TBP Balochi

بلوچستان ءِ بنجاھی شھر شال بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل برجاہ، زھرشانی بنجل ءَ مروچی چار ھزار ءُ شش سد روچ سرجم بوتگ – مروچی زھرشانی بنجل ءَ ھر تک ءُ پھناتاں سیادی داروکیں مردماں بنجل ءِ تر ءُ تاب کتگ ءُ بیگواھیں کھول ءِ گوم ءَ دلپدردی درشانتگ ءُ لوٹ کتگ کہ زورانسری آوار جنگ بوتگیں مردم یل کنگ بہ بنت –

ھمے وھد ءَ گل ءِ کمک سرکماش ماما قدیر بلوچ ءَ وتی ھیال درشانتگ ءُ گوشتگ کہ ریاست ھمے لوٹیت کہ بلوچستان ءَ تاکت کارمرز بہ کنت ءَ مردمانی ھیال درشانءُ آھانی توار ءَ ایرموش کنگ لوٹیت –

آئی ءَ گوشتگ تاکت ءِ زور ءَ ھچ کس راج ءَ لگتمال کرت نہ کنے مروچی بلوچستان ءُ بیمناکیں دور ءِ تہ ءَ گوزگ انت –

آئی ءَ دیمتر ءَ گوشتگ ک اسلام آباد ءَ نودربراں وتی سنگت ءِ ھاتر ءَ پُرایمنیں زھرشانی ءِ کتگ ھما زھرشانی ءَ ریاست ءَ وتی زوراکی پیش داشتگ ءُ اے پدر کتگ کہ بلوچ ءَ تاکت ءِ ھلاس کنگے کوشست کنگ بوھگ انت – آئی ءَ گوشتگ کہ زورانسری آوار جنیانی بگیری نودربرانی توار ءِ ایرموش کنگ پہ ریاست ءَ شر نہ انت –

اسلام آباد ءَ بلوچ نودربرانی نیمگ ءَ زورانسری آوار جنگ ءُ بیگواہ بوتگیں نودربریں سنگت حفیظ بلوچ ءِ پہ وش ءُ سلامتی یل کنگ ءِ ھاتر ءَ مروچی دومی روچ ءَ زھرشانی بنجل برجاہ بوتگ –

اسلام آباد پریس کلب ءِ دیم ءَ بلوچ طلبا کونسل ءِ نیمگ ءَ چہ اے بنجل اڈ دئیگ بوتگ –

حفیظ بلوچ ءِ زورانسری آوار جنی ءِ بگیری ءَ زھرشانیانی درچ برجاہ انت وھدیکہ گوستگیں روچ ءَ نودربراں اسلام آباد ءِ تہ دگہ نودربر گل ءُ سول سوسائیٹی ءِ ھمراھی ءَ زھرشانی روانک ءِ ھم کش اِتگ بوتگ کہ اودا پولیس ءَ روانک کشوکیں نودربر لٹ شاپ کرتگ انت –

زانگ بہ بیت حفیظ بلوچ گوستگیں ماہ ءَ ھزدار ءَ ھما وھد ءَ آوار جنگ ءُ بیگواہ کنگ بوتگ کہ اکیڈمی ءِ تہ ءَ زھگاں وانینگ ءَ بوتگ ءُ حفیظ بلوچ اسلام آباد ءَ قائداعظم یونی ءِ اسلام آباد ءَ ایم فل نودربرے ھم –

زھرشانی کنوکانی رِد ءَ حفیظ بلوچ ریاستی پوج ءِ میجر ءَ آوار جتگ ءُ بیگواہ کتگ – زھرشانی کنوکیں نودربراں لوٹ کتگ زورانسری آوار جنی ءِ درچ ھلاس کنگ بہ بیت ءُ آھانی سنگتیں نودربر پہ وش سلامتی یل کنگ بہ بیت –

بلوچستان ءِ دمگ کیچ ءِ بنجاھی شھر تربت ءَ دیم پہ شال ءَ گلزار دوست ءِ پندی روانک مروچی چارومی روچ ءَ ھم جنزان بیتگ – کیچ ءِ دمگ ھیرونک ءِ نزیک ءَ زالبولاں آئی ءِ وش اھت کتگ –

زانگ بہ بیت تربت سول سوسائٹی ءِ کونینئر گلزار دوست ءَ بیست ءُ ھپت فروری ءَ تربت دیم پہ شال ءَ پند ءَ روانک بندات کتگ – آئی ءِ لوٹانی تہ ےَ بیگواھیں مردمانی یل کنگ، بلوچ ورنایانی زورانسری آوار جنی ءِ دارگ، نشہ ءِ ھلاسی ءُ زمینانی سر ءَ زورگری ءِ ایکوزیشن ایکٹ ھژدہ سد ءُ نود ءُ چار ءِ لڑ ءَ بلوچستان ءُ سندھ ءَ وفاقی ادارھانی نیمگ ءَ بلوچانی زمینانی سر ءَ زورگری ھوار اَنت-

اے وھد ءَ زالبولاں آئی ءِ واستا نیک دوائی کتگ ءُ گوشتگ کہ گلزار دوست ءِ اے زھرشانی روانک ءَ دراھیں بلوچاں ھوار بیگ لوٹ ایت ھرجاہ ءَ آئی ءِ وش اھت کنگ بہ بیت –

بلوچ نودربر گل آزاد ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ پاکستان ءِ بنجاھی شھر اسلام آباد ءَ نودبرانی پُرایمنیں زھرشانی سر ءَ پولیس ءِ لٹ شاپی ءُ گیر انسانی رویش ترندی ءَ گوں ایرجتگ گوشتگ کہ زورگیریں تاکتانی مدامی ھمے کار بوتگ ایردستیں راجاں تاکت ءِ زور ءَ ھاموش بکنت ءُ آھاں وتی ھک چہ زبھر بہ کنت – پرایمنیں نودربرانی سر ءَ لٹ شاپی ءَ چہ پدر بیت اِتنت زورگیر ھاتر ءَ ھر بلوچ ءِ آئی دژمن انت آ ھر کج ءَ بہ بیت ھر پڈا آئی سیادی بہ بیت آئی ءَ گوں اے چیز ءَ واست ءَ نیست بس آئی گوم ءَ دژمن ءَ وڈا پیش کیت –

جارکش ءَ دیمتر ءَ وتی درشان ءِ تہ ءَ گوشتگ کہ بلوچستان ءَ ریاستی زلم زوراکی، آوار جنی ، کُشت کوشاں چہ بیزار بوتگیں ھزارانی کچ ءَ بلوچ نودربر چداں چہ دراتکگ ءُ پاکستان ءِ بنجاھی شھر اسلام آباد پہ وانگ ءَ شُتگ انت بلے بلوچ بوھگ ءَ مدامی آھانی سر ءَ زوراکی کنگ کنگ بوتگ – ھمے زوتاں پنجاپ ءُ اسلام آباد بلوچ نودربرانی گوم ءَ ھما وڈ پیش آھگ بوتگ کہ اے گپ ءَ پدر بیت کہ ریاست بلوچاں گوں یک کالونی وڈا ڈیل کنگ لوٹیت ھمے مکسد ءِ ھاتر ءَ آ تشدد کنگ انت – اسلام آباد ءُ پنجاپ ءَ وانوکیں نودربر وتی گسانی آھگ ءَ تُرسگ انت پرچاکہ اودا چہ واتری ءَ اگاں آوار جنگ ءُ بیگواہ کنگ بنت یاکہ احتشام ءِ وڈا کُشگ بنت اےجاورھالاں پہ بلوچ ورناھاں اے گپ پدر بیت کہ ریاست ءِ گور ءَ مئے حیثیت جاہ چی انت – بلوچانی گوم ءَ نپرت کنگے اے گولائی بلوچستان ءَ تاں اسلام آباد تالان کتگ کہ ھچ وڈیں بلوچ ورناہ نودربر پھریز نہ انت –

جارکش ءَ وتی درشان ءِ گڈسر ءَ گوشتگ کہ بلوچ ورناھاں زانشت ءِ دربرگے جھد ءَ ھر زوراکی ءِ دیمپانی کنگ کپگ انت اے پہ ھماھاں درونت ءِ کہ بلوچستان ءِ راجی جیڑہ ءِ سر ءَ وتی چم ءِ جھل جتگ انت – اقوام متحدہ، میاں استمانی ادارہ ءُ دگراں لوٹیت کہ پاکستان ءِ تہ ءَ تشدد دیمپانی کنوکیں بلوچ ورناھانی ھاتر ءَ وتی توار ءَ چست بہ کن انت ءُ یک جوانیں پروگرام ءِ رِد ءَ آھانی زانشتی کیرئر ءِ بہ رکّین انت –

نبشتانک: بی ایس ایف ءِ جُنز

نبشتہ کار: معراج لعل

دی بلوچستان پوسٹ

چُشکہ بلوچستان ءِ تہ ءَ بازیں نودربری سیاسی ءُ راجی گلانی بُن اِشت ایر کنگ بوتگ اَنت کہ آیانی مُول ءُ مراد بلوچ نودربرانی ھڑ ءُ جنجالانی گیش ءُ گیوار کنگ بوتگ۔ آ پہ بلوچ نودربرانی واستا یک اُمیتے ءِ کندیلے ءِ داب ءَ دیم ءَ اَتکگ اَنت، تُری مزن شاہ دربرجاہ بہ بنت یا کہ آدگہ وانگی پڑ بہ بنت بلے چرے گلانی تہ ءَ چیزے ءَ وت ءَ برجم داشت کُت نہ کُتگ ءُ پُرشت ءُ پُروش ءِ آماچ بوتگ اَنت ءُ چیزے تنی وھدی وتی برجم ءُ مھکم دارگ ءِ ھاتر ءَ جُھد ءَ اَنت ۔

ھما گل کہ پُرشت ءُ پُروش ءِ آماچ بوتگ آئی ءِ ٹوھیں سَوب ھمے بوتگ کہ آئی ءِ تہ ءَ یکمُشتی ءُ تپاکی نہ بوتگ ءُ آیاں یکجائی ءَ کار کنگ ءِ جُھد ءُ کوشست نہ کُتگ، پمیشکا مرچی باندا آیانی نام باکی گلانی چیر ءَ چیر تر اِتگ اَنت یا کہ بھر ءُ بانگی ءِ دُروشُم ءَ مھلوک ءِ دیم ءَ زانگ بنت۔

ھمے پیم ءَ بلوچ اسٹوڈنس ایکشن کمیٹی کہ گوستگیں دہ سالاں چہ گیش کہ بلوچستان ءِ تہ ءَ یک نہ اُوشتوکیں دابے ءَ کار کنان ءُ جُنزان اِنت ۔ پہ ھمے ھاتر ءَ بلوچ نودرابرنی واھش ءِ پد ءَ کہ ماں گیش ءَ چہ گیش مھکم ءُ تپاک بہ باں ءُ گیشتر کار بہ کناں آیاں کمیٹی ءِ نام بدل کُت ءُ یک گلے ءِ نام دات بزاں بلوچ اسٹوڈنس فرنٹ (بی ایس ایف) ءِ نام دات، بی ایس ایف ءِ جُھد پہ بلوچ نودربرانی علم، زانشت، ءُ یکمُشتی اِنت کہ آ پہ بلوچ نودربرانی ھر پیمیں ھڑ ءُ جنجال ءِ دیمپانی ءَ کنت ءُ آیاں یکجائی ءُ تپاکی ءِ سکین ءَ دنت۔ اَنچوش کہ گوستگیں دہ سالاں چہ گیش بلوچ نودربرانی کاروان ءِ سَروکی ءَ کنان ءُ پیداک اِنت ءُ شالا ہمے داب ءَ جُنزان بات۔

گُڈی ءَ ھمے گُشگ لوٹاں کہ بی ایس ایف نوک گچین بوتگیں بُنجاھی سر کماش ڈاکٹر شکیل بلوچ ءَ مراد بادی گُشاں ءُ اُمید داراں کہ کاروان ءِ سروکی ءَ یک جوانیں رنگے ءَ برجم دار اِیت ءُ گوں کُل بلوچ نودربرانی ھواری ءَ جُنز ءَ دیم ءَ بارت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: اِزّت ءُ مھرک ءِ کسہ

نبشتہ کار: پراز نور

دی بلوچستان پوسٹ

پیروان ءَ یک وش رنگیں، آسکی گردن ءُ تنک لُنٹیں جنکے ھست اَت نام ئِے مھرک اَت آئی ءِ کُماریں چمّانی تہ ءَ یک کیپے مان اَت آئی ءِ یک ‏بچکندگے ءَ گْوش ئے کہ نیکراھیں مردم اوں ٹگلینت کُتگ اَت آئی ءِ سیاہ بزیں ملگور گْوش ئے وھدے شنگ اِت اَنت آئی ءَ بازیں مردمانی ھوش ءُ سار ‏بُرتگ اَت پیریں مردماں گپ کُتگ اَت کہ یک مزنیں شائر کہ نام ئِے اِزّت اَت ، مھرک ءِ شیدائی اَت ءُ مھرک ءِ ناگھانی بیرانی ءَ وتی دیم گوں پیروان ءَ کتگ ءُ بد دوائی ‏دات۔

‏” پیروان” تئی سرزمین ءَ مھرک ءِ وڑیں شررنگیں ءُ کبگی بالاد وتی تہ ءَ بُرتگ ، ھدا بہ کنت کہ تئی سرزمین ءِ سرسبز ءُ شادابی ءِ سر ءَ مَرگ ءِ ساھگ ‏بہ کنات”۔

اِے وھد ءَ اِزّت سک ابیتک ءُ بیچاڑ اَت ءُ وتی مھرک ءَ گیر آرگ ءَ اَت۔ آئی لنٹانی لپرزگ بند نہ بوتگ اَنت ءُ آئی ءِ ارسانی تْرمپاں دریا جوڑ کُتگ آئی ‏ءِ دل سک گیمرتگ اَت ءُ گماں گوں تلوس اتگ ءُ پیریں مردماں گوشتگ اَت کہ پیروان ءِ تہ ءَ یک ھترناکیں وھیلے کپت ءُ تیوگیں پیروان ءِ مردماں وتی لوگ یلداتگ ءُ دگے نیمگ ءِ لڈ ات اَنت ءُ بے ‏وس ءُ لاچار بوتگ اَنت۔ ھماں کُوچگ کہ اود ءَ مُدام سرسبز ءُ شادابی اَت اود ءَ گمانی جمبر ءَ بستگ اَت ءُ تیوگیں ھند ءُ دمگ ابیتک بوت اَنت ءُ تھاری ءَ ‏چاریں نیم ءَ مانپوش اِتگ، پیروان سرباز ( ایران بلوچستان ءِ ) یک گونڈیں کوچگے اَت کہ اود ءَ مدام آبرشت بوتگ اود ءَ مدام کؤر تچگ ءَ بوتگ اَنت ءُ مردم سلامتی وتی زند ءَ ‏گْوازینگ ءَ اِت اَنت ھر نیمگ ءَ کِشت ءُ کشاری اَت، دْرچک ءُ ڈگار اِت اَنت۔

سالُک نامیں مردے ءِ گِس ءَ یک شوکیں وش رنگیں جنِکّیں ‏چکّے ودی بوتگ مات ءُ پت ءَ آئی ءِ نام مھر بانو ایر کتگ اَت۔ مات ءُ پت ءَ آئی ءِ باز ھیال ءُ گور کتگ۔
پیرزالاں گوشتگ اَت کہ اِے مزن بی بازیں مردم ‏وتی زلپانی کید ءَ بند ایت ءُ بازیں مردماں وتی شررنگی ءِ شیدائی کنت بازیں مردم پہ اِے جنکّ ءَ تلوس اِیت چہ کسانی ءَ مھربانو ءَ را کوچگ ءِ مردماں مھرک ءِ نام ءَ توار پِر کُتگ اَت آئی ءِ لوگ ءِ مردماں آئی ءَ را کسانی ءَ گوں آئی ءِ ناکو زھگ ءَ نامینتگ مھرک کم کم ءَ جوان بوان بوت ءُ ‏نوں آئی ءِ رستگیں بالاد ءِ جواناھی کوچگ ءَ ڈنّ شھر ءَ نامدار بوان بوتگ ھر شھر ءَ وش رنگی ءِ گپ ءُ تران بوتگ اَت مھرک ءِ دیم چو گوش ئے کہ چاردھی ماہ ءَ بوتگ ءُ شنگیں سیاہ بزیں ملگور، اسپیت ءُ شیریں بدن باز ڈولدار اَت یک رندے ملا پازل ءُ اِزّت یکجاہ نندوک بنت ءُ شائِری ءِ دیوان ءِ تہ ءَ مھرک ءِ توسیپ کنگ بیت ملا پازُل مھرک ءِ بارو ءَ گپ ءُ تران ءَ بیت اِزّت ‏گوں دلگوشی ءَ گوشدار ایت ءُ درائین ایت کہ اِے مھرک کَے اِنت کہ مدام مردم ھمے مھرک ءِ نام ءَ گِر اَنت ءُ آئی ءِ توسیپ ءَ کن اَنت؟ ملا پازُل ءَ پسّہ دنت ءُ گوش ایت کہ مھرک یک شر رنگیں ءُ ماہ دروشم ءُ زیبائیں جنکّے تو یک رندے مھرک ءَ بہ گند ئے تئی ھوش ءُ سار رو اَنت۔ آئی ءِ سیاہ بزیں ملگور ترا ‏پتائی ایت ءُ اڑین ایت۔ تو ھچ وڑ وت ءَ چہ آئی ءِ ملگورانی شم ءَ وت ءَ گیشینت نہ کن ئے۔ اِزّت ءَ گوشت کہ نوں من واھگدار آں کہ بہ گندان ئِے ۔

اِزّت درکپ ایت دیم پہ پیروان ءِ نیمگ ءَ ھر جاہ ءَ روان بیت ءُ مردماں ڈیک وارت مھرک ءِ باور ءَ جست کنت مردم ھمے پسّہ دے اَنت کہ آ سک ‏زیبائیں جنکّے اِزّت پیروان ءَ سر بیت ءُ کؤر ءِ نزّیک ءَ گند ایت لھتیں جنک لیب ءَ بنت آیانی ٹھکانی توار ازّت ءِ گوشاں کپ ایت ۔ اِزّت تیوگیں ‏جنک آنی تہ ءَ ھمے جنک ءَ چارگ ءَ بیت کہ ماہ دْروشم ءُ وش رنگے اَت اِزّت وتی دل ءَ جیڑ ایت ءُ پہ ستک اِے گپ ءَ جنت کہ سد در سد مھرک ھمیش ‏اِنت۔ ‏

اِزّت پیروان ءِ تہ ءَ وتی گام ءَ ایر کنت اود ءِ مردم ازّت ءِ مھمانی ءَ کن اَنت ءُ باز اِزّت ءُ شرپ دے اَنت ئِے۔ ازت نند ایت جیڑ ایت شئر پربند ایت ھر شئر ءِ تہ ءَ مھرک ءِ نام ءُ ستا ءُ توسیپ ءَ کنت مھرک ءِ پت سالُک مکن کنت ئِے کہ اِے وڑ ءَ منی جنکّ ءِ سر ءَ سوت ءُ گزل پِر مہ بند بلے بیا کہ نوں ‏ازّت دارگ نہ بیت ھرجاہ ءَ نند ایت شئر پہ مھرک ءَ پِربند ایت سالُک ءَ چار اِت کہ اِے شائر منی جنکّ ءَ یل نہ دنت۔ من وتی جنکّ وَ ‏نامینتگ من چے پیم ازّت ءَ بہ ریپین آں کہ منی جان بہ چُٹّ ایت۔ گڑ ءَ سالک ازّت ءَ را گْوش ایت کہ تو من ءَ بازیں تلاہ ءُ سور، ماڑی بیار بہ دئے ‏من مھرک ءَ ترا دے آں۔ ازّت پسّہ دنت کہ من نوں واتر ھما بے ءَ گوں واتر کن آں کہ من تئی گْور ءَ کتگیں پیمان ءَ سرجم بہ کن آں۔

یک روچے یک کاروانے گوں وتی سردار ءَ دیم پہ پیروان ءِ نیم ءَ آیگ ءَ بیت۔ مھرک گوں وتی ھمسریں دزگْوھاراں سیل ءُ سواد ءَ بیت ءُ دیم پہ کؤر ءَ ‏کیت مھرک وتی دزگوھاراں گوش ایت منی دل جانشودگ لوٹ ایت من رو آن ءُ جان شود آں اگاں کسے آیگ ءَ بیت من ءَ توار پر بہ کن اِت۔ ‏

مھرک جانشودگ ءَ بیت کاروان ھمے نیم ءَ آیگ ءَ بیت مھرک ءِ دزگوھار مھرک ءَ توار پِر کن اَنت کہ زُوت بیا گُداں بدل کن کہ کاروانے پیداک اِنت۔ ‏بلے مھرک وتی ھیالاں گوں لیب ءُ گْوازی کنگ ءَ بیت ءُ کندگ ءُ بچکندگ ءَ گوں کور ءِ آپ ءَ لیب ءَ بیت ۔ وھدیکہ کاروان نزّیک ءَ رسگ ءَ بنت مھرک ءِ دزگْوھار شِنگ ءُ دام بنت مھرک گِند ایت کہ کاروان پیداک اِنت، یک گوشے جنت ءُ آپ ءِ چیر ءَ روت۔ سیاہ بزیں ملگور بُرز ءَ تْرپّل بنت۔ ‏کاروان ءِ مردم گِند اَنت کہ یک جاتوے ءِ سْیاھیں ملگور زاھر اِت اَنت ۔ چہ بازیں ترس ءُ بیم ءَ کاروان ءَ وتی گام تیز کُتگ ءُ چہ اود ءَ رپت ءُ شُت اَنت۔ پیروان ‏ءِ تہ ءَ وھدیکہ کاروان اتک ءُ سر بوتگ، پیروان ءِ مردماں آیانی مہمانی کُت ۔کاروان ءِ مردماں پیروان ءِ نندوکیں مردم گوشت اَنت کہ کؤر ءَ ما جاتوے دیستگ کہ سیاھیں ‏ملگور آپ ءِ برز ءَ ملّگ ءَ بوتگ اَنت۔ مردماں کند اِت ءُ گوشت آ جاتوے نہ بوتگ بلکیں مھرک بوتگ بلوچی دود ءُ ربیدگ ءِ ھساب ءَ یک روچے مھرک ءِ ‏پت سالک ءَ کاروان ءِ مہمانی کُت۔ کاروان ءِ مردماں مھرک اود ءَ دیستگ ءُ ھبکّ ءَ بوت اَنت ءُ گْوشت ھمے ماہ دروشم ءُ سیاہ بزیں ملگور مھرک اِنت۔ ‏لھتے روچ ءَ پد مھرک نادراہ بوت ءُ ھچ وڑ ءَ دْراہ نہ بوت۔ روچ پہ روچ ھالت ھراب بوان بوت پیریں مردم گْوش اَنت کہ مھرک ءَ را کاروان ءِ ‏سردار ءَ چم کُتگ اَت ۔ ملکموت مھرک ءِ ساہ ءَ کش ایت ءُ بارت ۔ دومی نیمگ ءَ اِزّت وتی مال ءُ مڈیاں پیروان ءَ آیگ ءَ بیت ءُ راہ ءَ گِند ایت کہ ‏سالُک جنازھے ءِ ھمراھی ءَ پیداک اِنت چم ارسیگ اَنت ئِے ءُ پریات ھم کنگ ءَ اِنت ۔ اِزّت سھیگ بیت کہ اِے مھرک ءِ جنازہ اِنت گڑ ءَ اِزّت چو ‏گنوکانی داب ءَ گریوگ ءَ بِنا کنت۔ کبر ءِ تہ ءَ کَل کنگ ءَ پد ھپتگے ءَ بُرز اِزّت مھرک ءِ کبر ءِ سرون ءَ نند ایت۔ مردم کا ینت ءُ دلبڈی دے اَنت ءُ رو اَنت۔ ھپتگے ءَ پد ‏اِزّت اوں پیروان ءَ بدّوائی دنت در کیت ۔

ھر جاہ ءَ روان بیت گزل پر بندان بیت۔ ‏ھمے گوش ایت کہ من کراسان ءَ سپر کتگ ءُ ھندوستان ءَ ھم شتگ آں، یھودیانی گور ءَ ھم شتگ آں، کابل ءُ گزنی، کندواہ بہ گر داں مری ءَ من وتی گُل اندام ءِ وڑیں نہ دیستگ۔ دریگتیں من ءَ منی مھرک بہ رس ات ایں۔

کسہ ھلاس

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ پنجگور ءِ ھنکین کیلکور ءَ سلاہ بندیں مردم ءُ پاکستانی لشکریانی نیام ءَ جنگ ءِ ھال اِنت۔

جنگ ءِ تہءَ دوھیں نیمگ ءَ چہ جانی تاوانانی ھم ھال پیداک اِنت، بلے داں انگت اے درگت ءَ سرجمیں اھوال نیست۔

زانگ بہ بیت کہ ھمے دمگانی تہءَ بلوچ آجوئی لوٹوکیں سلاہ بندیں گل ھم مھکم اَنت ءُ لشکریانی گوما پیشءَ ھم آیانی میڑ بیتگ اَنت۔

بلے مروچی بیتگیں جنگ ءِ درگت ءَ واکدار ءُ آجوئی لوٹوکیں گلانی لیکہ داں انگت دیما نئیتکگ۔

بلوچ اسٹوڈنس ایکشن کمیٹی ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ گوشتگ کہ اسلام آباد پولیس ءِ بلوچ نودربرانی پرایمنیں زھرشانی سر ءَ لٹ شاپی ایر جتگ ءُ گوشتگ کہ سرجمیں پنجاپ ءَ وانوکیں بلوچ نودربرانی ملک ءِ بنجاہ ءَ سربازار لٹ شاپ کنگ زوراکی ءِ گڈسر انت – جمہوری ءَ پُرایمنی وتی زھرشانی ریکارڈ کنگ ھر شھری ءِ بنکی ھک انت ءُ بلوچ نودربراں ھمے ھک ءَ چہ زبھر کنگے ھاتر ءَ آھانی سر ءَ لٹ شاپی بیت اِنت –

بنجاھی جارکش ءَ گوشتگ کہ پنجاپ سرجمیں وانگجاھاں وانوکیں بلوچ نودربر یک پندل ءِ رِد ءَ ماژگی ءُ جانی تشدد کنگ بوھگ انت – زانت ءُ زانشت ءِ رِد ءَ بلوچستان ملک ءِ پشت کپتگیں سوبہ ئے – ادے نودربر وتی لوگ ءُ جاھاں یل دئینت ءُ پنجاپ ءِ وانگجاھاں داکلہ زور انت تانکہ ارزانی ءَ وتی وانگ ءَ دیما برت بہ کن انت – بلے بدکسمتی ءَ بلوچ نودربر نوں پنجاپ ءِ وانگجاھاں ھم پھریز نہ انت – یک پندل ءِ گوم ءَ ھمے نودربرانی پروفائلنگ کنگ بیت انت ءُ وڈ وڈیں ھنر ءُ ہیلھاں نودربر ماژگی تشدد کنگ بنت کہ چریشی ءَ سرجمیں پنجاپ ءِ تہ ءَ وانوکیں بلوچ نودربرانی تہ ءَ ترس ءِ ودی بوتگ – اشی ءَ ابید بلوچ نودربرانء زورانسری آوار جنی ءِ درچ ءِ بندات کنگ بوتگ وھدیکہ ھمے نودربر چٹیانی گوازینگ ءَ پنجاپ ءَ چہ درکائینت دیم پہ بلوچستان ءَ کائینت گڈا زورانسری آوار جنگ ءُ بیگواہ کنگ بنت –

بنجاھی جارکش ءَ وتی درشان ءِ تہ ءَ گوشتگ کہ ھشت فروری ءَ ھزدار ءَ سیادی داروکیں بلوچ نودربر چہ وتی میتگ ءَ آوار جنگ ءُ بیگواہ کنگ بوتگ – حفیظ بلوچ قائداعظم یونیورسٹی ءِ ایم فل نودربرے اشی ءَ ابید دلیپ بلوچ ھم گوستگیں روچاں رکھنی ءَ پوجی پانگس ءَ آوار جنگ بوتگ کہ وتی چٹیانی گوازینگ ءَ وتی گِس ءَ رؤگ ءَ بوتگ – دلیپ بلوچ اسلامیہ یونیورسٹی بھاولپور ءَ ایم اے انگلش لٹریچر نودربرے – اشی ءَ ابید سرجمیں پنجاپ ءَ بلوچ نودربرانی پروفائلنگ درچ برجاہ انت کہ گجرات یونی ءِ وئیل مئے دیم انت – زورانسری آوار جنگ بوتگیں نودربرانی یل کنگے ھاتر ءَ بلوچ نودربراں سلام آباد پریس کلب ءِ دیم ءَ وتی زھرشانی بنجل ءِ اڈ داتگ کہ پولیس آھانی سر ءَ لٹ شاپ کُتگ چریشی ءَ بازیں نودربرے ٹپی بوتگ انت –

جارکش ءَ وتی درشان ءِ گڈسر ءَ گوشتگ کہ ما ھستیں وھدے سرکار ءَ چہ لوٹ کنیں کہ وفاقی ءُ سوبائی سرکار بلوچ نودربرانی زورانسری آوار جنی ءُ پروفائلنگ ءِ سر ءَ گامگیج بہ زوریت ءُ سرجمیں پنجاپ ءِ تہ ءَ وانوکیں بلوچ نودربرانی پھریز ءَ بہ کنت – اگاں بلوچ نودربر چدوگیشتر پھریز کنگ نہ بوتاں گڈا سرجمیں نودربر گلانی ھمراھی ءَ بلوچستان ءُ پنجاپ ءَ پرایمنیں زھرشانی کنیں –

بلوچ اسٹوڈنس کونسل ءِ رھشوناں سَے شمبے ءَ اسلام آباد پریس کلب ءَ پنجاپ ءَ وانوکیں نودربراں پوج ءُ دگہ ادارھانی نیمگ ءَ تُرسینگ ءُ آھانی رویش درگت ءَ اھوال کاراں گوں تران کنان ءَ گوشتگ کہ بلوچستان اے ملک ءِ پشت کپتگیں سوبہ ئے کہ مھلوک بازیں مالی ءُ دگہ جیڑہ جنجالانی آماچ انت ءُ اشی ءَ ھوار ھوار اودا وانگجاھے کمی انت ءُ شاھدربرجاھاں شریں وانگ نہ بوھگے برابرانت – وانگجاھاں نودربرانی آوار جنی ءُ سال دوھزار نوزدہ ءَ بلوچستان شاھدربرجاہ دیم ءَ اتکگیں ہراسمنٹ ءِ سوب ءَ نودربر ھمے پھم انت کہ اودا آ پھریز نہ انت چریشی ءَ ھر سال سدانی کچ ءَ نودربر زانت ءِ دربرگے ھاتر ءَ پنجاپ ءُ اسلام آباد ءِ وانگجاھانی نیمگ ءَ کائینت –

آھاں گوشتگ کہ اے وھدی ھزارانی کچ بلوچ نودربر پنجاپ ءِ وانگجاھاں وانگ ءَ انت بلے بدکسمتی ءَ ھمے جاور ھالانی سوب ءَ آ پنجاپ ءُ اسلام آباد شُتگ انت اودا ھم ھمے جاورانی دیمپان انت – گوستگیں ماہ ءَ لاھور ءِ وانگجاھاں چار نودربر شپ ءِ نسپ ءَ بید ارزی ءَ وتی ھاسٹلانی تہ ءَ آوار جتگ ءُ ترسینتگ انت کہ لھتے روچاں چیریں جاھاں بندیگ کنگ ءَ پد یل کتگ انت – ھمے ماہ ءَ گجرات شاھدربر جاہ ءَ وانوکیں پشتون ءُ بلوچ نودربر شاھدربرجاہ ءِ واکدارانی نیمگ ءَ لوٹارینگ بوتگ انت کہ شمار ءَ ہائر ایجوکیشن کمیشن ءَ گوں ملارینیں اے نودربرانی موبائیل پچ گپتگ ءُ آھانی میسج ءُ سوشل میڈیا چیک ءُ تان کتگ انت ءُ نودربراں دگہ وڈیں جست پُرس کنگ بوتگ ءُ ترسینتگ انت کہ ایرجنگی انت –

آھاں گوشتگ کہ ہراسمنٹ ءِ نوکتریں وئیل ھمے زوتاں قادداعظم شاھدربرجاہ اسلام آباد ءِ فزکس ءِ نودربر حفیظ بلوچ ءِ گوم ءَ بوتگ حفیظ بلوچ ایم فل ءِ اسکالرے کہ آ چہ ھزدار ءِ کوچگی دمگ باغبانہ سیادی داریت – کہ گوستگیں چیزیں ماھاں میجر مرتضی نامی مردم ءَ پون کتگ ءُ بیھار داتگ ءُ گوشتگ گوں من دچار کپ – حفیظ بلوچ لھتے زاتی جیڑھانی سوب ءَ میجر مرتضی ءَ گوں دچار نہ کپتگ – گڈا حفیظ بلوچ کہ وتی چٹیاں وتی گس ءَ شتگ بوتگ ھمود ءَ ھشت پروری سال دوھزار بیست ءُ دو ءَ پاکستانی پوج ءَ اکیڈمی دی اسٹوڈنس ان اکیڈمی ءَ زورانسری آوار جتگ ءُ بیگواہ کتگ – زانگ بہ بیت میجر مرتضی حفیظ بلوچ ءِ ترسینگ ءِ ھاتر ءَ قائداعظم یونیورسٹی ءَ ھم اتکگ – آئی ءَ یک ریسرچ ءِ یونیورسٹی ءَ وانوکیں بلوچ نودربرانی پروفائلنگ ھم کتگ کہ اشی گواہ مئے گور ءَ ھست انت –

آھانی گوشگ ات کہ حفیظ بلوچ ءِ زورانسری آوار جنی ءِ بگیری ءَ سینزدہ پروری ءَ اسلام آباد پریس کلب ءِ دیم ءَ زھرشانی ھم کنگ بوتگ ءُ قائداعظم یونیورسٹی ءِ تہ ءَ سَے پیس واک ھم کنگ بوتگ سَے روچی زھرشانی بنجل ءِ ھم جنگ بوتگ – اشانی کنگ ءَ ابید ھم ناکہ حفیظ یل کنگ بوتگ ءُ ناکہ یونیورسٹی ءِ واکدار ءُ اے ادارھانی نیمگ ءَ چہ مارا رسپانس رستگ – جھندم حفیظ بلوچ ءِ یل کنگ ءَ بیست ءُ شش فروری ءَ اسلامیہ یونیورسٹی بہاولپور ءِ یک دگہ نودربرے دلیپ بارکھان ءَ چہ اوار جنگ ءُ بیگواہ کنگ بوتگ کہ ایم اے انگلش ءِ نودربرے بوتگ –

آھاں گوشتگ کہ اے پریس کانفرس چہ ما ھستیں وھدے سرکار ءَ ھوار قائداعظم یونیورسٹی ءِ واکدار، ہائر ایجوکیشن کمیشن ءُ دگہ ادارھاں لوٹ کنیں کہ حفیظ بلوچ ءُ دلیپ بلوچ ءِ یل کنگ ءَ وتی کرد ءَ پیلو بہ کن انت اشی ءِ ھمراھی ءَ پنجاپ ءُ اسلام آباد ءَ نودربرانی ہراسمنٹ وئیلانی درگت ءَ ھم گامگیج بہ زور انت – ھر ھمے وڈیں وئیلانی گر ءُ دار بہ بیت کہ بلوچ نودربر اسلام آباد ءُ پنجاپ ءِ وانگجاھاں وت ءَ گیر مھپوز محسوس کن انت –