TBP Balochi

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدریں وتی شنگ کرتگیں درشان ءِ تہ ءَ کیلکور ءَ پوج ءِ گوم ءَ جنگ ءَ نمیران بوتگیں گل ءِ سنگت شھید ثناء اللہ پنام اُستاد میر جان شھید چاکر پنام پُھلین دروت ندر کُتگ گوشتگ ءُ گْوشتگ کہ ھمے سال دوھزار بیست ءُ دو ءِ یک مارچ ءَ بالگتر ءِ دمگ کیلکور ءَ زورگریں پاکستانی پوج ءُ دمگی ڈیت اسکواڈ ءِ کارمنداں پیش ءَ سنگر گِپتگ ءُ سرمچارانی سر ءَ ھما وھد ءَ اُرش کتگ روچ ایر رؤگ ءِ وھد ءَ اناگتی اُرش کتگ کہ سرمچار سپر ءَ بیتگ اَنت – چریشی ءَ بی ایل ایف ءِ کلانیں سنگت استاد ثناء اللہ پنام استاد میر جان ءُ سرمچار چاکر ء شھید غلام قادر شھید بیتگ اَنت-

جارکش ءَ دیمتر ءَ گوشتگ کہ استاد میر جان چہ بلوچستان زانشجاہ ءَ ماسٹر ءِ ڈگری گِرگ ءَ پد چو ایندگہ ورنایانی پیم ءَ روزگار ءِ دُمب ءَ نہ کپتگ کہ آسراتی ئیں زندے بہ گْوازین ایت بلکیں آ سال دوھزار ھشت ءَ گوں بی ایل ایف ءَ ھمگرنچ بوتگ ءُ آئی ءَ وت ءُ وتی دُرسیں کِرد ءُ زانت پہ بلوچ راجی آجوئی ءُ آؤکیں باندات ءَ ندر کُرتگ اَنت – آ یک سرجمیں سرمچارے بیتگ کہ آئی گوں وتی جپاکشی، آجوئی ءِ جوزگ ءُ مھکمی ءِ سوب ءَ زوت گوریلہ جنگ ءِ رِپک ءُ راھبند دربُرتگ اَنت ءُ گل ءَ آئی ءَ نوک اتکگیں سرمچارانی ھیلکاری ءُ تْرامکاری ءِ زمہ واری داتگ اَنت پمشکا آ اُستاد گوشگ بوتگ- شھید میر جان ناکہ تھنا ھیلکاری استادے بوتگ بلکنہ ءَ اشی ءَ ابید آئی ءَ اوتاگ ءِ کمک کماندار ءُ اوتاگ کماندارے ءِ کِرد ھم پیلو کُرتگ انت- آ گل ءِ راہ راھبندانی پاسداری کنوک ءُ بے بھائیں کِردے ءِ واھُند بوتگ ءُ شھید ثناء پنام استاد میر جان گل ءِ تہ ءَ میجری ءِ اُگدہ ءِ سر ءَ بوتگ-

جارکش ءَ گوشتگ کہ چاکر جان ء غلام قادر سال دوھزار شانزدہ ءَ گوں بی ایل ایف ءَ ھمگرنچ بوتگ ءُ بلوچستان ءِ آجوئی ءِ جُھد ءَ وتی کِرد ءَ پیلو کنگ ءَ بوتگ – آ تمرد، مُھکم ءُ جپاکشیں سرمچارے بوتگ- شھید چاکر ءِ واجھیں کماش واجہ غلام قادر زوگیریں پاکستانی پوج ءَ سولیر ءَ لشکرکشی یے ءِ میان ءَ گس ءِ نزیک ءَ تیرجتگ ءُ بےدردی ءَ شھید کُرتگ ات –

بی ایل ایف ءِ جارکش میجر گوھرام بلوچ ءَ گڈسر ءَ وتی درشان ءِ تہ ءَ گوشتگ کہ شھیدانی لوٹ ءُ واھگانی پد ءَ بلوچستان ءِ آجوئی ءَ تاں مئے جُھد برجاہ بیت انت –

پاکستان ءِ بنجاھی شھر اسلام آباد ءَ بلوچ نودربرانی سر ءَ لٹ شاپی، نودربرانی پروفائلنگ ءُ زورانسری آوار جنیانی بگیری ءَ مروچی پنچ شمبے ءِ روچ ءَ بلوچستان شاھدربرجاہ ءَ بلوچ نودربرانی نیمگ ءَ پر ایمنیں روانک کشگ بوتگ کہ آئی ءِ تہ ءَ بازیں جنک ءُ بچکیں نودربراں بھر زرتگ –

پرایمنیں روانک بلوچ اسٹوڈنس ایکشن کمیٹی ءِ نیمگ ءَ بلوچستان شاھدربرجاہ ءِ آرٹس فیکلٹی ءَ بندات بوتگ ءُ تاں مزنیں گیٹ ءُ پدا بُک پوائنٹ ءُ اودا چہ واتر بوتگ ءُ آرٹس کونسل ءَ اتکگ انت –

زھرشانی کنوکیں نودربراں زورانسری آوار جنگ بوتگیں نودربرانی اکس ءُ پلے کارڈ دستءَ بوتگ انت کہ آھانی سر ءَ ھمے نبشتہ بوتگ کہ بیگواھیں نودربر حفیظ بلوچ ءَ ھوار دگہ نودربر یل کنگ بہ بنت –

زھرشانی کنوکانی رِد ءَ گوستگیں روچاں اسلام آباد ءَ بلوچ نودربرانی سر ءَ پولیس ءَ لٹ شاپی کتگ ءُ آھانی زھرشانی بنجل جوڑ کنگ ءَ نیشتگ وھدیکہ بلوچ نودربر حفیظ بلوچ ءِ زورانسری آوار جنی ءِ بگیری ءَ وتی زھرشانی ءَ نبشتہ کنگ ءَ بوتگ انت گڈا پولیس ءَ دارگے کوشست کتگ انت –

دومی نیمگ ءَ اسلام آباد ءِ پریس کلب ءِ دیم ءَ بلوچ نودربرانی زھرشانی بنجل برجاہ انت ءُ نودربراں سَے روچ انت کہ بنجل جتگ ءُ زھرشانی ءَ انت –

گلزار دوست ءَ تربت تاں شال ءَ پیادگ روانک ءَ یکسد ءُ بیست کلیومیٹر شُتگ ءُ ھوشاپ ءَ سر بوتگ – کہ اودا ھیرونک ءُ تجابان ءِ نندوکیں سدانی کچ ءَ چُک ءُ زالبولاں ھوار ورنا ءُ کماش ءَ آ وش آتک کتگ –

گلزار دوست ءِ گوشگ انت پادانی سُچگ ءُ آبلہ بوھگ ءَ ابید آ جھد کنت کہ شپ ءَ بالگتر ءَ سر بہ بیت –

زانگ بہ بیت گلزار دوست ءَ بیست ءُ ھپت فروری ءَ بیگواھیں مردمانی یل کنائینگ، بلوچ ورناھانی زورانسری آوار جنی ءِ بگیری ءُ پوج ءِ رویش ءُ دمگانی تہ ءَ پانگس ءُ چیک پوسٹانی بگیری ءَ اے پیادگ روانک کش اِتگ –

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل برجاہ، زھرشانی بنجل ءَ مروچی چار ھزار ءُ شش سد ءُ یک روچ سرجم بوتگ- مروچی اتحاد نوجوانان ءِ سرکماش سمیع اللہ مندوخیل وتی کابینہ ءِ ھمراھی ءَ بنجل ءَ اتکگ ءُ بیگواھیں مردمانی گوم ءَ دلپدری درشانتگ –

بنجل ءَ اتکگیں مردمانی گوم ءَ تران کنان ءَ وائس فار بلوچ مسنگ پرسنز ءِ کمک سرکماش ماما قدیر بلوچ ءِ گوشگ ات کہ پنجگور ءَ ھوار بلوچستان ءِ دگہ ھند ءُ دمگاں پاکستانی پوج ءِ لشکر کشی یکشل ءَ برجاہ انت تنی وھدی پاکستانی پوج ءَ بازیں بلوچ ءِ اے دمگاں چہ زورانسری آوار جتگ ءُ بیگواہ کتگ انت – لشکر کشی ءَ پیش پاکستانی پوج ءَ اے دمگانی درسیں پترگ ءُ درآھگے راہ ءُ در بند کرتگ انت –

ماما قدیر بلوچ ءِ گوشگ ات کہ مئے گل ءَ بازیں سال ءِ بیت اتنت کہ پُرایمنیں جھد کنگ انت مئے گور ءَ ریاست ءِ زوراکیانی درسیں کسہ نبشتھی دروشم ءَ ایر انت کہ دنیائے دیم ءَ زاھر ءِ کن ایں تانکہ اقوام متحدہ ءُ میاں استمانی ادارہ بلوچستان ءَ بوکیں ریاستی زوراکیانی اندازہ بہ جن انت وھدیکہ وی بی ایم پی ءِ بازیں وھداں بؤکیں پرایمنیں جھد ءِ درگت ءَ میاں استمانی ادارھانی ھچ نگوشگ سوالیہ نشان ئے –

ماما قدیر بلوچ ءِ گوشگ ات کہ بلوچ سرڈگار ءِ پرزند نزریاتی بنیات ءَ اصولی جھد کنگ ءَ انت آ اینکس نزور نہ انت ریاست ءِ زوراکی یا آئی ءِ پروپکنڈھاں پد بہ کنز انت –

تربت ءِ دمگ ھوشاپ ءِ بیگواھیں مردمانی یل نہ کنگ ءُ آھاں زاھر نہ کنگے بگیری ءَ آھانی کھولاں زھرشانی کتگ ءُ دگ ءِ سر ءَ نندانک جتگ ءُ نشتگ انت چریشی ءَ سی پیک دگ ءَ رؤگ آیگ بند بوتگ –

ھوشاپ ءِ زھرشانی کنوکاں ماہ ءَ پیش پوج ءِ دست ءَ زورانسری آوار جنگ بوتگیں ناصر ء دوستین، مراد بخش ء عبدالرحمن، پسن چار شمبے ءِ وش ءُ سلامتی یل کنگے لوٹ کتگ – زھرشانی کنوکانی رِد ءَ آھانی دوستیگیں مردماں ماہ ءِ پرگوستگ بلے انگت زاھر کنگ نہ بوتگ انت ناکہ مار ءَ اے گوشگ بوتگ کہ آھاں چی کُتگ –

ھوشاپ ءَ سی پیک دگ ءِ سر ءِ نندانک ءِ سوب ءَ ھردو نیمگ ءَ گاڑیانی لین لگتگ وھدیکہ ھوشاپ ءِ مردماں چدوپیسر ھم وتی دوستیگیں مردمانی یل کنائینگے ھاتر ءَ سی پیک دگ ءِ سر ءَ زھرشانی کتگ ءُ نندانک جتگ –

زھرشانی کنوکاں لوٹ کتگ کہ سیاسی پاٹی ءُ سوبائی سرکار آھانی دوستیگیں مردمانی یل کنگ ءُ آھانی زاھر کنگ ءَ وتی کرد ءَ پیلو بہ کن انت-

ایمنسٹی انٹرنیشنل ءَ وتی شنگ کرتگیں یک نوکتریں رپورٹے ءِ رد ءَ زورانسری آوار جنی ءِ آماچیں بلوچ باپاری مردم عبدالحفیظ زھری ءِ زندگی پاکستان ءَ بیمناکی ءِ درشان کتگ-

ادارہ برائے انسانی حقوق ایمنسٹی انٹرنیشنل ءِ نیمگ ءَ شنگ بیتگیں رپورٹ ءِ رد ءَ عبدالحفیظ زھری متحدہ عرب امارات ءَ سروس کمپنی ءِ ھلائینوکے بیتگ کہ اود ءَ واکداراں گیر کانونی آوار جتگ ءُ زنداناں کرتگ-

رپورٹ ءَ گوشگ بیتگ عبدالحفیظ زھری متحدہ عرب اماراتی واکداراں گیر کانونی دزگیر کنگ ءَ پد بے پاسپورٹ ءَ پاکستان ءِ دست ءَ داتگ ھمے دمگی پولیس ءَ آئی ءِ کھول ءَ آئی ءِ بارو ءَ سرپدی دیگ ءَ ابید آئی ءِ پاسپورٹ ءَ لوٹگ ءَ اَنت اماراتی واکداراں حفیظ بلوچ ءِ سر ءَ ھستیں بھتام آئی ءِ کھول ءِ دیم ءَ پدر نہ کرتگ اَنت نانکہ آیان ءَ کانونی ھک دیگ بیتگ –

رپورٹ ءِ رد ءَ عبدالحفیظ زھری ءِ کھول اشی ءَ پیسر پاکستان ءَ ترندیں ریاستی اُرشانی زد ءَ بیتگ اَنت ءُ حفیظ بلوچ ءِ زند ءَ پاکستان ءَ سک ترسناکی اِنت ایمنسٹی انٹرنیشنل ءَ پاکستانی واکداراں چہ حفیظ زھری ءِ دیم ءَ آرگ ءُ کھول ءَ را رھوت کنگ ءُ ٹرائل کنگ ءِ ھک ءِ دزبندی کرتگ-

زانگ بہ بیت ھزدار ءِ جھمنند عبدالحفیظ زھری ھمے سال ءِ بیست ءُ شش ءُ بیست ءُ ھپت جنوری ءِ میانی شپ ءَ متحدہ عرب امارات ءَ زورانسری آوار جنی ءَ پد بیگواہ کنگ بیتگ ھمے وڑ سال دوھزار ءُ دہ ءَ عبدالحفیظ زھری ءِ کستریں برات مجید زھری ھزدار ءَ زورانسری آوار جنی ءَ پد آئی ءِ لاش دزکپتگ ءُ ھمے وڑ ءُ سال دوھزار ءُ یازدہ ءَ باپاری مردم حاجی رمضان زھری سلاہ بندیں مردماں تیرانی نشانگ کتگ ءُ کشتگ بیتگیں وئیل ءَ دزمانجنی ءِ بھتال پاکستانی چیریں اداراہ ءُ سلاہ بندیں گل کہ ڈیتھ اسکواڈ ءِ نام ءَ زانگ بیت اِنت آئی ءِ سر ءَ لڈگ بیتگ –

عبدالحفیظ ءِ کھول ءِ رد ءَ آئی ءُ اے وئیلاں وتی جان ءِ بچینگ ءَ دبئی ءَ شتگ ءُ اشی ءَ پیسر سال دوھزار ءُ ھژدہ ءَ عبدالحفیظ ءِ تروزتک راشد ھسین ھم متحدہ عرب امارات ءَ چیریں ادارھاں دزگیر کنگ ءَ پد بیگواہ کرتگ ءُ شش ماہ ءَ پد آ پاکستان ءِ دست ءَ دیگ بیتگ داں انگت ءَ بیگواہ اِنت، عبدالفیظ راشد ھسین ءِ بیگواھی ءِ چم دیتگیں مردمانی تہ ءَ یکے بیتگ-

نبشتانک: مارا پہ گُلزمین ءَ جیڑگی اِنت

نبشتہ کار: کادر ھسرت

دی بلوچستان پوسٹ

منی تھاریں کوٹی ءِ تہ ءٙ چندیں بلوچی کتاب اٙنت ماں الماری ءٙ اَنت ءُ یکے بس من آں! منی ساھگ اِنت ءُ تھنائی انت! دگہ کس نیست پہ نند ءُ نیادے ءٙ ءُ پہ گپ ءُ تْرانے ءَ برے برے دل من ءٙ سکین دنت کہ تو ڈن ءٙ مہ رو ، ڈن ءِ ندارگاں سیل مہ کن، تھنا ھمے کوٹی ءِ تہ ءٙ بہ نند ءُ واجہ منیر مومن ءِ لچّھاں بہ وان ءُ دل ءٙ چہ گماں آزات بہ کن ءُ پد ءَ واجہ منزور بسمل ءِ دستونکاں بہ امباز دپ ءِ پُر ءٙ بہ گر ئے ءُ شائری بہ کن، بازیں تھاریں کوٹی ءِ تہ ءِ نندگ ءُ جیڑگ ءٙ اٙنچوش کتگ کہ من چہ مھروانیں شررنگ ءٙ چٹ پراموش آں، آئی ءِ ترانگ ءٙ نہ آں ءُ نیکہ یک ساھتے هم من ھالے گر آں، دل یک ساھتے ھم آئی ءِ بابت ءٙ نہ جیڑ ایت دل نہ گْوش ایت کہ یات بہ کن ئے بس گوں وت ءٙ جیڑگ ءٙ آں کسی پگر ءُ ھیال ءٙ نہ آں برے برے سنگت ڈیک ور اٙنت ءُ گلگ کن اٙنت تو آ کادر نہ ئے تئی دیم ءِ رنگ لگشتگ وت ءٙ آدینک ءِ تہ ءٙ شر بہ چار تو کجام ھال ءٙ ئے ءُ رنج ءُ ازابانی دیمپان ئے۔
زاناں چی ءٙ وت ءٙ تھاریں کوٹی ءِ تہ ءٙ بند کتگ؟ من درستیں سنگتانی گپاں گوشدار آں بس کند آں راه ءَ تاب دے آں ءُ رھادگ باں۔

یک شپے من کلم چست کت کہ پہ شررنگ ءَ شئیرے نبشتہ کن آں همے دمان ءَ من ءَ یک ترانگے ءَ گْور جت من کلم ایر کت جیڑگ ءَ لگ اِت آں کہ من ءَ اے تهاریں کوٹی ءِ تہ ءَ بوگی نہ اِنت ءُ پد ءَ منی وسریں جیڑگ اَنت چوشیں جیڑگ ءَ وَ سیت ءُ نپ نیست پد ءٙ منی اندر ءِ انسان ءٙ هم ھمے گْوشت کہ تو چی ءٙ وت ءٙ اے تھاریں کوٹی ءِ تہ ءٙ بند کتگ ڈن ءٙ درا بہ چار وتی راج ءٙ کہ چنچو بزگ اِنت مُپتیں جیڑگ تئی ھچ درد ءٙ نہ ور اٙنت ترا اگاں جیڑگی اِنت گُڑا پہ وتی وتن ءُ پہ وتی راج ءٙ بہ جیڑ اے بے پائدگیں جیڑگاں ھچ پائدگ نیست۔

راج ءِ درداں بہ مار وتی گلامی ءِ زمزیلاں بہ سِند، ھک ءِ گپ ءٙ بہ جن، آس بہ دے دژمناں کہ تئی ماتیں وتن لگتمال کرتگ اِش تئی بْرات اِش ماں زندان ءٙ بند کرتگ اٙنت تئی مات ءُ گْوھار ماں چار راہ ءِ سر ءٙ پہ وتی تنگھیں برات ءُ کبلھیں پتانی واست ءٙ زھر شانی کنگ ءَ اٙنت بٙلے تو بس وتی گماں دُچار ئے اے زندگی یے وَ نہ اِنت جیڑ ئے گُڑا پہ راج ءٙ بہ جیڑ پہ وتی آیوکیں پدریچ ءِ بابت ءٙ بہ جِیڑ گُڑا من ترا یک راجدوستے لیک آں! چوشیں زند ءٙ پائدگ نیست بس پہ وت ءٙ جیڑ ئے پہ راج ءٙ مہ جیڑ ئے تو ھما وھد ءٙ راجدوستے بہ ئے کہ پہ وتی راج ءٙ جیڑ ئے ءُ راج ءِ گمانی شریدار بہ ئے من وتی وسریں جیڑگ یلہ کت اَنت چہ کوٹی ءَ ڈن ءَ درآتک آں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ خضدار ءَ پاکستانی لشکریاں یک مردمے دزگیر کنگ ءَ پد بیگواہ کُتگ۔

اھوالانی ردءَ پاکستانی لشکریاں گوستگیں روچ ءَ ادار دو ءَ خضدار کھٹان ءِ جھمنند ماسٹر نزیر احمد بنجاھی بازار ءَ صابری مسیت ءِ دیما دزگیر کنگ ءَ پد ناشناسیں جاھاں بُرتگ۔

یات بہ بیت ماسٹر نزیر احمد یک سالے پیسر ھم 13 مارچ 2021 ءَ بیگواہ کنگ بیتگ اَت وھدیکہ سَے ماہ ءَ پد آ یل کنگ بیتگ اَت۔ وھدیکہ ماسٹر نذیر احمد ءِ مستریں برات اھوالکار منیر احمد شاکر 14 اگست 2011 ءَ سلاہ بندیں مردماں تیرگواری کُتگ ءُ کُشتگ اَت، ھندی اھوالانی ردءَ اھوالکار منیر احمد گمانی اِنت کہ سرکاری مستری ءَ جنزوکیں ڈیتھ اسکواڈ ءَ تیر جتگ ءُ کُشتگ اَت۔

زانگ بہ بیت کہ چریشی ءَ ماہ ءِ پیسر قلات ءِ ھنکین منگچر ءَ چہ پاکستانی لشکراں اُستاد کفایت اللہ ھم دزگیر کُتگ اَت کہ داں انگت بیگواہ اِنت

کفایت اللہ ءِ لوگ بانک ءِ ردءَ 11 فروری ءِ شپ ءَ پھازگی گلانی کارمنداں منگچر ءَ لوگ ٹُک اِتگ ءُ منی لوگ واجہ کہ آ سرکاری اُستاد اِنت، آ منی چمانی بیگواہ کُتگ اِش۔ وھدیکہ چریشی ءَ پیش قائد اعظم یونیورسٹی اسلام آباد ءِ نودربر حفیظ بلوچ چہ خضدار ءَ ھما وھدءَ سلاہ بندیں مردماں بیگواہ کُتگ اَت کہ آ زھگاں وانینگ ءَ بیتگ۔

روس ءَ اے گپ من اِتگ کہ یوکرین ءِ جنگ ءَ مئے 498 پوجی کُشگ بیتگ اَنت-

فرانسیسی ھبر رساں ایجنسی اے ایف پی ءِ رد ءَ گوستگیں ھپتگ ءَ مھتر ولادیمیر پوتن ءِ نیمگ ءَ یوکرین ءَ بندات بیتگیں جنگ ءَ اولی رند ءَ روس ءَ وتی پوجیانی بیرانی ھال راست کتگ اَنت-

روسی وزارت دفاع ءِ جارکش کوناشینکوف ءَ چار شمبے ءِ روچ ءَ سرکاری ٹی وی ءَ یک درشانے ءَ گُشتگ یوکرین ءِ جنگ ءَ ڈیھ ءِ واستا جنگ کنان ءَ 498 پوجیاں وتی جان ببا داتگ اَنت ءُ 1597 پوجی زدگ بیتگ اَنت –

روسی وزارت دفاع ءِ نیمگ ءَ دیمتر ءَ گوشگ ’ جنگ ءَ یوکرین ءِ 2870 ءَ گیش پوجی ءُ راجدوست ‘ بیران کساس 3700 زدگ بیتگ اَنت ’

روس ءِ وزارت دفاع ءِ نیمگ ءَ شنگ بیتگیں درشانیانی کچ ءُ کساسانی راستی لس مھلوک ءِ نیمگ ءَ نہ بیتگ اَنت نانکہ یوکرین ءِ نیمگ ءَ اے درگت ءَ درشان شنگ کنگ بیتگ اَنت-

زانگ بہ بیت گوستگیں روچاں یوکرین ءُ روس ءِ جنگ ءِ برجاہ اِنت چریشی ءَ یوکرین ءَ نشتگیں مردماں یوکرین یلو کرتگ ءُ شتگ اَنت-

بلوچستان ءَ ھوار ءَ بازیں جاھاں نشتگیں بلوچاں دو مارچ ءَ بلوچ دود ءُ ربیدگی روچ داشتگ –

گوستگیں روچ ءَ بزاں دو مارچ ءَ بلوچستان ءِ جتا جتائیں جاھاں بلوچ نودربر گلانی نیمگ ءَ دود ءُ ربیدگی روچ دارگ بیتگ –

اشانی تہ ءَ بلوچ اسٹوڈنٹس ایکشن کمیٹی ءَ کراچی ءَ دود ءُ ربیدگی روچ ءِ درگت ءَ دیوان اڈ داتگ ءُ اشی ءِ ھواری ءَ تربت، شال ھیدر آباد ءُ دگہ دگہ جاھاں بساک ءِ نیمگ ءَ دود ءُ ربیدگی دیوان برجم دارگ بیتگ اَنت-

چرے مراگشاں بازیں کچے ءَ بلوچ نودربراں بھر زرتگ ءُ مراگشاں دود ءُ ربیدگی چیزاں ھوار جتاجتائیں بنگپانی سر ءَ تران بیتگ اَنت-

ھمے وڑ ءَ بلوچ پھناتاں چاگردی رسانکجاھاں ھم بلوچ دود ءُ ربیدگی ھیش ٹیگ کارمرد بیتگ ءُ ھیش ٹیگ ٹرنڈ چل اِتگ –

چاگردی رسانکجاھاں بلوچ دود ءُ ربیدگی روچ ءِ درگت ءَ بلوچاں ھوار دگہ راجاں ھم اے روچ ءَ پہ بلوچاں ھمدردی درشان کرتگ ءُ روچ ءِ ستاہ شانی کرتگ-

زانگ بہ بیت دو مارچ دود ءُ ربیدگی روچ اولی رند ءَ سال دوھزار ءُ دَہ ءَ بی ایس او آزاد ءِ ھزدار ھنکین ءِ نیمگ ءَ برجم دارگ بیتگ اَت کہ اے مراگش ءَ بمب چگل دیگ بیتگ اَر ءُ چریشی ءَ وانندہ گل ءِ باسک سکندر بلوچ ءُ جنید بلوچ نمیران بیتگ اِت اَنت ءُ بازیں کسے زدگ بیتگ اَت –

چرے بمب تراک ءَ پد اے بمب ءِ بھتام سرکاری چیریں ادارھانی سر ءَ لڈگ بیتگ اَت کہ سیاسی گلاں اے گوشتگ اَت اے بلوچ دود ءُ ربیدگی روچ ءِ بگیر ءُ بلوچ ءِ نہ منوکیں مردماں کرتگ-

ھمے وڑ دو مارچ ءِ روچ ءِ درگت ءَ کراچی ءَ جن قونصل ءِ جنرل بولگر زیگلر ءُ آئی ءِ لوگی کالڈیا زیگلر ءَ بلوچی گُد گور ءَ کرتگ ءُ دراھیں بلوچاناں اے روچ مراد باتی گوشتگ-

اے درگت ءَ جرمن قونصل ءِ جنرل ءَ بلوچی پوشاکانی ھواری ءَ جرمن قونصل ءَ گپ کنوکیں ملازمانی گون ءَ ھم بلوچی زبان ءَ گوں گپ جتگ-