TBP Balochi

اسپینش لالیگا فٹبال گوازی ءَ گوستگیں روچ ءَ دھ ٹیمانی میان ءَ گوازی کنگ بوتگ کہ آھانی تہ ءَ اسپینیول یکے ، کیڈز یکے ءُ بارسلونا ءَ چار گولاں گوازی کٹ اتگ انت وھدیکہ کیلٹا ویگو ءُ رئیل بیٹس، سیویلا ءُ رئیل سوسائیڈ دیمیگ بوتگ انت –

اسپینیول ءُ ملورکا ءِ میان ءَ بوتگیں گوازی ءَ اسپینیول ءَ یک گول ءَ گوازی کٹ اِتگ گول اسکورر اسپینیول ءِ لیبی آر.ڈی توماس بوتگ کہ آئی ءَ چِل ءُ دومی ملٹ ءِ تہ ءَ گول اسکور کتگ – کیڈز ءُ وئل رئیل میان ءَ بوتگیں گوازی ءَ ھم کیڈز ءَ یک گول ءَ گوازی کٹ اِتگ – کیڈز ءِ نیمگ ءَ چہ لیبی آر.سبرینیو ءَ گوازی ءِ گڈسر نودمی ملٹ ءِ تہ ءَ گول اسکور کتگ ءُ گوازی وتی ٹیم ءِ نام ءَ کُتگ –

لالیگا لیگ ءِ دوشی شپ بوتگیں پنچمی گوازی بارسلونا ءُ رئیل میڈریڈ ءِ میان ءَ بوتگ کہ بارسا ءَ چار گول ءَ رئیل میڈریڈ ءَ چہ گوازی کٹ اِتگ رئیل میڈریڈ لیبی گوازی ءِ گڈ سر ءَ تاں ھچ گول اسکور کنگ ءَ سوبین نہ بوتگ انت –

بارسا ءِ نیمگ ءَ فیری ایمرک ءَ دو، آر.اروجو ءُ ایف. ٹورس ءَ یک یک گول ءِ اسکور کُتگ گوازی وتی ٹیم ءِ نام ءَ کُتگ –

نودربرانی پہ زور بیگواہ کنگ ءُ وانگ جاھانی تہ ءَ تُرسینگ ءِ بگیری ءَ باندہ سرجمیں ملک ءَ کلاس نہ گرگ ءِ جار جنگ بوتگ –

اے درگت بلوچ اسٹوڈنس کونسل اسلام آباد ءَ گوں کُلیں استاد ءُ نودربراں دزبندی کتگ کہ آ باند ءَ بیست ءُ یک مارچ ءَ دوشمبے ءِ روچ ءَ بلوچ نودربرانی بیگواہ کنگ ءُ تُرسینگ ءِ بگیری ءَ کلاس مہ گِر انت ءُ زھرشانی ءَ ھوار بہ بنت –

بلوچ اسٹوڈنس کونسل ءَ ماسٹراں چہ لوٹ کُتگ گوشتگ کہ چاگرد ءِ جوڈیشت ءَ استادانی کرد ءَ چہ انکار بدکسمتیں راج ءِ کرت کنت کہ گوستانک ءَ زوال ءِ آماچ بوتگ مروچی استاد پگر ءُ ھیال بہ کن انت کہ آ اے لاقانونیت ءُ گیر جمہوری امل ءِ گر ءُ دار ءَ وتی کرد ءَ پیلو کنگ ءَ انت؟ آیا وتی نودربر ءُ دمگی مردماں گیر انسانی امل ءَ گوں بگیری دارگے درونت دیگ استاد ءِ کار نہ انت؟ اے کرن ءَ زورانسری آوار جنی ءِ یکجاھیں سزا تاوان ءِ بوت کنت بلے بژن لھتے استاد اے چاگردی سلکاریاں ھوار انت زاناں اے چاگردے تہ ءَ شری آرگ استادانی زمہ ءَ نہ انت –
بی ایس سی نیمگ ءَ چہ گوشگ بوتگ کہ مار ءَ یک ماہ ءَ گیش انت ھر وڈیں سکی سوری اوپار کنگ ءَ ایں مروچی انچو روچ ءَ پد ھم استادانی زمیر واب انت مروچی مئے زھن ءِ تہ ءَ ھمے جست پیداک بیت اِنت ءُ مروچی استاد نودربرانی ھوسلہ جوڈ بوھگے بدل ءَ ھاموش انت ءُ اے گیر جمہوری املے پلامرزی ءَ کنگ ءَ انت – بیا ات زانت رکینگ ءَ بلوچ نودربرانی ھمراہ داری ءَ بہ کن ایت ءُ آھانی ھوسلہ جوڈ بہ بئے –

بی ایس سی ءَ نودربراں چہ لوٹ کتگ گوشتگ کہ مروچی بلوچ نودربر ایوک ءَ وتی سنگت حفیظ بلوچ ءِ یل کنگ ءُ وتی سر ءَ بوتگیں گیرکانودی زوراکیانی بگیری ءَ دراتکگ انت زاناں ما چہ وتی نودربراں چہ ھمینچو ھم امیت داشت نہ کنیں کہ چاگرد ءِ تہ ءَ بلوچ نودربرانی گوم ءَ بؤکیں زوراکیانی گرد ءُ دار ءَ مئے ھمراہ داری ءَ بہ کنے – بلوچ نودربر مدامی یک جمہوری چاگردے ءِ جوڈیشت ءَ وتی کرد ءَ پیلو کنگ ءَ انت اے جاورھاں بازیں لٹ کٹانی سگگ ابید وتی پرایمنیں جھد ءَ چہ دسکش نہ بوتگ انت دیمتر ءَ ھم وتی ھکانی پھازگ ءَ پرایمنین جھد کن انت ءُ ھمے وڈ زانت ءِ شوھاز ءَ برجاہ دار انت –

یکرندے پدا بلوچ اسٹوڈنس کونسل ءَ سرجمین ملک ءِ نودربراں چہ لوٹ کتگ کہ بیست ءُ یک مارچ ءَ کلاس مہ گر انت ءُ مئے زھرشانی بھر بہ بنت ءُ مزلومیں نودربرانی گوم ءَ بوتگیں گیر انسانی ءُ گیرکانودی اے امل ءِ دارگ ءَ ھمراہ داری بہ کن انت –

بی ایس سی ءَ راج ءَ چہ لوٹ کتگ گوشتگ کہ زانشتیں راج چاگردے دیمروی ءِ ضامن انت ما چہ راج ءَ لوٹ کنیں کہ چاگردے اے ھرابیانی بگیری ءَ وتی کرد ءَ پیلو بہ کن انت بلوچ نودربرانی ھمراھ داری ءَ بہ کن انت ءُ آھانی ھوسلہ بہ بنت –

آھاں چاگردی باسک ءُ اھوالکاراں چہ ھم لوٹ کتگ گوشتگ کہ ما چہ شما ھمے امیت ءَ داریں باند ءَ سرجمیں ملک ءَ بؤکیں زھرشانی ءَ شریں وڈی ءَ دیم ءَ کارے ءُ مھلوک ءَ سر کن ایت وتی پرز ءِ گوم ءَ انساپ کنے –

بلوچ آجوئی لوٹوکیں راھشون گلزار امام بلوچ ءَ گْوشتگ کہ بلوچ راجی مڈیانی لُٹ ءُ پُل ءِ موکل ھچ وڑ ءَ دیگ نہ بیت اِنت –

بلوچ آجوئی لوٹوکیں سلاہ بندیں گل بلوچ نیشنلسٹ آرمی ءِ راھشون گلزار امام بلوچ ءَ ریکوڈک پروچیکٹ سر ءَ کنیڈین باپاریانی نیمگ ءَ چہ باپاری بلوچ مڈیانی لُٹ ءُ پُل کنگ گْوشتگ ءُ مکن کتگ کہ دری باپاری کنوک بلوچ مڈیاں پُلگ ءَ چہ یک کر بہ بنت-

اے گپ آئی ءَ یکشمبے ءِ روچ ءَ چاگردی رسانکدر ٹوئیٹر ءَ وتی یک ٹوئیٹے ءِ تہ ءَ گوشتگ اَنت-

گلزار امام بلوچ ءَ گْوشتگ کہ بلوچ راج ءُ آجوئی لوٹوکاں بلوچ مڈیانی لُٹ ءُ پُل کنوک پدر کتگ اَنت کہ آ زورگر ءِ نیمگ ءَ چہ جوڑ کتگیں اے دری باپاری ءَ نہ منّ ایں-

گلزار امام بلوچ ءَ دیمتر ءَ گْوشتگ کہ ما یکرندے پد ءَ دری باپاری کنوکاں مکن کن ایں آ بلوچستان ءَ چہ دیر بہ بنت اگاں ناں تُرندیں تاوانانی دیمپان بنت-

زانگ بہ بیت بلوچستان ءِ سُرپُرکنوکیں آجوئی لوٹوکیں سلاہ بندیں گل بلوچ لبریشن آرمی ءِ مجید برگیڈ ءَ بلوچستان ءَ چینی باپاری بلوچ راج ءِ ابید مرزی ءِ بگیری گوشتگ ءُ اے شوربندیانی سر ءَ باز اُرش کنگ ھم بوتگ-

2018 ءَ چاغی ءَ چینی انجینئر بس نشانگ کنگ بوتگ اَت ءُ آئی ءِ زمہ واری بی ایل اے ءَ منّ اِتگ اَت-

سربوتگیں ھالانی رِد ءَ بلوچستان ءِ دمگ کیچ ءِ مزن شھر تربت ءَ مروچی یکشمبے ءِ روچ ءَ تیرگواری ءِ وئیل ءَ یک مردمے بیران بوتگ –

گیشیں ھالانی رِد ءَ چوگان کنڈ ءَ ناشناسیں پرپٹ سوارانی تیرگواری ءَ کلات ءِ جھمنند ءِ ھما دمان ءَ.بیران بوتگ –

تربت پولیس ءِ رِد ءَ علی نواز ء علی محمد جھمنند کلات کہ وتی گاڑی ءَ سوار بوتگ ءُ رؤگ ءَ بوتگ کہ ناشناسیں پرپٹ سواراں آ داشتگ ءُ تیرباران کُتگ ءُ کشتگ –

پولیس ءِ رِد ءَ علی نواز ءِ کھول ءَ زاتی جیڑھے ءِ گپ رد کُتگ بلے مئے پٹ پول برجاہ انت کہ کوش ءِ پُشت ءَ راستی چی انت –

بلوچستان ءِ تیابدپی شھر گوادر ءَ وتی ھکانی لوٹگ ءَ بلوچستان ھک دو تحریک ءِ زھرشانی نندانک چارُمی روچ ءَ پانزدہ روچ ءِ واستا ھلاس کنگ بیتگ-

گوادر پورٹ گیٹ ءِ دیم ءَ برجاھی ءِ سبب ءَ سیکورٹی ادارھاں ترندیں جیڑھانی دیمپانی بیتگ اَنت چریشی ءِ سبب ءَ گوستگیں روچ ءَ میرین سیکورٹی فورسز ءَ زھرشانی ھواریں زالبولانی سر ءَ لَٹ ءُ کُٹ بیتگ اَنت-

سر بیتگیں اھوالانی رد ءَ بلوچستان ءِ مزن واکداراں حق دو تحریک ءِ سرجمی ءَ لوٹانی منّگ ءُ سدکی ءَ پد مولانا ھدایت الرھمان بلوچ ءَ پورٹ ءِ دیم ءَ نندانک پانزدہ روچ ءِ واستا ھلاس کتگ نندانک ءَ مزن واکداراں گپ ءُ تران ءَ پد لھتے لوٹانی منّگ ءَ پد پانزدہ روچ ءِ تأ ءُ لھتے لوٹانی سرجمی کنگ ءَ سدکی کنگ بیتگ اَنت ءُ چریشی ءَ پد نندانک ھلاس کنگ بیتگ زھرشانی کنوکاں گوشتگ کہ سرجم نہ بوگ ءَ دوبر پورٹ ءِ دیم ءَ زھرشانی کنگ بیت اِنت-

زانگ بہ بیت گوادر ءَ ھق دو تحریک ءُ دمگی ماھیگرانی زھدشانی بلوچ زر ءَ گیر کانونی ٹرالرنگ ءِ دارگ ءَ بیتگ –

دمگی انتزامیہ ءُ سرکار ءِ رد ءَ گوادر ءَ گیر کانونی ٹرالرنگ ءِ دارگ ءَ سیکورٹی ادارہ پرکار اَنت بلے دردیا ورد اے گپ ءَ رد کنگ ءَ اَنت-

نِمدی پہ وتی مکھیں مات ءَ

اردو نبشتہ کار: ضیاء الرحمان

بلوچی رجانک: واجو بلوچ

دی بلوچستان پوسٹ

وتی مکھیں مات ءِ نام ءَ کِہ آ منی دل ءِ نزیکترین مَردم اِنت اے منی مِھروانیں مات ءِ سبب اِنت کِہ مَرچی من گوں وتی نزوریں پاداں زمین ءِ ھما سنگتانی ھمراہ آں کِہ آ چَہ وتی جِند ءَ درتکگ اَنت ءُ گوں یک راجی پِکرے ءَ گوں بدواھاں دیم پَہ دیم اَنت ءُ یک کسانیں وھدے ءِ تہ ءَ وتی دُژمِن باز بیچاڑ ءُ ھیراں کُتگ اِت –

منی مِھروانیں مات، راستے کِہ مَرچی من ترا چَہ باز دوراں بلے من ھما ماتیں زمین ءَ پھازگ ءَ آں کِہ آ نَہ تنھا تئی بلکیں تئی مات ءِ مات اِنت، آ مئے گُلزمین اِنت۔ ما دُرست اے ماتیں زمین ءِ وامدار ایں۔ امَّاں، بس ھمے دوا ءَ بلوٹ کِہ آ روچ ھچبر مَہ ایت کِہ من دُژمن ءَ پُشت پیش بِداراں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔