TBP Balochi

خضدار ءَ سلاہ بندیں مردماں یک مردمے آوار جنگ ءَ پد بیگواہ کُتگ۔ بیگواہ بیتگیں مردمے پجار دارو ء شیر مھمد جھمنند کوچہ گریشہ خضدار ءَ چہ بیتگ۔

ھندی اھوالانی ردءَ بیگواہ بیتگیں مردم بیست مارچ ءَ ناشناسیں اولاک سواریں سلاہ بندیں مردماں خضدار بس اڈہ ءَ چہ ھما وھدءَ آوار جنگ بیتگ کہ آ ھنگول ءَ چہ آیگ ءَ بیتگ۔

ھندی اھوالاں گُشتگ کہ بیگواہ کنوکانی سیادی سرکاری مستری ءَ کارکنوکیں گل ڈیتھ اسکواڈ ءَ اِنت۔

زانگ بہ بیت بیگواہ بیتگیں مردم پیسر ءَ ھم لشکریاں دزگیر کنگ ءَ پد بیگواہ کُتگ اَت ءُ پدءَ یل داتگ اَت۔ نی یک برے پدءَ بیگواہ کنگ بیتگ۔

انسانی ھقانی گل ءُ راجدوستیں تکانی ردءَ بلوچستان ءَ زورانسری بیگواھیانی وئیل دو دھکاں چہ برجاہ اَنت۔ راجدوستیں گل لشکریانی سرءَ اے بیگواھیانی بھتام جن اَنت وھدیکہ لشکری اَے بھتاماں مدام رد کن اَنت۔

ھمے زورانسری بیگواھیانی ھلاپ ءَ گلزار دوست ءَ تُربت ءَ چہ شال ءِ دراجیں پادانی لانگ مارچ کُتگ کہ گوستگیں روچ ءَ شال ءَ رستگ ءُ آسر بیتگ۔

بلوچستان ءَ زورانسری آوار جنیانی بگیری ءَ دراجیں پند شال ءَ سر بوتگ ءُ آسر بوتگ-

سول سوسائٹی تربت ءِ رھشون گلزار دوست ءِ تربت تاں شال ءَ پیادگ ءِ روانک بیست ءُ سَے روچاں پد شال ءَ سربوتگ – شال ءِ سر بوھگ ءَ وائس فار بلوچ مسنگ پرسنز ءِ چیردستی ءَ روانک ءِ دروشم ءَ آ وش اتک کنگ بوتگ –

زانگ بہ بیت گلزار دوست بیست ءُ ھپت فروری ءَ ایوک ءَ تربت ءَ چہ دیم پہ شال ءَ پاد شپاد روانک کشگے جار جتگ ات کہ اود ءَ لھتے روچاں پد زالبولانی گوشگے پد ءَ بوٹ پاد ءَ کُتگ ءُ روانک برجاہ داشتگ شال ءِ سر بوھگ ءَ بیگواھیں مردمانی کھولان مزنیں کچ ءَ روانک ءَ بھر زرتگ –

گلزار دوست ءَ اے پیادگ پند ماما قدیر بلوچ ءِ نام ءَ کُتگ بوتگ – ماما قدیر بلوچ ءَ اشی ءَ پیش سال دوھزار چاردہ ءَ سمی بلوچ، علی حیدر بلوچ ، بیگواھیں زاکر مجید ءِ گھار فرزانہ مجید ءِ ھمراھی ءَ شال تاں کراچی ءُ پدا دیم پہ اسلام آباد ءَ دراجیں پند ءِ جتگ بوتگ – شال ءِ سربوھگ ءَ گلزار دوست ءَ روانک ءِ مردمانی ھمراھی ءَ شُتگ ماما قدیر بلوچ ءِ نیمگ ءَ برجم کنگ بوتگیں بنجل وائس فار بلوچ مسنگ پرسنز ءِ بنجل ءَ داشتگ – کہ اود ءَ اھوالکاراں ھوار ھر تک ءُ پھناتاں سیادی داروکیں مردماں بنجل ءَ اتکگ ءُ گلزار دوست ءُ بیگواھیں مردمانی کھول ءِ گوم ءَ دلپدردی درشانتگ –

وائس فار بلوچ مسنگ پرسنز ءِ بنجل ءَ چہ ءَ گلزار دوست ءَ اھوالکاراں گوں تران کنان ءَ گوشتگ کہ آئی ءِ اے کاروان بلوچستان ءَ برجاھیں ریاستی دھشت گردی ءُ زورانسری آوار جنیانی بگیری زھرشانی یے – گلزار دوست ءَ دیمتری ھاتر ءَ گوشتگ کہ شال ءَ تاں کراچی ءُ پدا اسلام آباد ءَ ویل چئیر ءِ پند جنگ ءِ جار جتگ –

گلزار دوست ءِ گوشگ اِنت دراجیں پند ءِ مول بلوچستان ءَ برجاھیں انسانی ھکانی لگتمالی ءُ زورانسری آوار جنیاں دیما آرگ انت – آئی ءَ گوشتگ ماما ءِ جھد چار اِتگ ءُ پیادگ روانک ماما قدیر ءِ نام ءَ کُتگ – وھدیکہ اے دراجیں پند ءَ واجہ یعقوب ءُ زبیر آسکانی گلزار دوست ءِ ھمراہ بوتگ انت –

اے وھد ءَ بنجل ءَ ساڈی ایں بیگواھیں مردمانی کھولاں ھوار سیاسی ءُ چاگردی باسک ءُ رھشوناں گلزار دوست ءِ گامگیج ءِ ستا شانی کتگ –

گلزار دوست ءِ دراجیں پند ءِ درگت ءَ وائس فار بلوچ مسنگ پرسنز ءِ رھشون نصراللہ بلوچ ءِ گوشگ ات کہ دراجیں پند وتی مکسد ءَ سوبین بوتگ میاں استمانی ادارھانی نیمگ ءَ اشی ءب سر ءَ گامگیج زورگ اے مارچ ءِ مزنیں سوبمندی یے –

نصراللہ بلوچ ءَ دیمتر ءَ گوشتگ کہ بلوچستان ءَ برجاھیں انسانی ھکانی گل لگتمالی ءِ بگیری ءَ گلزار دوست ءُ دگہ جھد کنوکانی جھد ستا کرز انت وھدیکہ اے ناھکیانی بگیری ءَ جھد ءَ مدامی ما آئی ءِ ھمراہ انت ءُ توار چست کنیں –

گلزار دوست وتی زھرشانی ءِ درچ ءَ برجاہ دارگ ءُ ویل چیر مارچ ءِ درگت ءَ زوت جار جنت –

بلوچستان ءِ بنجاھی شھر شال ءَ بیگواھیں مردمانی پانکجنیں گل وائد فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ شش سد ءُ نوزدہ روچ سرجم بوتگ انت – تربت ءَ چہ بنجاھی کونسلر عوامی پاٹی ءِ محمد عظیم دشتی سوشل ورکر عبدالرحمن ءُ بی ایس او پجار ءِ سرکماش زبیر بلوچ ءَ بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشانتگ –

بنجل ءَ اتکگیں مردمانی گوم ءَ تران کنان ءَ ماما قدیر بلوچ ءِ گوشگ ات کہ وھدیکہ ما ھمے پگر کنیں کہ اے پُرایمنیں جھدے ھاتر ءَ دگہ دیمونی بہ دئینت اے تُرس ءِ مستریں سوب مرگ انت وھدیکہ گپ مرگ ءِ سر ءَ کئیت مردم ھنچوش ھلاس بیت گُشے آئی ءَ سرجمیں زند ءَ مرگ پرنیست –

ماما قدیر بلوچ ءِ گوشگ ات کہ دنیا ءَ ھر شے ءِ کہ پیداک بوتگ انسان ءِ بیت کہ دلوت ءِ یک ناں یک روچے الم مریت – مردم اے نہ مار انت ھم کہ آ ھنچوش بہ مِر انت کہ مدامی زندگ بہ بنت – لکانی کچ مردم مِرگ ءَ انت لھتے وئیل سر ءَ کپت ءُ لھتے اناگتی تیرانی آماچ بنت ءُ لھتے نادراھی ءَ چہ بلے گواستانک گواہ انت مروچی دنیائے تہ ءَ ھما مردم نمیران انت کہ آھاں وتی مکسد پجّا آؤرتگ ءُ آئی ءِ ھاتر ءَ پُرایمنیں جھد کُتگ آ سوبین بوتگ شر یا شھید بوتگ بلے آئی ءَ وت ءَ یک جاہ ءَ سر کُتگ –

آئی ءَ گوشتگ کہ مروچی ھما بلوچ پرزند کہ پُرایمنیں جھد ءَ وتی بھر ءَ مان کن انت اشی مول آ سرجمیں بلوچ ءِ بچ انت ءُ بیگواھیں مردمانی ھاتر ءَ جھد کنگ ءَ اِنت –

ماما قدیر بلوچ ءَ گوشتگ پگری ءُ نزریاتی مردم ھچبر وتی زات ءِ ھاتر ءَ پگر نہ کنت بلکنہ آ مدامی پہ راج ءِ ھاتر ےَ پگر کن انت آھاں وتی زات ءِ ھاتر ءَ پگر کنگے موہ ھم نرسیت –

بلوچ نودربر گل آزاد ءِ بنجاھی جارکش ءَ زورگیریں ریاست ءُ آئی کٹھ پتلی بلوچستان ءِ سرکار ءِ نیمگ ءَ ریکوڈک ءِ گیرکانودی معاہدہ درگت ءَ رسانکدراں وتی شنگ کرتگیں درشان ءَ تہ ءَ گوشتگ کہ دنیائے تہ ءَ زورگیراں ھچبر اے موکل دیگ نہ بوتگ کہ ایردستیں دمگے مھلوک ءِ ھمراہ داری ءَ بگیر معاہدہ بہ کن انت – وھدیکہ دری باپاریانی ھم زمہ واری بیت انت کہ جنگ زدگیں دمگ ءَ باپاری کنگ ءَ پیش زمینی راستیاں شری ءَ بہ زان انت اگاں ناں اے وڈیں معاہدھاں پد باپاری ءَ مدامی وتی پیسلہانی سر ءَ پسٹائینتگ – دنیائے تہ ءَ ھچ وڈیں باپاری تاں ھما وھد ءَ پھریز نہ انت کہ ھما زمین ءِ ھکئیں وارسانی رزا مہ بیت ھمے وڈ بلوچ سرڈگار ءِ سر ءَ ھم بید بلوچ راج ءِ رزا ءَ زورگیرانی نیمگ ءَ کنگ بوتگیں اے معاہدہ ءَ دیم ءَ شُت نہ کنت –

جارکش ءَ بیرک گولڈ کارپوریشن نامی کمپنی ءُ پاکستان ءِ میان ءَ بوتگیں اے معاہدہ ءَ نہ منّ اِتگ ءُ گوشتگ کہ بیرک گولڈ کارپوریشن کمپنی ءَ ھنچیں کٹھ پتلی سرکار ءِ گوم ءَ اے معاہدہ کتگ کہ آئی ءِ بلوچستان ءِ تہ ءَ ھچی ارزشت نیست وھدیکہ آھانی سیادی تچکی ءَ گوں زورگیر ءَ انت – بلوچ راج ءَ اشی ءَ پیش ھم اے وڈیں گیرکانودی، بید راجی ءُ زوراکانی نیمگ ءَ کنگ بوتگیں باپاری نہ منّ اِتگ انت کہ آئی پدریں درور سی پیک انت کہ بلوچ راج چوں چو کوہ آئی دیم ءَ اوشتوک انت – بلوچ راج اے دابیں ھر ھما معاہدہ ءَ چہ بگیری داریت کہ بلوچ راج ءِ مال ءُ مڈیانی لٹ پُل ءَ بہ کنت – ھمے ھاتر ءَ اے وڈیں باپاریاں باپاری کنگ ءَ پیش زمینی جاورھال چارگی انت – اے وڈیں باپاری ءَ ھچی باندات نیست کہ آئی دیم ءَ یک سرجمیں راج ءِ اشتوک بہ بیت ءُ ریکوڈک معاہدہ ھم سرجمی ءَ گیرکانودی ءُ زورگیرانی نیمگ ءَ.چہ کنگ بوتگ کہ اھانی مول مراد مئے مال ءُ مڈیاں ارزانی ءَ بہا کنگ انت ھمے ھاتر ءَ بلوچستان ءِ تہ ءَ اشاں باندات نیست –

جارکش ءَ وتی درشان ءِ گڈسر ءَ بیرک گولڈ ءَ چہ لوٹ کتگ گوشتگ کہ وتی معاہدہ ءَ سر ءَ چمچانک ءِ بہ دنت ءُ معاہدہ ءَ دسکش بہ بیت پرچاکہ بلوچ راج ءَ اے معاہدہ ءَ سرجمی ءَ نہ منّ اِتگ – اگاں کمپنی بلوچ راج ءِ رزا ءَ ابید وتی باپاری بلوچستان ءِ تہ ءَ برجاہ دارگ لوٹیت گڈا آئی ءَ ادا راج ءِ گھگیری ءِ دیم دارگ کپیت – ما اے گپ ءَ پدر کنگ لوٹیں کہ بلوچ راج ءُ ورنا ھچبر وتی مال ءُ مڈیاں ارزانی بہا بوھگ ءَ نیل انت ھر فورم ءَ اشی ءِ دیم ءَ دار انت – بھیسیت نودربر گل بی ایس او آزاد اے گیر کانودی ءُ بلوچ مال مڈیانی لٹ پُل ءِ بگیری ءَ ھر فورم ءَ جھد کنیں –

سھار کتاب کاروان ءِ نیمگ ءَ گوستگیں روچ ءَ سراج اھمد میتگ کاٹھور ءَ بک اسٹالے جنگ بیتگ کہ اے کتاب کاروان ءَ بازیں کچے ءَ مردماں بھر زرتگ –

سھار ادبی کاروان ءِ نیمگ ءَ مروچی ساھار کتاب کاروان کمال خان جوکیو کالج ءِ دیم ءَ بک اسٹال جنگ بیتگ ءُ اود ءَ ھم مھلوک ءَ بازیں کچے ءَ بھر زرتگ ءُ کتاب دوستی ءِ نیمگ ءَ وتی درشانی کتگ –

ھمے درگت ءَ بلوچ چاگردی باسک ابرار مراد ءَ چاگردی رسانکدر ٹوئیٹر ءَ ٹوئیٹ کنان ءَ گُشتگ کہ جھالت ءِ بگیر ءَ زانشت گھتریں سلاہ اِنت –

سھار ادبی کاروان ءِ نیمگ ءَ برجاھیں بک اسٹال ھمے ماھے بیست ءُ چار رمس ءَ ال ابراھیم ھسپتال ءِ دیم ءَ اولڈ تھانہ ءَ برجم دارگ بیت ءُ پدءَ بیست ءُ شش ءَ ڈگری کالج کونکر، گڈاپ برجاہ دارگ بیت –

سھار ادبی کاروان ءِ نیمگ ءَ اے اولی رند اِنت کہ کاٹھور ءُ ملیر ءِ دگہ دمگانی تہءَ کتابانی اسٹال جنگ بیگ ءَ اِنت –

پہ جنین چُک ءِ باندات ءٙ بہ جیڑ

نبشتہ کار: کادر ھسرت

دی بلوچستان پوسٹ

دیریگیں گپے کہ من سپرے ءٙ روگ ءٙ ات آں گُڑا راہ ءِ نیم ءٙ مئے گاڑی ھراب بوت، پد ءٙ من ءٙ تُن ءٙ ھم گپتگ اٙت من اینگو آنگو چار اِت، دُکان نیست اٙت، لوگے ھم چم ءِ زاھر ءٙ گندگ بوگ ءٙ نہ اٙت گُڑا من کمو دیمتر ءٙ شت آں، یک شپانکے دیست کہ پساں چارینگ ءٙ اٙت من ھمیشی ءِ کر ءٙ شت ءُ سلامے دات واجہ ءٙ منی سلام الیک کت ءُ من واجہ ءِ کر ءٙ نشت ءُ گپ ءُ تران کُت واجہ ءٙ گْوشت “منی ھیال ءٙ تو اد ءِ مردمے نہ ئے تو وتی ھالاں بہ دئے باریں تو اے گیابان ءٙ چے لوٹ ئے؟-

من درائینت جی ھو واجہ تئی گپ راست اٙنت من اد ءِ مردمے نہ آں من یک مساپرے آں ءُ مئے گاڑی ھراب اِنت من پد ءٙ سک تنیگ آں من اینگو آنگو چار اِت بلے گندگ ءٙ ھچ نیستگ اٙت من پمیشکا ترا دیست ءُ تئی کر ءٙ آتک آں اگاں تئی کر ءٙ آپ بیت گُڑا من ءٙ بہ دئے من سک تنیگ آں” شپانک ءَ گْوشت “ھو من ءٙ آپ گون اِنت بلے سارت نہ اٙنت اگاں تو لوٹ گُڑا منی لوگ کمو دیم ءٙ اِنت پہ تو سارتیں آپے کار آں”من گْوشت “جی اناں واجہ وت ءٙ تکانسر مہ کن من ھمے آپاں ور آں” انچو انچو ما گپ ءُ تران ءٙ ات ایں گُڑا دھول ءِ توار منی گوشاں کٙپت من چہ کماش ءٙ جُست گپت کہ اے چونیں دھولانی توار انت بلکیں یکے ءِ سور انت کماش ءَ درائینت “ھو ھمد ءٙ مئے یک ھماساھگے ءِ چک ءِ سور اِنت من پد ءَ جُست گپت بٙلے بٙلے جنین چُکے ، اگاں مردین چُکے۔

کماش ءٙ پسّو دات “جنین چکے من کربان آں من جُست کُت “گُڑا زاناں تو سور ءَ نہ رو ئے؟ کماش ءَ نادلکشی ءَ پسّو دات “منی دل ھم گوش اِیت کہ بہ رو آں بلے یک ھیالے کیت۔ منی دل نہ گوش ایت گوں اے گپاں ارس ئِے چہ چماں گُلگُل بوت اٙنت۔ من سک پریشان بوت آں کہ اے واجہ ءٙ چے بوت؟ من گوں وتی اے گپ ءِ کٙنگ ءٙ ملامت بیت آں من کماش ءِ ارس پھک کت ءُ گْوشت “واجہ من ءٙ بہ بکش اگاں من بدیں گپے جتگ دْرائینت ئِے “اناں واجو تو چوشیں گپے نہ جتگ کہ من تئی گپ ءِ سر ءٙ گریوگ ءٙ آں من ھما جنک ءِ واست ءٙ گریوگ ءٙ آں کہ مات ءُ پت ئِے دست ءِ وت برباد کنگ ءٙ اٙنت”وھدے کہ کماش ءٙ اے وڑ گْوشت منی دل ءٙ وسواسے چست بوت، من ھمے گپ جت کہ کماش من تئی گپاں سرپد بوگ ءٙ نہ آں، تو من ءٙ گْوشت کن ئے کہ جنک ءِ زندگی چوں برباد بوگ ءٙ انت؟ کماش ءٙ وتی کٙمرزانی بست ءُ گپ ءٙ لگ اِت “اے جنک ءِ زندگی چو برباد بوگ ءٙ اِنت اے جنک وانگ ءٙ اِنت ءُ وانگ ءٙ سک زبر انت۔جنک ءِ دل ءٙ اِنت من دیمتر ءٙ بہ وان آں پہ وتی راج ءٙ چیزے کت بہ کن آں بلے پہ مال ءُ دولت ءِ لالچ ءٙ ایشی ءِ پت ءُ مات کسانی ءٙ سور دیگ ءٙ اٙنت ئےِ، ھمے جنک ءِ کہ ھما بچک ءٙ گوں سور بوگ ءٙ اِنت ھمے بچک یک نشائی یے ءُ شپ ءُ روچ نشہ کنت، شراب ھم وارت، بلے جنک ءِ مات ءُ پت گوش اٙنت کہ مئے زامات بس ھمیش اِنت دگہ کس نہ بیت-

من جُست کُت “واجہ گُڑا جنک ءٙ اے بابت ءٙ گوں وتی مات ءُ پت ءَ گپ نہ کتگ کہ شما پرچا من ءٙ چوشیں مردے ءَ دیگ ءٙ اِت کہ شپ ءُ روچ نشہ کنت دگہ ھچ ءِ سد ئِے نیست نَیکہ وتی ءُ نیکہ راج ءِ من چوں شات باں ایشی ءِ لوگ ءٙ؟ کماش ءَ درائینت “واجو! آ جنین چُکے، چہ دوداں مجبور اِنت ءُ پد ءٙ آ نہ لوٹ ایت کہ منی مات ءُ پِت بنام بہ بنت، بِہ گِند ئے بزگ چے کُت کنت؟ من گْوشت “واجہ! آ اگاں پہ وتی مات ءُ پت ءِ گیرت ءُ ننگ ءٙ وت ءٙ را چشیں آسے ءٙ دور دیگ ءٙ اِنت گڑا آئی ءِ مات ءُ پت ءَ ھم اے زانگ لوٹ اِیت کہ منی چُک چوں شات بیت اگاں ما چوشیں مردے ءَ بہ دئے آن ئےِ” کماش ءَ درائینت ” بلے اناں آ چو نہ جیڑ اٙنت آ بس ھمے جیڑ اٙنت کہ مئے زامات سیریں مردمے ءُ مئے چُک شات بیت اِنت بلے چو نہ جیڑ اٙنت کہ زندگی آئی ءٙ گوازینگی اِنت مارا باید اِنت آئی ءِ زندگی برباد کنگی نہ انت-

من پسّو دات ” واجو تو راست گْوش ئے بلے آیاں چوشیں زانگ کُج اِنت۔ آ باید اِنت اے چیز ءٙ بہ پھم اٙنت کہ آ جاگہ ءٙ جنک ءِ وشی انت، زر نہ انت کماش ءَ گوں ارسیگیں چمّاں گْوشت “واجو تھنا اے جنک نہ اِنت بازیں جنین چُکے ھمے آس ءٙ ستکگ ءُ تباہ بوتگ”مئے کسہ آسر نہ بوت، ما گپ ءٙ ات ایں کہ گونڈوھے آتک ءُ توار ئِے کُت “بیا مئے گاڑی تیار اِنت”من کماش رُکست کت دیم پہ وتی منزل ءٙ شت آں اُمیت کن آں کہ شما سرپد بوت اِت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ پنجگور ءِ ھند پروم ءَ گوستگیں شپ ءَ پاکستانی پوج ءَ بیڑ برتگ ءُ چار مردم بیگواہ کرتگ اَنت-

گیشیں ھالانی رد ءَ گوستگیں شپ ءَ پاکستانی پوج ءَ پروم ءِ ھند جائین ءَ بیڑ برتگ ءُ اود ءَ ظھور ء محمد علی، اصغر ء محمد علی، اشفاق ء عبدالخالق ءُ شکور آوار جتگ ءُ بیگواہ کتگ اِنت ئِے –

دمگی مردمانی رد ءَ پوج ءَ بازیں کچے ءَ بیڑ برتگ دمگ انگیر ءَ کرتگ ءُ لوگانی سر ءَ بیڑ برتگ ءُ بیڑ ءِ وھد ءَ پوج ءَ لوگانی گران نھادیں مڈی برتگ اَنت-

دومی نیمگ ءَ چہ کیچ ءَ ھال اِنت پاکستانی پوج ءَ گوستگیں روچ ءَ دو مردم دزگیر کنگ ءَ پد بیگواہ کرتگ اَنت، آوار جنگ بیتگیں مردمانی پجار اکبر ء ماسٹر اسلم ءُ نعیم ء رحمت ءِ ناماں زانگ بیتگ اَنت اے مردم گوستگیں روچ ءَ کیچ ءِ بنجاھی شھر تربت ءَ آوار جنگ بیتگ اَنت-

گوستگیں سال دوھزار ءُ بیست ءُ یک ءَ پوج ءِ دست ءَ چہ مچ ءَ آوار جنگ بیتگیں عطاء اللہ شاھوانی نوزدہ مارچ ءَ یل بیتگ ءُ وتی لوگ ءَ سر بیتگ-