TBP Balochi

نبشتانک: بریں مِریں پہ واهگاں

نبشتہ کار: سیپ بلوچ

دی بلوچستان پوسٹ

زندمان ءُ زندگی ءِ تہ ءَ لھتے روکیں رژن چو بیگہ ءِ شینکاں مدام امیت ءِ بروارد ءَ چو کوه ءَ شپانکے ءِ امیت ءَ بنت بلے زندگی ءِ دْروت ، دراهی بیت ، مرچی یک هنچیں اهدے ءِ یک هنچیں شائرے ءِ گڈی نبشتگیں شیر ءِ سر ءَ نبشتہ کنگ ءَ آں کہ اے بوت کنت منی زندگی ءِ تہ ءَ اولی ءُ گڈی شیر اِنت ، کہ شائر ءَ وتی لیکہ ءِ تہ ءَ گمان همے بیت کہ سرجمیں گوست ءُ آؤکین اهد گوشتگ ، چوناها آهوگل ءَ کمیں وهد ءِ تہ ءَ وتی شائری ءَ گوں اهد ءِ دیم گند کتگ ، کہ مرچی بلوچستان ءَ هرچ زبان دوست ءُ بلوچی لبزانک ءِ وارس آئی ءِ وانگ ءُ گوشدارگ ءَ یک ملمائی ءِ لیک ایت ، آهوگل ءِ هرکجام نویس اتگیں شیرانی توسیپ ءَ بکن آں ند هچ اوشت ءِ آماچ نہ بیت بلے اے ملنگیں شائر ءَ وتی گڈی شیر هنچو دردیگیں لبزاں گوں نبشتہ کتگ کہ آئی ءَ همے گمان بوتگ کہ بوت کنت منی گڈی شیر بہ بیت- اے وهد ءَ هرکسی کلم ماں چو پچیں کتاب آهوگل ءَ مرچگیں وهد ءُ آؤکیں جاورانی سر ءَ همے گمان درشان کتگ کہ کیت همے باریگ کہ گونگیں زبان اوں گپ کن انت ، بلوچ ءِ هما ندکار کہ وتی ند اش اوشتے آماچ کتگ اَنت آ اوں جاوراں وهد ءَ نبشتہ کنگ ءَ وتی راجی زمہ واری لیک انت ، زبان گُوں من گُوں بِہ بِیت ءُ دود مئے وتی بِہ باں اے گزّ مئے اے کور ءُ مئے کرْود ءُ مئے وتی بِہ باں-

اد ءَ شئیر یک هنچیں سکینے دیگ ءَ اِنت کہ آ سکین ، بلوچ ءِ آجوئی ءُ زبان ءُ دودانی گپ ءَ انت ، راج بیت زبان بیت زبان بیت راج بیت ، گز بنت کھور بنت کور بنت اے مھمکیں سیستان بیت ، چوناها لبزانتکار ءُ جنگی سپاهی یکیں اسپ ءَ سوار اَنت ، آهوگ گل ءِ شائری ءَ آشوب ءِ همک رنگاں گوں بندوک اِنت ءُ زیبا انت-

“کایا گوں جاک جنگ بیں”
“کایا ملام پر کنین”
“چہ در کپین زمانگ ءَ”
“من ءُ تو کہ سپر کنین”
“اے دل نہ سگین دیریانی سر” “متابیں چڑنگاں”
“وپائے کشک ءَ کنٹگین اے رنجین راهے کَنڈگان”
“زهیرگانی ساهتان گوں یک دمے دچار بین”
“پدا ماں سبزیں سیاهگاں گُل ءَ چو بے کرار بیں”
“بہ بریں مریں پہ واهگاں”

شائری وتی گڈی کلوه ءَ دروت ءُ دروهبات کنگ ءَ اِنت راجے بزگی نیزگاری وانندگ ءُ زانتکاری ءِ لیکہ ءُ هزامیں دروشم ءَ کہ شائر ءَ وتی ند ءِ گُڈی ءَ شیر ءَ همے گمان ءَ گوں درنگاز کنگ ءَ اِنت کہ راج کجام دروشم ءَ وت ءَ زندگ کنگ ءَ انت ءُ کجام دروشم ءَ وت ءَ زندگ کنت آهوگ گل یک هنچیں زندگیں داستانے کہ آئی ءَ گوں وتی شائری ءَ وت ءَ راجے پگر ءُ لیکھانی تہ ءَ وت ءَ زندگ کتگ ءُ راج ءَ اوں وتی شائر زندگ داشتگ ، آهوگ گل ءِ همک شیر پہ آهوکیں وهد ءُ نوکتریں جاوراں پنت انت ، پہ راجی جنز ءَ هست تاوانے بلاهیں وت ءَ زاهر کنگ ءُ پیشدارگ-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان اکیڈمی تربت ءَ عنقا پبلیکیشنز شال ءِ نیمگ ءَ چہ چاپ ءُ شنگ بوتگیں نمیرانیں شائر آھوگ گل ءِ کتاب کلیات آھوگ “آس سبزیں جنگلے ” دیمدرائی ءَ مراگشے اڈ دیگ بوتگ – مراگش ءَ ھر پڑ ءَ سیادی داروکیں مردماں بھر زرتگ – کلیات ءِ آھوگ ءِ اسٹال ءِ ھم جنگ بوتگ-

بلوچستان اکیڈمی ءَ برجم دارگ بوتگیں مراگش چار بھراں بوتگ کہ اولی بھر ءَ آھوگ گل ءِ زند ءُ ازم ءِ سرھال وتی ھیال دیوان ءِ دیم ءَ درشان کُتگ انت ءُ دومی بھر آھوگ گل ءِ زند ءُ شائری ءِ بابت ءَ یک ٹیبلویے دیوان ءِ دیم ءَ پیش کنگ بوت- مراگش ءِ سیمی بھر گشتانکی اَت کہ آئی ءِ تہ ءَ عمران حاصل، الطاف بلوچ ءُ سلیم ھمراز ءَ آھوگ گلءِ شئرانی ءِ جتا جتائیں تکانی سر ءَ وتی ھیال درشان اتگ انت – چریشی ءَ پد مراگش ءِ چارمی بھر ءَ شئر ءُ شائری کہ بلوچی ءِ زبان ءِ نامداریں شائر مبارک قاضی ءِ پاگواجھی ءَ بندات کنگ بوت – شائری دیوان ءَ ندیم اکرم، سیلم ھمراز، الطاف بلوچ، حمل امین، علی چراگ، یونس واھگ، پزیر جی ایم ءُ راشد حسرت ءَ وتی وتی شئر ونت انت – شائری دیوان ءِ جارچین عابد علیم ات ءُ مراگش گڈسر ءَ بلوچ اھوالکار طارق مسعود ءَ مراگش ءَ اتکگیں مھماناں ءَ آھوگ گل ءِ کتاب یک یک کتابے سوگات کت انت ءُ عابد علیم ءَ مراگش ءِ آسری ءِ جار پرّینت-

بلوچ نیشنل موومنٹ ءِ سرکماش خلیل ءَ گْوشتگ کہ ریکوڈک مڈی بلوچ ءِ راجی مال ءُ مڈی اَنت بلوچ راج ءِ رازی بیگ ءَ ابید ھرچ ڈیھ ءُ شرکت ءِ بھا زورگ درکانودی ءُ در کِردانکی یے زانگ بیت۔کینیڈا ءِ شرکت بیرک (Barrick) گوں زورگریں پاکستان ءَ وتی کُرتگیں مُسام ءِ سر ءَ چار ءُ گُزار بہ کنت۔

چیئرمین خلیل ءَ گْوشتگ کہ ما جنگی جاورانی تہ ءَ گْوزگ ءَ ایں ءُ مئے جنگ پہ وتی راجی آجوئی،راجی ھستی،راجی پجار ءُ پہ راجی مڈیانی واستا اِنت۔ پاکستان یک زورگریں ڈیھے آئی ءَ مئے سرڈگار دستیگ کُرتگ بلے ما یک راجے ءِ بستار ءَ یک زورگرے ءَ ھچبر اے موکل ءَ نہ دے ئیں کہ آ مئے مڈیاں بھا بہ کنت۔

آئی ءَ گْوشتگ کہ پاکستانی زورگری ءِ بگیری ءَ بلوچ راجی جُھد ءِ میان ءَ دری باپارانی باپاری کنگ وھد ءِ زیان کنگ اِنت۔ چہ بیرک گولڈ شرکت ءِ دیم ءَ آمیدگس ءَ کیس ءِ بےسوب بیگ ءُ میارباری زرانی دیگ ءَ یکبرے پد ءَ بلوچستان ءِ مڈی ارزان ءَ بھا کنگ بیگ ءَ اَنت۔بلوچ راج ءَ ھر زورگر ءُ لُٹ ءُ پُل کنوکانی بگیری کُرتگ۔ کینیڈا ءُ آئی ءِ بیرک گولڈ شرکت ءَ گْوستانک چارگ ءُ راستی زانگ ءُ چہ چوشیں شوربندی ءُ مُساماں وت ءَ گستاہ بہ دار ایت۔ شرپمندیں ڈیھانی شرکت یک زورگِپتیں دمگے ءَ باپاری مہ کن اَنت۔ بلوچ راج ءِ مہ کن کنگ ءَ ابید اگاں یک شرکت یا ڈیھے ءَ پاکستان ءِ گون ءَ ھوار بوت ءُ بلوچ ءِ مڈیانی لُٹ ءُ پُل کنگ ءِ مُسام کُرت گڑا بلوچ راج ءَ وتی مڈیانی پھریزگ ءِ ھک ھست اِنت۔

آئی ءَ گْوشتگ کہ دری ڈیھ ءُ میان استمانی شرکت سرپد بہ بنت کہ بلوچ راج ءَ شست بلین ڈالر ءِ سی پیک شوربندی بےسوب کُرتگ۔پہ سی پیک شوربندی ءِ سرجم کنگ ءَ پاکستان ءَ چین ءِ کمک ءَ بلوچ راج ءِ چِکچینی کُرتگ بلے چہ ایشی ءَ ابید انگت بلوچ راج پروش دات نہ کُرتگ۔بلوچستان ءَ پاکستان ءِ پروش ورگ آئی ءِ کسمت ءَ اِنت۔پاکستان ءِ دُرسیں شوربندی بلوچستان ءَ بےسوب بیتگ اَنت ءُ دیم ءَ ھم آئی ءِ ھمک شوربندی ابید بلوچ ءِ رازی بیگ ءَ بےسوب بنت۔

چیئرمین خلیل ءَ وتی درشان ءِ گُڈی ءَ گْوشتگ کہ ما چہ کینیڈا ءِ سرکار ءَ دزبندی کن ایں کہ آ وتی شرکت ءَ پابند بہ کنت آ زورگِپتیں بلوچستان ءَ باپاری مہ کنت۔

بلوچستان ءِ ضلع ھُزدار ءَ یک کسان سالی ئیں جنکے سیاھکاری ءِ نشانگ کنگ بوتگ-

سربوتگیں ھالانی رِد ءَ ضلع ھُزدار ءِ دمگ سنی گنبدی ءِ ھند ءَ سے مردماں کسان سالی ئیں جنکے ءِ گوم ءَ زورانسری سیاھیکاری کتگ-

سنی گنبدی ھُزدار ءِ نندوک محمد اسلم ءَ صدر پولیس تھانہ ھُزدار ءَ ارزبندی نکش کتگ کہ گوستگیں روچ ءَ 21 مارچ ءَ آئی ءِ جنک نزیکیں ھمساھگ ءِ لوگ ءَ آپ ءِ ھاتر ءَ بوتل زرتگ ءُ درتکگ ءُ آئی بوتل پُر کتگ آ لوگ ءَ چہ واتر پیداگ بوتگ کہ سے کُتکار شاہ زیب ء عبدالخالق ٹَک بارانزئی ، یحیٰ ء عبدالوھاب ٹَک بارانزئی ءُ بلال ء زمان خان ءَ زورانسری آئی ءِ سینزدہ سالی ئیں جنکو چست کتگ ءُ نزیکیں زمان خان ھالیگیں لوگ ءَ برتگ ءُ اود ءَ سیاھیکاری ءِ نشانگ کتگ –

پولیس ءَ جنکوے ءِ پت رپورٹ ءَ سے ئیں کُتکارانی بگیری ءَ ایف آئی آر نکش کتگ ءُ سے ئیں کُتکار دزگیر کتگ اَنت-

زانگ بہ بیت گوستگیں روچاں ھُزدار ءِ دمگ نال ءَ یک جنکے کُشگ ءُ آئی ءِ جان ءِ بھر ءُ میدانی چنگ ءُ بُرگ ءَ پد لاش آپ چات تہ ءَ دور داتگ-

دمگی انتزامیہ ءَ وئیل جاہ ءَ سر بوتگ ءُ آپ چات ءَ چہ جنک ءِ لاش درکُتگ ءُ کُشکارانی پٹ ءُ پول بندات کتگ ءُ ساری آئی ءِ لوگ واجہ منظور احمد ء نور محمد سمالانی جھمنند مال زراغو دزگیر کتگ ءُ پٹ ءُ پول بندات کتگ-

گُڑا ھمے پٹ ءُ پول ءِ میان ءَ کُشگ بوتگیں جنین ءِ لوگ واجہ ءَ منّ اِتگ ءُ گْوشتگ کہ جنک ءِ کوش ءَ منی مات مسماة لوگ بانُک نور محمد ءُ منی یک سیادے سیف اللہ ء محمد عالم سمالانی ھوار اَنت، چریشی ءَ پد لیویز ءَ ڈپٹی کمشنر ھُزدار گوشگ ءِ پد ءَ گامگیج زرتگ ءُ جنک ءِ ترو مسماة ءَ دزگیر کتگ- وھدے کُتکار سیف اللہ ء محمد عالم کوش شپ ءَ تتکگ-

سربوتگیں ھالانی رِد ءَ بلوچستان ءَ دو جتائیں اشکرانی چات ءَ تراک ءَ چہ ءَ کاریزکار زدگ بوتگ انت –

اولی وئیل شال ءَ ہنہ اوڑک ءِ دمگ زرغون غرکی ءِ اشکرانی چات ءَ زھریں گیس ءِ پُر بوھگ ءَ سَے کاریز کار دمتوس بوتگ انت کہ آھانی پجار سید محمد، محمد سلیم ءُ جمیل ءِ ناماں چہ بوتگ انت –

دومی نیمگ ءَ چمالنگ ءِ دمگ مری لیز ءَ ھم گیس پُربوھگ ءَ سَے کاریز کار نقیب اللہ، عبدالفائق ءُ یارمحمد زدگ بوتگ انت کہ ھما دمان ءَ چات ءَ چہ کشگ ءُ شال ءِ بی ایم سی نادراھجاہ ءَ سر کنگ بوتگ انت –

ھردو وئیلاں زدگ بوتگیں کاریزکارانی تہ ءَ دو ءِ جاور نگیگ انت –

بلوچستان ءَ ھمک وھد ءَ اشکرانی چات ءَ وئیل بوھگ ءَ انت وھدیکہ گوستگیں روچ ءَ دکی ءَ اشکرانی چات ءَ میتھین گیس ءِ پُر بوھگ ءَ تراک بوتگ چریشی ءَ سَے کاریز کار زدگ بوتگ انت –

مزدور گلانی گوشگ انت کہ اے وئیل ھمے سوب ءَ بوھگ ءَ انت کہ سھولیات نیست اِنت ءُ اے وئیلانی آماچ بوتگیں گیشتریں مردمانی سیادی ھمساھگین ڈیھ اوگان، دمگی انت –

مزور گلانی گوشگ انت کہ اشکرانی چاتاں وئیلانی درچ برجاہ انت وھدیکہ واکدار ءُ کاریزانی مالکانی نیمگ ءَ ھچ وڈیں گامگیج زورگ بوھگ ءَ نہ انت وھدیکہ مزور وتی کمک ءَ وت کنگ ءَ لاچار انت –

بلوچستان ءِ بنجاھی شھر شال ءَ بیگواھیں مردمانی پانکجنیں گل وی بی ایم پی ءِ زھرشانی برجاہ، زھرشانی ءَ مروچی چار ھزار ءُ شش سد ءُ بیست روچ سرجم بوتگ انت – زھرشانی بنجل ءَ بانک ھوران بلوچ، ورلڈ بلوچ پیپلز کانگریس ءِ ڈاکٹر عبدالحکیم لہڑی ءُ کامریڈ جلیلہ حیدر ءَ بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشانتگ –

وائس فار بلوچ مسنگ پرسنز ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ اے دنیائے تہ ءَ بازیں مردمے وتی کرد ءَ پیلو کن انت کہ آھانء کتگیں کار ھچبر شمشکار نہ بنت، ھنچیں مردم کہ بید آھانی ستا ءَ مردم ءَ آرام نئیت – چوناھی ءَ ھر راج ءِ تہ ءَ چشیں مات ءُ چُک ودی بنت کہ آھانی کرد ستاکرز انت – اگاں چارگ بہ بیت بلوچ راج ءِ تہ ءَ ھم چشیں چک ءُ مات ھست انت مھکمی ءَ گوں اشتاتگ انت مکابلہ کنگ ءَ انت وتی کاروان ءَ دیم ءَ برگ ءَ انت مروچی بلوچ پرزندانی یل کنائینگے پُرایمنیں جھد ءِ تہ ءَ ھم ھنچیں مات ءُ چُک ودی بوتگ انت کہ ھر وڈیں سکی ءُ سوری گرم ءُ سارت اوپار کن انت ءُ وتی جھد ءَ گوں دلگوش انت –

ماما قدیر بلوچ ءَ دیمتر ءَ گوشتگ کہ وھدیکہ انسان گلامی ءِ زمزیلاں پُروشت نہ کنت آ گلام ءُ ایردستیں راج یے مئے گلامی ءُ بے وسی ءِ اندازگ اے گپ ءَ چہ پدر انت کہ مروچی مئے دیم ءَ بلوچ راج ءِ تمردیں ءُ بے وسیں چُک انت مروچی مار ءَ وتی گلامی حیثیت اندازہ بوھگی انت – مروچی بلوچانی زمیر پرچہ واب انت ما زوراکیانی بگیری ءَ پرچا توار چِست نہ کنیں –

سربوتگیں ھالانی رِد ءَ سند ءِ مزن شھر کراچی ءَ سلاہ بندیں مردمانی تیرگواری ءَ بلوچستان ءِ جھمنند ءَ ھوار دو مردم بیران بوتگ انت –

گیشیں ھالانی رِد ءَ کراچی ءَ انگلش بوٹ ہاؤس ءِ نزیک ءَ سلاہ بندیں مردماں دو مردم تیرباران کُتگ ءُ تتکگ انت چریشی ءَ ھردو مردم بیران بوتگ انت – بیران بوتگیں مردمانی پجار عبدالرحمان ءُ چاند خان ءِ نام ءَ چہ بوتگ انت –

پولیس ءِ رِد اے ٹارگٹ کلنگ وئیلے ھردو مردم پرپٹ ءَ سوار بوتگ انت – پولیس ءِ گوشگ انت وئیل جاہ ءَ نائن ایم ایم پسٹول ءِ تیرانی سَے پشنگ دست کپتگ –

پولیس ءِ رِد ءَ اُرشکاراں آھانی رندگیری کُتگ ءُ اتکگ انت – وھدیکہ عبدالرحمان محکمہ تالیم بلوچستان ءِ کاردار یے ءُ چاند نیازی گوستگیں پولیس اپسر ءِ بوتگ ءُ چاکیواڑہ ءِ گوستگیں ایس ایچ او بوتگ وھدیکہ چاند نیازی لیاری گینگ وار ءِ مستر ارشد پپو کوش ءَ ھم نامزد بوتگ –

بلے تنی وھدی ءِ کوش ءِ درگت ءَ ھچ وڈیں سرپدی نہ رستگ کہ کجام سوب ءَ اے مردم کُشگ بوتگ انت ءُ اشانی کُشندہ کئے انت –

نبشتانک: کولواہ سھر بازار ءِ وانگجاہ

نبشتہ کار امجد بیکس

دی بلوچستان پوسٹ

سھربازار بلوچستان آواران ءِ میتگے انت ءُ کولواہ بُندپتری درگت ءَ آواران ءِ کْوھنیں نام اِنت انیگیں وھد ءَ آواران بلوچستان ءِ ھما ڈسٹرک اِنت کہ اود ءَ ھچ بُنکی اسراتی نیست اَنت ۔ انچوش کہ انسان ءِ بُنکی اسراتیاں چہ یکے آپ ءُ نگن اِنت ، دومی وانگ ءُ زانگ اِنت ءُ سیمی دُرھجاہ ءُ ھسپتال اِنت بلے کولواہ سھربازار چہ ایش بُنکی اسراتیاں زبھر اِنت ۔

من ءَ یاد اِنت وھدیکہ 24 ستمبر 2013 ءَ بیگاہ ءِ کساس سَے ءُ چار ءِ ساھت ءَ کولواہ ءَ ھوار مکران ءَ مزنیں زمین چنڈے بوت ۔ اے ساھت ءَ من ڈیلٹا سنٹرتربت ءَ وتی ھم تبکاں گوں ھوار کوٹی ءَ وانگ ءَ اَت اَنت وھدیکہ گُلزمین ءَ مزنیں جٹکایے دات ما نودربر چہ کوٹی ءَ زوت دراتک اِیں ءُ ڈن ءَ درکپت اِیں ھیر اود ءَ وَ جان ءِ مزنیں تاوان نہ بوت بلے رند ءَ من چہ ھبر ءُ ھالاں ، چہ مردمانی گَپ ءُ تراناں اِشکُت کہ سرجمیں کولواہ ءَ اے زمین چنڈ ءَ مزنیں نُکس ءُ تاوانے داتگ پد ءَ ھمے زمین چنڈ دو ءُ سَے روچ ءِ سر ءَ جٹکا دیاں داں کساس سالے ءَ جٹکا دات ئِے ۔

کولواہ سھر بازار ءِ مردم سکیں وار ءُ مِسکینیں مردم اَنت ، دو وھد ءِ نگن اش کدی بیت ءُ کدی نہ بیت بلے آیانی لوٹ ءُ واھگ ھمیش اَنت کہ آیانی زھگ بہ وان اَنت ءُ دنیا ءَ پوہ ءُ سرپد بہ بنت ۔

سھر بازار میتگ ءَ سرکار ءَ دوھزار (2000) ءِ وھد ءَ یک کسانیں وانگجاھے ٹاھینتگ اَت بلے بدبھتی ءَ چہ ھمے وانگجاہ 24 ستمبر 2013 ءَ زمین جُمب ءَ وتی ھرجان جَت ۔ گونڈوانی وانگ ھم اوشت ءِ آماچ بوت ۔ بلے چہ وانگجاھے ڈرگ ءُ کپگ ءَ پیش سوجکار کدی اَتک اَنت ، زھگ اش وانینت اَنت ءُ کدی نہ اَتک اَنت ۔ البت چہ ھمے مزنیں زمین چنڈ ءُ بلاھیں آپت ءَ رند وانگجاہ ڈراِت ءُ کپت ۔

سھر بازار ءِ گونڈوکیں چُکان ءَ وانگ ءِ سک ھُب ءُ واھگ اَست آ لوٹ اَنت کہ ما بہ وان ایں بلے آیاں ٹیچر ءُ وانگجاہ نیست اِنت بلے نوں لھتیں روچ بیت کہ سھر بازار ءِ لھتیں نوجواناں وتی کُمک ءَ وت گونڈوانی وانینگ بُنگیج کُرتگ ۔ بلے بژنی ھبرے کہ نئے گونڈواں ءَ اُستاد ءُ سوجکارے ھست، نئے پہ وانگ ءَ کتاب ءُ کلمے ، نئے پہ نندگ ءُ وانگ ءَ وانگجاھے ، نئے پہ سر ءِ چیر دیگ ءَ کوٹی ءُ ساھگے اَست ۔ داں کہ گونڈلیں نودربر یک کوٹی یے ءَ بہ نند اَنت ءُ بہ وان اَنت ۔ وتی واباں سرجم بہ کناں اَنت ۔

ما چہ سرکار ءُ بلوچستان ءِ وزیر تعلیم ءَ ھمے اوست ءُ اومیت کن ایں کہ آ زوت وتی دلگوش ءَ اے نیمگ ءَ گْور کن اَنت ءُ سھربازار ءِ وانگ ءُ وانگجاہ ءِ جیڑہ ءَ گیش ءُ گیوار کن اَنت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔