TBP Balochi

پازلءِ ھند ءِ پھری ئیں پرزند، شھید کپٹن آدھم بلوچ

نبشتہ کار: قدیر ساگر

دی بلوچستان پوسٹ

2009 ءَ شھید گلام مھمد ءِ شھادت ءَ پد وھدے بلوچستان ءَ ریاستی جبر ءُ زلم گیش بیت انت‌ گڑا سیاسی سنگتانی یک نہ کٹوکیں زورانسری گر ءُ بند و مسخ شدہ لاشانی دور دیگ ءِ سلسلھے بندات بیت۔ بازیں سنگتے شھید کنگ بیت بازینے چہ ڈیھ ءَ درانڈیھ کنگ بیت ءُ بازینے روچ ء مروچی گار ءُ بیگواہ دژمن ءِ ٹارچر سیل ءُ زنداناں بند انت۔ راجی جنزانی تھ ءَ چشیں سکیں ساھتاں اسیلیں بامرد ھما لیکگ بیت کہ وتی راج ءِ تھ ءَ بہ مان ایت ءُ راجی زمہ واریاں پیلو بہ کنت آ کارست راجدپتر ءَ مدام گیر آرگ ءُ یات کنگ بیت۔ چرا کارستاں یکے شھید گلام مھمد ءِ ھنکین ءِ اسیلیں زمین زھگ کپٹن آدھم ات،کہ زورگریں پاکستان ءِ واکدارانی نیمگ ءَ چہ وھدے ھر روچ سیاسی سنگت ءُ دوزواھانی لاش کور ءُ چاراھاں دؤر دیگ بوگءَ ات انت گڑا کپٹن ءَ راجی جنز ءِ سنگتاں گوں انچیں نزیکی یے برجم داشت کہ اے نزیکی ءُ ھمگرنچی داں گڈی ساہ ءَ برجاہ اَت۔ من ءَ یات ِانت 2014 ءَ وھدے شھید ڈاکٹر منان مند ءَ گوبرد ءَ پارٹی دورھے ءَ اتکگ ات گڑا سنگتے ءَ من ءَ کلوہ کتگ ات کہ تو وت ءَ پلاں وھد ءُ پاس ءَ سر کن, اے وھدی ریاست ءِ زلم ءُ جبرے یک انچیں چاگردے ٹہ اتگ ات ھر میتگے ءَ پد چک پوسٹے پہ وش اتک ءَ ساڑی ات۔اے وھد ءَ مئے بازیں سنگتے ھم ھاموش سرینڈر بیتگ ات ءُ اچ ما وت ءَ ڈسکنکٹ ایش کتگ ات ھنکین ءَات انت بلئے انچوش ات انت گشئے اد ءَ نہ َاَنت۔ من کپٹن کلوہ کت کہ روگی ِانت گوبرد ءَ منان جان اتکگ کپٹن جاوراں شر پوہ ات بلئے وتی زمہ واری ءَ چہ پراموش نہ ات ۔دمان ءَ گشت ئے تیار بی من پیداکاں ,من گشت راھانی ھال ءَ سھیگ ئے؟ کندات ءُ گشت ئے ,,پنجابی مئے زمین ءِ دراہیں راھاں ُتری بہ بندیت جنز ءِ کارانی ھاترا راھے پیداک کنگی ِانت۔ ,, ما شت ءُ ڈاکٹر دیوان کت ءُ سنگت دیست اَنت , آدھم ءِ کارکردگی ءُ سرگرمیانی سوب ءَ ھمے دیوان ءَ آ بی این ایم مند ھنکین ءِ بلو یونٹ سکریٹری گچین کنگ بوت۔

کپٹن مدام پہ چاگرد ءَ گموار ات لیب ءُ گوازی ءِ دیمروئی بہ بیت یا چاگردی ایندگہ کارانی جیڑھاں دیم آرگ ءُ راج ءَ چرا جیڑهان آشنا کنگ ء‌ُ آ جیڑهانی گیش ءُ گیواری ءَ پہ ساڑی کنگ کپٹن وڑے نا وڑے ءَ وتی بھر ءِ زمہ واری ءَ پیلو کنگ ءِ جھد ءَ ات ما دلجم اتیں مئے درانڈیھی ءَ پد کسے ھست کہ پہ ھک ءُ دل گوں ایمانداری راجی کاراں ھنکین ءَ دیما برگ ءَ انت۔ کپٹن راج ءَ گوں ھمکوپگ ات, راج ءِ گژن ءُ بزگی ءَ مارگ ءَ ات, بٹاکی ءُ وتگڑیں میر ءُ وزیرانی شِر ءَ پاشک کنگ ءَ ات مھلوک ءَ زانت ءُ آگھی دیگ ءَ ات بازیں رندے ءَ سرکاری چانیگواراں کپٹن ءِ شکایت ھم چہ پنجابی ئیں واجہ ءَ کتگ ات کہ کپٹن مئے راہ ءِ ڈنگر انت مئے کد ءَ مھلوک ءَ آشنا کنگ ءَ اِنت باز رندا قبضہ گیریں لشکر ءِ واکداراں آدھم تریٹ ھم کتگ ات کہ راجدوستی ءِ راجکاری ءَ دست کوتاہ بہ بیت بلئے آدھم ءَ سرڈگار ءُ راج ءِ ھزمت وتی ارواہ ءَ گیش ارزشت داتگ ات ءُ پدکنز نہ بیت۔ کپٹن ءِ یک شری یے ءُ سادگی یے ایش ات کہ ھروڑیں مردمے بیتیں مدام دیم پہ دیم تچک ءَ وتی گپی گشت تری آ ریاست ءِ واکدار بیتیں یا آئی ءِ بها زرتیں چانیگوار,ھمے تمرد ءُ بامردین سپت کپٹن ءِ کوش ءِ سبب جوڑ بیت ،ریاست ءُ آئی ءِ دلار چہ کپٹن انچو ترس ات انت کہ کپٹن ءِ ھست بوگ پرآیاں مرگ ءِ بےتواریں بیھارے ات، گڈی ءَ ریاست ءَ 27 جنوری 2022 ءَ زرھریدیں ڈیتھ اسکواڈ ءَ اے زمہ واری دات کہ شما کپٹن ءَ شھید بکن ات۔بلئے ریاست گوں دلاراں اے گپ ءَ پراموش ات کہ مرگ راجی بامرد ءَ کشت نہ کنت بلکیں نمیران کنت۔مرچی کپٹن جسمانی دروشم ءَگوں ما یکجاہ نہ انت بلئے آئی ءِ جھد ءُ کربانی یک چیدگے پہ ھما پرزنداں کہ زمین ءَ وتی مات گش اَنت ءُ مات ءِ ننگ ءِ پهاز ءُ وتی ساه ءُ سرانی پرواه ءَ نہ دارانت-

بلوچءُ بلوچستان آجو بات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

کسانیں چمشانکے مُنیرمومن ءِ شاعری ءِ سر ءَ

نبشتہ کار: عمرمراد

دی بلوچستان پوسٹ

مئے لبزانک ءَ رواجے ٹھ اتگ کہ ھر ازمکارے ءِ سر ءَ کہ نگد کاری بیت گُڑا الّم آئی ءِ ازمی بالاد ءَ ایر جن انت ءُ زاتی زندگی ءِ سر ءَ ہم ایراد گِر انت ءُ دومی ھبر ایش اِنت کہ ھر وھد ءَ دو ازمکار گِچینکاری ءَ اوشتارین اَنت یکے ءِ ازمی بستار ءَ بُرز کن اَنت ءُ دومی ءَ جَہل جن انت منی نِزّا اے نا گوں ازمکار ءَ انساپے بیت ءُ ناکہ نگد ءِ ھَک اد ءَ بیت نگد کار بائدیں ازم کار ءِ ازمی کَد ءُ بالاد ءَ بہِ گشین ایت وانوک ءَ کمو باز ہما ازم ءِ باروا سرپدی بِہ دنت آسان تِری بیار ایت بگندئے من رد بباں چیاکہ من ءَ نگد ءِ باروا چُشیں سرپدی یے نیست ءُ نہ من نگدانکی زنڈیں کتابے ونتگ یک یک نبشتانکے ونتگ ھو ، بلے من ءَ نگد ءِ باروا بازیں سرپدی نیست-

من مُنیر ءِ شاعری ءِ بابت ءَ اے چاریں دانکانی نبشتہ کنگ ءَ آں پمیشکا لاچاراں کہ مُنیر ءِ شاعری منی ارواھ ءِ تاراں سُرین ایت منی باتِن ءِ زبان ءَ گوں ہم زُبان انت منیر ءِ شئیراں واناں یا اِشکناں منی دل ءَ گوں زندگی ءَ گپ جنگایاں چو کہ من زندگاں من ءَ ساھے مان انت الّم گوں زندگی ءَ من ءَ گپ جنگ لوٹ ایت بلئے من زندگی ءِ جُست ءُ پُرساں سرپد نہ باں وھدے مُنیر ءَ واناں گڑا دلجم باں کہ ھو من ءُ زندگی ہمنیادیں من ہما وھد ءَ کہ نوک ورنا ءُ نوک بروت شنزاَتاں من ءَ ھچ آرام ءُ تاہیر رَسَگ ءَ نہ ات سرسر جنان اتاں نہ زانت چے بکناں؟ کُجا بُرواں میتگ ءِ دمکاں بے اِرادگ گَردگ ءَ اتاں یک لوگے ءِ پُشت ءَ دِرتگیں ماہتاک بلوچی یے کپتگ اَت گیشتر تاکے گار اَت انت بس کمو تاکے مان ات من سرسری چار ات تاں من اے کتاب ءِ وانگ ءَ زانگاھاں گُڑا من ہمے ماہتاک زُرت شُتاں لوگ ءَ وتی ھر پالام کُت سوار بوتاں تچک ءَ وتی ڈگار ءَ ۔ڈگار ماک، ماش، کڈّب ات موسم نود ات سائلہ ات من ماکانی توک ءَ نشتاں ماکاں سبزیں پُل پرِات نرمُکیں کؤشے کشّگ ءَ اَت ہمے ماہتاک بلوچی ءَ کَڈ ءِ بَڈ ءِ وانان بوتاں تاں یک شئیرے ءَ منی چم کپت انت-

“اے باگ ءِ پُل بلوٹ انت دلاں ھسار کن اَنت”
“منی ھیالاں گوں تئ مہلباں دُچار کن انت”

نوں ادا بِچار مُنیر ءِ شئیر ءَ منی ارواھ ءِ تار سُرینت انت منی ھیالے گوں تئی مھلباں دُچار کُت انت ۔ہما مردم کہ گُش انت مُنیر ءِ شاعری پھمگ نہ بیت آمردُم گڑا بلکیں زندگی ءَ نہ پھم اَنت ھو بزاں اد ءَ یک گپے اَست مُنیر واز نہ کنت، نارہ، اوگام نہ جنت، ھکَل نہ دنت، ھُکم نہ دنت مُنیر یک پاک ءُ پلگاریں شائرے پمیشکا پاک ءُ پلگاریں شئیر گُش ایت منیر پہ مردمانی اے گپ ءَ وتی ازمی بالاد ءَ جھل نیار ایت منیر وھد ءِ ھم گام انت کسے وت ءَ را رسینت کنت وَ زندگی ءَ گند ایت اگاں نہ گُڑا پشت کپتگ یک انسانے ءِ دل ءِ تہ ءَ غم اندوہ درد ءُ دور بہ بیت آئی ءِ چھر گ گیمُر ایت آئی ءِ پیشانی کِرچک تَرّ ایت ءُ بازیں درد ءُ رنج وئیل ءُ واکیہ انسان ءَ ھبر زانت، شائر ءُ ازم کار ہم جوڈ کن انت ۔

“دلانی درد چہ پیشانی ءَ ھوں پدّر بنت”
“جبین ءِ داگ زُبان ءَ ھوں نامدار کن انت”

ما زندگی ءِ وھدے گپ ءَ جنیں گڑا زندگی ایوک ءَ سیاست، اِبادت، روزگار ءَ نہ گُش انت ھنچو کہ منّگ بیت ادب زند ءِ آدینک انت گڑا زند ءَ باز رنگ مان ۔ ما اے گپ ءَ بجیڑیں کہ مردم پرچا شئیر وانیت یا گوں سازاں گوشدار ایت، تچکیں گپے کہ ما سؤت ہمے واستا گوشداریں کہ مئے مارشتانی زبان انت ما ہمے گپ ءَ گوں دُنیا ءَ گوں دومی مردُماں جت نہ کنیں یا درانگاز کُت نہ کنیں ھمے گپ ءَ شائر بیان کنت آ مئے کُلانی زبان بیت کسے ایوک انت نشتہ جیڑگ ءَ انت وتی گوم ءَ یاھدا ءِ گوم ءَ پریات کنگ ءَ انت بلئے آ نہ زانت من چے بُگشاں ،شپاں مردم ءَ را ترانگے ءِ کیپ ءِ ھُمار الّم ءَ گون جنت، ہرکس اے لوٹ ایت کہ منی سُھباں مھروانیں بچکندے بِرَس ایت چوں وش انت اے زندگی انت ھر زندگیں مردم ءَ اے مارشت ھست انت ۔ وھدے کہ مُنیر ھمے مارشت ءَ درانگازیت پد ءَ نُورخان بزنجو ھمیشی ءَ الھانیت گڑا منی دل ءَ منی تب ءِ درشان انت تئی دل ءَ تئی تب ءِ درشان انت-

“شپاں تئی ترانگءِ کیپ ءِ ھُماریں کدّہ پکارانت”
“منارا پہ وتی سُھباں تئی بچکندگے کار اِنت “
“سباھاں زھیر پِربندیت شپاں چوں سوز الھانیت “
“کَئے انت اے نادُراہ اشک ءِ کَئے انت کہ اینچو بیمارانت”

یک مردُمے ءَ دگے دوستیں مردمے است یاکہ پیسرا بوتگ نوں چرائی ءَ جُدا بوتگ یا دگے کُجام سوْبے ءَ آمردم وتی ارواھ ءِ بھر ءَ چہ گستا ءُ دُور انت آہمک روچ ھمُک سھت ءُ دمان بس گوں ہمائی ءِ زھیر ءُ ترانگاں دُچار انت باریں چینچو سال، ماہ ءُ روچ گْوستگ انت اے مردم ءَ ہرپئیمیں جُھد کُتگ بلئے گِندک ءُ دیدار ءِ ھچ وڑیں درے پچ نہ بوتگ اے بزّگ ءِ زند ءِ توامیں ارمان گوں ہمائی ءَ بندوک انت اے اگاں جنگے ءَ انت، کارے ءَ انت، زند ءِ ھرکُجام نَپَس گیریں پِڑ ءَ انت اشی ءِ ارمان واھگ پہ ھمائی ءِ نیاداں زَر اَنت نادَس رَس اِنت ۔ یک روچے موسم سک زیبا ات بیگاھ ءِ وھد ات جمبری پُٹّے ھم دراتکگ اَت آ کؤرے ءِ لمب ءَ نشتگ سبزیں جنگل لُڈگا انت کپوتانی کُوکُو ءُ الھانانی توار ات- دُوریں کوہ ءِ سر ءَ جمبر بوسہ دیان ات اے وڑیں ساھتاں الْم ءَ دوست ءِ نیادانی بے کساس تلب بیت آ دل ءَ گُش ایت گندئے انوں آ گون ببوتیں پد ءَ ھمے دمان ءَ آئی ءِ دل آئی ءَ پسّہ دنت کہ نبوتگیں گپے ھونیں ارس چہ آئی ءِ چماں جھلاد بنت ءُ زبان ءَ اے شئیر کیت۔

“زُلپ بوئیں بیگھے ءِ دامُن ءَ نیاد ءِ تلب “
“زاناں گیشتر لوٹ اِتگ مرچی چہ بستار ءَ وتی”

مُنیر ءِ درد سنگینیں ھیال زیبا انت گال بند پُرزیمر ءُ واناک انت منیر سنگینیں دردانی زیبائیں ھیال ءِ وشبوانی زیمریں گالوار ءِ شائرے منیرشئیر گُش ایت زندگی تران انت منیر ءَ کُلیں انسانی درد وتی ارواھ ءَ دوتکگ انت منیر ہمُک اھد ءِ زُبان جوڑ بوتگ منیر ءَ زہم ہر شپ واب ءَ گند انت منیر وت ءَ را بے میار نہ کنت منیر گُش ایت من وتی اھد ءِ جوابدِھاں ہرکسی شرّی ءُ ھرابیانی جُست مناکنئگ بنت کُلیں ارواہ منی تہ ءَ واپس اَنت چہ ھمُک کبر ءَ پاد کاھاں من
وھدے دُنیا ءِ زورآور پہ نِزورانی ڈیھانی گِرگ ءُ وتی کنگ ، مال ، مڈّی ءُ زِرانی پچگرگ ءِ ھُنر سازی ءِ کار ءَ بندات کن اَنت مُنیر وتی زمین ءِ بَرگ راج ءِ جنگ کُشگ ءَ چم وت گند ایت وتی نادرسی نزوری ءَ ہم سرپد انت بس موتک کاریت-

“من اشکُتہ کہ شھراں رنگ ءُ روگِنیں”
“کلوہ کُتگ ترا منی وتن منا تو دل نہ بئے”

“منی وتن گوں ہیر ءُ زاپِرنیں نوبتاں”
” پہ جنگلے ءَ سرگِرئے منا بُزور گوں “
“من ایوک ءَ ملُور باں”

وتی راج ءِ سیاست، زانت ءُ، زورءَ گند ایت ،بندات ءَ کہ دُژمن دیمروئی ءِ نام ءَ بلوچ سرڈگار ءَ کار ءَ بندات کنت بلوچ ورنا ءُ سیاست دان ھنچو پہ ھِیراں بُوستی جاہ جن انت ھر ورنا سیاھیں دزمالے گُٹّ ءَ کنت بُکشاں کوپگاں ایر کنت آشوبی ،، نارہ ،، اوگام جنان کنت بلئے راھبرانی نیمگ ءَ چہ نہ کہ دلجمیں جنگی سِلاہ ءُ سامانے جم کنگ بیت نہ جوانیں راھبندے ٹھینگ بیت کہ کُجام وھد ءَ کُجام رنگ ءَ جنگ یا سیاست کنگ بہ بیت مئے ڈیھ رَک اِت بکنت ءُ نہ کہ ورنا ءُ وانِندھان ءَ پہ دائمی راجکاری ءَ تیار کنگ بیت پمیشکا مُنیر گُش ایت منی راج ھچ سھی نہ بوتگ اے جھانی بدلی اتکگ ما بائدیں باز وھد ءَ ساری اے وھد ءِ تیاری بُکُتیں بلئے ما سئیل ءُ سَواد ءَ دست گَٹّ بوتگیں لئیب ءَ بوتگیں ۔

“تیر پہ مُرگاں ایر کُت انت ءُ زہم پہ سَواداں بیگاھ ءِ”
“ناگاھ گِپتگ داواھاں راجے سئیل ءُ شکارانی”
“کْوھنیں رنگءُ داباں بلوچ کَرن ءِ پُتینکاں پَشت کپتہ “
“چمّے انگہ زیمی دَجَنت ءُ بُکشے پناھَنت مارانی”

مُنیرمومن یک ابدمانین ءُ سرجمیں شائرے ءُ باز پُرمانا اِنت ھُمک اھد ءَ انسانی تب ءُ مارشتانی زُبان جوڑ بیت ءُ نمیران بیت نوکتر بوان کنت وھد ءِ دنز ءُ گُبار مُنیر ءَ چیر ترّینت ءُ گار کُت نہ کن اَنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

حمل ظفر آل ڈسٹرکٹ ناک آؤٹ فٹبال ٹورنمنٹ ءِ سیمی فائنل اولی گوازی شھید نادل جان تمپ ساچان سلالہ تربت ءِ میان ءَ مروچی گومازی وانگجاہ ءِ فٹبال پٹ ءَ کنگ بوتگ کہ ساچان تُربت ءَ یک گول ءَ گوازی کٹ اِتگ وت ءَ فائینل ءَ سر کُتگ –

گوازی ءَ ھردو ٹیمانی لیبیاں جوانیں گوازی پیش داشتگ ءُ ساچان تربت ءِ نیمگ ءَ چہ یک گول ءِ اسکور کنگ بوتگ کہ لیبی زباد ءَ داتگ

مروچگیں گوازی ءَ جوانین گوازی ءِ پیش دارگ ءِ داد زباد بلوچ ءَ رستگ –

ٹورنمنٹ ءِ سرکماش ظفر اکبر ءَ ھردو ٹیمانی لیبی دلبڈی داتگ ءُ اتکگیں مھمان ءُ گوازی بھرزورکیں لیبیانی منت گپتگ-

ٹورنمنٹ مروچیگیں گچینی مھمان تمپ ءِ اسیسٹنٹ کمیشنر صادق کبدانی ءُ میونسپل کمیٹی ءِ سرکماش کُہدہ مقبول بگٹی بوتگ انت کہ آھاں ٹورنمنٹ ستا کُتگ ھمے واھگ داشتگ کہ دیمتر ءَ ھم ھنچیں ٹورنمنٹ برجاہ دارگ بہ بنت –

اے ٹورنمنٹ حمّل ظفر فٹبال کلب ءِ چیردستی ءَ کسانسالیں ورنا ھدامُرزی حمل ظفر ءِ نام ءَ ایر کنگ بوتگ اشی ءِ تہ ءَ آل ڈسٹرکٹ ءِ بیست ءُ چار ٹیماں بھر زرتگ کہ آھانی تہ ءَ شھید نادل جان تمپ، ساچان سلالہ تربت ، حمل ظفر گومازی، ون اسٹار گومازی ءَ جوانی ءَ گوازی کنان ءَ وت ءَ سیمی فائینل ءَ سر کُتگ ءُ مروچی سیمی فائینل گوازی ءَ ساچان تربت ءَ یک گول ءَ باج بُرتگ گوازی وتی نام ءَ کُتگ –

سیمی فائینل ءِ دومی گوازی باندا حمل ظفر گومازی ءُ ون اسٹار گومازی ءَ میان ءَ کنگ بیت اِنت –

بلوچستان ءِ شھر شال ءَ پاکستانی پوج ءِ دست ءَ دو ورناہ آوار جنگ ءَ پد بیگواہ کنگ بوتگ اَنت-

وائس فار بلوچ مسنگ پرسنز ءَ زورانسری آوار جنگ بوتگیں ورناھانی گپ پدر کتگ-

پاکستانی پوج دست ءَ آوار جنگ بوتگیں ورناھانی پجّار عبدالباسط ء عبدالغنی ءُ گل زیب ء محمد عظیم ناماں چہ زانگ بوتگ اَنت-

اِھوالکارانی رِد ءَ عبدالباسط گوستگیں ماہ فروری ءَ شال ءِ دمگ جیور کالونی ءَ پاکستانی ایف سی ءُ چیریں ادارھاں لوگے ءِ سر ءَ بیڑبرتگ ءُ آوار جتگ ءُ گوں وت برتگ-

ھمے وڑ دومی ورناہ گل زیب ء محمد عظیم 20 فروری ءَ زور کلی شابو ءَ چہ پاکستانی پوج ءَ آوار جنگ ءَ پد بیگواہ کتگ- دوئیں ورناہ پاکستانی پوج ءَ ھما وھد ءَ چست کتگ اَنت وھدے بلوچستان ءَ زورانسری آوار جنی وئیلانی تہ ءَ اناگاہ گیشی اَتکگ-

زانگ بہ بیت گوستگیں ماہ ءَ بلوچستان ءِ جتا جتائیں دمگاں پنجاہ ءَ گیش مردم زورانسری آوار جنی ءِ نشانگ کنگ بوتگ اَنت لھتے پد ءَ آجو بوتگ بلے اشانی تہ ءَ گیشتر بیگواہ ءَ اِنت-

شال پریس کلب ءَ اھوالکاراں گوں تران کنان ءَ پیادگ روانک ءِ رھشون گلزار دوست ءَ گوشتگ کہ ریاستی ادارھانی دست ءَ آوار جنگ بوتگیں مردم کمی ءِ بدل ءَ گیش بوھان انت- اے وھد ءَ ماما قدیر بلوچ، غفار بلوچ ءُ بی ایس او ءِ رھشون زبیر بلوچ ءُ بیگواھیں راشد حسین ءِ مات ھم پریس کلب ءَ ساڈی بوتگ انت –

اھوالکاراں گوں تران کنان ءَ آئی ءِ گوشگ ات کہ دو دھک انت کہ بلوچستان ءَ ورنا، کماش زالبولانی زورانسری آوار جنی ءِ درچ ءَ گیشی اتکگ ءُ گوستگیں چاردہ سال انت کہ بیگواھیں مردمانی ھاتر ءَ وائس فار بلوچ مسنگ پرسنز ءِ زھرشانی بنجل برجاہ انت – بازیں سال ءِ بیت کہ وائس فار بلوچ مسنگ پرسنز ءِ چیردستی ءَ بیگواھیں مردمانی کھول زھرشانی کنگ ءَ انت ءُ دراجیں پند ءِ ھم جنگ بوتگ کہ شال تاں کراچی ءُ پدا اسلام آباد ءَ شُتگ انت بلے ریاست ادارھانی دست ءَ زورانسری آوار جنیانی تہ ءَ کمی آھگے بدل ءَ گیشی اتکگ –

آئی ءَ گوشتگ کہ بیست ءُ ھپت فروری ءَ تربت سول سوسائیٹی ءِ پیسلہ ءِ رِد ءَ پاد شپاد کیچ تاں شال ءَ روانک بندات کنگ بوتگ ءُ روانک سول سوسائٹی کنوینر سرکماشی ءَ بندات کنگ بوتگ کہ کیچ بگر تاں پنجگور، بسیمہ، سوراب، کلات، مستونگ تاں شال ءَ بیست ءُ یک مارچ ءَ سربوتگ کہ بنجل ءِ سربوھگ ءَ روانک زھرشانی دروشم ءَ کنگ بوتگ –

آئی ءَ دیمتر ءَ گوشتگ کہ اے زھرشانی مول بیگواھیں مردمانی ریاستی ازیت جاھاں یل کنائینگ کانود ءِ رِد ءَ آمیدگس ءَ آرائینگ ءُ ریاست ءِ چیردستی ءَ کارکنوکیں ڈیت اسکواڈ کہ نشہ باپاری ءَ تچکی ھوار انت آھانی راہ ءِ پرایمنیں وڈی ءَ دارگ وھدیکہ اے روانک ءَ لوٹانی تہ ءَ ایف سی ءِ مھلوکانی گِسانی سر ءَ پاد اھگ ءُ آھانی کم شرپ کنگ لوٹ ھم مان انت –

آئی گوشتگ ھستیں وئیلانی چارگ ءَ پد ما ھمے پیسلہ زرتگ کہ ما سلو روانک ءِ بندات کنیں کہ سرجمین بلوچستان ءِ دمک ءُ دراں گوازن کنت ءُ بلوچ راج ءِ دوستیگیں مردمانی یل کنائینگے توار ءَ بُرز کنیں – آئی ءَ گوشتگ کہ یک نیمگے ما نودربر ورنا زالبول ءُ کماشان چہ ازیت ءَ رکینگ لوٹیں دومی نیمگ ءَ مئے سر ءَ چوگیشتر زوراکی کنگ بوھگ ءَ انت ھمک روچ مار ءَ بیگواہ کنگ ےُ پروفائلنگ کنگ بیت اِنت –

آھانی گوشگ ات کہ بلوچستان شھدربرجاہ ءَ چہ اوار جنگ بوتگیں سھیل بلوچ ءُ فصیح بلوچ بہ بنت یاکہ قائداعظم شھدربرجاہ ءِ نودربر حفیظ بلوچ اے درسیں ھما وئیل انت کہ ما لاچار انت زھرشانی بہ کنیں –

دومی نیمگ ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی چار ھزار ءُ شش سد ءُ بیست ءُ یک روچ سرجم بوتگ انت، مروچی ہائی کورٹ گوستگیں سدر رائب بلیدی بلوچ، ایڈوکیٹ امان اللہ کاکڑ ءَ بنجل اتکگ ءُ بیگواھیں مردمانی کھول ءِ گوم ءَ دلپدردی درشانتگ –

وی بی ایم پی ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ مارچ ءِ ماہ ءَ پاکستانی پوج ءِ زوراکی تھنا برجاہ نہ انت بلکنہ بلوچستان ءِ چپ ءُ چاگرداں زوراکی ءُ رستری کنگے تہ ءَ گیشی آرگ بوتگ وھدے ھمراھی ءَ پاکستان ءِ زلم زوراکی وت اے چیزے گواہ انت کہ بلوچ چکچینی ءَ ا کجام ھم سیمسراں سرگوز کنگ ءَ چک ءُ پد نہ بیت –

وھدیکہ ھزدار ءَ چہ زورانسری اوار جنگ بوتگیں سیاسی باسکانی کھول ءَ جار جتگ کہ بیست ءُ شش مارچ ءَ بیگواھیں کبیر بلوچ، عطاء اللہ بلوچ ءُ مشتاق بلوچ ءَ سینزدہ سال سرجم بوھگ ءَ اِنت – اے درگت ءَ شال پریس کلب ءِ دیم ءَ سَے بج ءَ زھرشانی کنگ بیت اِنت ءُ بیگاھ ءِ شش بگر تاں دوازدہ ءَ چاگردی ترامجاہ ٹویٹر ءَ EndEnforcedDisappearances ھیش ٹیگ چلائینگ بیت – آھاں چہ درسیں سیاسی پاٹی ءُ نودربر انسانی ھکانی گلاں چہ لوٹ کتگ کہ زھرشانی ءُ کمپئین بھر بہ زور انت ءُ مئے دوستیگیں مردمانی یل کنائینگے ھاتر ءَ مئے ھمراہ داری ءَ بہ کن انت وتی انسانی اخلاقی ھک ادا بہ کن انت *

بلوچستان ءِ ضلع کیچ ءِ بُنجاھی شھر تربت ءَ کُشگ بوتگیں نامداریں بلوچ ازمکار شاھینہ شاھین ءِ کوش ءِ دگہ یک کُمکارے پولیس ءَ دزگیر کتگ-

پولیس رِد ءَ یک بیڑبرگ ءِ وھد ءَ پولیس ءَ نامداریں ازمکار شاھینہ شاھین کوش ءَ نامدپیں تتکگیں کُتکار محراب خان گچکی ءِ تاچینگ ءَ کُمک کنوکیں کُتکار سلمان ء جان محمد جھمنند پسنی دزگیر کتگ-

تربت پولیس ءِ رِد ءَ کُتکار صمید سعید ءِ گوشگ ءَ پد دزگیر کتگ ءُ پٹ ءُ پول بندات کتگ-

زانگ بہ بیت بلوچ اِھوالکار ءُ ازمکار شاھینہ شاھین ءَ پنچ ستمبر 2020 ءَ تیر جتگ ءُ کُشتگ – وھدے کہ کھول گوشگ ءَ پد آئی ءِ لوگ واجہ محراب خان گچکی ءُ آئی ءِ ھمراہ صمید سعید بگیری ءَ کوش ءِ ایف آئی آر نکش کتگ-

بلوچ ازمکار ءِ کوش ءَ نامدپیں یک کُتکارے صمید سعید نومبر 2020 ءَ دزگیر کتگ وھدے کہ ایف آئی آر ءَ نامدپیں دومی کُشکار محراب گچکی تنی گار اِنت –

بلوچ آجوئی لوٹوکیں سلاہ بندیں گلانی یکجاھیں گل بلوچ راجی آجوئی سنگر (براس) ءِ جارکش بلوچ خان ءَ رسانکدراں وتی شنگ کرتگیں درشان ءِ تہ ءَ گوشتگ کہ ریکوڈک ءَ بلوچ ءِ مال ءُ مڈیاں لٹ ءُ پُل ءِ ھاتر ءَ بیرک گولڈ کارپوریشن ءُ زورگیریں پاکستان ءِ مسام ءَ نہ منّ ایں ءُ اے کمپنی ءَ مکن کنیں کہ ریکوڈک ءَ چہ دور بہ بیت اگاں ناں بلوچ سرڈگار ءِ مال ءُ مڈیانی پھازگ ءِ ھاتر ءَ براس گڈی سیمسراں تاں روت –

بلوچ خان ءَ دیمتر ءَ گوشتگ کہ بلوچستان ایردستیں استان ءِ کہ اود ھکئین بلوچ رھشونانی بدل ءَ وتگڑیں سرکار ءِ آرتگ نندارینتگ تانکہ زورگیرانی لٹ ءُ پُل ءَ کانودی دروشم ءِ دیگ بہ بیت – گوستانک ءُ ھستیں وھدے راستی ءَ نزرانداز کنگ ءُ بیرک گولڈ کارپوریشن بلوچ سرڈگار سر ءَ زورگیریں تاکت ءُ آئی وتگڑانی ھمراھی ءَ مسام اے گپ ءَ زاھر کنت کہ اے کمپنی بلوچ رایہ ءُ بلوچانی گوستانکی ھک ءُ مِلک ءِ اھترام کنگ بدل ءَ اے تاکتانی گوم ءَ باپاری کنگ ءُ بلوچ ءِ مال ءُ مڈیانی لٹ پُل ءَ کنگ لوٹ ایت – ھمے ھاتر ءَ بلوچ پھازگ تاکتاں اے ھک ھست اِنت کہ وتی سرڈگار ءُ مڈیانی پھازگ ءِ ھاتر ءَ بیرک گولڈ کارپوریشن گوم ءَ ھم ھما وڑ کنت کہ زورگیرانی بگیری ءَ کنگ بوگ ءَ انت-

براس ءِ جارکش ءَ دیمتر ءَ گوشتگ کہ ما بیرک گولڈ کارپوریشن ءَ مکن کنگ لوٹیں کہ آ ریکوڈک مسام ءَ دسکش بہ بیت اگاں ناں بلوچ سرمچار اے درگت ءَ گوشگ بوتگ انت کہ بیرک گولڈ کارپوریشن اسٹاپ، پھازدار، تنصیبات، کالونیوں، آھانی ھمراھاں ھوار ھر وڑیں کاروان ءَ ترندیں ارشانی نشانگ بہ کن انت ھمے ھاتر ءَ آ وتی درسیں جانی ءُ مالی تاوان ءِ زمہ وار کمپنی وت اِنت –

بلوچ لبریشن آرمی، بلوچستان لبریشن فرنٹ، بلوچ ریپبلکن گارڈ، بلوچ نیشنلسٹ آرمی ءُ سندھو دیش ریولیوشنری آرمی یکجاھیں گل بلوچ راجی آجوئی سنگر براس ءِ جارکش ءَ گوشتگ کہ بلوچ پھازداریں تاکتاں اشی ءَ پیش بیرک گولڈ کارپورریشن ءِ وڈا چین ھم تچکی ءَ مکن کتگ کہ آ سیندک ءُ سی پیک ءِ وڈیں معاہدھاں بلوچ ءِ مال مڈیانی لٹ پُل ءَ ھوار مہ بیت بلے مئے اے وارننگ مان آرگ نہ بوتگ کہ نون چین آئی ءَ سگگ انت کہ مزنیں کچ ءَ سرمایہ کاری ءُ جانی ءُ مالی تاوان چست کنگ ءَ ابید وتی پروجکٹانی تکمیل ءَ باز دور انت – بیرک گولڈ کارپوریشن ءَ لوٹ ایت کہ بلوچ ءِ مال ءُ مڈیاں سر ءَ ھک ءُ ملک ءَ بہ منیت وت ءَ اے مسام ءَ چہ دور بہ گستا بہ کنت تانکہ ھمائی ءَ تہ ءَ کہ چین پنسِتگ آ بہ رکیت –

جارکش ءَ گڈسر ءَ وتی درشان ءِ تہ ءَ گوشتگ کہ بلوچ مال ءُ مڈیانی گوں دری ءُ ملک ءُ کمپنیانی گوم ءَ مسام کنگ بلوچستان ءِ آجوئی پد بلوچانی ھکئیں جمہوری نمائندگ ءُ سرکار کن انت کہ ھما باپاری کن انت ءُ آئی پھاز انت ھم – آئی ءَ چہ پیش بلوچ ءِ مال ءُ مڈیانی سر ءَ زورگیر ءَ گوں کنگ بوتگیں ھر وڑیں مسام زورگیریں پاکستان ءِ کتکاریانی تہ ءَ ھوار بنت –