TBP Balochi

بلوچستان ءَ ھک دے تھریک ءِ سروک مولوی ھدایت الرحمن بلوچ ءِ سروکی ءَ ضلع کیچ ءَ زمہ داریانی یک دیوانے برجم دارگ بوتگ چریشی ءَ مند ، دشت ، بلیدہ ءُ زامران ءَ چہ گلی مستراں بھر زرتگ-

بلوچستان ءِ گوم ءَ ھکومت بلوچستان ءُ وفاقی ادارھانی میان ءَ 32 روچ ءَ برجاھیں نندانک آخرکار گوستگیں سال ءَ 16 دسمبر ءَ وزیراعلیٰ بلوچستان ءُ دگہ وزیرانی ساڑی بوگ ءَ نبشتانکی ءُ زبانی مھاد ءَ ڈیھ ءُ راج ءِ مپاداں ایر کنگ ءُ اشانی سر ءَ گامگیج زورگ ءِ باور کنائینتگ بلے بژن اِنت تنی وھدے سیمسری جیڑہ ءُ پریشانی ءِ سر ءَ ھچ وڑیں چست ءُ ایر کنگ نہ بوتگ، تھنا پیسرگیں وڑ ءَ لسٹنگ ءُ یک ھَدے ءَ لمیٹیشن بوگ ءَ بوتگ آ انگت ھم ھست اِنت چریشی ءِ سبب ءَ گریبیں مردم مسیبت ءُ پریشانیانی دیمپان اَنت چریشی گاڑی ڈرائیوراں بیگار کنگ ءُ کار گرگ ھوار اِنت-

آیانی گْوشگ اِنت کہ چریشی ءِ مستریں سبب دمگی انتزامیہ ءِ زمہ وار ءُ ڈپٹی کمشنر مکران ءِ بے سوبی اِنت اشی ءَ پد ھک دے تھریک سروک ءُ وتی زمہ وار ءُ دمگی واجکارانی ھمراھی ءَ کمشنر مکران شبیر احمد مینگل ءَ آئی ءِ نندگجاہ ءَ ءَ گند ءُ نند کتگ ءُ راجی جیڑہ ءُ پھازگ ءِ درگت ءَ سرپدی داتگ-

آئی ءَ گْوشتگ کہ 31 مارچ ءَ تاں سرجمیں گوازینگی پوائنٹ کہ آیاں زوت پچ کنگ ءِ جار ءُ وفاقی ءُ صوبائی نیمگ ءَ چہ کنگ بوتگ کہ آیانی تہ ءَ دشتک سنگاوان ، گربن کور دپ راھداری گیٹ فوڈ پوائنٹ ، مند دشت سیمسر، گروک دگ ھوار اَنت-

آئی ءِ گْوشگ اِنت کہ اگاں مھاد ءِ سر ءَ گامگیج زورگ نہ بوت ءُ گوازینگی پوائنٹ پچ کنگ نہ بوت اَنت، آجوئی باپاری ءُ بچّار کارڈ ءِ سر ءَ پچ کنگ نہ بوت ءُ گیش بے پھازگ ءُ تُرس برجاہ بوت اَنت گُڑا یک اپریل ءَ ڈی سی کیچ کارگس ءِ دیم ءَ بے مدتے ءَ تاں نندانک جن ایں-

بلوچستان لبریشن فرنٹ ءَ کولواہ ءَ دُژمنیں پوج ءِ شش کارندھانی کوش ءِ زمہ واری منّ اِتگ

بی ایل ایف ءِ جارکش میجر گْوھرام بلوچ ءَ رسانکدر ءَ شِنگ کتگیں درشان ءِ تہ ءَ گْوشتگ کہ بیست ءُ چار مارچ ءَ مئے سرمچاراں کولواہ ءِ دمگگشانگ مری آباد ءَ پاکستانی پوج ءِ سر ءَ ھما وھد ءَ اُرش کتگ وھدے آ کوھی دمگاں پُترگ ءِ جُھد ءَ بوتگ اَنت-

سرمچاراں آ دیستگ ءُ سنگر گپتگ اَنت ءُ نزیکیں کوہ ءَ سر کپوکیں شش پوج ءِ کارندہ نشانگ کتگ ءُ ھما دمان ءَ کُشتگ اَنت- ھمے وڑ سرمچاراںاے اُرش بے سوب کتگ ءُ دُژمن واتر بوگ ءَ لاچار کتگ-

جارکش ءَ گْوشتگ کہ زورگریں پوج سر ءَ اُرش داں زورگپتگیں بلوچستان ءِ وتواجھی ءَ برجاہ بنت-

بلوچستان ءِ گیشتر ھند ءُ دمگاں پھازگی لشکر ءِ سنگر ءُ بنجل ءُ پانگساں لس مھلوک سک باز دلسیاہ کُتگ –

بازیں وھد ءَ سیاسی گلاں ایف سی ءُ پھازگی لشکر ءِ دمگانی تہ ءَ ساڑی بوگ ءِ بگیری ءَ زھرشانی ھم کُتگ –

بلوچستان ءِ تیاب دپی دمگ گوادر ءَ ھمے زوتاں چِست بوتگیں زرمبشت ءِ بنکی لوٹانی تہ ءَ ھم ھمے لوٹ ھوار بوتگ کہ بازار ءُ کوچگانی پھازگی لشکر ءِ پانگس ھلاس کنگ بہ بنت –

بلوچستان ءَ آجوئی لوٹوکیں سلاہ بندیں گلانی پاکستانی پوج ءِ سر ءَ اُرشاں پد پسوی تیرگواری یا گولہ باری ءَ بازیں مردمے زدگ ءُ بیران بوتگ انت کہ وھد وھد ءِ سر ءَ آھانی ھال دیم ءَ اتکگ انت –

ھمے سال ءِ دو فروری ءَ بلوچستان ءِ دمگ پنجگور ءِ بازار ءَ برجاھیں ایف سی ءِ بنجاھی بنجلے سر ءَ بلوچ لبریشن آرمی ءِ مجید برگیڈ ءِ سنگتانی کبزہ ءِ میان ءَ پھازگی لشکر ءَ آپریشن ءِ میان ءَ بازیں گولہ ءِ آس داتگ کہ لس مھلوک ءِ گسانی سر ءَ کپتگ انت –

ھمے میان ءَ چتکان ءِ جھمنند وفا بلوچ ءِ گِس ءِ سر ءَ ھم یک گولھے کپتگ کہ چریشی ءَ آئی ءِ جنکوے ءِ سک باز زدگ بوتگ ات کہ تنی وھدی آئی ءِ الاج بوگ ءَ اِنت –

دی بلوچستان اھوال پتر ءَ سربوتگیں ھالانی رِد ءَ کیچ ءِ کوھی دمگ زامران ناگ ءَ برجاھیں ایف سی بنجل ءَ چہ مردم سک باز دلسیاھی ءِ آماچ انت –

دمگی مردم ءَ دی بلوچستان پوسٹ ءِ اھوالکار ءِ گوم ءَ تران کنان ءَ گوشتگ کہ کوہ ءِ سر ءَ پوجی پانگس ءِ سوب ءَ شپ ءَ زالبول ڈن ءَ وپت نہ کناں ءُ کدی کدی رژناھیں لینٹ ھم چالو کن انت مھلوک ءِ گِساں لینٹ جن انت –

ھمے وڑ ءَ بلیدہ ءِ دمگ الندور گلی مردماں ھم شکایت کُتگ آھانی گوشگ انت اے جیڑھانی سر ءَ بلوچستان اسمبلی ءِ تہ ءَ نشتگیں راجدوستیں پاٹیاں ابید اسمبلی ءَ چہ ڈن نشتگینانی کرد ءَ چہ مھلوک ستک نہ انت –

گوادر ءَ دریاوردانی زرمبشت ءُ نندانک ءِ میان ءَ شھر ءُ بازاراں گیرکانودی پانگسانی ھلاس کنگ ءِ لوٹ سوبائی سرکار ءَ منّ اِتگ بلے آئی ءِ سر ءَ گامگیج زورگ نہ بوتگ بس یک دو لیوز ءِ پانگس چِست کنگ بوتگ انت-

پنجگور ءَ گوستگیں روچاں سول ھسپتال ءَ رؤکیں دگ سیکورٹی ءِ سوب ءَ بند کنگ بوتگ چریشی ءَ دمگی مردم ءُ نادراھ سک باز پریشان بوتگ انت –

اے درگت ءَ بلوچستان نیشنل پاٹی پنجگور ءِ جارکش ءَ وتی درشان ءَ گوشتگ کہ ایف سی بنجاھی بنجل باپاری ءِ بنجاہ ءَ انت ءُ اودا مردم ھم نندوک انت ڈسٹرکٹ ہیڈکوارٹر نادراھجاہ ھم بازار تہ ءَ اِنت – بازار ءَ رؤگے ءِ مستریں دگ چہ ایف سی ءِ بنجلے دیم ءَ چہ گوزیت ھمک روچ اے دگ ءِ بند کنگ چہ ءَ بازار ءَ ٹریفک جام بیت اِنت چریشی ءَ بازار ءَ رؤکیں مردم ءُ نادراھ سک باز دلسیاہ انت دنیا ءِ تہ ءَ ھچ جاہ پوجی بنجل مھلوک ءِ نندجاہ ءُ باپاری دمگاں نہ انت –

بی این پی ءِ جارکش ءَ بلوچستان ءِ سر وزیر، آئی جی ایف سی ءُ آرمی چیف ءِ اسٹاف چہ لوٹ کتگ پنجگور ءِ ایف سی بنجل شھر ءَ چہ ڈن برگ بہ بیت ءُ لس مھلوک چہ اے ازاب ءَ رکینگ بہ بیت تاں ھما وھد ءَ بنجل بازار ءَ چہ ڈن برگ نہ بیت ھما وھد ءَ تاں اے دگ ھم بند کنگ مہ بیت –

کیچ ءَ سیمسری دمگ مند ءَ برجاھیں ایف سی ءِ بنجاھی بنجل ءَ چہ ھم مھلوک دلسیاہ انت کہ ا ھم دمگے تہ ءَ انت –

سورو ءِ دمگی مردماں ھم چہ سرکار ءَ لوٹ کتگ کہ ایف سی شھر ءَ چہ ڈن برگ بہ بیت –

بلے تنی وھدی لس مھلوک ءُ سیاسی پاٹیانی ءِ شکایت ءُ زھرشانیانی چہ پوج ءِ نیمگ ءَ ھچ وڈیں گپ دیم ءَ نہ اتکگ –

بلوچ راجدوستانی نیمگ ءَ بیست ءُ ھپت مارچ سیاھیں روچے ھساب ءَ دارگ بوتگ – اے روچ ءَ بلوچ راج دوست مدامی یات داریت ءُ وڑ وڑ ءَ وتی زھرشانی ءَ کن انت –

اے روچ ءِ درگت ءَ کلانیں بلوچ راجدوستیں رھشون بی ایس او ءِ گوستگیں سرکماش میر عبدالنبی بنگلزئی ءَ چاگردی ترامجاہ ٹویٹر ءَ نبشتگ کہ بیست ءُ ھپت مارچ بلوچ گوستانک ءِ سیاھیں روچ انت –

آئی ءَ گوشتگ کہ برتانیہ ءِ زوراکانی درآیگ ءَ پد بلوچستان یک آجوئیں ڈیھے بوتگ بلے بیست ءُ ھپت مارچ 1948 ءَ پاکستان ءَ پوجی تاکت ءِ زور ءَ بلوچستان ءِ سر ءَ کبزہ کُتگ گوں پاکستان ءَ ھوار کُتگ –

آئی ءَ گوشتگ کہ ھما روچ ءَ بلوچ راج پاکستانی زورگیری ءِ بگیری ءَ جنگ کنگ انت –

دومی نیمگ ءَ بیست ءُ ھپت مارچ ءِ درگت ءَ بلوچ سوشل میڈیا ایکٹوسٹاں ھوار دگہ راجدوستیں گل چاگردی ترامجاہ ٹویٹر ءَ سیاھیں روچ ءِ درگت ءَ کمپئن چلائینگ ءَ انت –

آھانی گوشگ انت کہ بیست ءُ ھپت مارچ 1948 ءَ پاکستان ءَ تاکت ءِ زور ءَ آھانی آجوئی پچ گپتگ – اے روچ ءِ درگت ءَ چاگردی ترامجاھاں ابید ڈنی ملکاں نشتگیں بلوچ ھر سال اے روچ ءِ درگت ءَ زھرشانی کن انت –

ھمے وڑ مروچی راجدوستیں گل بلوچ نیشنل مومنٹ ءِ جار ءِ پد ءَ لندن ءُ جرمنی ءَ زھرشانی کنگ بوتگ –

بلوچ نودربر گل آزاد ءِ سرکماش ابرم بلوچ ءَ نبشتگ کہ ما وتی زند ءِ ھر ساھت ءَ 1948 تجربہ ءَ کنیں، ما راجدپتر ءَ گوست ءِ وڑ ءَ ناں بلکیں ھستیں وھدے بھرے سرپد بہ ایں –

آئی ءَ گوشتگ کہ ھزارانی کچ ءَ بلوچ زورانسری آوار جنگ ءُ کُشگ بوتگ انت ءُ مئے مال ءُ مڈیاں ھمک روچ پاکستان لٹ ءُ پُل کنگ ءَ انت –

بلوچ سلاہ بندیں گل ءِ رھشون گلزار امام ءَ نبشتگ کہ بلوچستان ھچبر پاکستان ءِ بھرے نہ بوتگ – اشی ءِ سر ءَ بیست ءُ ھپت مارچ 1948 پاکستان ءَ پہ زور کبزہ کُتگ – بلوچستان ءَ چہ اے ایردستی ءَ آجو کنگ ءِ ھاتر ءَ یوم سیاہ ءَ کنگ ءَ چہ شرتر انت کہ وتی انا ءَ یک کر کنگی انت ءُ دیم ءَ روگ ءِ ھاتر ءَ آشوبی پیسلہ کنگی انت –

بیست ءُ ھپت مارچ 1948 ءَ بلوچستان ءِ گوم ءَ چی بوتگ اشی ءِ سر ءَ درستیں راجدوستیں گلانی یک گپے دیم ءَ کیت – بلے پد ءَ ھم پارلیمانی پاٹیانی گوشگ انت کہ مار ءَ پاکستان ءِ تہ ءَ نندگی ءُ وتی ھک گرگی انت –

ملا اسمائیل لبزانکی گل پل آباد ءِ چیردستی ءَ مراگش “پل آباد زانشتی مراگاہ” نام ءَ اڈ دیگ بوتگ کہ وانگی سال ءِ ھلاسی ءَ گوستگیں روچ بیست ءُ شش مارچ دوھزار بیست ءُ دو ءَ برجم دارگ بوتگ ۔

مراگش ءَ پل آباد ءِ جتا جتائیں اسکولانی نودربر، استاد ءُ ملا اسمائیل گل ءِ باسکاں بھر زرتگ ۔ دیوان ءِ گوشتانک دیوؤکاں وانگ ءِ ارزشت ءِ سر ءَ تران کتگ ءُ وتی چاگرد ءِ وانگ ءِ نزوریں تکاں جوانتر کنگ ءُ پہ چاگرد ءَ شرتریں وانگی میلے ردوم دیگ ءِ نیمگ ءَ جھد کنگ ءِ سر ءَ زور داتگ – دیوان ءِ تران کنوکانی تہ ءَ نودبراں وزبت ءُ کسانیں گشتانج دیوان دیم ءَ درشانتگ ءُ استاداں وانگ ءِ میل ءِ ردوم دیگ ءِ سر ءَ گوشتانک داتگ- ماسٹر ملا اکبر ءَ تران کنان ءَ گوشت “روبرکت ءُ رودرتک ءِ ملکانی تہ ءَ وانگ ءَ باز ارزشت دیگ بیگ ءَ انت بلے مسلمانی ملکانی تہ ءَ ترکی ءُ ملیشیا بس دو ملک انت اود ءَ 100% مردم وانوک انت ایشی ءِ سوب ایش انت کہ آ وتی بجٹ ءِ شریں بھرے وانگ ءِ سرءَ ھرچ کن انت” ماسٹر میر انور ءَ گوشتانک داتگ گوشتگ کہ ما اسکول ءِ تہ ءَ نودربراں سک کم گندگ ءَ انت بایدیں پت ءُ مات وتی چکاں اسکول ءَ روان بہ دے انت”
آ دگر گشتانک دیوکانی تہ ءَ ،وھاب اللہ بخش، بلال حکیم ، جیھند ھوت، ماسٹر اکبر، میر انور، ھائی سکول ءِ پیسری ھیڈماسٹر ملا برکت ءُ انوگیں ھیڈماسٹر یاسین ساھب ءَ وتی گوشتانکاں وانگ ءِ ارزشت ءِ سر ءَ تران کتگ-

ماسٹر یاسین ءَ وتی گوشتانک ءَ گوشت کہ چہ درستاں ارزشتدارتریں لبز “علم” اگاں ھمے علم ءِ لبز ءِ ما ارزشت ءُ کار ءَ بزانیں گڑا ما وتی وانگی جیڑھانی شرتریں توجیلے ساز ات کنیں” درستیں گوشتانک دیوؤکاں ملا اسمائیل گل ءِ “پل آباد زانشتی دیوان” ءِ کار ءِ ستا کت ءُ امیت داشت کہ اے کار یکشلا برجم بیت۔

مراگش ءِ جارچینی ءِ ڈبہ گل ءِ کمک کار گشاد” ابرار گلام” ءِ کوپگ ءَ ات کہ آئی ءَ ملا اسماٰئیل پل آبادی ءِ زند ءُ ازم ءِ سر ءَ گونڈیں چمشانکے دات ءُ ملا اسمائیل لبزانکی گل ءِ چاپ کتگیں کتابانی سر ءَ تران کت۔

گڈسر ءَ پل آباد ءِ جتا جتائیں زانت جاھانی پوزیشن گپتگیں نودربر کہ اشانی تہ ءَ ھائی سکول پل آباد،پرائمری سکول ھوت جو پل آباد ءُ کلبر گرائمر اسکول ءِ نودربر ھوار ات انت ،چہ ملا اسمائیل لبزانکی گل ءِ نیمگ ءَ داد دیگ بوت انت –

نبشتانک: نودربر ءِ ھک

نبشتہ کار: پاتما بلوچ

دی بلوچستان پوسٹ

چوناھا بنی آدم مُدام اشتاپ اِنت، وھدے کہ ھُدا ءَ مھتر آدم چہ لِچ ءَ جوڑ کُت ءُ ساہ ئِے مان کُت گُڑا مھتر آدم ءَ یکپارگی چہ کُرسی ءَ پاد آیگ ءِ جُھد کُت چریشی ءَ مھتر آدم چہ کُرسی ءَ کپت۔ گُڑا ھُدا ءَ مھتر آدم ءَ گْوشت ” او بنی آدم تو سِبر بہ کن بے شک تئی ھُدا سبر کنوک ءِ کُمکّار اِنت-

ما گْوش ایں کہ باید اِنت ما بلوچ اشتاپ مہ کن ایں بلکیں ھر چیزے پیسر وت ھورت بہ وان ایں ءُ مُدام وانان ءَ سرپد بوُگ ءِ جُھد بہ کن ایں۔ چوناھا نودربر ءَ گیشتریں سرپدی ھم چہ وانگ ءَ رس ایت۔ وھدے کہ ما درونتاں وانان کن ایں گُڑا ما دْراھیں چیزاں وت سرپد بَہ ایں بلے ما پہ درونت ءِ وانگ ءُ سرپد بوگ ءَ تیار نہ ایں بلکیں تچک ءَ جُست کن ایں کہ اے چے یے؟ اے چون؟

چوناھا ھر نودربر ءَ جُست ءِ ھک وَ ھست وھدے کہ آ چہ درونت ءِ تہ ءَ چیزے سرپد مہ بیت گُڑا جُست بہ کنت چے ءَ کہ بنی آدم ءِ دیمروئی گوں جُست ءُ پٹول ءَ بندوک انت۔ اگاں ما جُست مہ کن ایں گُڑا ما ھچبر چیزے سرپد نہ بہ ایں ءُ دربُرت نہ کن ایں۔ البت جُست ءِ ھم یک رھبندے (اسُولے) ھست۔ اگاں ما وانگجاہ ءِ ھر وڑیں کتابے گِند ایں کہ آئی ءِ ھمُک درونت ءِ ھلاسی ءَ پد سوال، ھالیگ جاہ ءُ راست ءُ دْروگی جُست بنت ناں کہ اے وڑیں جُستی بھر چہ درونت ءَ پیسر نودربرانی دیم ءَ آرگ بنت۔ ماں تبک(کلاس) ءَ اول اُستاد نودربراں کتاب ءِ درونت وانین ایت ءُ پد ءَ سوالانی بھر ءِ نیمگ ءَ کیت انت پرچاکہ درونت ءِ وانگ ءَ پد سوال شریں وڑیں ءَ پھگ بیت۔

گُڑا ما گوں راج ءَ دزبندی کن ایں کہ ھچبر اشتاپ مہ بہ اِت بلکیں پیسر کم کم ءَ بلوچی درونتاں بہ وان اِت کہ بلوچی تئی جِند ءِ راجی ءُ ماتی زُبان اِنت پمیشکا بلوچی پہ بلوچ ءَ وانگ ءُ بلوچی نبشتہ دربرگ سک آسان اِنت بلوچی تھنا چہ بلوچ ءَ مھر ءُ راجدوستی لوٹ ایت، چہ مارا زُبان دوستی، اگل ءُ شریں درونتاں لوٹ ایت-

زُبان دوستی: اول مارا وتی دل ءِ تہ ءَ زُبان دوستی ءِ مارشت ودی کنگ لوٹ ایت۔ مارا جیڑگ لوٹ ایت کہ ما وَ بلوچے ایں، مئے راج ءَ وت یک جُتائیں شاھگان ءُ سرجمیں زُبانے ھست گُڑا پرچا مارا ماں وانگجاھاں یک درآمدیگی زُبانے وانینگ بوگ ءَ اِنت؟ ماں وانگجاھاں پرچا مارا درآمدیگیں راجے ءِ دْروگیں راجدپتر، آئی ءِ کوڑائیں رھشُون ءُ لگور ءُ وتگڑ بامردانی بابت وانینگ بوگ ءَ اِنت؟ زاناں بلوچ راجے نہ اِنت؟ بلوچ ءَ راجدپتر نیست، بلوچ راج ءَ راجی رھشُون ءُ راجی بامُرد نیست کہ مارا وتی راج ءِ بابت ءَ وانینگ بہ بیت! وھدے کہ تو اے چیزاں سرپد بیتگ ئے گُڑا ترا وتی راجی زُبان دوست بیت، وھدے کہ تو وتی راجی زُبان ءَ دوست دار ئے گُڑا ترا وتی زُبان ءِ وانگ ءُ نبشتہ ءِدربرگ ءَ واھشتے ودی بیت پرچا کہ ھر چیزے ءِ دربرگ ءَ شوک ءُ واھشت لازُم اِنت۔ پد ءَ ترا وتی راجی زُبان انچو بے کساس دوست بیت کہ تو گپ ءُ تران ءَ ھم وتی زُبان ءَ زگر دار ئے۔ پد ءَ تو زُبان دوست ءُ راجدوستے جوڑ بَہ ئے۔

اَگل: دومی پہ زُبان ءِ دربرگ ءَ اَگل ھم لوٹ ایت پمیشکا ما گْوش ایں باید اِنت ما اشتاپ مہ بَہ ایں، ما یکپارگی رَد نبشتہ مہ کن ایں بلکیں ما پیسر بلوچی درونتاں وانان ءَ وانگ ءَ ھیل کن ایں کہ مئے بلوچی وانگ زبر بہ بیت۔ وھدے کہ ما وانگ ءَ زبر بیتگ ایں گُڑا بلوچی درونتاں یک رندے پد ءَ سرجمی ءَ وان ایں، رھبند ءِ ” تپورگال، پیوندگال، کارگال ءُ ستاگال” ءِ وڑیں بُندری چیزاں سرپد بہ ایں۔ پد ءَ کسانیں درونتاں وت نبیسّ ایں ءُ آیاں چمشانک دیان ءَ راست بِکن ایں۔ مارا ھمے سرپد بوگ لوٹ ایت کہ بنی آدم ءَ مُدام چہ وتی ردیاں دربُرت پمیشکا مارا ھم چہ وتی ردیاں دربرگی اِنت، وھدے کہ ما ھر چیزے نبشتہ کن ایں گُڑا وتی نبشتگیں چیزاں وت دو رند ءَ وانان ءَ راست بہ کن ایں۔ پہ راجی زُبان ءِ دربرگ ءَ مارا چہ گوگل ءَ بلوچی کیبورڈ ءُ بلوچی بزانت بلد(ڈکشنری) ءِ وڑیں آسراتی ایرگیج کنگی اَنت کہ مرچاں ھر زُبان ءِ راج ماں گْوانکواں وتی زُبانانی کیبورڈاں کارمرز کن اَنت۔

شَرین ءُ راستیں درونت: وھدے کہ ما وتی اگل ءَ کارمرز بہ کن ایں گُڑا مارا بلوچی شریں درونت ءُ دِگہ وانگی نکان(وت) وت رس اَنت۔ مارا پہ بلوچی دربرگ ءَ شریں درونت چہ پیسبوک ءَ ھم رس اَنت۔ بازیں بلوچ ورناھیں نودربراں ماں پیسبوک بلوچی وانگ ءِ گروپ اڈ کُتگ اَنت کہ اے گروپاں شُما “Balochi Language Cetre” ءِ نام ءَ شوھاز بہ کن اِت ءُ وت ھوار بَہ اِت۔ ھمے پیم ءَ بازیں ورناھیں بلوچ نودربراں بلوچی وٹس ایپی وانگجاہ ھم اڈ کُتگ اَنت کہ اود ءَ بلوچی وانینگ بوگ ءَ انت گُڑا باید اِنت ما ھمے وٹس ایپی وانگجاہ ءُ دیواناں باسکی بہ زور ایں، وتی راجی زُبان ءَ وت دربر ایں ءُ دیم ءَ راج ءَ ھم بہ وانین ایں۔ ما تچک بہ زان ایں کہ بلوچی ھما وھد ءَ دیمروئی کنت وھدے کہ ما ھرکسے بلوچی وانینگ ءِ جُھد بہ کن ایں پمیشکا باید انت ما دْراہ زُبان ءِ اے سَےئیں بُندری لوٹاں پیلو کنان ءَ بلوچی وانگ ءُ وانینگ ءَ وتی راجی زمہ واری یے بہ منّ ایں۔

بلوچی مئے وتی شھدیں زُبان ءُ راجی پجّار اِنت۔ بلوچ شالا مُدام ھست بات اَنت ءُ بلوچی دیمروئی بہ کنات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔