TBP Balochi

منیر ءِ شئری ازم ءِ بودشت

نبشتہ کار: واھگ نیاد

دی بلوچستان پوسٹ

منیر چنچو مزنیں شائرے ؟ یا منیر ء شئری ازم چنچو مزن انت؟ اے یکیں بنگپ اِنت یا دو جتائیں سرھال اَنت منی جیڑہ ایش نہ انت من گشاں آئی ء شئری ازم ءِ بودشت ءَ چے پوہ بوگ ءَ پہ ھم بودے کمالے پکار اِنت آئی ءِ وانوکاں آئی ءِ شئری رپکاں چہ آشنا بوگ لوٹ ایت شئریت ء وت مان وتی ربط ھیل گرگی انت گڑا منیر ء شئری معنویت ءَ چے چیزے پولت کرت کن انت منیر ءِ ازم ءِ زیمر ءَ چہ وشنود بوت کن انت من منیر ءِ مریداں شہ نہ اوں پہ من منیر ۔ عطا۔ بسمل بلوچی ءِ شائر انت کئی کجام شئر کجام شئر ءَ چے معنوی اعتبار ءَ نزور تر انت یا توانا تر انت اے ازم ءِ کیلو انت کہ ھرکسی مارشتانی درپ ءَ باید کہ ایر بہ بیت مرے روچاں منیر ءِ یک شئرے ء سر ءَ گپ ءُ ھبر بوھگ ءَ انت بلے ھبر ھبر اَنت پہ مھر ءُ دلواھی یا پہ کست ءُ بد واھی من جھد کناں ھمے شئر ءِ دو بند گچین بہ کناں دو گپ علمی بنیاد ءَ وتی زانت ءُ زانگ ءِ کساس ءَ بہ جناں-

“بیا چہ عشق ءَ کستریں کارے کنیں”

اے شئر ءَ دل ءَ بیار اِت کہ عشق ھر کسی گور ءَ عشق انت بلے منیر ءِ گورا عشق ہمینچک کہ نازرک انت تہ منیر دو ہمینچک عشق ءِ بستار ءَ بلند کنت بے کساس بزر
چش کہ منیر ءِ شئر چہ معنا ئیت ءَ چکار اَنت پہ ایندگہ وانوکاں نہ بلکیں پہ منی جند ءَ یکیں مانا ءِ سر ءَ گزران کنئگ ءُ وتی مارشتاں ہمے یکین مانا ئے ایر کنئگ ءُ ایشی ءَ حتمی گشئگ منیر ءِ ازم ءِ توھین بیت-

“عشق ء کانچیں چمن نوکیں سیارھے”
“واب پوشیں وتن نوکیں سیارھے”

کمیں بیا اد ءَ دلگوش بئیں کہ شائر ءِ کمال چی انت “عشق ء کانچیں چمن” ادا منیر ءَ عشق ہمینچو نازرک کتگ کہ آئی پھریزگ ءِ گمان ءِ تہا بازیں وسواسے ھست کہ ھمے وسواساں آئی ءِ پھریزگ ءِ عمل ءَ را ھژدری کتگ ھمے وسواس اِنت کہ عشق ءِ بستار ئِے گیش برز کتگ “نوکیں سیارھے” آئی ءِ آسر ءِ پولگ ءَ نوکیں پندے ءَ نوکیں کشکے ءَ بلکیں نوکیں جفا کشی یے ءَ پہ دلجمی ھدوک انت آئی ءَ سناس کتگ کہ گرانیں کارے بلے ایشی ءِ آسر کنئگ ءِ توجیل انچش سازتگ ئے کہ نوکیں جھانے ءِ پولگ ءِ کساس ءِ ھمّتے گون ئِے ” واب پوشیں وتن” بزان وتی عشق ءِ وتی مراد ءِ وتی منزل ءِ ھنکینی ءِ ھزار مرادیں وابان اِنت ھما واب کہ چہ عالم ءَ پوشیدہ اَنت بلے شائر ءَ وتی دل ءَ چیدگ کتگ اَنت کہ آئی ءِ تعبیر ءِ دلجمیں مسافت ءِ جستجو ءَ نوکیں پندے ءَ راھیگ باں
عشق یا وتن چش کہ جمعی ءُ انفرادیت ءِ ھردوکیں ماناھاں زورگی شے انت ہرکس ءَ وت ءَ ھست بلے ھرکسی وتی وتی ھم است بنت چُشکہ ھمے عشق ءِ منزل ءُ دیار کہ پراھی ھنکینی ءَ ھرکسی وتی جتائین واھگے ھم است ھر کسا وتی جتا جتائیں واب آئی ءَ بندوک کتگ اگاں کسے لوٹ ایت کہ اے شوکیں واب مہ پرشیت ءُ آسرے بہ بیت ئے گڑا آئی ءَ مزنیں جفاکشی یے لوٹیٹ یا ” واب پوشیں وتن” ء مانا ءِ پَٹّگ ءِ جھد ءَ کن ئے ھما وتن کہ آئی ءِ ھنکینی ءَ ھر کس ءَ وتی داب اِنت وابے ھیالے یا گمانے وتی مازگاں ایر کتگ وانندہ، بزگر، پھوال ءُ زندگی ءِ ہر مکتبہ فکر ءَ گوں بندوکیں مردمے ءَ وتی وابے گوں آئی ءَ بندوک انت گڑا شائر گش ایت آئی ء پولگ ءِ ہمینچوکیں مزنیں جفاکشی پکار انت کہ ہمینچک آئی بستار ءِ مزنی انت بوت کنت ھود ءَ زندگی ءِ داب ءُ میل چٹ نوکیں بہ بنت انچیں کہ انوں کسی وھم ءُ گمان ءَ نہ اِنت کہ زندگی اے داب ءَ بیت یک نوکیں جھانے ءِ پولگ ءِ برابر انت-

چش کہ منیر ءِ شائری علامتی شائری انت لازم نہ انت کہ اد ءَ اے لبز وتی لبزی مانا ءَ زورگ بہ بنت کہ لھتیں مردم گش ایت منیر ءَ اد ءَ سیارہ پہ وتی شئر ءِ نوک کنگ ءَ آؤرتگ بھتاوراں زاناں شئر پہ نوکیں لبزے ءَ نوک بیت بلکیں آئیءِ معنوئی بلندی ءَ بچار اگاں منیر ءِ تواناھیں شئرے پہ لبز سیارہ ءَ ایر جنئگ بہ بیت کہ دری لبزے گڑا نوکیں شائری ءِ تھا الماری ءُ کباٹ ءُ ڈیسک ءُ ٹیبل ءَ بگر داں کوھنیں شائری ءِ شمش ءُ قمر ءَ درا شمش اگاں بلوچی ءَ ھست انت آ شمش بلوچی یک سھتے ءِ نام انت اے شمس ءُ قمر وت عربی ءِ ماہ ءُ روچ اَنت بلے چُش کہ اد ءَ مارشت ءِ باب ءَ کے بہ ٹُک ایت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ پنجگور ءَ ناشناسیں سلاہ بندیں مردماں پاکستانی پوج ءِ چیک پوسٹ ءِ سر ءَ گوستگیں شپ ءَ ارش کتگ-

دمگی مردمانی رد ءَ سلاہ بندیں مردماں گوستگیں شپ ءَ گچک ءِ دمگ جوان تاک ءَ فرنٹئر کور ءِ پوسٹ جتا جتائیں سلاھانی گون ءَ اُرش کتگ ھمے وھد ءَ ھردوکیں نیمگاں تیرگواری برجاہ بیتگ ءُ تراکانی توار اشکنگ بیتگ اَنت-

پد ءَ اُرشکار تچگ ءُ روگ ءَ سوبین بیتگ اَنت بلے تنی وھدی واکدارانی نیمگ ءَ دگہ گپ دیم ءَ نیتکگ اَنت-

پنجگور ءَ ھوار بلوچستان ءِ جتا جتائیں جاھاں پاکستانی پوج ءِ سر ءَ بلوچ سلاہ بندانی اُرش یکشل ءَ برجاہ اَنت گوستگیں شپ ءَ بیتگیں اُرش ءِ زمہ واری کس ءَ نہ زرتگ-

چریشی ءَ پیسر کوھلو ءَ یونین کونسل سفید ءَ ناشناسیں مردماں دو راکٹ آس داتگ کہ اشاں ھچ جانی تاوانانی ھال نہ بیتگ –

چمدیستگیں مردمانی رد ءَ گوستگیں بیگاہ ءِ ساھت پنچ ءَ دو راکٹ آس دیگ بیتگ اَنت کہ چریشاں یکے لیویز سپاھی امیع ھمزہ ءِ ٹیوب ویل ءِ نزیک ءَ کپتگ دومی مزنیں دگ ءِ سر ءَ کپتگ چریشی ءَ پد پوج ءَ دمگ انگیر ءَ کرتگ ءُ پٹ ءُ پول بندات کتگ-

بلوچستان ءِ جتاجتائیں دمگاں دگ ءُ دگہ وئیلانی آسر ءَ چار مردم بیران ءُ پنچ ٹپی بوتگ اَنت اشانی تہ ءَ چُک جنین ھم ھوار اَنت-

سربوتگیں ھالانی رِد ءَ ضلع ھُزدار ءِ تھسیل وڈھ ءِ بازار نزیک ءَ گاڑی یے چپ بوتگ چریشی ءِ آسر ءَ چُکے بیران ءُ دو زالبول ءَ ھوار یک چُکے ٹپی بوتگ اَنت-

ھُزدار بُنجاھی شھدگ زیرو بوائنٹ ءِ نزیک ءَ مساپر کوچ ءَ پرپٹ سوارے لگت داتگ ءُ چریشی ءِ آسر ءَ چہ پرپٹ سوار ھما دمان ءَ مرتگ ءَ وھدے کہ چُکے سک ٹپی بوتگ دوا درمان کنگ ءَ پد کراچی ءَ برگ بوتگ-

ھمے وڑ شال ءِ دمگ سبی دگ ءَ دشت سپیزنڈ نزیک ءَ ریل دپ ءَ اَتکگیں یک مردمے بیران بوتگ-

دکی ءَ ڈگری کالج ءِ نزیک ءَ ناشناسیں پرپٹ سواراں تیرگواری کتگ ءُ روزی خان ء محمد اکبر عبداللہ زئی کاکڑ کشتگ ءُ تتکگ اَنت-

شال ءِ دمگ سریاب دگ ءَ کلی بنگلزئی ناشناسیں مردماں دکانے ءِ سر ءَ تیرگواری کتگ ءُ زبیر نامیں مردمے ٹپی کتگ-

سربوتگیں ھالانی رِد ءَ تمپ ءِ دمگ گومازی ءَ پاکستانی پوج ءَ گِس ءِ سر ءَ بیڑ برتگ ءُ یک مردمے آوار جتگ –

گیشیں ھالانی رِد ءَ پاکستانی پوج ءَ دوشی شپ ءِ ادار دو ءَ بلوچ ھان ءِ گِس ءَ بیڑ برتگ ءُ زوراکی کنان ءَ صادق ءِ بلوچ ھان زورانسری آوار جتگ ءُ گوں وت برتگ کہ انگت بیگواہ انت –

زانگ بہ بیت بلوچستان ءِ جتا جتائیں دمگاں پاکستانی پوج ءِ نیمگ ءَ زورنسری آوار جنیانی درچ یکشل ءَ برجاہ انت ـ بیگواھیں مردمانی پانکجنیں گل وی بی ایم پی ءِ رھشون ماما قدیر ءِ رِد ءَ پنجاہ ءُ دو ھزار مردم ءَ گیش بیگواہ انت کہ آھانی تہ ءَ سَے سد زالبول یکسد ءُ ھپتاد ءُ دو زھگ ھوار انت – بلوچستان ءَ آوار جنگ بوتگیں گیشتریں کچ نودربر ءُ ورناھانی انت –

نودربر حفیظ بلوچ ءِ پہ وشی یل کنائینگ ءُ بلوچ نودربراں ترسینگے بگیری ءَ بلوچ اسٹوڈنس کونسل اسلام آباد ءِ نیمگ ءَ جنگ بوتگیں زھرشانی بنجل بیست ءُ شش روچ ءَ پد آسر کنگ بوتگ، نودربراں حفیظ بلوچ ءِ یل بوھگ ءَ تاں وتی زھرشانیانی درچ ءِ برجاہ دارگے جار جتگ –

شمبے ءِ روچ ءَ اسلام آباد ءِ پریس کلب ءِ دیم ءَ نودربراں اھوالکارانی گوم ءَ تران کنان ءَ گوشتگ کہ بلوچستان ءَ وانگ ءُ زانگ ءِ درگت ءَ شما کُل سرپد ات بلوچ نودربراں ترسینگ ءُ پدا زورانسری آوار جنیانی نہ اوشتوکیں درچ بازیں دھکاں چہ برجاہ انت ءُ نوں بلوچ نودربر بلوچستان ءَ ڈں اسلام آباد ءُ پنجاپ ءِ زانشجاھاں ھم ہراسمنٹ ءُ زورانسری آوار جنی ءِ دیمپانی ءَ کنگ ءَ انت –

اھوالکاراں گوں تران کنان ءَ آھانی گوشگ ات کہ حفیظ بلوچ کہ قائداعظم شھدربرجاہ ءَ ایم فل ءِ نودربرے کہ آ ھشت فروری سال دوھزار بیست ءُ دو ءَ ھزدار ءِ اکیڈمی ءِ تہ ءَ زورانسری آوار جنگ بوتگ آئی ءَ چہ پد اسلام آباد ءُ پنجاپ ءَ ھوار ملک ءِ دگہ جاھاں زھرشانیانی درچ ءِ بندات کنگ بوتگ ءُ اشی ءِ ھمراھی ءَ بلوچ نودربراں کانودی درسین دروازگ ٹُک اتگ انت ءُ بُرزی تبک ءَ وتی جیڑہ سرپد کنگے کوشست کُتگ ءُ ھمے درچ ءِ برجاہ داران ءَ یک مارچ ءَ اسلام آباد پریس کلب ءِ دیم ءَ حفیظ بلوچ ءِ پہ وش ءُ سلامتی یل کنائینگ ءُ بلوچ نودربرانی گوم ءَ بوتگیں ہراسمنٹ ءِ دارگے ھاتر ءَ یک زھرشانی بنجل ءِ اڈ دیگ بوتگ اشاں چہ ابید ما ھنگت نا امیت بوتگ انت –

آھانی گوشگ ات کہ قائد اعظم شھدربرجاہ ءِ واکدارنی گیر سنجیدگیں رویش ءُ پولیس ءِ نیمگ ءَ چہ نودربراں لٹ شاپ کنگ، باگی بوھگے پرچی، پھازگی ادارھانی کارمندانی نیمگ ءَ وھد وھد ءَ نودربرانی پروفائلنگ ءُ بیھار دیگ وڈ وڈا ترسینگ ءُ نودربراں یکے دومی ءَ میڈینگے جاور پیداک کنگ پدردی انت ءُ ایرجنگی انت –

اھوالکاراں گوں تران کنان ءَ زھرشانی ءَ نشتگیں نودربرانی گوشگ ات کہ مروچی اے زھرشانی بنجلے بیست ءُ ششمی روچ انت کہ اقتدار ءِ شھر ءِ میان ءَ جنگ بوتگ بلے ادا ھم مار ءَ ناامیتی ءَ ابید ھچ نہ رستگ – اے میان ءَ مئے جیڑہ ءَ پھمگے بدل ءَ وڈیں وڈیں مردماں اتکگ ءُ مار ءَ ترسینتگ ءُ ھمے زوتاں دیم ءَ اتکگیں وئیل اشی ءِ پدریں درور انت –

نودربرانی گوشگ ات کہ گوستگیں روچاں قائداعظم شھدربرجاہ ءِ بچکانی ھاسٹل ءِ شش نمبر ءَ شپ ءِ نھنگام ءَ سَے مردم بید موکل ءَ نودربرانی کوٹی ءَ پُتر انت – وڈ وڈیں جست پُرس کن انت دومی نودربرانی درگت ءَ گیر کانودی ءُ بے رھبندی جست پُرس کن انت ءُ آھاں ترسین انت وھدیکہ زیکیں روچ ءَ اسلام آباد پریس کلب ءَ چہ ڈن سیاھیں کانچیں گاڑی ءَ سواریں لھتے مردم بلوچ نودربر ءِ رندگیری ءَ کن انت ءُ آئی دار انت – سلاہ بندیں گلانی باروا گپ جن انت ءُ آئی ءَ ھنچیں جست کن انت کہ آ جستانی گوں یک نودربر ءَ ھچ سیادی نیست ءُ ھمے نودربر ءِ ترسینگ ءِ کوشست کنگ بوتگ – اشی ءَ چہ اے گپ پدر بیت ترسینگے درچ کم بوھگ ءِ بدل ءَ گیش بوھان انت چریشی ءَ نودربر گیشتر ماژگی ازیت آماچ انت ءُ وانگ ءُ زانگے ھمراھی ءَ آھانی زند ھم ھترہ ءِ تہ ءَ انت –

آھانی گوشگ ات ھشت فروری ءَ چہ ما پُرایمنیں زھرشانی کنگ ءَ انت بلے اشی ءَ چہ ابید ناکہ حفیظ بلوچ یل کنگ بوتگ ءُ ناکہ بلوچ نودربرانی ہراسمنٹ ءِ تہ ءَ کمی اتکگ بلکنہ روچ پہ روچ گیشی آھان انت – برزی تبک ءِ نیمگ ءَ اے جیڑہ دلگوش دیگ بوھگ ءَ نہ انت مئے لوٹ نزرانداز کنگ بوھگ ءَ انت- نوں وھدیکہ بلوچ نودربر گیشتر پھریز نہ انت گڈا ما بحیثیت ءِ مزلومیں نودربر اے گپ ءَ شمے دیم ءَ ایرکنگ لوٹیں اے میان ءَ بلوچ نودربرانی سر ءَ ھر وڈیں وئیلے بہ بیت آئی ءِ زمہ وار اسلام آباد ءِ واکدار ءُ پھازگی ادارھاں ھوار پنجاپ ءُ اسلام آباد ءِ شھدربرجاہ بنت کہ آودا بلوچ نودربر وانگ انت –

نودربرانی گوشگ ات کہ مئے ھنگت ءَ تان ھما دؤئیں لوٹ انت حفیظ بلوچ وش ءُ سلامتی یل کنگ بہ بیت ءُ اسلام آباد ءُ پنجاپ ءَ وانوکیں بلوچ نودربرانی پروفائنلنگ آھاں بیھار دیگ وڈ وڈا آھانی ترسینگ بند کنگ بہ بیت – مئے اے زھرشانی تاں ھما وھد ءَ برجاہ مان انت کہ مئے لوٹ منگ نہ بنت ءُ ھمے زوتاں دیمتری کاراں وتی سنگتانی گوم ءَ سلاہ مشورہ پد دیم ءَ کارین –

بلوچستان ءِ دمگ کیچ ءَ پوج ءَ میڑ ءِ میان ءَ یک مردمے ءِ جنگے ٹاہ داتگ –

پولیس ءِ رِد ءَ ابدؤئی ءَ سیممسر ءَ ایف سی ءِ یکسد ءُ بیست ءُ ششمی ونگ ءَ میڑ ءِ میان ءَ ایرانی نژاد علی ء عبدالحق نوتیزئی جنگ بوتگ –

آئی ءِ جون ایف سی ءَ ٹیچنگ نادراھجاہ ءَ سر کُتگ بلے تنی وھدی میڑ درگت دگہ نیمگ ءَ ھچ ھال نیست اِنت

بلوچستان ءِ دمگ قلات ءُ سبی ءَ دو روچاں پوجی بیڑ برجاہ اَنت ناسرجمیں ھالانی رد ءَ ھردوکیں نیمگاں جانی تاوانانی ھال اِنت-

گوستگیں روچ ءَ بندات بیتگیں پوجی بیڑ ءَ پاکستانی پوج ءِ ایس ایس جی کمانڈوزاں ھوار پوج بھر زورگ ءَ اَنت یک ایس ایس جی کمانڈوزے ءِ بیرانی ءِ ھال دمگی مردماں راست کرتگ بلے واکدارانی نیمگ ءَ اے درگت ءَ ھچ ھال دیم ءَ نیتکگ اَنت-

بلوچ سلاہ بندیں گل بی این اے ءَ یک کسانوکیں درشانے شنگ کتگ ءُ گشتگ کہ پوجی بیڑ ءِ وھد ءَ یک درزنے ءِ کچ ءَ ایس ایس جی کمانڈوز جنگ بیتگ اَنت ءُ گشتگ کہ بیڑ برجاہ اَنت بلے داں انگت ءَ تاوانانی ھال شنگ نہ کتگ اَنت-

شال ءَ جھمنندیں اردو نیوز ءِ اھوالکار زین الدین ءَ وتی چاگردی تندجاہ ٹویٹر ءَ گشتگ بلوچستان ءِ دمگ کچھی ءَ سنی شوران ءَ ھواریں کوھی دمگ ناگاھو ءَ پوج ءِ بیڑ، تیرگواری ءِ میان ءَ ناشریں گلانی ھشت مردم جنگ بیتگ اَنت ءُ پوج ءِ یک سپاھیگے اٹک ءِ جھمنند نثار اھمد ھم جنگ بیتگ ءُ سَے زدگ بیتگ اَنت-

نیشنل پاٹی ءِ چیردستی ءَ بی ایس او ءِ گوستگیں رھشونانی ستاشانی برجم دارگ بیتگیں نیاد ءَ تران کنان ءَ نیشنل پاٹی ءِ بنجاھی سروک ءُ بلوچستان ءِ گوستگیں سروزیر ڈاکٹر عبدالمالک بلوچ ءَ گوشتگ کہ راجی زرمبشت ءَ ھواریں ھر ھما پرد مئے واستا ستاکرز اِنت، بلوچ اسٹوڈنٹس آرگنائزیشن ءِ کیڈرز راجی سنچ ءُ پجار ءِ سر ءَ سرجم ءَ ابید راجی ءُ سیاسی جمھوری گامگیجانی بھر یتگ بلوچ نودربرانی یکجاہ کنگ ءُ راجی مڈیانی سر ءَ گپ کنگ یک جوانیں سیاسی گامے نیشنل پاٹی ھر ھما باسک ءِ شرپ ءَ کنت ءُ آئی ءِ گپ ءَ گوشدار ایت-

آئی ءَ گُشتگ بلوچستان ءُ اے وھد ءَ یک ناوشیں سیاسی جیڑھے ءُ جنجالانی آماچ اِنت چریشی ءَ بلوچ راجدوستیں پاٹیاں یکجاہ ءَ جد ءُ جھد کنگ ءُ وھد ءُ جاورانی سرپد بیگ المی اِنت-

آئی ءَ گُشتگ کہ بلوچ چاگرد ءَ وت ماں وتی گٹگیری ءَ زبھر کتگ راج ءُ ڈیھ ءِ لوٹ اے وھد ءَ پدر کن اَنت کہ بلوچستان ءل دراھیں تاکتاں دومی ءِ شرپ کتگ وتی سیاسی سنچ برجم دارگی اِنت آئی ءَ گُشتگ کہ کیڈرز ءِ یکجاہ بیگ ءِ مول ءُ مراد جتا جتائیں پاٹی ءُ مردمانی میان ءَ گپ ءُ ترانانی درچ برجاہ دارگی اِنت ءُ سیاسی تاکتانی ھمسنت سیاسی ءُ راجی لوٹانی واستا ساجو کنگی اَنت-

ڈاکٹر مالک بلوچ ءَ گُشتگ کہ نیشنل پاٹی سیاسی باسکانی شرپ ءُ شان ءَ کنت ھچبر اے نہ چار ایت کَے کجام پاٹی ءَ گوں بندوک اِنت سیاست ءَ گیش اوپار ءُ دیمروئی کنگ المی اِنت ءُ سیاسی گامگیجانی ستاشانی کنگ اژدری اِنت-

نیشنپ پاٹی ءِ چیردستی ءُ برجم دارگ بیتگیں نیاد ءَ بی ایس او ءِ جتا جتائیں وھداں گوستگیں چیئرمین ءُ باسک ھوار بیتگ اَنت-

اوّلی ءُ گُڈی رند ات

نبشہ کار۔ منزور آدِل رھگوز

دی بلوچستان پوسٹ

یک روچے منی سر نیٹورک ءَ کپت منی ھال سنگاباد ءِ مردمے ءِ گوما بوت سلام ءُ دوا ءَ رند مردم ءَ من ءَ گُشت کہ پلانی تئی نمبر ءِ سک ءَ جُست ءُ پد ءَ انت من گُشت پہ چی ءَ زناں؟ گُشت ئِے کہ ایشانی گونڈلے پارٹی یے ءَ شُتگ۔ من گُشت کجُام پارٹی ءَ شُتگ؟ گُشت ئِے من نہ زاناں من گُشت گُڑا آ مردم منی نمبر ءَ چے کنت؟ گُشت ئِے کہ گُشتگ اِت مئے مردم ءَ رابیدیاھینی ایت من گُشت اے گونڈل زناں کجام پارٹی ءَ انت؟ گشت ئِے من نہ زاناں شمئے کِرا نہ انِت زناں؟ من گُشت ناں مئے کِرا نہ اِنت ءُ اے گونڈل من نہ دیستگ ءُ منی گوما اے گونڈل ءِ ھال ءُ اھوال ھم نہ بوتگ-

گُڑا من اینگو آنگو سنگتاناں جُست ءُ پد کُت کہ اے گونڈل کجام گَلّ ءَ شُتگ ءُ کئ گوما گون انِت۔ گُڑا یک روچے (یو بی اے) سنگتے ءِ گوما منی ھال بوت من جُست کُت کہ مئے دمگ ءِ گونڈلے گاریں شمئے کِرا انت یا ناں دگہ نیمگے سرے کشّیتگ ءُ بوت کنت کہ ریاستی چریکاں (دفاع) والا آں گلّے ءِ رنگ ءَ دست گیپتگ آ سنگت ءَ گُشت کہ اے گونڈل مئے کِرا انت ءُ ما دست گیپتگ۔من جُست کُت کہ چونیں گُڑا؟ آ سنگت ءَ کند ات ءُ پسّو دات گُشت ئِے ورناء انو سک ءَ شوکیں وتی کارانی سر ءَ ذمہ دار ءُ ایماندار اِنت۔ دیمتر ءَ باریں چون بیت۔ بلے اے دور ءَ سک ءَ شرّ اِنت ھمے وڑا وھد ءُ نوبت گوزاں بوت اَنت ما ھم برے اد ءُ برے ھود ءَ ھمے تگ ءُ تاچ گلّانی کاراں گوں دزگٹ اتاں۔ یک روچے یک جاھے من ءُ دگہ دو سنگت ءَ شھید دودا ءُ شھید بالاچ ءُ شھید اسلم ءَ گوں ڈیک وارت سلام ءُ دوا بوت۔ اے وھد ءَ آ سنگت اشتاپ اتاں ءُ ما ھم ھما سنگتانی وڑا اشتاپ اتاں دیر ءَ داں گپ ءُ تران نہ بوت۔ شھید دودا ءُ شھید بالاچ ءَ من پیسر ءَ دیستگ ات ءُ ایشاناں گوں شرّیں وڑے ءَ بچاروک اتوں شھید اسلم ءَ من پیسر ءَ نہ دیستگ ات یکبرے من ءَ کمو شک بوت کہ بوت کنت کہ اے مئے دمگ ءِ ھما گونڈل انت۔ پد ءَ من دل ءَ گُشت کہ اے آ نہ انت۔ ھمے وڑا وھد ھم گوزان ات پد ءَ یک روچے من شھید رھمدل ءَ جاگاھے ڈیک وارت من جُست ءُ پُرس کُت گپ ءُ تران کُت۔ من گُشت کہ مئے دمگ ءِ پلانی ءِ چُک ءِ کوڑ نام کئے انت؟ گُشت ئِے کہ میراس انت من گُشت گُڑا چون اِنت باریں ھال ءُ اھوالانے بدئے۔ گُشت ئِے ٹیٹ انِت من کند ات ءُ گُشت ڈئے زالم تو بیارتیں گوں من چار ات باریں چونیں مئے سیاد شھید رھمدل ءَ کند ات ءُ گُشت انشالہ تو وتی سیاد ءَ زوت گندئے۔ ھمے وڑا مئے زند گوزان ات یک روچے یک سنگتے نیٹورک ءَ چے اتک ءُ گُشت ئےِ کہ لھتیں سنگت آیگی اِنت ءُ مارا رؤگی اِنت ءُ دست گِرگی آں۔ من گُشت کہ سنگت کئ زھی آں؟ آ سنگت ءَ گُشت کہ لھتیں (بی آر اے) سنگت آں ءُ دودا گوں سنگتاں ھم گون انِت۔ یک ءُ دو روچ گوست سنگت شُتاں سنگتانی دست گِرگ ءَ من ھمدا اوتاک ءَ اتوں۔ اوتاک ءِ ورگ ءُ چَرگ ھلاس بوت ءُ من شُتوں ساھگے ءَ پہ آرام ءَ تچک دات۔ کسانیں وابے جَت ءُ پاد اتکوں آپے وارت ءُ پد ءَ تچک دات۔ دل پد ءَ ھُبینگ ءَ شُت منی ھیال ءَ پاد برمش ءِ توار بوت من سر چِست کُت ءُ چار ات داں سنگتاں سنگت اش گوناں پیداکاں۔ من واب ءَ چے پاد اتکوں شُتوں سنگتاناں وش اتک کُت ءُ نشتاں دیوان بوت ۔ سنگتانی جُست ءُ پُرس راہ ءُ رندانی ءُ آ دگہ دمگانی سنگتانی جُست ءُ پرُس ھمے وڑا ھمے مزاک ءُ مسکرا ءَ یک ءُ دو روچ گوست۔ یک روچے دیگر ءِ وھد ءَ ما کُل سنگت دیوان ءَ نشتگ اتاں گپ ءُ تران ءُ دیوان ات۔ شھید میراس چو منی چپیں دست ءِ نیمگ ءَ نشتگ ات. من شھید ءَ را سنگُکے جَت ءُ دست ءِ سرا اشارہ کُت کہ بیا۔ شھید میراس پاد اتک ءُ اتک منی نزیک ءَ نشت۔ من دست ءَ گیپت ءُ اول سر ءَ جُست کُت کہ لوگ ءَ ھال کتگ مات جوڑ ءُ وش اِنت؟ من ءَ چو دگہ وڑ چار ات ءُ گُشت ئِے جوڑ ءُ وشیں من بلئے ھال نہ کتگ۔ پد ءَ من جُست ءُ پُرس کنان کُت پلانی چونیں، پلانی چونیں۔ بس ھمے یکیں گپ ءَ گُشگ ءَ ات کہ ٹیٹ ءُ وشّاں۔ دگہ ھچ گپ کنگ ءَ نہ ات۔ من گُشت گپ کن تو گپ ءَ نئے؟ بچکند ات ءُ گُشت ئِے کہ تو من ءَ مانگیشّینگائے من چون گپ کنیں۔ اول ایش انت کہ من ترا زانگ ءَ نہ اوں؟ دومی تو من ءَ اَنچو جُست ءُ پُرس کنگ ءَ ئے پور ءَ تو منی لوگ ءِ تھ ءِ مردمے ءِ من کند ات ءُ گُشت اؤ من تئی لوگ ءِ تھ ءِ مردمے اوں تو من ءَ چون نہ زان ئے؟ گُشت ئِے باور کن کہ من ترا نہ زانیں۔ اولی رند ءَ من دگہ سنگتے ءِ پِت ءِ نام گُشت کہ من پلانیگی چُک اوں نوں من ءَ زان ئے ؟ کند ات ءُ گُشت ئِے ھو۔ گُڑا داں دیر ءَ ما گپ ءُ تران کُت۔ پد ءَ رند ءَ گُشت ئِے کہ تو انگت آ نئے بلئے من گُشت چونی ءَ گُشت ئِے آ چُشینے نہ اِنت۔ کمو دیر ءَ پد دگہ سنگتے ءِ نام گیپت ئِے ءُ گُشت ئِے کہ ترا ایشی ءِ اکس گون من ءَ پیشدارے ۔ اے سنگت من ھما وھد ءَ دیستگ کہ من کسان بوتگ اوں پد ءَ رند ءَ من نہ دیستگ۔ ما داں دیر ءَ دمگ ءِ سرا گپ ءُ تران کُت ءُ گلّانی سرا ءُ گُڈسرا گُڑا من وتی نام نبشتہ کُت ءُ گُشت کہ ایشی ءِ ھالاں بدئے باریں کجا انت ءُ چے کنگ ءَ انت مرچان ءَ چون انت۔ بچکند ات ءُ گُشت ئِے نہ زاناں۔ بلکین کہ منی دیم ءَ ھم نشتگ من پد ءَ جُست کُت کہ شُما داں دیر ءَ ھمدائے ؟ گُشت ئِے ما اندازہ باندا رواں من گُشت تو بہ نشتینے چیزے روچ ءَ گِندوک ءُ دیدارے بیت گپ ءُ ترانے بیت چو اشتاپی مہ بو۔ بچکند ات ءُ گُشت ئِے انو ما رویں انشالہ پد ءَ دست ءَ وار کنیں کائیں تئی گِندوک ءَ من ءَ جُستے کُت تو داں دیر ءَ ھمدا بئے یا نہ؟ من گُشت زانگ نہ بیت بوت کنت کہ ھمدا بباں بوت کنت کہ اد ءَ مہ باں رند ءَ زانگ نہ بیت۔ گُشت ئِے انشالہ من کائیں لازم ترا گندیں ھمے وھد ءَ گُڑا وتی نمبر من ءَ داتے ءُ گُشت ئِے تو ھر وھد ءَ گیش اتے گُڑا من ءَ ھالے بکن من کائیں یا تو بیا۔
اے دگہ روچ ءَ سنگتاں ورگ وارت ءُ دیم پہ وتی نیمگ ءَ در کپتاں۔ وھد ءُ نوبت گوزان بوت اَنت برے برے گوں ھما سنگتاں ھال بوت۔ آ نیمگ ءِ ھر سنگت ءَ گوں ھال بوت من ھر وھد ءَ جُست کت کہ میراس چونیں۔ سنگتاں گُشت ٹیٹ ایں وشیں۔ من گُشت بگو زالم بیا نیٹورک ءَ چَکرے بجن من ءَ وَ تئی گپ ءُ کندگانی واستا زھیر کنت پد ءَ سنگت ءَ گُشت آ وَ گیشتر نیٹورک ءَ کیت بلے تو گار ءِ درا نہ بئے۔ من گُشت من پیریں مردے اوں منی ءَ زوت زوت ءَ نیٹورک ءَ آیگ نہ بیت۔ بیگاھے ءَ سنگتے نیٹورک ءَ چے اتک ءُ ھال ءُ اھوالے داتاں کہ سنگتے شھید بوتگ۔ سنگتاں جُست کُت کہ کئے انت ءُ چونی ءَ شھید بوتگ ءُ کجُا؟ سنگت ءَ گُشت کہ بی این اے ءِ بالاچ شادی کئور ءَ شھید کنگ بوتگ۔ وت ءُ میراس بوتگ اَنت میراس بچیتگ ءُ بالاچ شھید بوتگ۔
ھمے وڑا روچ پہ روچ سنگتانی شھادت گیش بوان ات اَنت یک روچے سنگتے نیٹورک ءَ چے اتکاں گُشت اش کہ استال گوں پنچ سنگت ءَ کُلبر ءَ شھید کنگ بوتگ۔ ماھے گوست پد ءَ سنگتے نیٹورک ءَ چے اتک ءُ گُشت ئِے کہ ماسٹر ءِ اوتاک ءِ سر ءَ پوج ءَ بیڑ بُرتگ ءُ ماسٹر گوں نھ سنگت ءَ شھید بوتگ۔ دگہ دہ ءُ پانزدہ روچ گوست ءُ نہ گوست پد ءَ ھما بدّیں ھال سنگتے نیٹورک ءَ چے اتک ءُ گُشت ئِے کہ دوداھی اوتاک ءِ سرا پوج ءَ بیڑ بُرتگ دودا گوں شش سنگت ءَ شھید بوتگ۔ اے ھال کہ منی گوشاں کپت من ءَ سک ءَ توْر ات تنیگا آ سنگتانی یاد ءُ تھتال ءُ توْرشتاں چے مردم در نہ یتکگ اے دگہ یک بلاھیں ءُ نہ پراموشیں ٹپ ءُ توْرشتے دل ءَ بوت۔ برے برے کہ من ترا گیر آرؤتگ من ھمے جیڑ اتگ کہ کد پد ءَ من گوں ترا ڈیک بُوران ءُ پد ءَ من ترا ھما وڑا مان بہ گیشناں بلئے بژن من گوں ترا دیم پہ دیم ءَ ڈیک وارت ءُ نہ گوں نیٹورک ءَ ڈیک وارت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔