TBP Balochi

سر بیتگیں ھالانی رد ءَ بلوچستان ءِ دمگ نوکنڈی ءَ چہ اوگانستان ءَ دیم پہ ماشکیل ءَ روکیں مساپر بریں گاڑی وئیل ءِ آماچ بیتگ چریشی ءَ چار مردم بیران اَنت-

وئیل ءَ چار مردم بیران بیتگ اَنت کسان سالیں زھگان ھوار یک درزنے ءِ کچ ءَ مردم زدگ بیتگ اَنت-

دمگی مردمانی رد ءَ وئیل تیز روگ ءِ سبب ءَ پیش اتکگ، لاش ءُ زدگ بیتگیں مردم ھسپتال ءَ برگ بیتگ اَنت-

زدگ بیتگیں مردم گیشیں درمانی ءَ ماشکیل ءَ برگ بیتگ اَنت وئیل ءِ پَٹ ءُ پول ءَ لیویز کنگ اِنت-

ھمے وڑ ءَ تربت ءَ عومری کھن ءَ کرولا گاڑی ءُ موٹر سائیکلے ءِ میان ءَ وئیل بیتگ چریشی ءَ زالبولے ءَ ھوار سَے مردم بیران بیتگ اَنت-

لیویز کارمند وئیل جاہ ءَ سر بیتگ ءُ لاش اش چست کرتگ ءُ ھسپتال ءُ برتگ انت ئِے –

زانگ بہ بیت بلوچستان ءَ ھمک روچ پیش اتکگیں وئیلاں مردمانی جان زوال بیگ ءَ اَنت اشانی گیشتر ترنف روگ ءُ دگانی پُرشت ءُ پروشی ءِ سبب گوشگ بیگ ءَ اِنت –

آواران ءَ پوجی گاڑی ءِ سر ءَ اُرش کرتگ ءُ پنچ کارندہ کشتگ اَنت- میجر گوھرام بلوچ

بلوچستان ءِ دمگ آواران ءَ سلاہ بندیں مردماں پوجی گاڑی مروچی بمبے ءِ نشانگ کرتگ، اُرش آواران ءِ دمگ کنیرہ ءَ پیش اتکگ کہ اود ءَ پوجی گاڑی گوزگ ءَ بیتگ ناگتی سلاہ بندیں مردماں چیر کرتگیں بمبے ءِ نشانگ کرتگ-

دمگی مردمانی رد ءَ چرے بمب تراک ءَ گاڑی ءَ سواریں پوجی زدگ ءُ ٹپی بیتگ اَنت-

دومی نیمگ ءَ بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کرتگیں درشان ءَ گُشتگ کہ آواران ءِ دمگ کنیرہ ءَ مروچی نیم روچ ءَ پاکستانی پوجی کاروان چیرکرتگیں بمبے ءِ نشانگ کتگ –

میجر گوھرام بلوچ ءَ گشتگ کہ اے کاروان دَہ گاڑی ءُ ھشت پرپٹانی کاروان بیتگ آواران ءَ دیم پہ مشکے ءَ روگ ءَ بیتگ چرے کاروان ءَ اُرش ءَ یک گاڑی ءِ ستکگ ءُ تباہ بیتگ ءُ گاڑی ءَ سواریں پنچ کارندہ مرتگ ءُ زدگ بیتگ اَنت-

جارکش ءَ گشتگ اے اُرش بلوچستان ءِ آجوئی ءَ داں برجاہ مان اَنت-

بلوچستان ءِ دمگ کیچ ءِ بنجاھی شھر تُربت ءِ میتگ آپسر بلوچی بازار ءَ چہ گوستگیں سال ءِ 24 دسمبر ءَ زورانسری بیگواھی ءِ آماچ بیتگیں خلیل دلوش ءِ مات زر گل ءُ حفیظ ء وشدل ءِ مات مھرجان ءَ دگہ ھندی جنینانی ھمراھی رسانکدراں گوں تران کنان ءَ گُشتگ کہ سی ٹی ڈی ءَ نصیر آباد ءَ چہ گوں سلاہ ءُ بمبانی ھمرائی ءَ دزگیری ءِ پندل سازگ ءَ گوں مارءَ ذھنی جیڑگانی آماچ کُتگ۔

آھاں گُشتگ کہ آھانی دوھیں زھگ گوستگیں سال ءَ 24 دسمبر ءِ شپ ءَ ادار دو ءَ چہ لوگءَ وپتگیں واب ءِ تہءَ سادگیں پوشاک گوریں لشکریانی کارمنداں دزگیری ءَ پد بیگواہ کُتگ اَنت، کہ اِشی ھلاپ ءَ ما پولیس ءِ گورءَ ارزی ھم نبشتہ کنگ ءِ دزبندی کُتگ بلے پولیس ءَ ارزی نبشتہ نہ کُتگ ءُ مارءَ اے بیھار دیگ بیتگ کہ اگں شما اے درگت ءَ ارزی نبشتہ کُت گُڑءَ شمئے زھگ کُشگ بنت ھمے تُرس ءَ ما ھاموش بیتگ اِنت۔ بلے سی ٹی ڈی ھمے سال ءَ 28 مارچ ءَ آھانی دزگیری چہ نصیر آباد ءَ پدر کُتگ ءُ بھتام جتگ کہ آھانی گورءَ سلاہ ءُ بمب ھم دزگپتگ اَنت۔

آھاں گُشتگ کہ سی ٹی ڈی اے ٹاہ دروگ اِنت سرجمیں میتگ اے گپ ءِ شاھدی دیگ ءَ ساڑی اِنت کہ اے دوھیں زھگ چہ آپسر بلوچی بازار تُربت ءَ چہ بیگواہ کنگ بیتگ اَنت اگں مارا کجام ھم آمید گِس ءَ لوٹارینگ بیت اِنت گُڑا ما اے گپ ءِ شاھدی دیگ ءَ ساڑی اِنت۔

رسانکدراں گپ کنگ ءَ پد آھاں ھندی جنینانی ھمرائی ءَ ڈپٹی کمشنر کیچ حسین جان بلوچ ءَ گوں آئی کارگس ءَ نیاد کُتگ ءُ وتی زھگانی یل کنائینگ ءِ لوٹ کُتگ ءُ گُشتگ کہ آھانی دوھیں چُک بے میار اَنت آ شپ ءَ وپتگیں وابے تہءَ لوگءَ چہ دزگیر کنگ ءَ پد بیگواہ کنگ بیتگ اَنت کہ اِشی منانک ھم مئے گور ءَ است اَنت۔

ڈپٹی کمشنر کیچ ءَ گُشتگ کہ آھانی زھگانی بگیرءَ ایف آئی آر نبشتہ کنگ بیتگ ءُ آ کیچ دمگ ءَ ڈن دگہ یک دمگی ءَ پولیس ءِ دزگیری ءِ تہءَ اَنت پمیشکہ آ اے درگت ءَ ھچ کُت نہ کنت بلے اے درگت آ دمگ ءِ ڈپٹی کمشنر ءَ گوں گپ کنت۔

دی بلوچستان پوسٹ

بلوچستان ءَ زورانسری آوار جنگ بوتگیں مردمانی ھاتر ءَ شال ءِ پریس کلب ءِ دیم ءَ بیگواھیں مردمانی پانکجنیں گل وی بی ایم پی ءِ زھرشانی بنجل برجاہ، زھرشانی بنجل ءَ مروچی چار ھزار ءُ شش سد ءُ سِی ءُ یک روچ سرجم بوتگ انت – مروچی این ڈی پی ءِ رشید بلوچ، غنی بلوچ ءُ اشفاق بلوچ ءَ زھرشانی بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشانتگ –

ماما قدیر بلوچ ءَ بنجل ءَ اتکگیں مردمانی میان ءَ وتی ھیال درشانتگ ءُ گوشتگ کہ بازیں کرن ءِ بیت کہ بلوچستان میاں استمانی تاکتانی مپاد ھاتر ءَ جنگ جاہ ءِ جوڑ بوتگ یک نیمگے رویش مٹ کنوکیں سامراجی کاسگ چَٹ ءُ دومی نیمگ ءَ پُرایمنیں جھد کنوکیں باسک وتی جھد ءَ کنگ ءَ انت –

ماما قدیر بلوچ ءَ گوشتگ کہ اگاں گوستانک چارگ بہ بیت بلوچ چاگرد انسان دوست ءُ اوپار کنوکیں چاگردے زانگ بیت – سامراج ءِ زلم ءُ زوراکیانی بگیری ءَ بلوچ مدام یکجاہ بوتگ انت –

ماما قدیر بلوچ ءَ دیمتر ءَ گوشتگ کہ مروچی ھزارانی کچ ءَ بلوچ ریاستی زوراکیانی آماچ انت کہ آ گوستگیں بازیں سالاں چہ زورانسری آوار جنی ءِ آماچ کنگ بوتگ ءُ زندانی کنگ بوتگ انت – نوک آبادی ءِ بگیری ءَ بلوچ پرزندانی دیمونی ستا کرز انت

بلوچستان ءِ دمگ کوھلو ءِ بارکھان ھنکین ءَ کل کتگیں شوروانی تراک ءَ یک چُکے بیران بیتگ۔ ھندی ھسپتال ءَ ڈاکٹر، کارمند ءُ آسراتی نہ بیگ ءِ سوب ءَ لس مھلوک ءَ پُرشت ءُ پروش کُتگ۔

تراک بارکھان شھر ءِ نزیک ءَ جاگن ءِ کچھیں دگ ءِ سرءَ بیتگ، کہ اِشی ءِ نشانگ یک زھگے بیتگ کہ وتی گوکءَ شھر ءَ برگ ءَ بیتگ۔

ھندی اھولانی ردءَ چُک سک ٹپی ایں جاوراں میتگیں مردماں ڈی ایچ کیو ھسپتال ءَ بُرتگ کہ آودہ چُک ءَ درد سگ اِت نہ کُتگ اَنت ءُ بیران بیتگ۔

دومی نیمگ ءَ ھسپتال ءَ ڈاکٹر، کارکنوک ءُ آسراتی نہ بیگ ءِ سوب ءَ لس مھلوک ءَ پُرشت پروش بندات کُتگ، کھول ءَ چُکے جون دگ ءِ سرءَ ایر کُتگ ءُ زھرشانی بندات کُتگ وھدیکہ ھسپتال ءِ شَئے ھم بُن داتگ اَنت۔

سربوتگیں ھالانی رِد ءَ بلوچستان ءِ دمگ آواران مشکے ءَ لوگانی لُٹ ءُ پُل ءَ چہ دمگی مردم دلسیاہ انت –

دمگی مردمانی گوشگ اِنت کہ لوگانی مڈی ءُ توشگی سامانانی لُٹ ءُ پل کنوکانی سیادی چہ سرکار انت –

اے درگت ءَدی بلوچستان پتر ءَ سربوتگیں ھالانی رِد ءَ گوستگیں روچاں یار جان ، پکیر جان ءُ بابو شاھنواز جاھمنند مشکے ءِ گِس لٹ پُل کنگ بوتگ انت اے میان ءَ لُٹ ءُ پُل کنوکاں گرانبھائیں مڈی ءُ سُھر وتی ھمراھی ءَ برتگ اَنت-

دمگی مردمانی رِد ءَ اے لُٹ ءُ پُل ءَ سرکاری ٹولی ءِ سروک دینو ء محمد ابراھیم ھوار اِنت-

ھالانی رِد ءَ مشکے ءُ کش ءُ کری دمگاں اے وڑیں وئیل وھد وھد سر ءَ بوھگ ءَ اَنت بلے اسر مندیں مردم ھالانی شنگ کنگ ءَ ترسگ انت –

بلوچستان ءِ تیاب دپی شھر گوادر ءِ تھسیل پسنی ءِ دمگ چربندن ءَ نودربراں وتی ھکانی لوٹ ءِ ھاتر ءَ زھرشانی کتگ –

سربوتگیں ھالانی رِد ءَ پشمبے ءِ روچ ءَ جنکیں نودربراں وانگجاہ ءَ ٹیچرانی کمی ءُ سے ٹیچرانی بدل کنگ ءِ بگیری ءَ ڈپٹی ڈسٹرکٹ آفیسر ایجوکیشن کارگس ءِ دیم ءَ نندانک جتگ ءُ زھرشانی کتگ-

نودربراں ٹیچرانی کمی، وانگجاہ ءُ دگہ جیڑاھاں ھوار پلے کارڈ چست کتگ ءُ انتزامیہ بگیری ءَ نارا جتگ-

دی بلوچستان پوسٹ ءَ رس اتگیں ھالانی رِد ءَ چربندن جنکیں مڈل وانگجاہ ” گرلز مڈل اسکول ” ءِ نودربراں مروچی سُھب ءَ چربندن ءَ چہ پسنی ءَ اَتکگ ءُ ڈی ڈی او ای کارگس ءِ دیم ءَ ٹیچر ءُ وانگجاہ ءِ بان نہ بوگ سر ءَ زھرشانی نکش کتگ-

نودربراں دمگی رسانکدر ءَ گْوشتگ کہ تھسیل پسنی ءِ آ دگہ دمگاں چہ لگتگیں ٹیچرانی سبب ءَ ٹیچر آسراتیانی سوب ءَ وت ءَ بدل کن اَنت- چریشی ءِ مروچی ما زھرشانی کنگ ءَ لاچار ایں-

ایجوکیشن ءِ زمہ واری ءَ چہ دزبندی کن ایں ایجوکیشن دارگ یوسی وائز کنگ بہ بیت دانکہ اے جیڑہ ءَ راہ درگیجگ بہ بیت-