TBP Balochi

سربوتگیں ھالانی رِد ءَ بلوچستان ءِ دمگ ڈیرہ بگٹی ءَ ناشناسیں مردماں بند ساچی کمپنی ءِ گاڑی ءِ تراکناکیں شوروانی نشانگ کُتگ –

بندساچی کمپنی ءِ گاڑی کوھلو ءِ ھند لاسے زئی ءَ نشانگ کنگ بوتگ کہ دگ ءِ سر ءَ کار کنوکیں کمپنی ءِ ڈمپر ءِ سر ءَ کنگ بوتگ –

تراک ءَ بند ساچی کمپنی ءِ ڈمپر تاوان بار بوتگ ءُ تنی وھدی ھچ وڈیں جانی تاوان ھال نیست اِنت-

تراک ءَ پد پوج ءَ دمگ وتی انگیر ءَ کُتگ بلے تنی وھدی اے اُرش ءِ زمہ واری ھچ گل ءَ نہ منّ اِتگ –

سندھ ءِ شھر ھیدرآباد ءِ دمگ کوٹڑی ءَ ریل ٹریک سر ءَ تراکے بوتگ چریشی ءَ یک پٍُٹے ریل ءِ ٹریک تباہ بوتگ-

تراک ءِ سبب ءَ ریلانی روگ ءُ آھگ مھتل بوتگ وھدے کہ لھتے ریل جامشورہ ءُ ھیدرآباد ریل اسٹیشن ءَ دارگ بوتگ اَنت- دمگی پولیس ءَ گْوشتگ کہ تراک ءِ کساس ءُ ٹریک ءَ رستگیں تاوان ءِ چار ءُ ٹپاس کنگ بوگ ءَ اِنت-

ھمے کوٹڑی ءَ پد مرضیٰ پاڑا ءِ دمگ ءَ ھم ریل ٹریک سر ءَ تراکے بوتگ ءُ چریشی ءِ آسر ءَ ٹریک ءَ تاوان رستگ-

اے تراکانی زمہ واری سندھی آجوئی لوٹوکیں سلاہ بندیں گل سندھودیش روولیوشنری آرمی ( ایس آر اے) ءَ منّ اِتگ-

جارکش ءَ گْوشتگ کہ سوڈھو سندھی ءَ درشان ءِ تہ ءَ گْوشتگ کہ سندھودیش روولیوشنری آرمی مروچی ھیدر آباد ءَ ڈیتھا اسٹیشن ءُ کوٹری ( جامشورو) ءِ خورشید کالونی پنجاب ءَ رؤکیں ریل ٹریکس سر ءَ کنگ بوتگ بمب تراک زمہ واری ءَ منّ اِیت ءُ پنجابیاں ھوار سرجمیں ڈنی مردماں مکن کن ایں ءُ آ سندھ ءَ یل بہ کن اَنت برو اَنت-

جارکش ءَ گْوشتگ کہ ایس آر اے سندھ ءِ سرجمی آجوئی ءَ تاں وتی سلاہ بندیں جُھد ءَ برجاہ دارگ ءِ اِھد ءَ کن ایں-

بلوچستان ءِ دمگ کیچ ءِ مزن شھر تُربت ءَ چہ پولیس ءَ جون دزگپتگ ءُ نادراھجاہ ءَ سرکُتگ۔

اھوالانی ردءَ تُربت ءِ ھنکین آبسر مولد ریک ءَ چہ یک مردمے ءِ جون دزکپتگ۔ دزکپتگیں جون ءِ پجار اھمد ء سراج ءِ نام ءَ زانگ بیتگ۔

پولیس ءِ ردءَ جون چہ بیران بیتگیں مردمے سیادی ءِ لوگ ءَ چہ دزکپتگ کہ آہ ساہ ءِ مُنجگ ءِ سبب ءَ بیران بیتگ۔

جون پولیس ءَ دزگرگ ءَ پد نادراھجاہ ءَ سر کُتگ وھدیکہ پولیس گیشتر پَٹ ءُ پول کنگ ءَ اِنت۔

ریکوڈک معاہدہ ءَ پد بلوچستان ءَ ریکوڈک پھازگی کمپئین ءِ بندات کنگ بوتگ – کمپئین ءِ رھشونی ءَ سیاسی ءُ چاگردی رھشون ءُ باسک کنگ ءَ انت –

مروچی بلوچستان شھدربرجاہ ءَ چہ کمپئین بندات کنگ بوتگ ءُ پنتاک بھر کنگ بوتگ انت – ھمے وھد ءَ نوابزادہ حاجی لشکری رئیسانی ءُ نیشنل ڈموکریٹک پاٹی ءِ باسکاں پنتانک ھم بھر کتگ انت گوں ءُ مردم سرپدی داتگ انت –

کمپئین چلائینوکانی گوشگ انت کہ اے کمپئین ریکوڈک ءِ درگت کنگ بوتگیں چیریں معاہدہ بگیری ءَ کنگ بوھگ انت اے درگت ءَ شال ءَ مراگش ءِ ھم اڈ دیگ بیت وھدیکہ دگہ نیماں ھم کمپئین برجاہ بیت –

ریکوڈک پھازگی کمپئین نیمگ ءَ “ریکوڈک چیریں معاہدہ ” نام ءَ پنتانک بھر کنگ بوتگ کہ آھانی تہ ءَ نبشتگ کہ بلوچستان ءِ سرڈگار ھپتاد ءُ دو سالاں پد ھم گریبی ءُ بیروزگاری مھکوم انت کہ اودا مال ءُ مڈیاں سریچیں جاھانی بوھگ ءَ ابید ھم مھلوک وتی بنکی ھکاں چہ زبھر کنگ بوتگ انت – لینڈ ایکوزیشن ایکٹ 1894 وڈیں وتی کانود وتی سلاہ جوڈ کرتگ ءُ سرکار دیمروئی ءِ نام ءَ بلوچستان مھلوک ءَ بس لُٹگ انت ملٹی نیشنل کمپنیانی گوم ءَ بلوچستان سرڈگارے باپاری کنگ بیت تانکہ سامراج ءُ نوآبادیاتی ءِ لٹ پُل پالیسی مھکم بہ بیت –

دیمتر ءَ نبشتگ کہ ھمے زوتاں ریکوڈک کاپر اینڈ گولڈ پراجیکٹ ءِ چیریں معاہدہ ھم بلوچستان ءَ برجاھیں زوراکیانی بھرے کہ اشی ءَ بھا کن انت ءُ بلوچستان ءِ مھلوک ءَ گیشتر گریبی نیمگ ءَ بر انت ءُ آھاں چہ وتی زمیناں زبھر کنائینگے پندلے –

پنتاک ءِ تہ ءَ گوشگ بوتگ کہ بلوچستان ءِ مھلوک ءَ چہ لوٹ کنیں کہ ریکوڈک کاپر اینڈ گولڈ پراجیکٹ ءِ معاہدہ ءَ مہ منّ انت پرچاکہ چیر بوھگے سوب ءَ اے ھچ وڈا بلوچستان ءِ ھک ءَ نہ انت ءُ اے المی انت اے معاہدہ یکبرے شری ءَ زاھر کنگ طہ بیت درسانی دیم ءَ آرگ بہ بیت ءُ اشی ءَ پد بلوچستان ءِ گیشتر مھلوک اشی ءِ پیسلہ ءَ کنت کہ اے منصوبہ ءِ مول بلوچستان ءِ وشھالی انت یا بلوچ ءَ رد دیگ ءُ بلوچاں چہ وتی جندے سرڈگار گلینگ ءُ نوک آباداں جاہ دیگ انت –

بلوچستان ءِ تیاب دپی شھر گوادر ءَ چارشمبے ءِ روچ ءَ مزنیں کچے ءَ کوسٹ گارڈ بُنجل ءِ بُنجاھی دروازگ ءَ یکجاہ بوتگ ءُ نندانک جتگ تاں شپ ءَ برجاہ بوتگ-

گوستگیں روچ ءَ کنٹانی ھور ءَ پاکستانی کوسٹ گارڈ ءِ کارندھانی نیمگ ءَ چہ پوریاگرانی سر ءَ لٹ ءُ کُٹ ءُ ڈیزلانی دستیگ کنگ ءِ بگیری ءَ ھک دے تھریک ءِ جار سر ءَ زھرشانی کنگ بوگ ءَ اِنت-

زھرشانی کنوکاں گْوشتگ کہ کوسٹ گارڈ میجر ڈن ءَ زر گرگ ءُ دگہ جُرماں ھوار اِنت- آیانی گْوشگ اِنت کہ کوسٹ گارڈ ءِ دمگی مردمانی گوم ءَ رویشگ واجہ ءُ گلام ئیگ اِنت اے مارا کبول نہ اِنت-

دمگی مردمانی گْوشگ اِنت کہ دری پوج ءِ کارندہ اد ءِ ربیدگ ءُ رمس رواج ءَ چہ سرپد نہ اَنت ءُ مئے راجی گیرت سر ءَ لیب کنگ ءَ اِنت-

آیاں گْوشتگ کہ میجر بابر زوت در کنگ بہ بیت سیمسری کار ءُ بار پچ کنگ بہ بیت-

دانکہ شپ ءَ مردمانی زھرشانی برجاہ بوتگ-