TBP Balochi

بلوچستان ءِ دمگ کیچ ءِ ھند تمپ ءُ مند ءِ میانی دمگ ءَ پاکستانی پوج ءِ تیرگواری ءَ یک مردمے بیران بیتگ-

بیران بیتگیں مردم ءِ پجار سکیندر ء دوست مھمد جھمنند گومازی ءِ نام ءَ زانگ بیتگ، کہ گوستگیں روچ ءَ پوج ءِ تیرگواری ءَ بیران بیتگ-

چاگردی رسانکجاھاں سر بیتگیں ھالانی رد ءَ سکیندر یک سلاہ بندیں گلے ءِ باسک بیتگ ءُ پوج ءِ تیرگواری ءَ نمیران بیتگ-

سکیندر ءِ نماز جنازہ مروچی آئی ءِ بنکی ھنکین گومازی ءَ وانینگ بیتگ ءُ زمین ءِ میار کنگ بیتگ-

دمگی مردمانی رد ءَ نماز جنازہ بازیں کچے ءَ مردماں بھر زرتگ ءُ سکیندر ء دوست مھمد گلزمین ءِ میار اش کتگ-

وتن دیوانگیں مُرید

نبشتہ کار: علی مُراد

دی بلوچستان پوسٹ

من ءُ تو یکیں منزل ءِ راھیگ اِت اِنت، ھما منزل کہ بلوچ ءِ وشھالی ءِ منزل اِنت ھما منزل کہ بلوچ راج ءِ تمردیں پُسگاں گوں وتی زگریں ھوناں دگہ رنگ ءُ دروشمے داتگ اَت گوں ترُندیں گاماں دیم ءَ جُنزان اَنت –

شے جان تو ھم شھیدانی لَڑ ءَ ھوار گپتے ءُ پہ وتی ھانُل ءِ اِشک شئے مُرید بیتے- پہ وطن دیوانگیں مُرید ءَ یک اپریل ءِ بیگاہ ءَ گوں بدواھاں جنگ دات ءُ دژمن ءَ ھمے گُشت کہ اے شئے مُرید ءِ دیار اِنت پہ ھلو ھالو ءَ تو باج نہ برے – بلکیں ترا یات بیت کہ تو من ءَ گُشتگ ات کہ من پہ سپر ءَ سرگپتگاں کہ اے گرانیں ڈبہ کہ منی نزوریں کوپگان اِنت نوں من جُنزاں پہ منزل ءَ من ھم ترا گُشت کہ اللہ ءِ باھوٹ ءِ ھیال بہ کن- پرچہ کہ من تو بھ جُدا نہ بیتگ ات انت من ءَ یاد نہ بیت کجام روچ ءَ کہ من تو جُدا بیتگیں بلکیں تو یاد بہ ئے۔ اے گران ءُ دراجیں پند ءَ من تئی مُدام ھمراہ بیتگ اَنت بلے نزاناں کہ اے کجام لاچاری اَت کہ تو جُدا درکپتے من اے ھم نزانت کہ اے لاچاری منیگ اَت یا تئی، بلکیں تو زانتگ اَت بلے من ترا نہ پُرست تو بچکندگے جَت ءُ پہ منزل راہ گپت ئے –

یک ایریل ءِ مگرب ءَ من ءَ ھنچو شُبین بیت کہ بس گُلزمین مھر اَنت کہ تئی بالاد جاہ اِش کُتگ تو پہ زمین نمیران بیت ئے شیھو –

تو منی سکّیں نزیکتریں ھمراھے اِتے بلے منی نزوریں زانت ءَ تئی اندر ءِ چیر راز سرجم ءَ ونت کُت نہ کُت اَنت پرچہ کہ تئی اندر ءَ پہ گُلزمین ءَ ھنچیں مارشتے ھست اَت کہ منی وڈیں نیزوریں انسان ءَ پہ تئی مارشتانی سرجم کنگ ءَ انگت وھد درکار اَت- شیھو تو سک اشتاپ کُت تو پہ من پہ بلوچ ورنایاں مرچی یک ھنچیں کتاب ئِے کہ تئی ھرچ لبز پہ من راستیں راہ ءِ شون ءَ دنت –

دل باز گُشیت کہ پہ ترا نبشتہ بہ کن تاکاں سیاہ کن نَد سیاھیاں ھلاس کن- بلے تو وت یک ھنچیں کارست ئِے کہ منی نَد پہ ترا کجام ستاہ ءَ بہ کنت کہ کم انت – تئی دستیگیں ارمان سرجم بہ بنت پہ تئی دیستگیں وابانی سرجم کنگ ءَ تئی منزل ءَ دو گام دیم ءَ بَرگ اِنت پہ بلوچ پدریچ ءَ اے گرانیں بار ءَ کمتر کنگ اِنت ۔

تئی داتگیں دیمھونی پہ بلوچ ورناھاں ھمے مِستاگ ءَ دنت کہ پاد اِت شئے مُرید ءِ ھانُل لدیگاں پامال کُتگ ءُ ورنایاں چہ گرانیں واب ٹوھین اِیت کہ ھے کن اِت بیلاں لیلام بوھگ ءَ اِنت وتن۔

“رتکگیں ھون ترا ماپ منی سد رند ءَ”
“پُروشتگیں سِنگ ترا ماپ نہ بیت بولان ءِ”

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دنگ ھزدار ءَ یک ورنایے زورانسری آوار جنگ ءَ پد بیگواہ کنگ بیتگ، آئی ءِ بارو ءَ دگہ ھچ ھال نیتکگ اَنت-

ٹی بی پی پتر ھال ءَ سر بوتگیں ھالانی رد ءَ ھزدار ےِ دمگ زھری بلبل ءَ دو روچ ءَ پیسر ھما وھد ءَ یک ورنایے آوار جنگ ءُ بیگواہ کنگ بیتگ کہ فٹ بال ءِ گوازی ءَ پد واتر آیگ ءَ بیتگ –

ورنا ءِ پجار لعل مھمد ءِ نام ءُ زانگ بیتگ کپ کھٹ باغبانہ زھری ءِ جھمنند اِنت –

دمگء مردمانی رد ءَ ورنا لس پوشاکی گداں ھواریں سلاہ بندیں مردماں آوار جتگ ءُ گوں وت برتگ چریشی ءَ پد آئی ءِ درگت ءَ دگہ ھچ سرپدی نہ بیتگ-

دمگدار ءِ گپ ھم اے درگت ءَ انگت ءَ چوشیں وئیلانی بارو ءَ دیم ءَ نیتکگ اَنت-

بلوچستان ءِ دمگ واشک ءَ شمبے ءِ روچ ءَ پاکستانی پوج ءِ تیرگواری ءَ چہ سے مردم بیران بوتگ اَنت-

سربوتگیں ھالانی رِد ءَ واشک ءِ دمگ ناگ ءَ پوج ءَ تیرگواری کتگ ءُ سے مردم کُشتگ اَنت-

بیران بوتگیں مردمانی پجّار ٹوبہ ءِ نندوک عوض بلوچ ء امام بخش، الیاس ء بشیر ءُ اکبر ء دوستا ءِ ناماں چہ بوتگ اَنت-

بلے سرکاری بنشون ءِ نیمگ ءَ اے درگت ءَ ھچ وڑیں گپ دیم ءَ نیتکگ نانکہ وئیل ءِ سوب زانگ بوتگ-

زانگ بہ بیت واشک ءِ دمگ ٹوبہ دمگی میتگ انگر ءُ آیانی سُر ءُ پرانی پابندگ اِنت دیمپان بوتگ-

بلوچ راجدوستانی نیمگ ءَ چہ گوستگیں بازیں ماھاں ھمے ھال سر بوگ ءَ اِنت کہ ٹوبہ ءِ دمگ ءَ پاکستانی پوج ءَ دمگی میتگ ءَ لشکر کشی تُرند کتگ ءُ ھمے درگت ءَ زالبولاں ھم زھرشانی کتگ-

گوستگیں سال ءَ بلوچستان ءِ تیاب دپی شھر گوادر ءَ ھک دو تھریک ءِ دراجکشیں نندانک ءَ واشک ءَ چہ سیادی داروکیں جمعیت علمائے اسلام ءَ چہ سیادی داروکیں مولانا عبدالوحید بلوچ ءَ وتی زھرشانی نکش کتگ ءُ دمگاں پاکستانی پوج ءِ انگر رسانکدر ءِ دیم ءَ درشان کتگ-

آئی ءِ گْوشگ ات کہ واشک ءِ دمگ کچگ ءُ ناگ ءَ پوج ءِ نیمگ ءَ مردماں تنگ کنگ ءَ اَنت ، آئی ءَ گوشتگ کہ مردمانی کار ءُ روزگار ءِ گر ءُ دار ءُ کشت ءُ کشار ماندارگ بوتگ اَنت-

آئی ءَ گوشتگ کہ چیزے ماہ ءَ ساری پاکستانی پوج ءِ سر ءَ یک تراکے بوتگ اشی ءِ پُشدر ءَ پاکستانی پوج ءَ سرجمیں دمگ انگر ءَ کتگ مردمانی سُر ءُ پُرانی سر ءَ پابندگ جتگ-

آئی ءَ ھمے گْوشتگ کہ دمگ ءِ مردمانی پرپٹ پچ گرگ بنت ءُ مال ءُ دلوتاں ھم بر اَنت-

بلوچ لبریشن آرمی ءِ جارکش جیئند بلوچ رسانکدراں شنگ کرتگیں وتی درشان ءِ تہ ءَ بلوچستان ءِ دمگ زامران ءَ پاکستانی پوج ءِ سر ءَ بیتگیں اُرش ءِ زمہ واری من اِتگ-

جیئند بلوچ ءِ درشان ءِ رد ءَ بلوچ لبریشن آرمی ءِ سرمچاراں کیچ ءِ دمگ زامران ءُ ڈیل کک ءِ ھند ءَ زورگریں پاکستانی پوج ءِ پوسٹ نشانگ کتگ –

جارکش بلوچ لبریشن آرمی ءَ گشتگ بی ایل اے سنائپر ءَ پوسٹ ءِ سر ءَ ڈیوٹی دیوکیں کارندہ نشانگ کتگ ءُ کشتگ پد ءَ سرمچاراں مزنیں سلاھانی گون ءَ اُرش کرتگ چریشی ءَ دگہ یک کارندھے مرتگ ءُ بازینے زدگ بیتگ اَنت ءُ اُرش ءَ چیک پوسٹ ءَ ھم تاوان رس اِتگ-

جیئند بلوچ ءَ دیمتر ءَ گشتگ پد ءَ پوسٹ ءَ دو پوجی ھیلی کاپٹر سر بیتگ ءُ مرتگین ءُ زدگ بیتگیں کارندہ اش برتگ اَنت اے اُرش ءِ زمہ واری ءَ مئے گل بلوچ لبریشن آرمی منّ ایت-

جارکش ءَ دیمتر ءَ گشتگ ما اشی ءَ اھد کن ایں مول ءُ مرادانی سرجمی ءَ جد ءُ جھد ءَ برجاہ داریں –

بلوچ ریپبلکن گارڈ ءِ جارکش دوستین بلوچ ءَ رسانکدر ءَ شنگ کُتگیں درشان ءِ تہءَ گُوشتگ کہ مئے سرمچاراں نصیر آباد ڈیرہ مراد جمالی ءِ اوچ پاور پلانٹ ءَ چہ پنجاب لین (برگ) ٹرانسمیشن تراکینتگ۔ اُرش ڈیرہ مراد جمالی ءِ ربی کینال ءِ ھند ءَ بیتگ۔

آئی ءَ گُوشتگ کہ تراک ءَ پد ٹاور ءِ کپتگ وھدیکہ دگہ یک ٹاور سک باز سانمند بیتگ کہ اِشی ءَ پد سوچ پاور پلانٹ ءَ چہ پنجاب ءَ رؤکیں لین (برگ) بند بیتگ۔

آئی دیمترءَ گُوشتگ کہ ٹاورانی تراکینگ ءِ زمہ واری ءَ مئے گل من اِیت ءُ چُشیں اُرش داں بلوچستان ءِ آجوئی ءَ برجاہ مان اَنت۔

زرپھازیں سربُلند

نبشتہ کار: سلال سمین

دی بلوچستان پوسٹ

سر بُلند بلوچ راجدپتر ءِ توک ءَ ھما نام انت کہ آ وتی مٹ وت انت آئی ءَ وتی ھجگ ءِ جوانی ءِ توک ءَ وتی سر پہ ماتیں گُلزمین ءَ کُربان کُرت ءُ راجدپتر ءَ پہ آوکین ورنایاں یک کندیلے ءِ ڈول ءَ رُژن بلان انت ۔

سر بلند ءِ نام مرچی ھرچ لوگ ءِ توک ءَ گِرگ بیت انت ءُ مات وتی کُنگریں بچّاں ھمائی ءِ ڈول ءَ پہ ءَ زمین ءَ کُربان بوگ ءِ سکین ءَ جن انت ۔ منی قلم ءَ انچو زور نیست انت کہ سر بُلند ءِ ورنائی ءَ شُمئے دیم ءَ پدّر کُرت بکن آں بلے من یک کسانیں جُھدے کن اں ۔

اے ھما روچ ات کے زِر لھم لھم اں چول جنان ات ، زِر ءِ بوجیگ دُرست یک کِنارے ءَ اوشتاتگ اِت اَنت ۔ اے ھما روچ ات کہ نیلیں زِر ءَ گُش ئے وتی رنگ بانوری ءِ داباں مٹ کُرتگ ات ءُ سر بُلند ءِ سالونکی ءِ ودار ءَ نشتگ ات ۔
اے ھما روچ ات کے دُژمِن ءَ مئے مکھیں مات ءِ دِل ءَ آس روک کُرتگ ات اے ھما روچ ات کہ گوادر ءَ پہ آپ ءِ واست ءَ گونڈلاں گوں تُنّیگیں نُک ءَ روانک کش اِتگ ات اے ھما روچ ات کہ زِر ءِ اندر ءَ چائینہ ءِ ٹولی ءَ بلوچ ءِ مڈیانی ءِ پُلگ ءِ جار جتگ ات اے ھما روچ ات کہ چہ زِر ءَ بلوچ ءِ ورناہ ءَ یک ھملے ءِ اے ودارِیگ اَت ھما ھمل کہ گوں پرنگاں جنگ ءِ داتگ ات ءُ وتی زِر ءِ پھازگ ءَ کُربان بوتگ ات بلے چو گِندگ ءَ زِر ءَ مرچی سما ءَ بوتگ ات کَہ ھست انت یک سر بُلندے سر ءَ کفن بندوک انت ءُ کیت انت چے بوجیگ ءَ یکے آ سوار بیت ءُ چول جنان کنت منی اندر ءَ ءُ دری دُژمِنانی روک کُرتگیً آس ءَ پہ ھمایاں یک ازابے کنت ءُ ھمے ڈول ءَ سر بُلند ءِ کاگد ءِ لُنٹاں گُش ئے یک بچکندے بندوک ات ءُ آئی ءَ ھمے ساھت ءَ وتی جان پاک ءُ ساپ کُرتگ ات ۔
چہ ءَ بارود ءَ اڈ داتگ اَت نوکیں پوشاکے پِر کُرتگ ات ءُ چہ بارود ءَ نی بوھاں وتی جان ءَ مُشان اَت ءُ چو سالونک ءَ سمبھیتگ اَت اے روچ ءَ سر بُلند ءِ دل ءِ مُراد گُش ئے سرجم بوتّ انت ۔
اے سالونکیں سر کہ ھر کس ءَ چم شانک دات آئی ءَ آ ھمے سما کُرت کہ باریں چُنت کرن انت کہ آ پہ وتی گُلزمین ءِ بانوری ءُ وتی سالونکی ءِ ودار ءَ ھمے ڈول ءَ سمبھینگ بوتگ گُش ئے زِر ءِ گوات آئی ءِ لھموک ءِ زُلفاں سماران ات ءُ آئی ءَ وتی اندر ءَ جزم کنان ات گوں زر ءِ اندر ءِ جزم بوگ ءَ گُش ئے زِر ءَ وتی رنگ مٹ کُرت ءُ سر بُلند ءِ پوشاک ءِ پِر کُرت انت او چہ دور ءَ دُژمِن ءِ درا بُوگ ءَ دیست گُڑ ءَ اے لھم ءِ چول چو بُرز ءُ بُلند ءِ تُوپّان ءَ بُوت انت گُش ئے چولانی اندر ءَ سر بُلند ءَ آس روک کُرتگ ات پہ ءَ دُژمِناں ھمے ساھت ءَ گوادر تُنّ ءِ جار ءَ جنان ات ، ھمے ساھت ءَ دُژمِن ءِ زوراکی لٹّ ءُ کشّ ءِ تہ ءَ ات ، ھمے ساھت ءَ دُگنیا ءَ وتی مستی ءُ موجانی ءِ سرا ات ھمے ساھت ءَ یک تراکے ءِ توار چِست بوتّ ءُ پہ ءَ دُژمِن ءِ ھپت پُشت ءَ یک الکاپے سبکّے بوتّ اے تراک ءِ توار ءَ ورنایانی ءِ کَرّیں گوش پچ بوتّ انت ءُ آیانی کوریں دیدگاں رُژنے تالان بوتّ اے تراک ءَ گُش ئے زِر ءَ چہ وتی دِل ءَ آھے در کُرت ءُ پہ شانے گُشت ئِے کے منی سالونک ءَ من ءَ چہ دُژمِن ءِ زِندان ءَ آزات کُرت ءُ منی بانوری ءِ واھشت سرجم بوتّ انت او سر بُلند ھمے ڈول ءَ بلوچ راج دپتر ءِ توک ءَ مرچی زِر پہاز ءِ نام ءَ زانگ ءُ توار جنگ بیت انت بائِد انت مرچی بلوچ ءِ ھرچ ورناہ وت ءَ سر بُلند ءِ کِشک ءَ ھوار بکنت ءُ پہ وتی راج ءِ رکینگ ءِ ھاتِراں وت ءَ کُربان بکنت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ جعفر آباد ءَ سلاہ بندیں مردماں لوگ ءَ پُترتگ ءُ سَے جنین آدم کُشتگ اَنت۔

اھوالانی ردءَ جعفر آباد دمگ ءِ بیڈ باغ ھنکین ءِ نزیک ءَ سلاہ بندیں مردماں لوگے ءَ پُترتگ ءُ بنگلانی ٹکءَ سادی داروکیں سَے جنین آدم تیر جتگ ءُ کُشتگ اَنت۔

اھوالانی ردءَ اے وئیل ءِ سوب کھنیں دژمنی اِنت، بلے داں واکدارانی نیمگ اے وئیل ءِ ھچ پئیم ءِ لیکہ دیما نئیتکگ۔

ھندی اھولانی ردءَ وئیل ءَ پد ھنکین ءَ جاورھالانی تہءَ نگیگی ودی بیتگ۔

بلوچستان ءِ ضلع کیچ ءِ بُنجاھی شھر تربت ءَ آدینگ ءِ روچ ءَ ھک دے تھریک ءِ نیمگ ءَ چہ وتی لوٹانی ھک ءَ ڈپٹی کمشنر کیچ کارگس دیم ءَ بے مدتیں ھاتر ءَ نندانک بندات کتگ-

نندانک ءِ بنداتی ڈپٹی کمشنر ءِ آھگ ءُ مردمانی گوم ءَ گپ رپ بوتگ کہ بے نتیجہ ءَ ھلاس بوتگ-

ھک دے تھریک ءِ نیمگ ءَ ھپت لوٹ پیش کتگ کہ ایران چہ ھمگرنچیں سیمسری راہ ءُ درانی پچ کنگ آیانی تہ ءَ دشتک سنگاوان ، جالگی زامران، گربن کوردپ، چکاپ مند، دشت کپکار ، پوائنٹ ھوار اَنت وھدے کہ ایف سی ءِ دزمانجنی ءِ دارگ، سی ٹی ڈی ءِ درگت ءَ ورناھاں بیگواہ کنگ ءُ دروگیں ایف آئی آر نکش کنگ ءِ دْرچ ءَ بند کنگ ءُ سیمسر ءَ چہ ورگی توژگ، ڈرائیورانی گوم ءَ یک کلیندرے ءِ موکل ءَ ھوار زانتی ادارہ، مسیت ءُ پارک ءَ ھوار میتگانی کش ءُ گور ءَ چیک پوسٹانی ھلاس کنگ، سیمسر ءِ دوئیں نیمگ ءَ ھستیں مردماں سکّی ءُ وشیانی درگت ءَ آھگ ءُ روگ ءِ موکل دیگ ھوار اَنت-

ڈپٹی کمشنر کیچ حسین جان بلوچ ءَ اسٹنٹ کمشنر تربت عقیل کریم ءُ اے ڈی سی تاپش ءِ ھمراھی ءَ نندانک جاہ ءَ اَتکگ ءُ گپ ءُ دیوان کتگ بلے ھک دے تھریک ءَ ڈپٹی کمشنر کیچ ءَ وتی لوٹانی منّارینگ ءَ تاں ننداک ھلاس نہ کنگ ءِ شور ءِ سرپدی داتگ ءُ پدر کتگ دانکہ عملی دروشم ءَ لوٹانی سرجم کنگ نہ بوت اَنت نندانک برجاہ بیت-

اے درگت ءَ نندانک ءَ نشتگیں مردماں گوں تران کنان ءَ تھریک ءِ سروک مولانا ھدایت الرحمن بلوچ ءَ گْوشتگ کہ ایف سی بلوچستان ءَ بلوچانی مستریں دُژمن اِنت، ایف سی ءِ درکنگ ءِ ھاتر ءَ عید ءَ پد ملین مارچ ء بندات کن ایں، ایف سی ءَ چہ بلوچانی جان ءُ مال ننگ ناموس ءِ ھترہ اِنت-

آئی ءِ گْوشگ اِنت کہ مئے پھازوکی ءِ نام سر ءَ پوج ءِ پھازگ وت لیویز ءُ پولیس کنگ ءَ اِنت اے شرم گپے-

آئی ءِ گْوشگ اِنت کہ الاج ءَ پیسر ناداراھی ءِ سرپد بوگ الّمی اِنت، شش ماہ ءَ چہ تھریک ءَ دیم ءَ برگ ءَ آں وزیراعظم ءَ گامگیج زرتگ، چیف سیکرٹری ءُ وزیرانی دیوان پہ دیوان کنگ بوتگ بلے ھچ، نادُراہ مکران ءَ چہ گچینکتگیں نماھندگ اَنت، سیمسر ءُ تیاب دپی ءَ زرگری بند بوگ ءَ چہ آیانی لوگ ءَ ورگ ءُ آپ بند بنت، گوادر ءِ وزیر ءَ ھمکروچ یک کائیکے ءَ چہ دوھزار کلدار گپتگ ءُ ھمکروچ پنچ سد کائیک رو اَنت، گوادر ءَ چہ پنجگور تاں سرجمیں ایف سی ءِ دلار اَنت، پنجگور ءَ نماھندگ تھزیب ءُ اکلاک ءَ چہ زبھر اَنت، پنجگور ءَ سِھت ءَ جاوراں زبھر اِنت، یک ماھے ءِ تہ ءَ برے جام کمال برے قدوس بزنجو فرشتہ جوڑ بنت، وتگڑیں راجی نماھندگ بلوچ راج ءِ دُژمن اَنت آ بائیکاٹ کنگ بیت ءُ ھر دمگ ءَ راج اشانی بگیری ءَ جُھد کن ایں پمیشکا زمین دستکنوک، منیشات بھا کنوک ، ٹرالر مافیا ءُ سیمسر مافیا ھمے نماھندگ اَنت، وزیر فارم ہاؤس ءِ ھاتر ءَ گریبانی زمیناں کبزہ کنگ ءَ اَنت-

آیاں گْوشتگ کہ بلوچستان ءِ ھرچ بلوچ ایف سی ءَ وتی دُژمن سرپد بنت، ایران ءَ چہ آؤکیں کسی ءِ کر ءَ یک کیلوے روگن ھم ھست گُڑا آ دارگ بنت اگاں کلوے روگن یل بہ کن ئے پاکستان ءَ پروش اِیت، ایف سی زھن تہ ءَ ھمے ھست کہ بلوچ وشھال مہ بنت، آیانی کر ءَ ورگی چیز مہ بیت، ایف سی ءَ بلوچستان ءَ چہ در کنگ الّمی اِنت، گوش اَنت ایف سی مئے پھازگ ءِ ھاتر ءَ اِنت بلے شرم گپے کہ ایف سی ءِ پھازوک لیویز ءُ پولیس کنگ ءَ اَنت- آیاں گْوشتگ کہ ایف سی ءَ مئے دگ بند کتگ اَنت، وانگجاہ ءُ نادُراھجاھاں چوکی جوڑ کتگ، بلوچستان ءَ بلوچاں ھچ کس ءَ تُرس نیست اگاں ایف سی ءَ تُرس ھست گُڑا بلوچستان ءَ یل بہ کن اَنت، راہ ءُ در پھازوکی ءِ نام سر ءَ بند کنگ ءَ نیل ایں، اجبیں گپے پاکستان ءَ ایرانی آرت ءُ روگن ھترہ ھست، بلے کریسٹار، شیشہ، تریاک ءُ منشیات دیم ءَ گْوز اَنت ڈیھی ادارہ اگاں بلوچستان ءَ پاکستان ءِ گوم ءَ کنگ لوٹ اِیت گُڑا ایف سی ءَ بلوچستان چہ درکنگ بہ بیت اشانی ساڑی بوگ بلوچستان پاکستان ءَ چہ جتا بیت کنت-

آئی ءَ گْوشگ اِنت کہ دو روچ ڈپٹی کمشنر کیچ کارگس ءِ دیم نندانک ءِ پد نندانک ءِ جاہ ءَ بدل کنگ بیت ءُ ایف سی ءِ گیٹ دیم ءَ ھم نندانک جن ایں-

نندانک ءَ زورانسری آوار جنگ بوتگیں مردمانی کھول ھم بھر زرتگ ءُ داں شپ ءَ نندانک برجاہ ءَ بیت-