کیچ ءَ تیرگواری ءِ ویلاں یک مردمے بیران ءُ ٹپی، شال ءَ داعش ءِ دست ءَ آوار جنگ بیتگیں زھگ ءِ لاش دزکپتگ

بلوچستان ءِ دمگ کیچ ءَ تیرگواری ویلاں ءَ یک مردمے زدگ ءُ یک لاشے دزکپتگ ءُ داعش ءِ دست ءَ آوار جنگ بیتگیں زھگ مصور کاکڑ ءِ لاش دزکپتگ-

بلوچستان ءِ جتاجتائیں دمگاں یک کسان سالی ئیں چکے ءَ ھوار یک مردمانی لاش دزکپتگ انت ءُ چہ تیرگواری ءَ ٹپی کنگ بیتگ-

بلوچستان ءِ دمگ کیچ ءَ آدینگ ءِ روچ ءَ دو جتاجتائیں ویل دیم ءَ اَتکگ اَنت، آیانی تہ ءَ یکے ءِ لاش دزکپتگ- وھدے دومی ویل یک مردمے ٹپی بیتگ-

لیویز فورس ءِ رِد ءَ ، تمپ ءِ دمگ میرآباد زبیدہ جلال دگ ءِ نزیک ءَ یک تیرسُپتگیں لاشے دزکپتگ- کہ آئی ءِ پجّار قائم علی ء محمد حیات نام ءَ چہ بیتگ کہ تمپ ءِ دمگ آسیا آباد جھمنند بیتگ-

چمّگندانی رِد ءَ لاش دگ کش ءَ یک ویرانیگیں ھندے ءَ دزکپتگ کہ آئی ءِ جسم ءَ تیرانی بازیں جاھے نشان بیتگ اَنت- لیویز ءَ لاش وتی دستیگ کتگ نادُراھجاہ ءَ برتگ اود ءَ گیشیں کاروائی ءَ پد کھول ءِ دست ءَ داتگ-

تنی وھدے کوش سوب زانگ نہ بیتگ-

ھمے روچ ءَ کیچ ءِ تھسیل بلیدہ ءِ دمگ میناز ءَ ناشناسیں مردمانی تیرگواری ءَ چہ یک مردمے ٹپی بیتگ- لیویز رِد ءَ عبداللہ ء نور بخش نامیں مردمے ھما وھد ءَ نشانگ کنگ بیتگ وھدے آ میناز بازار نزیک ءَ ساڑی بیتگ-

تیرگواری ءَ پد ٹپی زوت نادُراھجاہ ءَ پہ الاج واستا نرگ بیتگ-

گوستگیں سال ءَ چہ شال ءَ آوار جنگ بیتگیں کسان سالی ئیں چُک مصور خان کاکڑ ءِ لاش مستونگ ءِ دمگ اسپلنجی ءَ دزکپتگ- اِھوالکار رِد ءَ لاش ءِ جاور بے کساس ھراب بیتگ-

لاش کھول ءِ دست ءَ دیگ بیتگ ءُ کل ءُ کسارت ھم کنگ بیتگ- بلے کھول سرکاری ءَ نیمگ ءَ چُک ءِ پجّار ءِ جار ڈی این اے ٹیسٹ ءِ گُڈی رپورٹ ءَ چہ شرت کتگ-

مصور خان ءِ کھول ءِ نزیکیں مردمے ءِ رِد ءَ ھکومت نیمگ ءَ چہ آ گوشگ بیتگ کہ یک آپریشنے ءِ میان ءَ جنگ بیتگیں ناشرکارے ءِ موباھل پون ءَ چہ یک کسان سالی ئیں چُکے ھون ءَ ششتلیں اکس دزکپتگ- اے اکس دمگی مردمے ءِ گوشگ پد ءَ سیکیورٹی فورسز ءَ اسپلنجی ءَ کاروائی کتگ ءُ لاش دزکپتگ-

ڈی آئی جی اعتزاز احمد گورایہ ءِ جارکش ھکومت بلوچستان ءِ ھمراھی ءَ پریس کانفرنس کنان ءَ گْوشتگ کہ مصور ءِ آوار جنی ءِ ناشرکاریں گل داعش ھمگرنچ بیتگ- آئی ءَ بھتام جتگ کہ آوار جنی ءَ سے مردمانی تہ ءَ دو ءِ اوگانی بیتگ اَنت-

آئی ءَ ٹاہ داتگ کہ سرچ آپریشن ءِ میان ءَ یک لوگے ءَ اسپلنجی ءَ داعش بُنجل سر ءَ اُرش ءَ پد چُک شھید کنگ بیتگ- 23 ءِ تاریک ءَ چُک ءِ لاش نادُراھجاہ ءَ برگ بیتگ، ڈی این اے ءِ ھون چارتگ ءُ اشی ءَ پد راست کنگ بیتگ اے مصور اِنت-

واکدار ءَ ٹاہ داتگ کہ داعش نیمگ ءَ چہ دوازدہ میلن ڈالر ڈیمانڈ کنگ بیتگ-

شاھد رند ءَ ٹاہ داتگ کہ حکومت ءَ ًمصور خان ءِ کھول زھرشانی ءَ نداشتگ بلے شھر ءَ سی سی ٹی کیمرھاں تاوان دیگ بیتگ-

زانگ بہ بیت مصور خان آوار جنی زمہ واری جھانی ناشرکاریں گل داعش ءَ زرتگ اَنت مزنیں کچے ءَ زر لوٹ کتگ-

کھول رِد ءَ آوار جنوکاں گوں گُڈی ءَ رند ءَ رمضان المبارک ءَ ھال کنگ بیتگ، چریشی ءَ پد آئی ءِ ھچ وڑیں دز نہ کپتگ-