کلات ءَ پاکستانی پوج ءِ 10 کارندہ کشتگ اَنت- بی ایل اے

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ گوستگیں روچ ءَ کلات ءِ دمگ ھربوئی ءَ زورگریں پاکستانی پوج دو جتا جتا آئی ای ڈی اُرشانی نشانگ کتگ- چریشی ءَ دشمن ءِ 10 کارندہ کشتگ ءُ 6 ٹپی کتگ اَنت-

جارکش ءَ گوشتگ بی ایل اے ءِ سرمچاراں دوشمبے ءِ سھب ءَ کلات ءِ دمگ ھربوئی ءَ زورگریں پاکستانی پوج ءِ کارمند ھما وھد ءَ نشانگ کتگ اَنت آ ھمے دمگ ءَ پوج کُشی ءَ پیشگامی کنوکیں پوجی کاروان ءِ پھزداری ءَ یک پوسٹے ءَ مُچ بیتگ اَنت-

جیئند بلوچ ءَ گوشتگ دشمنیں پوج ءِ ھالیگیں پوسٹاں پیسر ءَ تراکناکیں شورو ایر کرتگ اَنت – دشمن ءِ چاردہ کارندہ مُچ بیتگ اَنت ءُ ھمے وھد ءَ سرمچاراں ریموٹ کنٹرول آ تراک ءِ نشانگ کتگ اَنت – تراک ءِ آسر ءَ دشمنیں پوج ءِ 9 کارندہ جاہ پہ جاہ ءَ مرتگ اَنت ءُ کم چہ کم چار زدگ بیتگ اَنت-

جارکش ءَ گوشتگ دشمن ءِ کارندھانی لاش گوستگیں روچ ءَ سرجمی ءَ ھمود ءَ کپتگ بیتگ اَنت ءُ بیگاہ ءِ وھد ءَ دشمنیں پوج ءِ گاڑی سر بیتگ اَنت گڑا سرمچاراں یک دگہ ریموٹ کنٹرول آئی ای ڈی ءِ گون ءَ دشمنیں پوج نشانگ کتگ ءُ چریشی ءَ دشمن ءِ یک کارندھے مرتگ ءُ دو زدگ بیتگ انت ءُ گاڑی ءَ باز تاوان رس اتگ-

جیئند بلوچ ءَ گوشتگ بلوچ لبریشن آرمی اے دویں اُرشانی زمہ واریاں من ایت ءُ ایشی ءَ ستک ءِ کول ءَ کنت کہ زورگریں پاکستانی پوج اَچ بلوچستان ءَ درکپگ ءَ مئے اُرش برجاہ بنت اِنت-