اے جنگ تھنا چار بلوچ ءِ جنگ نہ اِنت
نبشتہ کار : نادیہ بلوچ
دی بلوچستان پوسٹ
هردے تو بلوچستان ءِ جنگ ءِ بابت ءَ جیڑے ترا اَنچو سما بیت کہ تو اے جنگ ءِ تہ ءَ زندگی وَ کنگ ءَ ئے بلے تو اے جنگ ءَ شرّی ءَ سرپد نہ ئے تو اَنچیں دابی ءَ زندگی کنگ ءَ ئے تاں انچو سما بیت کہ تو چیزاں سرپد نہ ئے هر ھمُک جیڑگ ءَ تو وتارا دور داشتگ ، گوش ئے ھون ریچیں بدنانی بوہ ترا سما نہ بوتگ، گوش ئے شھیدانی گُڈی تیرے توار ءَ تئی گوش نہ جکسینتگ اَنت ، گوش ئے سَر بُلند ءِ کُتگیں کرداں تئی دیم ءَ هِچ بستار نیست ، شارُل ءِ چست کُتگیں گامگیج پر تو کسانیں جُھدے بوت کنت بلے شارُل ءِ همے گامگیج ءَ ھمُک بلوچ زالبول سرپد کُتگ کہ بید ءِ دیمھونی ءَ جنگ ءِ آسر کنگ نہ بوتگیں کارے ءُ همُک زالبولاں شارُل ءَ را اے درس دات کہ “زمین ھست دُرست ھست زمین نیست تاں ھِچ نہ مانیت” شارُل ءَ وتی وشھالیں زند ھمے واستا ندر کُت کہ آ سرپد اَت منی جُھد ءَ پد ھمُک زالبول وت ءَ اے پِڑ ءَ الّم کار اِیت-
مارا وت ءَ الّم اے پاهو دیگی اِنت کہ من ءُ تو گُلام ایں ءُ گُلام ءَ تاں ھما وهد ءَ زندگ بوگ ءِ هک نیست کہ آ پہ وتی آجوئی ءِ ھاتر ءَ جُھد مکنت. ما سرپدیں هر کس ءَ وتی جان دوست اِنت وتی کھول وتی مردم ، اِشاں چے دور بوگ پہ ابدمانی ارزانیں کارے نہ اِنت بلے اے جاورھالانی تہ ءَ زندگی چو بندیگیں مُرگی ءِ وڑ ءَ اِنت نہ آ بال کُت کنت ءُ نہ وتی دیستگیں واباں سرجم کُت کنت تو چون آ زندگی ءَ پہ وت گِچین کُت کن ئے کہ اود ءَ ناں ترا پہ وتی دیستگیں وابانی واستا کار کنگ ئے موہ دیگ بیت نہ وتی ھک ءِ واستا چار گپ جنگ ئے موکل دیگ بیت؟ تو بلکیں ھمے سرپد بہ ئے کہ تئی دور بوگ ءَ تو جنگ ءَ رَک اِت کن ئے بلے تو بِزان هزارانی کچّا مھلوک ءَ وت ءَ چہ اے جنگ ءَ دور داشتگ ھمشانی نیام ءَ بازینیاں جنگ ءِ دیمپانی بوگ کپتگ بازین ئِے لوگ ماندارگ بوتگ اَنت بازین ئِے چست کنگ بوتگ ھمے چست بوتگینانی کھول تاں روچ مروچی آیانی ودار ءَ دگانی سر ءَ زهرشانی کنگ ءَ اَنت-
جمیل مهراب ءِ رجانک (زالبول ءُ تُپنگ ) برٹولٹبریکٹ ءِ کسمانک یک کھول ءِ کہ جنگی جاورھالانی تہ ءَ زندگی کنگ ءَ اِنت اے کھول چِنچو وت ءَ رَکینیت چہ جنگ ءَ مات ھمے سرپد بیت کہ ما جنگ نہ کن ایں گُڑا جَنگ نہ بیت ھمے مات ءِ وتی بچّ ءِ جون یک روچے لھتے مردُمانی کوپگ ءَ بیت لوگ ءَ کئیت اے مات ءِ ھمے بچ اَت کہ تیاب ءَ ماهیگری ءِ کار ءَ اَت جَنگ بوتگ اَت زالماں جتگ اَت پدا ھمے گوشتگ اَت کہ اے یک گدّارے تو امینچو جُھد بکن وت ءَ را رکّینگ ءِ تو جَنگ بہ ئے وڑے ناں وڑے تو جَنگ بہ ئے زالم ترا جن اَنت پد ءَ گوش اَنت کہ “ یہ ایک ملک دشمن ہے” ھمے پیم ءَ تئی اَستانک ءَ هلاس کن اَنت۔ ھمے زالبول ءَ وتی چُکّانی رکّینگ ءِ چِنچو جُھد اِش کُت چُک ھم جَنگ بوت رند ءَ مات ءَ دیست ما کہ جنگ نہ کُت هم جَنگ بوتيں نو مئے بے توار بوگ پہ ما ائیب اِنت گُڑا آ تُپنگ ءَ بڑ ءَ کنت در کئیت دیم پہ جنگ ءَ من ءُ تو وت ءَ را ھمے زالبول ءِ وڑ ءَ وت ءَ جنگ ءَ چہ دور داشتگ بلے ما بزان ایں یک روچے اے جنگ من آں ءُ ترا الّم دستگیر کنت پد ءَ منی تئی پاد آیگ دیر بیت-
مئے دُژمن تاں امینچو تاکتور بہ بیت بلے مارا چہ تاکتور تِر بیت نہ کنت آ پہ مئے مال ءُ مڈیانی واستا جنگ ءَ اِنت ما پہ مئے زمین ءِ ابدمانی ءِ واستا وتی جاناں ندر کنگ ءَ ایں ءُ ھک ءِ ھاتر ءَ جنگ کنگ ءَ ایں ءُ گوسّت گواه اِنت کہ ھک باج ءَ بارت, الّم اے جنگ ترا دیمونی دیگ پرمائیت بلے ھمے دیمونی پہ آؤکیں باندات ءِ پدریچ ءَ ابدمان بیت ، من ءُ تو وت ءَ پھک ءَ چہ اے جنگ ءَ پراموش کُتگ مارا سرپد بوگی اِنت اے جنگ تھنا چار بلوچ ءِ جنگ نہ اِنت بلکیں سرجمیں راج ءِ جنگ اِنت ءُ پہ گپ ما اے جنگ ءَ باج بُرت نہ کن ایں اَنچو کہ بانُک شارُل گوش یت کہ “ only having revolutionary thoughts cannot solve our problems we also have to take practical steps “ تھنا آشوبی سسّآ ءُ پگر مئے جیڑگ ءُ مسلہ ءَ ھل نہ کن اَنت بلکیں مارا اِنچیں گامگیج زورگی اِنت کہ آھاں چہ مئے دُژمن سسّائی نادراه بہ بیت اِنت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی ءِ اِنت-