چہ کانود ءَ ڈن بلوچانی کُشت ءُ کوش
ٹی بی پی شونگال
یک سالے ءَ پیش بیست ءُ سَے نومبر ءِ شپ ءَ ودود بلوچ، بالاچ بلوچ، سیف بلوچ ءُ شکور بلوچ، چُشکہ پنجگور ءُ کیچ ءِ جتا جتائیں جاھاں زورانسری آوار جنگ بیتگ ات اَنت ءُ پولیس ءُ پوج ءِ بندیگ جاہ ءَ بند بیتگ اَنت، آ پسنی ءِ کوھی دمگاں بلوچستان پولیس ءِ مھکمہ ناشرکاری ءَ چہ کانود ءَ ڈن کُشتگ ءُ دروگیں میڑ ءِ نام داتگ انت- چہ کانود ءَ ڈن کشگ بیتگیں بالاچ بلوچ آمیدگسی ریمانڈ ءِ سر ءَ پیش ھم پولیس ءِ بندیگی ءَ بیتگ ءُ آمیدگس ءَ آئی ءِ کیس ھلگ ءَ بیتگ-
بلوچستان ءِ آجوئی ءِ زرمبشت ءِ پروش دیگ ءَ پاکستانی پوج ءِ اے پالیسی پیش ءَ بیتگ کہ آجوئی ءِ واستا پرکاریں سلاہ بندیں اُرشاں پوجی کارندھانی کوش ءَ پد پیش ءَ زورانسری بیگواھیں مردماں دروگیں پوجی ءُ پولیس میڑاں کُشگ ءِ ٹاپار کنگ بیتگ انت، گیشتر ھما مردماں دروگیں میڑاں کُشگ ءَ اَنت آیانی کیسز پاکستان ءِ آمیدگساں ھلگ ءَ اَنت ءُ انسانی ھکانی ادارھانی گور ءَ آیانی بیگواھی ءِ منانک ھست اَنت-
پاکستان ءِ اے پالیسیانی مول ءُ مراد زوراکی ءِ ساھگ ءَ بلوچ راجی زرمبشت ءِ پروش دیگ اِنت بلے بالاچ بلوچ ءِ چہ کانون ءَ ڈن کُشگ ءَ ریاستی زوراکیانی ھلاپ ءَ یک گھگیری زرمبشتے چِست بیتگ، اے سیاسی زرمبشت ءَ زورانسری آوار جنگ ءُ چہ کانود ءَ ڈن کُشت ءُ کوشانی ھلاپ ءَ چہ تربت ءَ داں اسلام آباد ءَ مارچ کتگ ءُ سرجمیں دنیا ءَ بلوچانی گھگیری سیاست دیم ءَ آورتگ ءُ شال ءُ گوادر ءَ راجی مُچی ءِ دروشم ءَ گھگیری ءَ یکجاھی ءُ راجی دروشم داتگ-
بالاچ بلوچ ءِ چہ کانود ءَ ڈن کوش ءَ یک سالے ءَ پد تربت ءَ فدا شھید چوک ءَ بلوچ یکجھتی کمیٹی ءِ پتر ءَ ھزاراں مردماں آیانی یات ءَ مُچ بیتگ ءُ ریاستی نسل کُشی ءِ پالیسیانی ھلاپ ءَ بلوچانی یکجاہ ءُ مھکم کنگ ءِ جھد ءِ راستی اِنت کہ بلوچستان ءَ ریاستی زوراکیانی چیر ءَ بلوچ راجی زرمبشت ءِ ھلاس کنگ ءِ پالیسی سوبمند نہ بنت ءُ ریاستی زُلمانی ھلاسی ءَ داں سیادی گھگیری برجاہ مان ایت-