ڈیرہ بگٹی : پاکستانی پوج ءِ دمگ ءَ شیلنگ، زالبول ءُ چکاں ھوار ھشت مردم ٹپی

پاکستانی پوج ءِ گوستگیں روچ ءَ چہ کش گور ءِ دمگاں لشکر کشی برجاہ ءَ اِنت آئی ءِ تہ ءَ ھیلی کاپٹر ءُ جھلی پوج بھر زیرگ ءَ اَنت-

چہ ڈیرہ بگٹی سربیتگیں ھالانی رِد ءَ پاکستانی پوج ءِ مزنیں کچے ءَ دمگ ءَ پیشگامی کنگ ءَ اِنت وھدے کہ جتاجتائیں جاھاں سلاہ بند ءُ پاکستانی پوج ءِ میڑ ءِ ھم ھال اِنت-

پاکستانی پوج ءِ لشکر کشی اے وھد ءَ ڈیرہ بگٹی ءِ چہ تھسیل سوئی ءِ کش گور ءِ جتاجتائیں دمگاں برجاہ ءَ اِنت وھدے کہ بازیں مردمے آوار جنگ ءَ پد ناشناسیں ھندے ءَ برگ ءِ ناسرجمیں ھال ھم ھست اِنت-

چہ ڈیرہ بگٹی ءَ ھالانی رِد ءَ پاکستانی پوج ءَ ھیلی کاپٹرانی لشکر کشی ءِ میان ءَ سوئی ءِ جتاجتائیں دمگاں لنجو ءُ سگھاری ءَ شیلنگ ء چہ ھشت ٹپی بیتگ اَنت کہ آیانی تہ ءَ سے زالبول ءُ پنچ چک ھوار اَنت-

شیلنگ ءَ چہ ٹپی الاج ھاتر ءَ دمگ ءَ لشکر کشی ءُ راھانی بندی سبب ءَ دلسیاھی ءِ دیمپان-

ڈیرہ بگٹی ءُ سوئی ءَ پاکستانی پوج ءِ لشکر ءِ میان ءَ بلوچ آجوئی لوٹوکیں گلاں پاکستانی پوج سر ءَ لَس آبادیانی نشانگ کنگ بھتام جتگ-

بلوچ سیاسی پارٹیاں انسانی ھکانی ادارھاں چہ دزبندی کتگ کہ آ ڈیرہ بگٹی ءَ ھوار بلوچستان ءَ برجاھیں لشکر کشی ءِ ھلاپ ءَ پاکستانی حکومت ءَ زور بدے اَنت ءُ لس آبادیانی نشانگ کنگ سر ءَ پاکستانی پوج ءَ جست بگر اَنت-