چین ءِ نپ اُرشانی نشانگ ءَ اَنت
ٹی بی پی شونگال
ھپت اکتوبر ءِ شپ ءَ کراچی ءِ بالی پٹ ءَ چینی انجنئیرزانی سر ءَ بلوچ لبریشن آرمی ءِ مجید بریگیڈ ءُ زراب(Zephyr Intelljgence Research & Analysis Bureau) ءَ فدائی اُرش کتگ- پاکستان ءَ چین ءِ سپارت ھانہ ءَ وتی تندجاہ ءَ بن قاسم پورٹ ءَ بندوکیں چین ءِ انجنئیرز جون، وہ چون زن ءُ لی زھااو ءِ تراک ءَ مرگ ءِ ھال راست کتگ – بی ایل اے ءِ رد ءَ چین ءِ واپار کارانی کاروان ءِ سر ءَ فدائی اُرش شاہ فھد پنام ءِ آفتاب ءَ کتگ-
پاکستان ءَ چین ءِ جھمنندانی سر ءَ کراچی ءَ اے دومی نامی ئیں اُرش اِنت کہ چریشی ءَ چین ءَ وتی شھریانی مرگ ءِ ھال راست کتگ اَنت – ایشی ءَ پیش اپریل دوھزار ءُ بیست ءُ دو ءَ مجید بریگیڈ ءِ اولی زالبول فدائی شاری بلوچ ءَ کراچی یونیورسٹی ءَ کنفیوشش انسٹیوٹ ءِ چینی استادانی سر ءَ اُرش کتگ ات کہ چریشی ءَ سَے چینی شھری مرتگ انت ءُ دو زدگ بیتگ اَنت-
بلوچ لبریشن آرمی چہ دوھزار ءُ ھژدہ ءَ سرجمی ءَ چین ءِ زرکاری ءُ لشکری نپاں نشانگ کنگ ءَ اِنت ءُ کراچی ءَ گچینی جاہ ءَ ترندیں پھزداری ءِ پاٹک ءَ چین ءِ انجنئیرزانی سر ءَ بی ایل اے ءِ فدائین یونٹ مجید بریگیڈ ءُ انٹیلجنس ونگ زراب ءِ سوبمندین اُرش ءَ تچک ءَ گیش ایت جہ گل سرجمیں پاکستان ءَ کجام ھم کُنڈا چین ءِ نپ ءُ منسوبھانی سر ءَ اُرش کنگ ءِ بودشت ءَ دار ایت-
شنگھائی کمکی گل ءِ نیاد ءَ پیش چین ءِ انجنئیرانی سر ءَ چہ اُرش ءَ بی ایل اے چین ءُ دنیا ءَ کلوہ دیگ ءَ اِنت کہ بلوچستان ءَ بلوچ راج ءِ مرزی ءُ واھگ ءَ ابید پُلپھانچی منسوبہ منگ نہ بنت اِنت – بلوچ لبریشن آرمی ءِ شوربندی اُرشاں چہ آئی ءِ بودشتانی سر ءَ مٹ بوگ ءَ تچک ءَ زانشتکاری یے کہ اے اُرش تورگ ءُ ھرت چارگ بنت کہ آیوکیں وھداں اے ڈوکیں شوربندیں اُرش برجاہ بنت اِنت-
بلوچستان چہ دو دھکاں جنگ ءِ آماچ اِنت کہ چریشی ءِ سبب ءَ دَری زرکارانی گمان کم اِنت ءُ پاکستان ءِ دَری زرکاراں پھزداری دیگ ءِ ٹاپار راست بوگ ءَ نہ اَنت-
اے لیکھاں چہ اے تچک بیان اِنت کہ بلوچ راج ءِ مرزی ءُ لوٹ ءَ ابید بلوچستان ءَ درملکی زرکار ءُ واپار دار مھپوز نشت نہ کن اَنت نی اے دمگ ءِ دراھیں اسٹیک ھولڈرزاں اے گپ ءَ سنجیدگی ءَ زورگی انت کہ بلوچ راج ءِ راستیں نمائندگاں یکجاہ زیرگ ءُ دوریانی دور کنگ ءَ ابید اے دمگ ءَ ھچ منسوبی سوبمند بوت نہ کن اَنت-