بلوچستان ءِ جتا جتائیں جاھاں پنچ سلاہ بندین مردمانی کُشگ ءِ ٹاہ آئی ایس پی آر ءَ داتگ

پاکستانی پوج ءِ جارکش آئی ایس پی آر ءَ ٹاہ دیان ءَ گوشتگ بلوچستان ءِ جتا جتائیں جاھاں بیڑانی تہ ءَ پنچ سلاہ بندیں مردم کُشتگ اَنت-

آئی ایس پی آر ءِ رد ءَ بلوچستان ءِ دمگ کیچ، پنجگور ءُ ژوب ءَ انٹیلی جنس بیڑاں کاروائی کنان ءَ پنچ سلاہ بندیں مردم کُشتگ اَنت-

آئی ایس پی آر ءِ رد ءَ گوستگیں شپ ءَ ترندین تیرگواری ءَ سَے سلاہ بندین مردم زدگ بیتگ اَنت ءُ آئی ایس پی آر ءَ گوشتگ اے کاروائی بلوچستان ءَ بیست ءُ شش اگست ءَ اُرشکارانی پژدر ءَ کتگ اَنت-

زانگ بہ بیت بیست ءُ پنچ ءُ بیست ءُ شش اگست ءِ میانی شپ ءَ بلوچ لبریشن آرمی ءَ سرجمیں بلوچستان ءَ “آپریشن ھیروپ” ءِ نام ءَ بیڑ بندات کتگ ات کہ چریشی ءَ پد داں دوازدہ اداراں بلوچستان ءِ دگاں بلوچ بند جاڑیگ بیتگ اَنت-

گیش اھوال بلوچ لبریشن آرمی ءَ جار جنان ءَ گوشتگ بلوچ لبریشن آرمی ءَ سرجمیں بلوچستان ءَ پاکستانی پوج ءِ ھلاپ ءَ آپریشن ھیروپ بندات کتگ ءُ آیاں بیلہ بنجل ءِ سر ءَ بلوچ فدائین اُرش کتگ ءُ اود ءَ اُرش ءِ بندات بلوچ زالبول ماھل نامیں جنکے ءَ کتگ ات-

جارکش بلوچ لبریشن آرمی جیئند بلوچ ءَ بیست اداراں پد آپریشن ءِ ھلاسی کتگ ءُ وتی نُھ فدائین ءُ یک فتح اسکواڈے ءِ باسکے ءِ نمیرانی ءِ اھوال دیم ءَ آورتگ ات اَنت-

بلوچستان ءَ بلوچ سیاسی پھناتانی گوشگ اِنت بلوچستان ءَ بلوچ سلاہ بندانی کاروائیاں پد پاکستانی پوج بندیگاں کُش ایت ءُ آیاں ناشرکار زاھر کنگ اِنت-

زانگ بہ بیت گوستگیں روچاں ھزدار ءَ پنچ مردمانی لاش آرگ بیتگ انت ءُ چریشی ءَ پد پنچیں لاشانی پجار بیگواھیں مردمانی ناماں زانگ بیتگ اَنت ءُ اود ءُ جتا جتائیں وھداں آوار جنگ ءُ بیگواہ کنگ بیتگ اَنت-

تنی وھدی بلوچ سلاہ بندیں گلانی نیمگ ءَ کیچ ءُ پنجگور ءُ ژوب ءَ بیڑانانی درشان دیم ءَ نیاؤرتگ اَنت-