ڈیرہ بگٹی ءَ پی پی ایل ءِ کاردار ءِ زورانسری آوار جنی ءَ پد بیگواہ

سربوتگیں ھالانی رِد ءَ ڈیرہ بگٹی ءَ پاکستانی پوج ءَ یک دگہ مردمے زورانسری آوار جنگ ءَ پد بیگواہ کتگ –

گیشیں ھالانی رِد ءَ پاکستانی پوج ءَ ماں ڈیرہ بگٹی ءَ یک دگہ مردمے زورانسری آوار جنی ءَ پد بیگواہ کتگ، زورانسری آوار جنگ بوتگیں مردمے پجار دوست بگٹی ء سوری بگٹی انت –

اھوالکار ءِ گوشگ انت کہ اے مرد پی پی ایل ءَ کار ءَ بوتگ کہ وتی کار ءِ ھلاس کتگ ءُ واتر گس ءَ روگ ءَ بوتگ کہ گیس فیلڈ دومی لمبر گیٹ ءَ پھازگی لشکر ءَ آ داشتگ ءُ وتی گاڑی ءَ سوار کتگ ءُ گوں وت برتگ –

اھوالکار ءِ رِد ءَ شاہ دوست بگٹی ءِ برات ءُ کونسلر علی دوست بگٹی ءُ ناکو پٹھان ء مڑزیان پیش ءَ پوج ءَ آوار جتگ ءُ بندیگ انت –

زانگ بہ بیت بلوچستان ءِ ایندگہ ھند ءُ دمگاں ھوار ڈیرہ بگٹی ءَ ھم پاکستانی پوج ءِ لشکر کشی ءُ زورانسری آوار جنیانی درچ یکشل ءَ برجاہ انت، لھتے روچ ساری ماں ڈیرہ بگٹی ناشناسیں سلاہ بندیں مردمانی دست ءَ شش فٹبالرانی دزگیری ءَ پد لشکر کشی ءُ پوج ءِ زوراکیانی تہ ءَ گیشی اتکگ ، اے میان ءَ بازیں مردمے پوج ءَ زورانسری آوار جنی ءَ پد بیگواہ کتگ انت کہ آیانی تہ ءَ لھتے مردمے نام ماں رسانکدراں شنگ بوتگ ـ

دومی نیمگ ءَ بلوچ لبریشن ٹائیگر ءَ ماں رسانکدراں وتی شنگ کرتگیں درشان ءِ تہ ءَ فٹبالرانی دزگیری منّ اِتگ ءُ گوشتگ اے لیبیانی پوشاک ءِ تہ ءَ ریاستی ایجنٹ بوتگ انت ـ