پاکستانی پوج ءِ ماں سبی ءَ دو سلاہ بندانی جنگ ءِ ٹاہ داتگ

پاکستانی پوج آئی ایس پی آر ءَ ٹاہ داتگ کہ سبی ءِ دمگ مچ ءَ پوج ءَ ھال رستگ ءُ آھاں سلاہ بندانی راہ بستگ ءُ سَے سلاہ بند کہ وتی اوتاک ءِ نیمگ ءَ داشتگ انت –

آئی ایس پی آر ءِ رِد ءَ سلاہ بنداں پھازگی لشکر ءِ سر ءَ تیر گواری کتگ ءُ دو نیمگی تیرگواری ءَ دو سلاہ بند جنگ بوتگ انت –

آئی ایس پی آر ءِ رِد ءَ اے میان ءَ یک سلاہ بندیں مردمے دزگیر کتگ وھدیکہ سلاہ بندین مردمانی گور ءَ سلاہ ءُ تراکناکیں شورہ دستیگ کتگ انت –

آئی ایس پی آر ءِ گوشگ انت کہ دمگی مردمانی نشانگ کنگ ءُ اشکرانی کاریز ءِ واھنداں ملام گرگ ءُ آھانی ترسینگ ءَ اے سلاہ بندیں مردمانی دست مان بوتگ –

آئی ایس پی آر ءَ ٹاہ داتگ کہ سلاہ بندیں مردمانی ھمراھانی دزگیری ءِ ھاتر ءَ دمگ ءِ تہ ءَ کلئرنس آپریشن برجاہ انت –

تنی وھدی چہ سلاہ بندیں گلانی نیمگ ءَ اے درگت ءَ ھچ وڑیں درشان دیگ نہ بوتگ ءُ چدوپیسر آئی ایس پی آر ءَ باز براں دستگوشیں مردم ءُ زورانسری آوار جنگ بوتگیں مردم سلاہ بند زاھر کتگ ءُ آھانی کوش ءِ ٹاہ داتگ کہ آھانی سیادی چہ بلوچ سلاہ بندیں گلان انت –