بلوچستان ءِ کیچ دمگ ءِ بنجاھی تُربت ءَ چہ یک نودربرے پاکستانی پوج ءِ دست ءَ آوار جنگ بیتگ، وھدیکہ نوشکی ءَ دو مردم ناشناسیں سلاہ بندیں مردماں دزگیری ءَ پد آوار جتگ اَنت۔
سربیتگیں ھالانی ردءَ بلوچستان ءِ کیچ دمگ ءَ چہ پاکستانی پوج ءَ یک ورناھیں نودربرے آوار جنگ ءَ پد ناشناسیں جاھاں ءَ برتگ-
بیگواھیں ورنایے پجّار نواز شفیع محمد ءِ نام چہ بیتگ کہ تربت آسکانی بازار ءِ جھمنند اِنت۔
دومی نیمگ ءَ ورنایے زورانسری آوار جنی ءِ پدری بلوچ نیشنل موومنٹ ( بی این ایم ) ءِ ادارگ پانک ءَ کتگ ءَ گْوشتگ کہ پوج ءَ ورناہ تربت ءَ یک دکانے ءَ بیڑبرتگ ءُ آوار جتگ ءُ دیم پہ ناشناسیں جاھے ءَ برتگ-
زانگ بہ بیت دو روچ ءَ ساری ھم پاکستانی پوج ءَ تربت ءِ شھر زامرانی بازار ءَ وارث ء موسٰی نامی ایں ورنایے آوار جنگ ءَ پد بیگواہ کتگ اَت-
دومی نیمگ ءَ بلوچستان ءِ دمگ نوشکی ءَ چہ سربیتگیں ھالانی ردءَ ناشناسیں گاڑی سواراں دو مردم بیگواہ کُتگ اَنت۔
اسسٹنٹ کمشنر زاھد شاہوانی ءِ ردءَ کیشنگی ءِ ھند کلی بلغانی ءِ جھمنند سفیر احمد ءُ لیاقت نامی مردم چہ ھوٹلءَ پرپٹ ءِ سرءَ وتی لوگءَ کلی بلغانی رؤگ ءَ بیتگ اَنت کہ نیم راہ ءَ پک اپ گاڑیءَ سواریں ناشناسیں مردماں چہ پرپٹ ءَ ایرگیتکگ ءُ گوں وت بُرتگ اَنت۔
واکدارانی ردءَ داں انگت بیگواھی ءِ سوب زانگ نہ بیتگ وھدیکہ لیویز کارندہ بیگواھانی درگیجگ ءَ پہ جھد کنگ ءَ اِنت۔
واکدارانی بیگواہ کنوکانی رندگیری ءَ پہ ٹولی دیم دیگ بیتگ اَنت بلے داں انگت آوار جنوکانی درگیجگ ءَ واکدار سومبند نہ بیتگ اَنت۔