گوستگیں سال ءَ دسمبر ءِ ماہ ءَ زورانسری بیگواھی ءِ آماچ بیتگیں لسبیلہ شھدربرجاہ ءِ نودربر عبدالقدوس قمبرانی داں انگت یل کنگ نہ بیتگ۔ بیگواھیں نودربر ءِ یک مستریں برات ئے ژانگولیں جون ھم پیسرءَ دزکپتگ۔
عبدالقدوس قمبرانی ءِ زورانسری بیگواھی ءُ یل نہ کنگ ءِ بگیر ءَ ھمے سال ءَ فروری ءِ ماہ ءَ سنگتیں نودربراں زھرشانی کُتگ اَت۔
لسبیلہ یونیورسٹی آف ایگریکلچر واٹر اینڈ میرین سائنس اوتھل (لوامز) ءِ نودربر عبدالقدوس قمبرانی داں انگت یل کنگ نہ بیتگ۔ آ شال ءِ سمنگلی دگ ءِ سرءَ بستگیں یک ھوٹل ءَ چہ 28 دسمبر 2022 ءِ شپ ءَ ناشناسیں سلاہ بندیں مردماں زورانسری گاڑی ءَ نندارینتگ ءُ بیگواہ کُتگ اَت۔
کھول ءِ ردءَ کہ آئی ءَ سئے ماہ ءَ بُرز ءِ وھد گوستگ بلے آئی درگت ءَ داں انگت ھچ پئیمیں اھوال نہ رس اتگ اَنت۔
کھول ءِ گُشگ اِنت کہ عبدالقدوس قمبرانی ءَ شھدربرجاہ ءَ چکاس داتگ ءُ موکلانی گوازینگ ءَ شال ءَ بستگیں وتی لوگ ءَ شُتگ بیتگ ءُ ھمے شپ ءَ سنگتانی پجیگ ءَ آ بازار ءِ نیمگ ءَ شُتگ بیتگ کہ چہ ھمودءَ آ زورانسری بیگواہ کنگ بیتگ اَت۔
یات بہ بیت چدوپیسر عبدالقدوس قمبرانی ءِ یک براتے باقر قمبرانی سال 2013 ءَ قلات ءَ چہ زورانسری بیگواھی ءِ آماچ کنگ بیتگ کہ آ دو سالاں پد یل کنگ بیتگ اَت وھدیکہ ھمے نیام ءَ لسبیلہ شھدربرجاہ ءَ واٹر ریسورس منیجمنٹ ءِ نودربر آئی دومی برات حفیظ قمبرانی 14 مارچ 2015 ءَ قلات ءَ چہ زورانسری بیگواھی ءِ آماچ کنگ بیتگ اَت کہ آئی ژانگولیں جون یک ماہ ئے ءَ پد 24 اپریل ءَ دزکپتگ اَت۔
کھول ءِ گُشگ اِنت کہ کجام ھم بے میاریں نودربر ءِ نشانگ کنگ مستریں زوراکی ءُ وانگ ءُ زانگ ءَ گوں دژمنی اِنت۔ قدوس قمبرانی یک مھنتی ءُ لائقیں نودربر اِنت انچش کہ ایندگہ سماداروکیں ءُ زانتکاریں بلوچ نودربرانی زمین تنک کنگ بیتگ قدوس ھم ھما بے میاریں بیگواھیں بلوچ ورناھاں چہ یک اِنت کہ آ ناشناسیں سلاہ ءُ ڈیوائس داروکیں مردمانی دستءَ زورانسری بیگواھی ءِ آماچ بیتگ۔
البت کھول ءَ بنجاھی واکدار ءُ بیگواھیں مردمانی ھاترءَ اڈ داتگیں کمیشن ءَ چہ دزبندی کُتگ کہ قدوس قمبرانی ءِ زیت ءَ زیت دیما آرگ بہ بیت دانکہ آ وتی وانگ ءَ برجاہ داشت بہ کنت۔