مھروانیں ملا بھرام – بانسری بلوچ

مھروانیں ملا بھرام

نبشتہ کار: بانسری بلوچ

دی بلوچستان پوسٹ

من ملا ءِ بارو ءَ باز گپ اِش کتگ اَت اے کہ چونیں مھروانے اے کہ کجام موڑ مردم اِنت گوں ھر کس ءَ گوں وش تبی ءَ گپ کنت زانتکارے جنگولے نہ ترسے مدام منی دل ءَ لوٹ اِت کہ بہ گندان ئِے –

اے ھم منی وشبھتی اِنت کہ چیزے ماہ پیسر اناگاہ ءَ یک مھروانیں مردے اتک مئے لوگ ءَ من جست کُت اے کے اِنت اَتکگ گوشت اِش کہ اے مُلا اِنت گڑا من سک باز وشھال بیتاں کہ مرچی ملا اتکگ مئے لوگ ءَ ءُ من گندان ئِے دو سے روچ ءَ ملا مئے لوگ ءَ بیت ءُ پد ءَ شتیں یک سپرے ءَ اے سپر ءَ مھروانیں ملا بھرام مئے ھمراہ اَت چو کہ مردم وتی یک گاریں مردمے در بہ گیج ایت چوں گل ءُ وشھال بیت من ھمے وڑ ءَ وشھال بیتگاں کہ من مرچی ملا ءَ گندگ ءَ آں ءُ مئے ھمسپر اِنت ھم اے سپر ءَ من مدام ملا شر ھیال کتگ ءُ چار اِتگ ملا ءِ گپ ءُ تْران دانکہ ملا ءِ راہ ءُ رواج ھم من ھیال کتگ اَنت-

من ایشی ءَ شری ءَ سرپد بیتاں کہ ملا چینچو مھروانیں مردمے اے سپر دانکہ ھپتگے ءَ شُت ھپتگے ءَ پد مئے سپر ھلاس بیت ءُ ما گڑا چہ مھروان ءَ جتا بیتیں گڑا نی من گیشتر پہ وتی مھروان ءِ گندگ ءَ ھدوک بیتگاں کہ پدا کدی کیت من گندان ئِے ماھے ءَ رند پدا اتک بلے اے رند ءَ بھت ءَ گوں من یاری نہ کُت من سھیگ نہ بیتاں ءُ ھمے یکیں روچ ءَ واتر شُت من بلے انگت ودار ءَ بیتگاں کہ الّم پد ءَ کیت-

روچ 23 فروری اَت من ءَ گوانکو دست ءَ اَت ءُ نشتگ اِتاں کہ ھشت شھید ءِ اکس اتک ءُ گوشت اِش ملا گوں ھپت سنگت ءَ مزن بند ءِ کوہ ءَ جنگ بیتگ اے وھدی گوش ئے منی چم تھار بیت اَنت من گْوشت اناں ملا چو آسانی ءَ جنگ نہ بیت گوشت اِش ھو اے ملا جند اِنت ملا جنگ بیتگ من نیم گنٹا ءَ دانکہ انچو ھُشک ءُ ھیران بیتاں ءُ چمانی ارس بند نہ بیت اَنت ملا جنگ بیت من ءَ باور نہ بیت گنٹایے ءَ دانکہ ھمے وڑ ءَ من گوں وت ءَ جیڑ اِت پد ءَ دگرے اتک منی کرا گوشت ئِے ملا پہ وتن شھید بیتگ منی مھروانیں ملا جان من ءَ سک زھیر کنت پہ تو تئی اچانگیں روگ ءَ پوراھیں مَنْد ابیتک کت دراھیں راج گمیگ کُت بلے منی مھروان مرچی من ھمُک تاک ءَ لیٹیناں بس تئی نام اِنت تو ساہ دات بلے وتن ندات-

تئی بامردی ءِ کسّہ ھرچ لوگ ءِ تہ ءَ ھرچ پسُگ ءِ دلانی تہ ءَ نبشتہ اِنت آ تئی جنگی کسّھاں الّم وان اِیت ءُ تئی سر ءَ پھر بند اِیت ءُ سرپد بیت کہ یک ملا نامیں جنگولے اے کوہ ءُ کُچگاں گردگ ءَ بیتگ ءُ دُژمن ئِے بے واب کتگ-

مھروانیں ملا بھرام ءَ ھمے مزن بند ءِ دل ءَ وتی چم پچ کُت اَنت ھمے مزن بند ءِ دل ءَ شھید کنگ بیت- شھیدی ترا مراد بات منی مھروان جان گوں سنگتاں ھوار-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔