ھزدار ءَ تیر گواری ءَ دو مردم بیران، کلات ءَ مردمے ءِ جون ءِ دست کپتگ

سربوتگیں ھالانی رِد ءَ بلوچستان ءِ دمگ ھزدار ءَ ناشناسیں مردمانی تیر گواری ءَ ناکو ءُ گوں ھمراھے برازتک ءَ بیران بوتگ –

تیرگواری ءِ وئیل ھزدار ءِ دمگ زھری ءَ بوتگ، تیرگواری ءَ بیران بوتگیں مردمانی پجار نزیر احمد ء زحیم بخش شاہو زئی ءُ عبدالوحید ء علی احمد شاہوزئی ءِ ناماں بوتگ انت –

لیویز ءِ رِد ءَ تیرگواری ءِ وئیل گوستگیں شپ ءَ بوتگ بیران بوتگیں مردم ناکو ءُ برازتک انت –

تنی وھدی وئیل ءِ درگت ءَ ھچ وڈیں سرپدی نہ رستگ کہ کجام سوب ءَ اے مردم کُشگ بوتگ انت –

دومی نیمگ ءَ بلوچستان ءِ دمگ کلات ءَ یک مردمے ءِ جون ءِ دست کپتگ –

لیویز ءِ رِد ءَ گوستگیں روچ ءَ کلات ءِ دمگ خزینئی ءِ بنجاھی شھدگ ءِ نزیک ءَ کنڈ ءِ تہ ءَ جون ءِ دست کپتگ کہ لیویز کارمنداں جون دست گپتگ ءُ نادراھجاہ ءَ سرکتگ اودا اژدری چار تپاس ءَ پد جون شال ءَ پہ پجار ءِ ھاتر ءَ دیم دیگ بوتگ –

زانگ بہ بیت بلوچستان ءَ ژانگولیں جون نبشتہ کنائینگ بنت بلے پہ آھانی پجار ءِ ھاتر ءَ ھچ وڈیں آسراتی نیست –

سال دوھزار دہ ءَ سوبائی محکمہ داخلہ ءَ جونانی نبشتہ کنائینگ ءِ درچ بندات کہ اشی اشی ھکم سپریم کورٹ نیمگ ءَ دیگ بوتگ – چدوپیسر دست کپتگیں ژانگولیں جونانی ھچ ریکارڈ ھم نیست –

سیاسی ءُ چاگردی پڑ ءَ سیادی داروکیں مردمانی گوشگ انت کہ بلوچستان ءَ ویرانگاں ژانگولیں جونانی دست کپگ بیگواھیں مردمانی کھول ءِ ھاتر ءَ زوراکی ءَ کمتر نہ انت –

دومی نیمگ ءَ بلوچستان ءِ تیاب دپی دمگ پسنی ءِ وارڈ نمبر چار زوبگ محلہ ءَ محمد علی نامی مردمے کارچ جنگ ءُ کُشگ بوتگ –

پولیس ءَ اژدری چار ٹپاس ءَ پد جون کھول ءِ دست ءَ داتگ – پولیس ءِ رِدءَ آھاں شک ءِ سر ءَ مردمے دزگیر کتگ ءُ پٹ پول برجاہ انت –