شال: بیگواھیں مردمانی درگت ءَ یک دگہ کمیشن ءِ جوڑ کنگ بوتگ

بلوچستان سرکار ءَ بیگواھیں مردمانی درگت ءَ یک دگہ پارلیمانی کمیشن ءِ جوڈ کُتگ – اے کمیشن بلوچستان ءِ مزن آمیدگس ءِ گوشگ ءِ پد ءَ جوڑ کنگ بوتگ –

وزیر داخلہ ضیا لانگو پارلمانی کمیشن ءِ سرکماش بیت اِنت وھدیکی اسمبلی ءِ باسک اسداللہ بلوچ، زاہد ریکی، ملک نصیر شاہوانی ءُ زمرک اچکزئی کمیشن ءِ باسک گچین کنگ بوتگ انت –

سرکار ءِ نیمگ ءَ کمیشن ءِ درگت ءَ گامگیج زورگ بوتگ –

ایڈیشنل چیف سیکرٹری داخلہ کمیشن ءِ سیکرٹری بیت اِیں، کمیشن ھر یک بیگواھیں مردمے ءِ درگت ءَ پٹ پول کنت ءُ کمیشن بیگواھیں مردمانی ملک ءِ بگیری ءَ کتگیں کاراں ھم چاریت –

زانگ بہ بیت بلوچستان ءِ تہ ءَ بیگواھیں مردمانی درگت ءَ بازیں کمیشن ءِ جوڑ کنگ بوتگ انت بلے بے واک ءِ سوب ءَ بیگواھیں مردمانی کھول چہ کمیشن ءَ دلجم نہ انت –

زانگ بہ بیت سال دوھزار بیست ءَ میان استمانی کمیشن آف جیورسٹ ( آئی سی جے) ءَ پاکستان ءَ زورانسری آوار جنگ بوتگیں مردمانی جیڑھاناں چارگ ءِ ھاتر ءَ جوڈ کنگ بوتگیں وفاقی کمیشن ءِ کارانی چارگ پد آ کمیشن ءِ دیما نہ برگ ءِ ھاتر ءَ گوشتگ –

آئی سی جے ءَ گوشتگ کہ اے کمیشن ءَ زورانسری بیگواھیں مردمانی وئیلاں ھواریں کتکار دیم ءَ آؤرت نہ کتگ انت ءُ وتی ھکم ھم پیلو نہ کتگ انت ءُگامگیج زورگ ءَ بے سوب بوتگ –