بلوچستان ءَ پاکستانی پوج ءِ سر ءَ اُرشانی تہ ءَ گیشی
ٹی بی پی شونگال
بلوچستان ءَ دو دھکاں چہ گیش اِنت کہ سلاہ بندیں آجوئی لوٹوکیں جُنز برجاہ اِنت بلے گوستگیں روچاں پاکستانی پوج ءِ سر ءَ اُرشانی تہ ءَ گیشی گندگ ءَ اتکگ، کہ اِشانی تہ ءَ پاکستانی پوج ءَ ترندیں جانی تاوانانی دیمپانی کنگ کپتگ۔ بلوچستان ءِ بنجاھی شھر شال ءَ ھوار کیچ ، ھزدار ، ھب ، کوھلو ءُ نوشکی ءَ اُرش کنگ بیتگ اَنت ءُ اے اُرشانی تہ ءَ دو مزنیں اُرش ھم ھوار اَنت کہ آیانی تہ ءَ اپسر رینک ءِ کارندہ ھم کُشگ بیتگ اَنت۔
23 دسمبر ءِ شپ ءَ دمگی بُن دوار تربت ءِ ھد ءَ گوکدان ءِ ھند ءَ پیسر ءَ چہ سراپ کُتگیں اُرشکاراں ایف سی ءِ یک کاروانے ءِ سر ءَ اُرش کُتگ، کہ اِشی ءِ تہ ءَ سوبیدارے ءَ ھوار چار کارندہ مُرتگ اَنت وھدیکہ دومی اُرش 25 دسمبر ءَ کوھلو ءِ دمگ کاھان ھنکین ءَ پوجی کاروان ءِ سر ءَ بیتگ، کہ اِشی ءِ تہ ءَ پاکستان آرمی ءِ کیپٹنے ءَ ھوار ھپت کارندہ کُشگ بیتگ اِت اَنت۔
2022 ءِ سال بلوچستان ءَ پاکستان ءِ پھازگی لشکریانی ھاتر ءَ باز گران بیتگ، 25 جنوری ءَ کیچ ءِ دمگ ءِ ھند دشت سبدان ءَ پوج ءِ بنجل ءِ سر ءَ بی ایل ایف ءِ اُرش ءِ تہ ءَ دہ ءَ چہ گیش پوجی کارندہ کشگ بیتگ ات اَنت۔ 2 فروری ءِ شپ ءَ بی ایل اے ءِ مجید بریگیڈ ءَ پھازگی لشکریانی نوشکی ءُ پنجگور بنجل ءِ سر ءَ اُرش کت، اے بلوچ جد ءُ جھد ءِ تہ ءَ اولی رند اَت کہ گھگیراں پھازگی لشکریانی بنجل گپتگ اَنت ءُ پد ءَ سئے روچاں داں دستیگ کنگ برجاہ داشتگ اَت ءُ جنگ داشتگ اَت۔
اپریل ءِ ماہ ءَ کراچی یونیورسٹی ءِ تہ ءَ مجید بریگیڈ ءِ شاری بلوچ ءَ کنفیوشس انسٹیوٹ ءِ چینی استاد یک پدائی اُرشے ءِ تہ ءَ نشانگ کُت اَنت، کہ اشی ءِ تہ ءَ سئے چینی اُستاد کُشگ بیتگ ات اَنت۔ اے بلوچ راجدپتر ءِ تہ ءَ اولی پدائی اُرش اَت کہ بلوچ زالبولے ءَ کتگ اَت۔
جولائی ءِ ماہ ءَ بی ایل اے ءَ پاکستانی فوج ءِ لیفٹیننٹ کرنل لئیق چہ زیارت ءَ بیگواہ کُتگ اَت ءُ ستمبر ءِ ماہ ءَ بی ایل اے ءَ پوج ءِ یک صوبیدارے دزگیر کنگ ءَ پد پاکستان ءَ تچک ءَ بندیگانی مَٹ کنگ ءِ داوت داتگ اَت۔ اے وئیل بلوچ سلاہ بندیں گلانی پالیسیانی تہءَ بدلی ءِ درشان ءَ کن اَنت۔
پاکستان ءِ پھازگی پّریسکار ھمے پیشن گوئی کنگ ءَ بیتگ اَنت کہ اوگانستان ءِ سر ءَ تالبانی دستیگی ءَ پد بلوچ جُنز نزور بیت بلے انیگیں لھتے سالاں چہ بلوچ آجوئی لوٹوکیں سلاہ بندیں گل پد ءَ وت ءَ مھکم کنگ ءَ اَنت ءُ سلاہ بندیں گلانی پالیسیانی تہ ءَ بدلی ءَ پد آیانی اُرشانی ترندی ءُ کارگرِد ءِ تہ ءَ ھم گیشی اَتکگ، نی آ بلوچستان ءَ ڈن کراچی ءَ ھم چین ءِ سیتاں تچکی ءَ نشانگ کنگ ءَ اَنت، کہ چریشی ءَ آیوکیں وھدءَ چین ءُ پاکستان ءِ جنجالانی تہ ءَ گیشی ودی بیگ ءِ گمان اِنت۔