کلات پولیس سر ءَ اُرش ءُ گوادر ءَ پوج ءِ سر ءَ اُرش

بلوچستان ءِ دو جتا جتائیں جاھاں پوج ءِ سر ءَ ناشناسیں مردمانی نیمگ ءَ اُرش کنگ بیتگ اَنت-

سر بیتگیں ھالانی رد ءَ بلوچستان ءِ دمگ کلات ءَ سلاہ بندیں مردماں پولیس تھانہ ءِ سر ءَ دزبمبے چگل داتگ-

پولیس تھانہ ءِ سر ءَ بمب اُرش گوستگیں شپ ءَ کلات ءِ شھر ءَ کنگ بیتگ کہ اود ءَ ناشناسیں مردماں دزبمبے چگل داتگ ءُ پشت اھشتگ ءُ شتگ اَنت-

تراک ءَ دگہ جانی تاوانانی ھال نہ بیتگ اَنت-

ھمے وڑ ءَ گوادر ءِ دمگ کنڈاسول تنک ءَ پاکستانی پوج ءِ چوکی ءِ سر ءَ سلاہ بنداں اُرش کتگ –

دمگی مردمانی رد ءَ اُرش ءِ سبب ءَ پوج ءَ جانی تاوانانی دیمپان کنگ بیتگ – اُرش ءَ پد پوج ءَ بازیں مارٹرے آس داتگ ءُ دمگ ءَ داں دیراں تیرگواریانی توار اش کنگ بیتگ اَنت-

زانگ بہ بیت ھمے ماہ ءِ دَہ دسمبر ءَ پاکستانی پوج ءِ کاروان ءِ سر ءَ سلاہ بندیں مردماں اُرش کتگ ات چریشی ءَ اود ءَ مرتگیں پوجیانی سلاہ اش ھم برتگ اَنت ءُ اشی ءِ زمہ واری بلوچستان لبریشن فرنٹ ءَ زرتگ ات-