بلوچستان ءَ تحریک تالبان پاکستان ءِ جنزوکیں گام — زارین بلوچ

الم بوانیت

آھوگ تو اے وڑ مہ کُتیں۔۔۔ – بالاچ قادر

آھوگ تو اے وڑ مہ کُتیں۔۔۔ بالاچ قادر دی بلوچستان پوسٹ گُل ترا یات بیت ھما وھدی کہ توءُ دگہ سنگتے مئے...

کمےّ وھد کشّ – منھاج مختار

کمےّ وھد کشّ منھاج مختار دی بلوچستان پوسٹ تو ھم زانئے کہ من ترا گشگایاں بلے اگاں ترا موھ رست منی اے...

بلوچستان ءِ آجوئی ءِ ترس ءُ پاکستانءِ نوکیں پالیسی: نبشتہ حکیم واڈیلہ

گوشنت زوراک وھدءِ وتا نزور بیگءَ گندیت اگں ماریت گڑا آوتی سرجمیں زورا جنت ءُ وتی زوراکیءَ برجم دارگءِ...

بلوچستان ءَ تحریک تالبان پاکستان ءِ جنزوکیں گام

دی بلوچستان پوسٹ گچینی

زارین بلوچ

تحریک تالبان پاکستان (ٹی ٹی پی) ءَ وتی چاگردی رسانکدر ءِ اکاونٹ ءِ سر ءَ یک درشانے شنگ کنان ءَ جار جتگ کہ بلوچستان ءِ دمگ مکران ءَ چہ “مجاھدین” جنگولانی یک ٹولی یے تحریک تالبان پاکستان ءَ ھوار بیتگ ءُ آئی ءِ مکسداں گوں وپاداری ءِ جارجتگ۔ مزار بلوچ نامیں یک ناشناسیں مردمے ءِ سروکی ءَ، اے ٹولی ءَ یک مزنیں نام ابو منصور عاصم مفتی نور ولی محسود حفظہ اللہ ءِ دست ءَ تحریک ءَ گوں وپاداری ءِ اھد کُتگ۔ ٹی ٹی پی ءَ وتی تکانی تہ ءَ ھوار بیوکیں نوکیں جنگولاں مرادباتی داتگ ءُ گُشتگ کہ آ بلوچستان ءِ تہ ءَ ٹی ٹی پی ءِ دزرس ءَ گیشتر ودین اَنت۔

تحریک تالبان پاکستان، اوگانستان ءُ پاکستان ءَ کارکنوکیں جتائیں اسلامی جنگی گلانی یک ھم سنتیں گلے ،کہ بلوچستان ءِ تہ ءَ ھم وتی دزرس ءَ گیشتر ودینگ ءَ اِنت، ءُ تاکت ءِ گرگ ءِ جھد کنگ ءَ اِنت۔ ٹی ٹی پی ءَ پاکستانی ریاست ءِ بلوچ مھلوک ءِ سر ءَ زوراکی، آیانی آسریاتیانی لُٹ ءُ پُل، بلوچ سیاسی باسکانی بیگواھی ءُ کوش ءُ بلوچستان ءِ تہ ءَ پوجی گامگیجانی سر ءَ ایراد گپتگ۔

گل ءَ دردواری ءِ درشان کُتگ ءُ بلوچ “آجوئی لوٹوکیں” سلاہ بندیں گلانی نیمگ ءَ سنگتی ءِ دست شاھار داتگ۔ یک کوھنیں گُشتنے ھست کہ “منی دژمن ءِ دژمن منی دوزواہ اِنت۔ ءُ انچو گمان بیگ ءَ اِنت کہ ٹی ٹی پی بلوچستان ءَ نوکیں دوزوا جوڑ کنگ ءِ جھد کنگ ءَ اِنت۔

سیکولر بلوچستان ءُ نیکراھی جنگولانی تہ ءَ گیشی

وتی سدانی سال کوھنیں راجدپتر ءِ نیام ءَ، بلوچستان کدی ھم نیکراھی ناشری ءُ بے اوپاری ءَ لوگ نہ کُتگ ۔ بلوچ یک باز نسلی راجے کہ جتائیں پد ندارگاں گوں سیادی داروکیں مردمانی سر ءَ بندوک اِنت، جتائیں ھدایانی تاھت ءَ کن اَنت، ءُ جتائیں زباناں گپ جن اَنت۔ ءُ پد ءَ ھم، اے مردم چہ بازیں پدریچاں چہ ھواری ءَ گوں زندگی کنگ ءَ اَنت ءُ یک دومیگ ءِ ربیدگ ءُ سرگُشتنانی شرپ ءَ کن اَنت۔ بلوچ وتی سیکولر ربیدگ ءِ سر ءَ پھر بند اَنت۔

بلے لھتیں دھکاں چہ بلوچستان ءِ سیکولر چاگرد سانمند بیان اِنت، نیکراھی بنیات پرستی، جتائیں پرکاھانی بگیری ءَ شدت ءُ نپرت انگیزیں جرمکاریانی تہ ءَ گیشی اَتکگ۔ اے گیشی بیستمی کرن ءِ نیامی آسری وھد ءَ بندات بیت بلے 2001 ءَ اوگانستان ءَ امریکی ارش ءَ پد اِشی ءِ تہ ءَ باز تیزی اَتکگ۔

بلوچستان ءَ نیکراھی بنیات پرستی ءِ راستیں سوب ءَ المی اِنت کہ اِشی ءَ اناگتی ودگ ءِ دروشم ءَ چارگ مہ بیت بلکیں بازیں دھکاں چہ ودوکیں میل ءِ دروشم ءَ چارگ بہ بیت۔

بلوچستان ءِ راجدپتری رد ءَ یک سیکولر دمگ ءِ بیتگ بلے اِشی ءِ تہ ءَ 1970 ءِ دھک ءِ نیام ءَ بدلی آیگ بیتگ اَنت۔ بلوچستان ءِ سیمسر گوں اوگانستان ءَ ھوار اَنت، ءُ اوگان جنگولاں پاکستان ءِ نیمگ ءَ پھازیتگیں جاہ دیگ بیتگ اَنت، اے اوگان سرکار ءِ نیمگ ءَ بلوچ راجدوستانی ھاتر ءَ نرمیں روش ءِ پدگرد اِنت۔

انچش کہ بلوچ اھوالکار، ساجد حسین، کہ 2020 ءَ ناگمانیں جاوراں سویڈن ءَ بیران بیت، آئی ءَ دی ڈپلومیٹ ءَ گلگدار دیان ءَ گُشتگ اَت کہ: “جنرل ضیاء الحق ءِ وھد ءَ (1977-88) وھدیں نیکراھی جنگول پاکستان ءَ اَتکگ، بلوچستان ضیاء ءِ پالیسیانی سوب ءَ ھرابیں دروشم ءَ سانمند بیتگ اَت۔ بلکیں سانمندی شال اگاں بلوچستان ءَ دگہ جاھاں اوگان باھوٹیانی آیگ ءِ بیتگ۔ بلوچستان ءِ پشتون کِشک ءَ بگر داں سبی، نیکراھیں مردم اگاں گیشتر درچتیں، جنگولاں وتی ھمرائی ءَ جھاد ءِ جزبگ آرتگ اِت اَنت۔

بلوچستان ءِ گوریچانی دمگاں ابید، اوگان باھوٹی سیمسر ءِ نزیکیں دمگاں ھم پُترتگ اَنت، کہ چریشی ءَ اے دمگ نیکراھی بنیات پرستی ءِ آماچ بیتگ اَنت۔

ساجد حسین ءِ رد ءَ، نیکراھی بنیات پرستی ءِ اولی کرومگ کیچ ءَ ترکیت اَنت پد ءَ چاگی ءُ نوشکی ءَ بنداتی رد ءَ، اے دیمرویاں ھمے ھندانی تہ ءَ رفتوں شیعہ پر کہ ءِ دیمپانی کنگ ءِ سر ءَ دلگوش دات۔ پان شیعہ ازم ءِ اے ھیال اِنت کہ ایران بلوچستان ءِ تہ ءَ شیعہ اسلام ءَ دیم ءَ آرگ ءَ اِنت، ءُ سنی (سلفی) سلاہ بندیں گلانی ھیال اِنت کہ اِشی ءِ دیمپانی کنگ ءِ یکیں راہ شیعہ ہزارہ مھلوکانی کوش اِنت، کہ زیارت ءِ ھاتر ءَ ایران ءَ رؤ انت۔ ساجد حسین ءَ درائشت کہ ایرانی بلوچانی، راجدوستی ءِ تہ ءَ ھم نیکراھی ٹولی گندگ بنت، پرچہ کہ بلوچ گیشتر سُنی اَنت کہ شیعایں ایران ءَ جھمنند اَنت میں۔ سیمسر ءِ اَے نیمگ ءَ وتی ھم ڈیھانی برھلاپ، ایران ءَ بلوچ کہ وتی اگبالانی ھاترءَ جنگ ءَ اَنت آ سیکولر نہ اَنت۔ آ کم ءُ گیش اسلام پرست اَنت۔ سیمسری دمگاں بازیں سنی گروپ سُر ءُ پُر کنگ ءَ اَنت، ءُ آیاں بازیں رند ءَ ایران ءِ تہ ءَ اُرش کُتگ، وھدیکہ تھران اے اُرشانی زمہ وار پاکستان، امریکہ ءُ سعودی عرب نامینیت۔

جنرل ضیاء ءِ ھاکمی ءِ بوت کنت بلوچ چاگرد ءِ سر ءَ ھچ سان نہ کپتگ، بلے پہ سیاست ءَ تباہ کاری ءِ سابت بیتگ، پرچہ کہ آئی ءَ وتی ھاکمی ءِ وھد ءَ نیکراھی پاٹیاں دلبڈی داتگ ءُ کمک کُتگ اَنت۔ یک بلوچ نبشتہ کاریں، نعمت گچکی ءَ دی ڈپلومیٹ ءَ گلگدار دیان ءَ گُشتگ کہ: “ضیاء ءِ اھد ءَ، بلوچستان ءَ، اولی رند ءَ دگہ پرکہ یانی، ھاسیں پئیم ءَ ذگری بلوچانی بگیر ءَ جتائیں لیکھانی مستری کنگ بیتگ۔ ھمک سال نیکراھی زانوگر “ختم نبوت” پئیمیں مراگشانی ھاتر ءَ تُربت ءَ شُتگ اَنت۔

آئی ءَ دیمتر ءَ گُشت کہ، “بُنکی دروشم ءَ، اے گچین کاری پندلانی ھاتر ءَ کارمرز کنگ بیتگ اَت پرچہ کہ بلوچستان ءِ مکران دمگ ءَ راجدوست باج بر بئیگ ءَ اِت اَنت۔ پمیشکا اسلام آباد ءِ سیاسی پاٹیانی ءُ سرکار ءِ ھیال اَت کہ راجدوست ذگریانی کمک ءَ چہ باج بر بئیگ ءَ اَنت۔

پمیشکا ذگریانی بلوچ ءَ گوں سیادی ھلاس کنگ ءُ بلوچ راجدوستانی تاکت ءَ نزور کنگ بہ بیت دانکہ راجدوستاں تاوان بہ رس ایت۔ آ انچش کنان کُت ءُ داں یک ھدے ءَ وتی نیام ءَ ھمے سیادی ءِ پروشگ ءَ سوبمند بیت اَنت۔ آیاں ذگری پرکایاں ھم ملام دات۔ بلے اَے گونڈیں وھدے گام ءَ اَت اَنت۔”

ضیاء 1988 ءَ مُرت بلے آئی ءِ پالیسی برجاہ دارگ بیت اَنت۔ ملایاں ذگری کارڈ کارمرز کنگ بندات کُت ءُ ذگریانی تنگ کنگ بندات کُت۔ 1990 ءِ دھک ءَ، ذگریاں زلم ءُ زوراکی ءُ نیکراھی بنیات پرستی ءِ گزب ءِ دیمپانی کنگ کپت۔ بلے شدت پسنداں آ شئے کدی ھم نہ رس ات کہ آئی آ لوٹوک بیتگ اَنت پرچہ کہ مکران دمگ، کہ ھمود ءَ ذگری جھمنند اَنت آیانی نیکراھی ھند بستگ اَنت، آ روایتی دروشم ءَ سیکولر دمگ اَنت کہ آودہ بلوچستان ءِ دگہ ھند ءُ دمگانی رد ءَ وانگ ءُ زانگ گیشتر اِنت۔

پاکستان ءِ یاگی گری ءِ بگیریں کار شون

پاکستانی ڈیھہ ءَ بلوچ راجدوستانی ءُ آجوئی لوٹوکیں” گلانی سانمندی ءِ دیمپانی کنگ ءِ ھاتر ءَ بلوچستان ءَ اسلامی نیکراھیں گلانی دلبڈی ھم کُتگ ءُ دیمروی ءَ کمک ھم کُتگ۔ اے کار شون ءِ جھلانکیں آسر دیم ءَ اتکگ اَنت، اِشی ءَ بلوچستان ءِ تہ ءَ نیکراھی بے اوپاری ءُ پرکہ وارانہ ڈِکَّر ءِ چاگرد ودی کُتگ۔ اے کارشون پاکستانی ڈیھہ ءِ ھاتر ءَ ھم بیت کنگ پائدگ مند نہ بیتگ، پرچہ کہ نیکراھی گلاں وتی توپکانی دیم پد ءَ وتی واجھانی نیمگ ءَ ترینتگ اَنت۔

نیکراھی گلاں بلوچستان ءَ بازیں اُرش کُتگ اَنت، کہ اِشانی تہ ءَ درستاں ھترناکیں سراج رئیسانی کوش اَت، کہ آ بلوچستان عوامی پارٹی ءَ سیادی داروکیں شدت لوٹوکیں سیاست دان ءِ اَت۔ رئیسانی 2018 ءَ مستونگ ءَ یک روانکے ءِ نیام ءَ وت کُشیں تراکے ءَ کُشگ بیتگ اَت، کہ اود ءَ دگہ 149 مردم بیران ءُ 186 ٹپی بیتگ اَنت۔ بیرانیانی کساس ترسناک اَت، اُرش ءِ تہ ءَ بازیں ھانواد ھلاس بیت اَنت۔ بازیں لوگانی تہ ءَ نماز جنازہ ءِ امامت ءِ ھاتر ءَ مردین پشت نہ کپتگ اَت۔

دولت اسلامیہ، کہ آئی ءَ داعش ھم گُشگ بیت،ھما گل ءَ سراج رئیسانی ءِ پوج ءَ گوں سیادی ءِ درگت ءَ گُشان ءَ اُرش ءِ زمہ واری زرتگ اَت۔ اے ٹولی اوگانستان ءِ سیمسراں گوں بستگیں بلوچستان ءِ دمگانی تہ ءَ سر ءُ پر کنگ ءَ اِنت ءُ ناشرکاری ءَ ھوار اِنت۔ اسلامی گل ءِ درستاں مستریں نشانگ بے سلاھیں لس مھلوک شیعہ ہ ہزارہ بیتگ اَنت۔ رئیسانی ءِ کوش اولی بر اَت کہ وھدے اِشی ءَ یک ھاسیں سیاستدان ءُ پوجے ءِ یک ھاسیں مڈی ءِ نشانگ کُتگ اَت۔

بلوچستان ءَ نیکراھی کُشت ءُ ھون ءِ گھگیری ءِ دراجیں ءُ یکشلیں دپتر بلوچستان ءِ مھلوک ءَ آیانی مڈیانی سر ءَ اگبال ءِ نہ منگ ھم پاکستانی واکدارانی بگیر ءَ زھری ءَ گوں بندوک اِنت۔ نیکراھی ءُ پرکہ واریں شدت ءِ تہ ءَ نوکتریں گیشی پاکستان ءِ نیمگ ءَ یاگی گری ءِ بگیر ءِ لوٹانی ھاتر ءَ نیکراھی شدت کارمرز کنگ ءِ تچکیں نتیجگ اِنت۔

بلوچستان ءَ پاکستان ءِ بگیر ءَ گھگیری ءِ پنچ چول دیستگ اَنت، وھدیکہ نوکتریں درچ 2004 ءَ بندات بیتگ اَت۔ گھگیری، کہ پیسر ءَ کوھانی سر ءَ سک اَت، نی بلوچستان ءِ شھری دمگاں داں سر بیتگ۔ بلوچ “آجوئی لوٹوکین” گلاں وت ءَ اسپر جوڑ کُتگ ءُ وت ءَ مھلوک ءَ گوں ھوار گیتگ، ءُ سرجمیں بلوچستان ءَ وتی سانمندی ودینت، کہ اِشی ءَ پاکستانی ڈیھہ ءِ ھاتر ءَ گھگیری ءِ ھلاس سک باز مشکل جوڑ کُتگ۔

“آجوئی لوٹوکیں” جزبگانی تہ ءَ ترندی ھما وھ دءَ اتک وھدیکہ یک کدآوریں بلوچ رھشونیں نواب اکبر خان بگٹی نمیران کُت۔ پاکستان ءِ پھازگی اسٹیبلشمنٹ ءَ بلوچستان ءِ تہ ءَ نیکراھی بنیات پرستی ءَ دیمروی دیگ ءِ ھاتر ءَ ءُ بلوچ یاگیانی ھمتنگی ءَ پروشگ ءُ تھنا کنگ ءِ ھاتر ءَ دمگ ءَ بنیات پرستیں اسلام ءِ دیما آرگ ءِ ھاتر ءَ تالبان، لشکر جھنگوی ءُ لشکر طیبہ ءِ پئیمیں اسلامی ٹولیانی کارمرز کنگ ءَ گوں پسہ دات۔ بلے اے کارشون بے سوب بیت پرچہ کہ وھدے اے گلاں کمو تاکت رس ات اشاں وتی ھاکمانی تنگ کنگ بندات کُت۔

پاکستانی ڈیھہ ءَ شدت لوٹوکیں گلانی لھتے رھشونانی کُشگ ءَ گوں بیر گپت اَنت، کہ اِشی ءَ جھادیانی ھاتر ءَ گیشتر جنگول ودی کُتگ۔ پاکستانی ڈیھہ ءِ اے رد منی ءِ تہ ءَ اِنت کہ آ اے ٹولیاں داشت کنت۔ بلے انیگیں جاورھال جتائیں دروشم ءِ پیش دارگ ءَ اَنت۔

پاکستانی پوج ءِ گور ءَ لھتے بلوچ سپاھیگ ءُ اپسر اَنت، پمیشکا آ گھگیری ءِ بگیر ءَ گامگیج زیرگ ءِ ھاتر ءَ سراج رئیسانی ءِ پئیمیں ھندی پراکسیانی سر ءَ اوست داریت۔ پوجی ءُ چیریں ادارگاں بلوچ یاگیانی دیمپانی ءِ ھاتر ءَ “ڈیتھ اسکواڈز” اڈ کنگ ءِ ھاتر ءَ نامداریں جرمکاریں مردم، ملیشیانی رھشون، منشیات پروش ءُ جاگیردار برتی کُتگ اَنت۔ اے”ڈیتھ اسکواڈز” بلوچ باسکانی ءُ نودربر رھشونانی “زورانسری بیگواھی”، ھون ریچ، پہ لب ءَ بیگواہ کنگ، منشیات ءِ باپار ءُ سلاہ بندیں دُزیانی تہءَ ھواری ءِ سوب ءَ بنام اَنت۔ وتی ھزمتانی بدلہ، اے ٹولی پوجءِ گور ءَ مزنیں کساس ءَ زر ءُ ھرچی کہ لوٹ اَنت آجوئیں دست ءَ گوں کُت کن اَنت۔

انچیں یک ملیشیا ءِ مستر شفیق مینگل اِنت، کہ زمانگ ءَ بنامیں یک شدت پسند ءُ پوج ءُ چیریں ادارگانی نزیکیں مردم اِنت ۔ بلوچ راجدوست شفیق مینگل ءَ بلوچ باسکانی، یاگیانی ءُ بلوچستان ءِ ہزارہ شیعہ برادری ءِ بگیر ءَ شدتی تکشامانی زمہ وار نامین اَنت۔

شفیق مینگل ءِ سر ءَ بے کساس شھریانی کوش ءُ بلوچستان ءَ پوج بگیریں جزبگانی دارگ ءُ پھازگی لشکریانی گوم ءَ رھوت ءَ کارکنگ ءِ بھتام اِنت۔ آئی ءِ سر ءَ پہ لب بیگواہ کنگ ءِ اسکیم جنزینگ ءُ بھتہ ھوری ءِ گامگیجانی ھم بھتام اَنت، ءُ آ اے درستیں کاراں یک راستیں ءُ جوانیں مسلمان ءِ کارست ءَ برجاہ داران ءَ کنگ ءَ اِنت۔

بلوچ یاگیانی دیمپانی کنگ ءِ ھاتر ءَ بلوچستان ءَ نیکراھی بنیات پرستی ءِ ربیدگ ءَ دیمروی دیگ ءِ ھاتر ءَ پھازگی اسٹیبلشمنٹ ءِ کارشونانی تہ ءَ شفیق مینگل تھنا یک پِٹو اِنت۔ ھمے وڑ ءَ گوں، بلوچستان ءَ بنیات پرستی ءِ تہ ءَ زور گیشی آرگ بیت اِنت۔ اے زور اڈ بیت ءُ اِشی ءَ ودگ ءَ یل دیگ بیت۔ اِشی ءِ سوب ءَ بلوچستان ءِ ھاتر ءَ تباہ کنوکیں سان دیما اتکگ اَنت، انچش کہ انسانی اگبالانی بے کساس ھلاپ ورزی، شیعہ ہزارہ نسل کشی، ءُ بے اوپاری ءِ ودوکیں ربیدگ۔ اِشی ءَ تحریک تالبان پاکستان، اسلامک اسٹیٹ ءُ دگہ ٹولیاں ھم دلبڈی داتگ کہ آ بلوچستان ءِ تہ ءَ بانزلاں پراہ کُت بہ کن اَنت بلوچ تکاں چہ جنگجول برتی کُت بہ کن اَنت۔

تالبان اور داعش

بلوچستان کدی ھم نیکراھی پرکہ واریانی لوگ نہ بیتگ ءُ درستیں نیکراھی ءُ زیر زندانی ھاتر ءَ پر ایمن بیتگ۔ بلے اوگانستان ءَ جنگ ءُ تالبانی دیما آیگ ءَ پد بلوچستان نیکراھی شدت ءِ پَٹ جوڑ بیتگ۔ بازیں سوب بلوچستان ءَ نیکراھی بنیات پرستی ءِ ھترناکیں میل ءَ دیما برگ ءَ اَنت، بلے یکے ءِ سیادی بلوچستان ءِ گوریچانی دمگ، ھاسیں پئیم ءَ ژوب دنگ ءَ گوں اِنت، کہ اِشی سیمسر پیسرگیں بنجاہ ءِ دست چیری ءَ بیتگیں قبائلی دمگ (فاٹا) ءَ گوں ھور بنت۔ فاٹا ءَ پاکستانی پوجءِ ضرب عضب ءَ پد، ٹی ٹی پی ءُ دگہ اسلامی گل بلوچستان ءِ جھلانکیاں داں پُترتگ اَنت ءُ اود ءَ پد ءَ مھکم بیتگ اَنت۔ اِشی ءِ آسر ءَ، بلوچستان ءِ بنجاھی شھر شال ءُ دگہ شھرانی تہ ءَ ھترناکیں اُرش بیتگ اَنت۔ اِشی یک دروریں اگست 2016 میں شال سول اسپتال ءَ بیتگیں بمب تراک اِنت، کہ اِشی تہءَ 70 ءَ گیشتر مردم بیران بیتگ اَت، کہ اِشانی تہءَ گیشتر وکیل اَت اَنت۔

اِشی ءَ پد پولیس ٹریننگ کالج ءِ سر ءَ دگہ یک اُرش ءِ بیتگ اَت کہ اِشی تہ ءَ 60 کیڈٹس کُشگ بیتگ اَت۔ ٹی ٹی پی ءَ چہ جتاہ بیتگیں ٹولی جماعت الاحرار، کہ داعش ءَ نزیکیں سیادی داریت، ھمیشی ءَ دوھیں اُرشانی زمہ واری من اِتگ اَت۔

دیم ءِ ماہ ءَ خضدار ءَ شاہ نورانی ءِ صوفی مزار ءِ سرءَ ناشرکارانی دگہ یک اُرش ءِ بیتگ اَت، کہ اود ءَ 50 ءَ گیشتر زائرین بیران بیتگ اَت۔ اے اُرش ءِ زمہ واری داعش ءَ زرتگ اَت۔

سئے ماہ ءِ نیام ءَ بلوچستان ءَ تہ ءَ داعش ءِ جنگول ءُ آیاں گوں بستگیں مردمانی اے سیمی اُرش اَت، یک انچیں دیمروی ءِ کہ اِشی ءَ سرجمیں دمگ ءَ گم ءُ رنج ءِ جاور ودی کُت اَنت۔ بلوچستان ءَ اے کساس ءَ داں نیکراھی بنیات پرستی کدی ھم نہ دستگ اَت، ءُ اناگتی شدت ءِ تہ ءَ گیشی ترسناک اَت۔

بلوچستان ءِ تہ ءَ اسلامک اسٹیٹ ءِ اُرشانی یک مزنیں کساس ءِ، اوگان تالبانی نامداری ءُ بلوچستان ءَ ٹی ٹی پی ءِ اے وھد ءَ سُرپُر ءُ برتی تکشام پاکستان ءِ یاگی گری ءِ بگیری ءَ اڈ داتگیں بے سوبیں کارشونانی آسر اِنت۔

دیما چی بیت کَنت؟

بلوچ “آجوئی ءِ لوٹوک” گل نانکہ ٹی ٹی پی ءِ پلہ مرزی کن اَنت ءُ نانکہ بگیری کن اَنت۔ آیاں تالبانی نیمگ ءَ یکجاھی ءِ پسہ نہ داتگ، کم چہ کم لس مھلوکانی دیما نہ داتگ۔ آجوئی لوٹوکیں گلاں داں انگت ٹی ٹی پی ءِ نیمگ ءَ بلوچ مھلوکانی برتی کنگ ءِ سرءَ ھچ پئیمیں درشان دیما نئتکگ۔ بلے آگ ھیال کنگ گیر گواچن پسندی نہ بیت کہ بلوچ سلاہ بندیں گل – کہ ھداں گیش سیکولر اَنت – ودوکیں نیکراھی بنیات پرستی ءُ پرکہ واریں شدتءِ ھلاپ بنت، اِشی بزانت اِش بیت کہ آ ٹی ٹی پی ءِ بلوچستان ءِ تہءَ وتی دزرس ءِ ودینگ ءِ ھم ھلاپ بنت۔

جیڑہ ھرچی ھم بہ بیت، یک گپ ءِ پدر اِنت – اگاں ٹی ٹی پی ءَ بلوچستان ءِ تہ ءَ کجام ھم پناہ جاہ رس ات، گُڑا اَے پہ دگہ اسلامی گلانی ھاتر ءَ وت ءَ جوڑ کنگ ءُ تاکت گرگ ءِ دلبڈی ودی کنت اِنت۔ چریشی ءَ نہ تھنا بلوچ کاز ءَ دلگوش دیر کئیت، بلکینہ بلوچستان ءِ سیکولر چاگرد ءَ ھم بے کساس تاوان بار کنت۔ نیکراھی بنیات پرستی ءَ سرجمیں جھان ءِ چاگرد تاوان بار کُتگ اَنت ءُ اَے چُشیں بھت ءِ نہ اِنت کہ بلوچ سگ اِت کُت بہ کن اَنت ءُ باوری دروشم ءَ اے نہ لوٹ اَنت کہ بلوچستان دگہ یک اوگانستان ءِ جوڑ بہ بیت۔

نوکتریں

بلوچستان: یک مردمے زورانسری آوار جنی ءَ پد بیگواہ

سربوتگیں ھالانی رِد ءَ پاکستان ءِ پھازگی لشکر ءَ یک مردمے زورانسری آوار جتگ ءُ بیگواہ کتگ -

عبدالمالک ءِ کُشندھانی یل بوگ پدردی اِنت – کھول

عبدالمالک ءِ کھول ءَ رسانکدراں وتی شنگ کرتگیں درشان ءِ تہ ءَ گوشتگ کہ کتکاراں دوھزار بیست ءُ دو ءِ بیست ءُ...

زورانسری آوار جنیانی بگیری ءَ کراچی ءَ زھرشانی برجاہ

بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ نُھ سد ءُ سِی...

ڈیرہ بگٹی ءَ شُد ءِ سوب ءَ سینزدہ سالی ورنا ءَ وتکشی کُتگ

ڈیرہ بگٹی ءِ دمگ سوئی ءَ سینزدہ سالی شُدیکیں ورنایے ءَ ھُشکیں نان ءِ نہ رسگ ءِ سوب ءَ وتی گُٹ وت...