بیست ءُ یکمی کرن ءَ تاکت چوں چارگ بہ بیت؟ – عظمت بلوچ

بیست ءُ یکمی کرن ءَ تاکت چوں چارگ بہ بیت؟

نبشتہ کار: عظمت بلوچ

دی بلوچستان پوسٹ

مرچیگیں دنیا ءِ سیاست ءِ تہ ءَ تاکت یک مزنیں بنگپے جوڑ بوتگ۔ مرچی اناں بلکیں سَداں سال پیسر تاکت ءِ سر ءَ گپ ءُ ترانے بندات بوتگ۔ جتائیں کواس ءُ زانتکاراں وتی زمینی راستی ءُ پلسپیانہ جیڑگانی رد ءَ تاکت چاراِتگ ءُ وتی ھیال درشان کتگ اَنت ۔ شانزدمی کرن ءَ میکاولی وتی کتاب “دی پرنس” ءَ نبشتہ کنت کہ آ پاور پالیٹکس ءِ سر ءَ مرچی ھم شرتریں کتاب زانگ بیت۔ بلے یک چیزے زانگ لوٹ ایت کہ جھان مَٹ بوان اِنت، دنیا ءِ ھرچیز وتی رنگ ءُ دروشماں بدل کنان اِنت ھمے رنگ ءَ تاکت ھم ھمے روانی ءِ بھرے کہ آ بدل بوان اِنت، زمانگے بوتگ کہ تاکت مردمانی جون ءُ آھانی کچ ءِ ھساب چارگ بوتگ۔ پد ءَ جنگی اِسپر جوڑ کنگ بوتگ اَنت کہ ھماھانی کساس ءَ تاکت کچ ءُ کیل کنگ بوتگ ھمے رنگ ءَ جنزان ءَ تاکت جتائی موسمانی گوزگ ءَ پد مرچی بیست ءُ یکمی کرن ءَ جتائیں دروشمے ءَ مئے دیم ءَ اِنت۔ اے نبشتانک ءِ مول ءُ مراد مرچیگیں وھدے تاکت ءِ وانگ، چارگ ءُ آئی ءِ ٹپاسگ اِنت۔ اے چیز مارگ بوتگ کہ مئے نیمگ ءَ بزاں بازیں بلوچ کَس یا ادارہ انگت تاکت ءَ ھما روایتی تاکتے سرپد بنت۔ اگاں 21می کرن ءَ مارا وتارا زورآور کنگی اِنت ءُ دژمن نزور کنگی اِنت ءُ وتی دوبر آجوئی گِرگی اِنت گڑا مارا چہ روایتاں در آیگی اِنت ءُ ھستیں وھد ءِ تاکت ءَ چہ آشنا بوگی اِنت ءُ ھمے تاکت ءِ ھساب ءَ مارا وتی دژمن ءِ تاکت کچ ءُ کیل کنگی اِنت۔ ایشی ءَ گوں ھوار مارا وتی تاکت ھم ھمے تاکت ءِ ھساب ءَ چارگی اِنت ۔ 20می کرن ءِ نبشتہ کار میشل فوکو گشیت تاکت تھنا مادی رنگ ءَ چارگ مہ بیت۔ مادی رنگ ءَ چہ مراد ایش اِنت کہ اگاں یک تاکتے ھست اِنت گڑا آ تھنا آئی ءِ جنگی ساز ءُ سامان ءُ لشکر ءِ کَچ ءُ آھانی ھیلکاری ءِ ھساب ءَ چارگ مہ بیت، تھنا اے ھساب ءَ چارگ مہ بیت کہ آ چینچو باز تشدد کت کنت۔ اے راستی ءَ چہ کس وتی چماں بند کت نہ کنت کہ تشدد تاکت ءِ مستریں بھرے بلے تشدد ءَ سرجمیں تاکت پوہ بوھگ رد اِنت۔ھستیں وھد ءِ ہرچ نزامے کہ ھست اِنت آ تھنا تشدد ءِ سر ءَ نہ اوشتاتگ۔ 20 می کرن ءِ بازیں نبشتہ کار ھست اَنت کہ آھاں دنیا ءِ تاکت ونتگ اَنت(اسٹڈی) آ اے آسر ءَ سر بوتگ اَنت کہ دنیا ءَ ھرچ مزنیں تاکتے کہ بوتگ ، آ تاکتانی زور ءِ یک بھرے آھانی وت ساچ اِتگیں زانت بوتگ۔ اے نبشتہ کارانی مزنیں لڑے ۔ برازیل ءِ مزن نامیں پلسپی ءُ پیڈاگوجسٹ پائلو فرائرے ھم اے لڑ ءَ ھوار اِنت کہ آ ھستیں وھدے زانت بزاں کہ 20 می کرن ءِ زانت ءِ سر ءَ نگد کنت کہ ھستیں زانت تاکتانی زانت اِنت بزاں ہرچ زورآوریں نظامے کہ ھست اِنت ، آئی ءِ وتی زانت ءِ راھبندے ھست کہ آ زانت ھما تات ءِ واستا کشک گیشینیت۔ آ ھما زانت ءِ راھبند ءَ کہ آ یک تاکتے ءَ دیم ءَ آؤرتگ آئی ءَ بینکنگ وانگی نظام ءِ نام ءَ دنت۔ آ گش ایت کہ اے وانگی نظام تھنا نودربران ءَ ھما تاکت ءِ جتائیں ادارھانی واستا روبوٹ جوڑ کنت کہ آ پہ ھما نظام ءَ کار بہ کن اَنت۔ دیم ءَ فرائرے گش ایت کہ اے نظام نودربرانی جیڑگی بودشت ءَ ھلاس کنان ءَ آھاں چہ مردمی کَٹّ ءَ بارت۔ مردم ءُ آ دگہ ساھدارانی نیام ءَ تپاوت ھم ھمیش اِنت کہ مردم جیڑ اِت کنت آ جیڑ اِت نہ کن انت۔ وھدے کہ مردم جیڑ اِت مہ کنت بزاں آ ھما دگرانی وڑا بیت۔

20می کرن ءِ دگہ نام داریں نبشتہ کارے انٹینیو گرامشی اِنت کہ آ زورآوریں کیپیٹلسٹ استانانی نظام آں اسٹڈی کنت کہ اے استانانی تھ ءَ چوں یک ھاکمیں تبکے جَپاکشیں تبک ءِ سرا ھاکمی کنت(چو کہ مرچی پاکستان ءَ زورانسری بلوچ راج ءِ زمین وتی استان ءَ ھوار کتگ ءُ آئی ءِ سر ءَ وتی ھاکمی ءَ برجاہ دارگ ءِ جھد ءَ اِنت پمیشکا من اے نبشتانک ءَ تبک ءِ جاگہ ءَ راج زُرتگ بزاں یک راجے چوں دومی راج ءِ زمین ءَ وتی استان ءَ پہ زور ھوار کنت ءُ آھانی سر ءَ وتی ھاکمی ءَ برجاہ داریت ) آ یک استانے ءِ تاکت ءَ دو چاگردانی ھساب ءَ زور ایت۔ یکے پولیٹیکل سوسائٹی اِنت ءُ دومی سیول سوسائٹی اِنت۔ پولیٹیکل سوسائٹی ءِ تہ ءَ لا انفورسمنٹ ایجنسیز ءُ فوجی ادارہ کاینت ءُ سیول سوسائٹی ءِ تہ ءَ سیاسی گل، وانگی ادارہ،باپاری گل ءُ ھالرسانی گل کاینت۔ گرامشی گش ایت کہ استان ءِ سر ءَ ھمے دویں تاکت ھاکمی کن اَنت۔ اولی تشدد ءِ زور ءَ استان ءِ سر ءَ ھاکمی کنت ھما زور کہ گندگ بیت پہ درور یک سُپاھی یے کَسے ءَ چیک پوسٹے ءِ سر ءَ تپنگ ءِ زور ءَ داریت، آئی ءَ لٹ ءُ کٹ کنت، اے زور ءَ ھرکس دیست کنت ءُ ھما مردم کہ دارگ بوھگ ءَ اِنت ءُ لٹ ءُ کٹ کَنگ بوھگ ءَ اِنت آ ھم زانت کہ منی سر ءَ ھاکمی کنگ بوگ ءَ اِنت۔ دومی ھیالانی زور ءَ استان ءِ سر ءَ ھاکمی کنت ھما زور کہ گندگ نہ بیت۔ پہ درور کسے اگاں وانگی ادارھے ءَ وانگ ءَ اِنت ھما وانگی ادارہ ءِ زریعہ ءَ استان وتی ھیالاں آئی ءِ سر ءَ مُشیت ءُ پد ءَ ھمے ھیال آئی ءِ سر ءَ ھاکمی کن اَنت،ھمے ھیالانی بنھشت ءَ آ روت ءُ ھما استان ءِ دگہ ادارھے ءِ بھر جوڑ بیت ءُ وتی راجی نَپانی ھلاپ ءَ کار کَنگ بندات کنت۔ اےسرجمیں کاراں آ وتی وشی ءَ گوں کنگ ءَ اِنت چیا کہ آئی ءَ اے سما نیست اِنت کہ آئی ءِ سر ءَ ھاکمی کنگ بوگ ءَ اِنت ءُ اے سرجمیں کاراں آ پہ وت ءُ وتی راج ءَ نا بلکیں وتی دژمن ءِ واستا کنگ ءَ اِنت ءُ وتی راج ءِ ھلاپ ءَ کار ءَ اِنت۔ گرامشی استانی نظام ءِ تاکت ءَ ھمے رنگ ءَ “ھیجیمنی” ءِ نام ءَ دنت-

ھمے نبشتہ کارانی لڑ ءَ ھواریں یک نبشتہ کارے ایڈورڈ سعید اِنت کہ آ گش ایت مرچی سرجمیں دنیا ءِ سر ءَ ویسٹ بزاں یورپ ءُ امریکہ ھاکمی ءَ اَنت۔آھانی ھاکمی ءِ سوب تھنا اے نہ اِنت کہ آھانی لشکر میلیٹری زور بوتگ۔ لشکری زور ءَ ابید آھانی گورا زانت ءِ مزنیں مڈی یے ھست کہ ھمے زانت ءَ آھان ءَ دنیا ءِ کنڈ کنڈ ءَ سر کتگ ءُ ھمے زانت ءِ تھا ھماھانی ھیال مان اِنت۔ دنیا ءِ اے دگہ مھلوک ھمے ھیالانی رد ءَ جیڑ اَنت ءُ آھانی پالیسی ءُ پیسلہ آں من اَنت ءُ ھماھانی ھساب ءَ پہ روکپت ءَ کار کن اَنت۔ آھاں اسل ءَ اے سما نیست اِنت کہ آھانی سر ءَ دگہ تاکتے ھاکمی کنگ ءَ اِنت ءُ آ پہ ھما تاکت ءَ کار ءَ اَنت ءُ وتی راجانی ھلاپ ءَ اوشتاتگ اَنت۔

اے درستیں نبشتہ کارانی وانگ ءَ پد کسے سرپد بیت کہ مرچی بزاں 21می کرن ءَ تاکت تھنا گوں لشکری زور ءَ بندوک نہ اِنت بلکیں آھانی زور ءِ یک مزنیں بھرے انچیں ھست کہ آ گندگ نہ بیت کہ آ آھانی زانت ءِ تھ ءَ چیر اِنت۔ آ ھما تاکت ءَ وتی جتائیں ادارھانی زریعہ ءَ ھما راج یا مھلوک ءَ سر کن اَنت کہ آئی ءِ سر ءَ آ ھاکمی کنگ لوٹ اَنت۔ مرچیگیں وھد ءِ تاکت ءَ پوہ بوگ ءَ پد ما بلوچستان ءَ پاکستانی ءُ بلوچانی تاکااں کیس اسٹڈی زوریں-

اے وھدی اگاں ما بلوچستان ءَ پاکستانی تاکت ءَ بچاریں گڑا اے چیز دیم ءَ کیت کہ پاکستان ءِ تاکت گیشتر تشدد ءِ سر ءَ اِنت۔ ہر روچ بلوچستان ءَ فوجی آپریشن بوگ ءَ اِنت، مردم گار ءُ بیگواہ کنگ بوگ ءَ اَنت،تیر گواری ءِ ویلاں مردم کُشگ بوگ ءَ اَنت۔ بلے اے ھم نہ اِنت کہ بلوچستان ءَ پاکستان ءِ ھیجیمنی نیست۔ بلوچستان ءَ سک باز بلوچ ھست اَنت کہ آ ھانی سر ءَ پاکستان ہاکمی کنگ ءَ اِنت ءُ آہاں وتی جند ءِ بلوچ راج ءِ ھلاپ ءَ کارمرز کنگ ءَ اِنت بلے آھاں اے سما نیست اِنت کہ آھانی سر ءَ ہاکمی کنگ بوگ ءَ اِنت ءُ آ چہ وتی کرداں وتی راج ءَ چینچو مزنیں تاوانے دیگ ءَ اَنت چیا کہ ھیالانی سر ءَ آھانی سر ءَ ہاکمی بوگ ءَ اِنت ءُ آ اد ءَ ھچ رنگ ءِ زور دیست نہ کن اَنت ، آ نا بلکیں چاگرد ءِ اے دگہ مھلوک ھم اے کردانی تھ ءَ زور نہ گند ایت۔ لکانی ھساب ءَ مرچی بلوچ مھلوک پاکستانی ادارہانی بھر اَنت ءُ انگت گیش بھر بوھگ ءَ اَنت۔ سال ءِ سر ءخ ھزارانی ھساب ءَ بلوچ نودربر چہ پاکستانی وانگی ادارہاں پارگ بنت ءُ اے دگہ ادارھانی بھر جوڑ بنت-

دومی نیمگ ءَ وھدے ما آئی ءِ ھلاپ ءَ وتی تاکت ءَ چاریں گڑا گندگ ءَ کیت کہ مئے تاکت تشدد ءِ ھساب ءَ سک مھکم اِنت۔ مئے جنگ ءَ مرچی پاکستان ءِ لشکری ادارہانی “مورال” پروشتگ ءُ وتی مھلوک ءَ اے باورکنائینگ ءَ سوبین بوتگ کہ ما وتی زمین ءَ پھریز اِت کنیں۔ پہ درور 2 فروری ءِ پنجگور ءِ ارش کہ 4 روچ ءَ سرجمیں بُنجل بلوچ پدائیانی دزچیر ءَ بوت۔ استان وتی سرجمیں زور ءِ جَنگ ءَ پد ھم آھانی شھید کنگ ءَ سوبمند نہ بوت۔ گڈسر ءَ آھانی وتی تیر ھلاس بوتگ اَنت گڑا وتا وت جَتگ اِش۔ گوستگیں ماہ ءَ وتی دو دستگیریں افسرانی پچ گِرگ ءَ بولان ءَ گوں شور بندی ءَ مزنیں فوجی آپریشنے بندات کت ئت بلے اد ءَ ھم بے سوب بوت کہ 12 ایس ایس جی کمانڈو ءَ ہوار بازیں سپاھی یے جَنگ بوتگ اَت ءُ دومی نیمگ ءَ تھنا 3 بلوچ سرمچار ءَ جنگ داشتگ اَت کہ آ ھم اشاں جت نہ کتگ اِت اَنت بلکیں وھدے جندے تیر اِش ھلاس بوتگ اَنت گڑا وت ءَ وت جَتگ اِش۔

بلوچستان ءَ چشیں روچے نیست کہ لشکر ءِ سر ءَ ارش مہ بیت۔ بازیں ارش آں بلوچ سرمچار سرجمیں بُنجلانی گرگ ءَ سوبین بوتگ اَنت ءُ بُنجلانی سرجمیں چیز اِش گوں وت برتگ اَنت۔ بلے وھدے ما چاریں کہ بلوچ ءِ بازیں مھلوکے پہ نازانتی استانی ادارہانی بھر جوڑ بوھگ ءَ اِنت۔ اشی ءَ چہ اے گپ زانگ بیت کہ استان اے مھلوک ءَ داں وتی ھیالانی سر کنگ ءَ سوبین بوتگ۔ اد ءَ جست اے پاد کیت کہ بلوچ ءَ پرچا وتی ھیال اے مھلوک ءَ داں سر نہ کتگ اَنت؟ اشی ءِ سبب باز بوت کن اَنت یکے وَ اِش اِنت کہ دژمن ءَ بلوچستان انچو میلیٹیرائز کتگ کہ بلوچ ءِ ھچ ڈولیں گل ءُ ادارہ ءُ فردے سرفیس ءَ نئیلیت انچو کہ تئی بلوچی روتاک “آساپ” ءِ بلڈنگ چیزے سال پیسر ماں شال ءَ ماندارگ بوت، عطا شاد ڈگری کالج ءِ دوارگس کہ یک جوانیں وانگ، زانگ ءُ نبشتہ کنگ ءِ چاگردے بیت کہ اود ءَ چہ بلوچ ءِ واستا باز لبزانک نبشتہ کنگ بیت آئی ءِ سر ءَ چھاپہ لگیت ءُ دوار گس بند کنگ بیت۔ معلم ءِ آزادی واجہ صبا دشتیاری ءِ سر ءَ ماں شال ءَ تیر گواری کنگ بیت ءُ نمیران کنگ بیت۔بلوچ ءِ نودربر گل بی ایس او آزاد ءِ بازیں باسک ءُ رھشونے شہید کتگے ءُ بازینے انگت آزارجاہاں بند اِنت ءُ گل ءِ جند ءِ سر ءَ بندش جَتگ ئے۔ اے درسیں جیڑہ ءُ جنجالاں پد ھم بلوچ ءَ وتی واستا راہ ءُ در شوھازگی اِنت دانک وتی مھلوک ءَ وتی ھیالاں سر بہ کن اَنت۔ ھیالانی مھکمتریں رنگ لبزانکی رنگ اِنت۔ بلوچاں وتی ھیال ءُ لیکہ لبزانکی دروشمے ءَ آرگی اِنت پرچا کہ لبزانک گار نہ بیت۔ لبزانک ھیالاں زندگ داریت۔ زانگ بہ بیت کہ 17می کرن ءَ پد سک باز آشوب اتکگ کہ اشانی آرگ ءَ پرنٹنگ پریس ءِ مزنیں کردے مان اِنت کہ پرنٹنگ پریس ءِ زریعہ ءَ ھیال ءُ لبزانک زوت تِر ءُ دور تِر سر کنگ بوتگ اَنت۔ مارا ھم مرچی وتی آشوبی ھیال وتی لبزانک ءِ بھر کنگی اَنت ءُ وتی مھلوک ءَ سر کنگی اَنت ءُ وتی مھلوک ءِ راھشونی کنگی اِنت، آھاں بلوچ ءِ راجی ادارہاں گوں آشنا کنگی اِنت، آھاں اے باور کنائینگی اِنت کہ اے شمے ادارہ اَنت ءُ پہ شما کار ءَ اَنت، مئے شمے راجی ھستمان گوں ھمے ادارہاں بندوک اِنت۔بلے اے کارانی کنگ چو وش نہ اِنت ءُ ھچ آشوب ءِ تھ ءَ وش نہ بوتگ ءُ ما اے امیت ھم مہ داریں کہ دیم ءَ وشتر بنت ، جہد چینچو گیش دیمروی کنت جاور گیش ھراب بُوان بنت۔ انچو کہ بشیر زیب بلوچ وتی یک نبشتانکے ” دشمن کی پہچان” ءِ تھا گش یت کہ مارا تیار بوہگی اِنت کہ آؤکیں وھد انگت گیشتر گران بیت۔ مرچی بلوچ ءِ مستریں زمہ واری اے بیت کہ آ بہ جیڑیت ءُ سما بہ کنت کہ آ ھما کار ءَ کنگ ءَ اِنت آ پہ وت ءُ وتی راج ءَ کنگ ءَ اِنت۔ یا دژمن ءِ واستا کنگ ءَ اِنت۔ یا آئی ھما کار ءِ کہ ارادہ کتگ آ کار آئی ءِ راج ءَ نَپ دنت یا دژمن ءَ۔ اگاں اے کار دژمن ءَ نَپ دیگ ءَ اِنت گڑا آ بزانت کہ ہاکم آئی ءَ کنٹرول کنگ ءَ اِنت ءُ چہ دژمن ءِ گلامی ءَ دراھگ ءِ جہد ءَ بہ کنت۔ کسے چہ استانی گلامی ءَ وت ءَ رکینگ لوٹیت گڑا الم اِنت کہ آ وت ءَ چہ استانی ادارہاں دور بہ داریت ءُ گوں وتی راجی ادارہاں نزیکی بہ کنت۔

راجی ادارہاں چہ مُراد ھما ادارہ کہ آھانی لوٹ گوں بلوچ راجدوستی ءِ لوٹاں ھم دپ انت بزاں کہ بلوچستان ءِ آجوئی، بلوچ پجار ءِ رکینگ ءُ بلوچ ءِ زمین ءِ یکجاہ کنگ ءِ واستا جھد ءَ انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔