گوادر: زھرشانی سیمی روچ ءَ برجاہ، انٹرنیٹ سروس بند

الم بوانیت

گوادر ءَ حق دو تحریک ءِ رھشونانی دزگیری ءِ ھلاپ ءَ زھرشانی سیمی روچ ءَ برجاہ، جاورھال ناگیگ، مکران ءِ مزن شھدگ ءَ ھوار گوادر ءِ دگہ شھراں یکلشیں ھرتال برجاہ، نوزدہ سالی ئیں ورنا پولیس ءِ لٹ ءُ کٹاں پد بیران-

سر بیتگیں ھالانی رد ءَ بلوچستان ءِ تیابدپی شھر گوادر ءَ حق دو تحریک ءِ نیمگ ءَ سیمی روچ ءَ ترندیں زھرشانی برجاہ اَنت ءُ پولیس ءِ آنسو گیس ءُ تیرگواریانی درچ ھم زھرشانی کنوکانی سر ءَ برجاہ اَنت-

گوادر ءَ ھوار ھوار اورماڑہ ءِ زیروپوائنٹ ءَ ھم زھرشانی کنوکانی بیڑ برجاہ اِنت کہ اود ءَ پولیس ءِ لٹ ءُ کُٹانی سبب ءَ نوزدہ سالی ئیں ورنا دوست مھمد ء دوشمبے بیران بیتگ-

ھالانی رد ءَ گوشگ بیتگ پولیس ءَ ورنا لٹ ءُ کُٹ کتگ چریشی ءَ آئی ءَ وتی ساہ داتگ اَنت-

گوادر ءَ ھوار دگہ جاھاں ھم حق دو تحریک ءِ رھشونانی سر ءَ پولیس ءِ بیڑ برجاہ اَنت –

گوستگیں روچ ءَ چہ بندات بیتگیں زھرشانی ءَ دمگ ءِ دراھیں رھوتی ھال بند کنگ بیتگ اَنت چریشی ءَ چہ اود ءَ تچکیں ھالانی گرگ ءَ جنجالانی دیمپانی اِنت-

شنگ بیتگیں تامر بنداں گندگ بیت اِنت کہ اود ءُ پولیس ءُ زھرشانی کنوکانی میان ءَ یکشل ءَ دست جنگی ءُ آنسو گیس ءُ تیرگواری بوگ ءَ اَنت-

گوستگیں روچ ءَ حق دو تحریک ءِ سروک مولانا ھدایت الرھمان ءَ گوشتگ کہ مئے رھشوناں ھوار چل مردم دزگیر کنگ ءُ ناشناسیں زنداناں برگ بیتگ اَنت کہ تنی وھدی آیانی درگت ءَ ھچ ھال نیست اِنت-

حق دو تحریک ءِ گوشگ اِنت اے زھرشانی ھما وھد ءَ ترند بیت اِنت دانکہ گپتگیں مردم یل کنگ نہ بنت-

زانگ بہ بیت گوستگیں روچ ءَ یک پولیس کارمندے ءِ ھال ھم شنگ بیتگ اَت چریشی ءَ پد سر وزیر بلوچستان ءُ وزیر داکلہ ءَ گشتگ ات کہ پولیس ءِ کوش ءِ زمہ وار حق دو تحریک ءِ سروک ءِ نام ءَ ایف آئی آر نبشتگ کنگ بہ بیت اِنت-

نوکتریں