ریکوڈک بل: اُگبال اگاں دُزی؟
ٹی بی پی شونگال
لھتے روچ پیسر ءَ پاکستان ءِ سینٹ ءِ دیم ءَ ریکوڈک بِل ایر کنگ بیت، کہ اِشی ءِ رد ءَ بلوچستان ءِ تہ ءَ ریکوڈک ءِ امبار ءُ دگہ گواجن بنجاہ (وفاق) ءِ ملکیت ءَ دیگ بیتگ اَنت ءُ ابید کجام بگیری ءَ اے بِل منگ ھم بیتگ۔ چہ سینٹ ءَ ریکوڈک بل ءِ منگ نامہ ءِ گرگ ءَ پیسر بلوچستان اسمبلی ءَ اے بل ءِ پلامرزی ءَ بلوچستان عوامی پارٹی ءِ سرکار ءَ قراردادے پاس کُتگ ات کہ آئی ءِ بگیری ءَ بلوچستان نیشنل پارٹی مینگل ءُ جمعیت علمائے اسلام ءَ کُتگ ات۔
اے بل ءِ منارینگ ءِ مول ءُ مراد پاکستانی سرکار ءُ بیرک گولڈکارپوریشن ءِ نیام ءَ مارچ ءَ بیتگیں اھد نامہ ءَ کانودی دروشم ءِ دیگ ءُ اھد نامہ ءِ بگیر ءَ کانودی اڑاندانی دیر کنگ ءِ جھد اِنت۔ چہ سینٹ ءَ بِل ءِ منگ بئیگ ءَ پیسر پاکستانی (سپریم کورٹ) مزن آمید گِس ءَ پاکستان ءِ بنجاھی سرکار ءُ بیرک گولڈکارپوریشن ءِ نیام ءَ بیتگیں اھد نامہ پلگاریں ءُ کانودی نامینتگ۔
ریکوڈک شوربندی چہ وتی بندات ءَ اَڑ ءُ کُڑانی آماچ بیتگ، بلوچستان ءِ مھلوک ریکوڈک شوربندی ءَ یک پُل ءُ پانچی شوربندی ءِ لیکگ ءَ اَنت، کہ چہ اِشی ءَ درملکی شرکت ءُ پاکستانی بنجاھی سرکار ءَ پائدگ رس ایت، چہ ریکوڈک ءَ پیسر سیندک، سوئی گیس ءَ ھوار ھمینکس مڈی چہ بلوچستان ءَ درکپگ ءَ اَنت، آیانی پربارو پائدگ بلوچاں رسگ ءَ ابید پاکستان ءِ بنجاہ ءُ آیانی شریداریں تاکتاں رسگ ءَ اَنت۔
پاکستانی رھبند (آئین) ءِ ھژدھمی بدلی ءِ رد ءَ “پرگینگاں چہ در آیوکیں کُدرتی گواجن پرگینگانی مستری ءَ بنت پرچہ کہ زمین پرگینگ ءِ مَڈی اَنت” بلے ھژدھمی بدلی ءِ ھستی ءَ پد ھم ریکوڈک بِل منگ بئیگ پرگینگی وت واکی ءِ سراسری ھلاپ کاری اِنت، کہ بنجاھی بنزھانی اگبالانی لُٹ ءُ پُل ءِ درور اِنت۔
بلوچستان ءِ پیسرگیں سروزیر نواب اسلم رئیسانی ءِ گُشگ اِنت کہ دو ھزار ءُ دوازدہ ءَ آئی ءِ سرکار پمیشکا ھلاس کنگ بیتگ پرچہ کہ آئی ءَ ریکوڈک اھد نامہ ءِ سر ءَ دزنشان جنگ ءَ مکن کُتگ اَت۔ پیپلز پارٹی کہ ھژدھمی بدلی ءِ آرگ ءِ ساھتاں زیر اِیت، آ ھم بلوچستان ءِ اگبالانی لُٹ ءُ پُل ءِ تہ ءَ پاکستان مسلم لیگ نون ءِ بنجاھی سرکار ءِ ھمکار اِنت۔
بلوچستان ءِ مھلوک ریکوڈک شوربندی ءُ ریکوڈک بل ءِ بگیر ءَ زھرشانی کنگ ءَ اَنت، بلوچستان ءِ پارلیمانی پارٹی ءُ آجوئی ءِ جھد ءَ ھواریں گل ءُ پارٹیاں ریکوڈک شوربندی ءِ بگیری کُتگ، بلوچستان نیشنل پارٹی مینگل ءَ سرجمیں بلوچستان ءَ ریکوڈک بل ءِ ھلاپ ءَ زھرشانیانی جارجتگ ءُ بلوچ یکجھتی کمیٹی ءِ چاگردی رسانکدری کیمپئن ءِ تہ ءَ بلوچستان ءِ ھمک تک ءَ سیادی داروکاں ریکوڈک شوربندی یک پُل ءُ پانچی شوربندی ءِ نامینتگ۔
مارچ ءِ ماہ ءَ پاکستان ءِ بنجاھی سرکار ءُ بیرک گولڈکارپوریشن ءِ اھد نامہ ءَ پد بلوچ آجوئی لوٹوکیں سلاہ بندیں گلانی سَنَّتی براس ءَ بیھار دیان ءَ گُشتگ اَت کہ “ریکوڈک ءَ بلوچ گواجنانی لُٹ ءُ پُل ءِ ھاتر ءَ بیرک گولڈ کارپوریشن ءِ گوں زورگیریں پاکستان ءَ گوں اھد نامہ ءَ ما تیوگ ءَ ردکنیں ءُ اے ڈاھجار ءَ شنگ کنیں کہ ھمے شرکت ریکوڈک ءَ چہ دیر بہ بنت اگاں ناں گُڑا بلوچ سرڈگار ءُ گواجنانی پھازگ ءِ ھاتر ءَ براس داں گُڈی ھداں رؤت۔”
بلوچستان ءَ ریکوڈک شوربندی ءَ ھوار ھمینچوک ھم شوربندی بندات بیتگ اَنت چہ آیاں بلوچستان ءِ لس مھلوک ءَ ھچ مُز نہ رس اتگ، بلکیں زبھری ءِ مارشتانی تہ ءَ گیشی اتکگ ءُ لس مردمانی تہ ءَ اے شوربندیانی ھلاپ ترندیں زھر ءُ ناوشی ءِ گندگ ءَ کئیت۔ بلوچستان ءَ بلوچ مھلوکءِ واھگ ءُ رزا ءَ ابید منارینگ ءِ یکشلی برجاہ بہ بیت گُڑا اے شوربندیانی بگیری لس گھگیری ءِ تہ ءَ گیشی آیگ ءِ گمان اِنت۔ گیشتر اِش کہ اے گپ ءَ تشیں ھم شک نیست کہ مھلوکانی جزبگ ءِ پربارو پائدگ بلوچ آجوئی لوٹوکیں گلاں بیت پرچہ کہ ریکوڈک پئیمیں اھد نامہ، آجوئی لوٹوکانی لیکہ ءِ پلہ مرزی ءَ کن اَنت۔