نمیرانیں شھید سر زاھد آسکانی
نبشتہ کار: حیمنہ بلوچ
دی بلوچستان پوسٹ
اے گپ ءَ ھرکس کنت کہ من ءَ وتی زبان ءُ راج دوست بیت اِنت بلے باز کم مردُم وتی کرد ءَ پیلو کنت۔ چہ وت ءَ گیش وتی راج ءَ دوست دار ایت اے دابیں مردُم پہ وت ءَ گیش پہ راج ءَ زندگی کن اَنت ءُ مرگ ءَ پد ھم نمیران بنت۔ بلوچ راج ءِ تھا ھم لھتے ھمے دابیں راج دوستیں مردم ھست کہ آیاں وتی سرجمیں زند پہ وتی راج ءَ ندر کُتگ۔ ھمے نامانی تہ ءَ یک نامے شھید سر زاھد آسکانی اِنت کہ بلوچ راجدپتر ءِ تہ ءَ آئی نام ءِ یک جتائیں کدّ ءُ بستارے ھست۔
اے ساھت ءَ کہ من نبشتہ کنگ ءَ آں گْوشے سر منی دیم ءَ نشتگ ءُ بچکندگ ءَ اِنت ءُ من ءَ گوشگ ءَ اِنت کہ آ واب کہ من دیستگ اِت اَنت آیانی پیلو کنگ شُمئے زمّہ واری اِنت ءُ من ءَ یکّین اِنت کہ شُما وتی منزل ءَ اّلم سوبین بہ اِت ءُ دُژمن شُمئے سوبینی ءَ گند ایت وتی سر ءَ وت ھاک مانریچ ایت۔ شھید سر زاھد ءِ اسلی نام زاھر آسکانی بیتگ،بلے وانگجاہ ءَ بدل کنگ ءُ زاھد ایر کنگ بیت اِنت سر زاھد 2 جنوری 1979 ءَ پروم پنجگور ءَ ودی بیتگ آئی ءَ چہ گورنمنٹ ھائی اسکول پنجگور ءَ وتی میٹرک کُتگ ءُ چہ پنجگور ڈگری کالج ءَ ایپ ایس سی ءُ پہ گیشیں وانگ ءَ شال ءَ شُتگ۔ سر ءَ وتی بی اے ءُ ایم اے ءِ ڈگری چہ بلوچستان یونیورسٹی ءَ گپتگ اَنت من رد نباں اگاں بہ گوش آں کہ سر زاھد آسکانی بلوچ راج ءِ تہ ءَ چہ ھما ناماں یکّے کہ آئی ءَ وتی زند بس پہ بلوچ راج ءِ زانت ءُ سرپدی دیگ ءَ ندر کُتگ۔
آئی ءِ زانشتی کَد ءُ کِرد ھم سنگ اَنت یک توانگریں پگرے ءِ واھُند بوگ ءِ ھمراھی ءَ آ یک جوانیں مردم ءُ شرّیں استادے ھم بیتگ سر یک راج دوستیں مردمے بیتگ ءُ آئی ءِ جھد ھمیش بیتگ کہ آ پہ وتی راج ءَ چیزے بہ کنت ءُ مارا ھم مُدام ھمے سکینے داتگ۔ سر 1997 ءَ چہ پنجگور ءَ دیم پہ گوادر ءَ شُت ءُ اود ءَ یک آگاھان ءِ نام درسرکاری وانگجاھے ءَ انگریزی سوجکاری داں یک سالے وانینتگ ئے پد ءَ لھتے جیڑھانی سْوب ءَ آگاھان وانگجاہ 2007 ءَ بند کنگ بیت گڑا سر وتی انگلش لینگویج سینٹرے پچ کنت آئی ءِ اے چیز پیسر ءَ مار اِتگ اَت کہ اگاں بلوچ ءَ گوں دگنیا ءَ ھم گام بوگی اِنت گُڑا انگریزی زبان ءِ سکّگ ھم اّلّمی اِنت داں کہ وت واجہ نہ بہ ئے واجہ ءِ گیگان آں بگر بلے پہ وتی منزل ءِ سر بوگ ءَ ناں پہ گلامی ءِ سانکلانی چُکّگ ءُ آیانی مھکم کنگ ءَ بازیں جھد کنگ ءَ پد اے لینگویج سینٹر ءُ زاھد آسکانی دوئیناں مردُمانی دل ءَ جاگہ کُت تیاب دپ ءِ اے زمین ءُ مردُماں آئی ءَ را ھمینچو مھر دات کہ سر ءَ گوادر وتی ھنکین کُت ءُ داں وتی گُڈّی ساہ ءَ ھمے شھر ءَ زندگی کُت ئِے لینگویج سینٹر ءَ رند آئی وتی اسکول ءِ دی اوئیس پَچ کُت اد ءَ یکبرے پد ءَ لھتے ناشریں مردمانی پندل سازی بناہ بیت وتسریں کچوچینی، کردارکشی، زاہ ءُ بد،ایر جنگ بیت داں آ وتی منزل ءَ مول ءَ پراموش بہ کنت ءُ پُشتا بہ کنز ایت بلے بدواھاں اے نہ زانت کہ اے مرد پہ پد کنزگ ءَ اِد ءَ نہ یتکگ اے دُرستیں سکّی ءُ جنجالاں پد ھم آئی ءِ ایمان ھمینچو مھکم اَت کہ آئی ءِ پیشانی ءَ پریشانی ءِ کرچکے گندگ نہ بوت نہ کہ آ وتی مول ءُ منزل ءَ پراموش بوت بلکیں اے چیزّاں آ گیشتر سکین دات کہ آئی ءَ گیشتر کار کنگی اِنت آ گوں وتی ھمے جزبگ ءَ دیم ءَ جُنزان کنت ءُ وتی اسکول ءِ سب کیمپس ءَ پچ کنت سر ءَ وتی دومی کیمپس ءَ 2007 ءَ پچ کنت, سیمی کیمپس ءَ بکشی کالونی گوادر ءَ پچ کنت ءُ 2008چارمی کیمپس ءَ سربندر ءَ پچ کنت ھمے جُھد ءِ برکت ءَ نہ ایوک ءَ گوادر ءَ بلکیں سرجمیں مکران ءَ دی اوئیس اسکول یک جوانیں نامے جوڑ کنت ءُ جوانتریں پرائیوٹ اسکول زانگ بیت سر ءِ یک شوکیں ھادتے اے بوتگ کہ آئی مدام وتی نودربرانی گوماں ھر وڑیں سرھال ءِ سر ءَ گپ ءُ تران کرتگ ءُ ھر نودربر موہ داتگ کہ آ وتی ھیال درشان بہ کنت من ءَ یات اِنت سر ءَ یک رندے بورڈ ءِ سر ءَ اتا شاد ءِ شئرے نبشتہ کت “تو پہ سرانی گُڈگ ءَ زندے ھیالان ءَ کُش ئے پہ سِندگ ءَ داشت کنے پُلاں چہ بُو تالانی ءَ “؟ ءُ مارا جُستے کت کہ شمئے تہ ءَ کئے ایشی ءَ ونت کنت ءُ بزانت ءِ گشّین ایت,مئے تہ ءَ کس ءَ پسّو نہ دات چیا کہ آ وھد ءَ مئے تہ ءَ کس ءَ بلوچی وانگ ءُ نبشتہ کنگ نہ زانتگ۔ گڑا سر ءَ مارا اے شئر ءِ مانا گُشت ءُ پد ءَ گشت ئِے کہ اے سک بژن ءِ گپ انت کہ ما بلوچ ایں ءُ وتی زبان ءِ وانگ ءُ نبشتہ کنگ ءَ نزانیں۔ زبان مہ بیت راج گار بیت ءُ آئی ءَ دگہ راجانی دیم ءَ ھچ ارزشت نہ بیت۔اے گپءَ من ءَ چہ تہ ءَ کُدینت کہ ما وتی جند ءِ زُبان ءَ کہ ونت نہ کن ایں گُڑا ما چہ تور دیمروی کُت کن ایں چہ ھما روچ ءَ من وتی بلوچی سر ءَ کار بندات کُت ءُ انگت ھم ھمے جُھد آں کہ بلوچی وانگ ءُ نویسگ ءَ روچ پہ روچ گھتر کُت بکن آں سر ءَ چوناھی ءَ اسکول ءِ زمانگ ءَ بلوچی وانگ ءُ نبشتہ کنگ ءِ ھُب بیتگ ءُ مدام بلوچی لبزانک ءَ گوں ھمگرنچ بوتگ گوں زُبان ءَ چُشیں مھر من پیسرا کسّی تہ ءَ نہ دیستگ۔ سر ءَ اسکول ءَ مدام انگریزی گپ کتگ بلے وھدے بلوچی ءَ گپے کتگ گڑا ھچ دری لبزے کار مرز نہ کتگ۔
بگندئے آئی ءَ وتی زبان شات نہ بوتگ کہ دری لبزے منی زبان ءِ زیبائی ءَ پولنگ مہ کنت آئی ءِ بلوچی لبزانک ءِ تہ ءَ ھم وتی یک پجّار ءُ جوانیں کردے بوتگ سر ءَ آزمانک, شئر ءُ رجانکاری ھم کتگ. 2010 ءَ پرانزکاپکا ءِ یک آزمانکی کتابے میٹا مور پوسز بلوچی ءَ رجانک کتگ۔ وھد ءِ لوٹ گْوش ئے یا ھجبر ھلاس نہ بوکیں زانشت ءِ ھوشام انت کہ پہ اے ھوشام ءِ پروشگ ءَ سر وتی دیار ءَ ڈنّ امریکہ ءَ روت چہ (Yes program) ءِ نیمگ ءَ، وھدے کہ واتر کیت داں بازیں نوکیں (ideas) وتی پاداں کار ایت گوں ءُ جُھد کنت کہ ھما زانشتی چاگردے کہ امریکہ ءِ نودربراں رسگ ءَ اِنت آ اے بزّگیں ءُ لگتمالیں بلوچ راج ءِ چُکّاں ھم بہ رس ایت بلے اِد ءِ جاور ءُ واجکارانی نیّت اے گپّ ءَ چوں اوپار کُت کنت کہ بلوچءَ رُژنائیں بانداتے بہ رس ایت۔ بلے آ نزاناں کہ سر کتاباں گیش وتی نودربرانی پگری درَنگازی ءِ سر ءَ کار ءَ اِنت آیاں یک با سمائیں پدریچے جوڑ کنگ لوٹگ ءَ اِنت کہ وتی نیک ءُ بد ءَ پجارت بہ کنت یک انچیں بانداتے ءَ کار ءَ اِنت کہ آ باندات ءِ واھُند تھنا بلوچ اِنت آ باندات ءَ بس ایمنی اِنت ،وت واجھی اِنت، کسی وازمندگی نہ اِنت کہ واجہ مارا بل ما وانیں واجہ مارا گار ءُ بیگواہ مکن ، واجہ مئے سر ءَ پہ ھُدائی کمّے رھم بہ کن، آ باندات ءِ واجہ ما وت بہ ایں۔ 04 دسمبر 2014 اے ھما روچ اِنت کہ اے روچ ءَ لھتیں ناشُناسیں مردماں سر اسکول ءِ گیٹ ءِ دپ ءَ نُھ تیر جت ءُ شھید کُت۔ مرچی سر مئے اندر ءَ نہ انت بلۓ آٸی ءِ داتگیں سوج ءُ پنت ھجبر چہ دل ءَ شموشگ نہ بنت ءُ سر ءِ سوج ءُ پگر آٸی ءِ نودربرانی شکل ءَ گندگ بیت ءُ سر زاھد آسکانی مئے دلانی تہ ءَ نمیران اِنت۔ سر تو ھر کُجا ءِ من ترا ھال دیگ لوٹاں کہ تئی کِشتگیں توم نی درچکے جوڑ بیتگ ءُ آ روچ ھم دور نہ اِنت کہ اے درچک بر کار ایت ءُ ما دائمی شادمان بہ ایں ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔