روکپتی بلوچستان: ایرانی لشکر ءَ پانزدہ کس آوار جنگ ءَ پد بیگواہ کرتگ اَنت

گوستگیں روچ ءَ زھرشانی ءَ پد ایرانی لشکر ءَ روکپتی بلوچستان ءِ جتا جتائیں جاھاں پانزدہ مردم آوار جنگ ءَ پد بیگواہ کرتگ اَنت –

سر بیتگین ھالانی رد ءَ روکپتی بلوچستان ءِ تیابدپی شھر چھبار ءَ ایرانی لشکر ءَ شھدربرجاہ ءِ نودربر علیرضارئیسی چہ لوگ ءَ دیم پہ نماز ءَ روگ ءَ بیتگ کہ راہ ءَ ناشناساں آوار جنگ ءَ پد بیگواہ کرتگ –

ھالانی تہ ءَ گوشگ بیتگ کہ علیرضا سرباز ءِ نندوک اِنت اد ءَ وانگ ءَ اِنت-

ھمے وڑ ءَ ھاش ءَ ھم یک مردمے آوار جنگ ءَ پد بیگواہ کنگ بیتگ –

آوار جنگ بیتگیں مردم ءِ پجار کیومرس شھنوازی ءِ نام ءَ زانگ بیتگ کہ آ ھاش ءِ نندوک اِنت-

ھمے وڑ ءَ ھاش ءَ دگہ یک کسے آوار جنگ ءَ پد بیگواہ کنگ بیتگ کہ آئی ءِ نام شھریار یادگاری ءِ نام ءَ زانگ بیتگ آ ھاش ءِ دمگ حیدر آباد ءِ جھمنند گوشگ بیتگ –

ھمے وڑ روکپتی بلوچستان ءِ دمگ سیریک ءَ ھم شش کس آوار جنگ ءُ بیگواہ کنگ بیتگ اَنت-

ھالانی تہ ءَ گوشگ بیتگ کہ شش کس گروک بخش سیریک ءَ ایرانی لشکر ءَ شش کس آوار جنگ ءَ پد بیگواہ کرتگ اَنت-

آوار جنگ بیتگیں مردمانی پجار بھنان آراستہ، امید آراستہ، امجن امینی نژاد، دانیال رستگار، فرشاد درستکار ءُ ادھم درستکار ءِ ناماں زانگ بیتگ اَنت-

ھمے وڑ ءَ دزاپ ءَ ھم ھپت مرد آوار جنگ ءُ بیگواہ کنگ بیتگ اَنت-

آوار جنگ بیتگیں مردمانی پجار فرشید حسن زئی ء حنیف، جمشید حسن زئی ء رضائی، امید حسن زئی ء شیر مھمد، اسماعیل حسن زئی ء کریم، بھزاد حسن زئی ء رحمدل کہ اے زاھدان ءِ دمگ چشمہ زیارت ءَ آوار جنگ بیتگ اَنت-

ھمے وڑ دگہ یک کسے کہ آئی ءِ نام حامد رخشانی سید علی ءِ نام ءَ زانگ بیتگ اے ھم گوستگیں روچ ءَ زاھدان ءَ آوار جنگ ءَ پد بیگواہ کنگ بیتگ-

ھالانی تہ ءَ گوشگ بیتگ کہ اے مردمانی سر ءَ بنداتی ءَ لشکر ءَ تیرگواری کرتگ ءُ پد ءَ دزگیر کرتگ ءُ برتگ اَنت-

زانگ بہ بیت روکپتی بلوچستان ءِ جتا جتائیں جاھاں گوستگیں روچ ءَ زھرشانی کنگ بیتگ ات چرے زھرشانیانی سر ءَ ایرانی لشکر ءَ تیرگواری ھم کرتگ ات ءُ چریشی ءَ چہ مردمانی زدگ بیگ ءِ ھال ھم دیم ءَ اتکگ ات اَنت-