راجی آجوئی ءَ زُبان ءِ کِرد؟ – پاتما بلوچ

الم بوانیت

آھوگ تو اے وڑ مہ کُتیں۔۔۔ – بالاچ قادر

آھوگ تو اے وڑ مہ کُتیں۔۔۔ بالاچ قادر دی بلوچستان پوسٹ گُل ترا یات بیت ھما وھدی کہ توءُ دگہ سنگتے مئے...

کمےّ وھد کشّ – منھاج مختار

کمےّ وھد کشّ منھاج مختار دی بلوچستان پوسٹ تو ھم زانئے کہ من ترا گشگایاں بلے اگاں ترا موھ رست منی اے...

بلوچستان ءِ آجوئی ءِ ترس ءُ پاکستانءِ نوکیں پالیسی: نبشتہ حکیم واڈیلہ

گوشنت زوراک وھدءِ وتا نزور بیگءَ گندیت اگں ماریت گڑا آوتی سرجمیں زورا جنت ءُ وتی زوراکیءَ برجم دارگءِ...

راجی آجوئی ءَ زُبان ءِ کِرد؟

نبشتہ کار : پاتما بلوچ

دی بلوچستان پوسٹ

چوناھا بنگلہ دیش 18 دسمبر 1971 ءَ آجو بیتگ وھدیکہ پاکستان ءَ چہ جنگ ءَ پْروش وارت ءُ ھمے پاکستان ءِ نود ءُ سَے ھزار لشکر ءَ ھندوستانی لشکر ءِ دیم ءَ یک اُلسی سرجھلی یے(پبلک سُرینڈرے)کُت بِہ گِند ئے بنگلہ دیش ءِ آجوئی ءَ سرجمیں دُنیا ھیران بوت کہ پاکستان ءِ ٹھینوک وت بنگالی اِت انت ءُ یک مُلکے ءِ جوڑ کنوک چون بیست سال ءِ کسانیں مُدتے ءَ رند وتی مُلک ءِ پْروشگ لوٹ اَنت۔ ما بے ھال مہ بہ ایں کہ کانگریس ءِ ھلاپ ءَ مسلم لیگ ءِ اولی سیاسی مُچی ءُ مسلم لیگ ءِ اڈ دیگ ماں بنگلہ دیش ءِ شھر ڈھاکہ ءَ بوتگ ءُ ھمے شیک مُجیب اُلرھمان ءَ پہ پاکستان ءِ اڈ دیگ ءَ ڈھاکہ تا دھلی ءَ پندیں روانکے ھم کش اِت کہ ما دو راجی سسّا ءِ بُنیات ءَ جُتائیں مسلم ریاستے لوٹ ایں۔ بہ گِند ئے مسلم لیگ ءِ نود در سد باسکانی کچ ءُ کساس بنگالی اَت اَنت بزاں بنگالی وت پاکستان ءِ جوڑ کنوک اَت اَنت ءُ بنگالی وت پاکستان ءِ پْروشوک ءُ وتگڑیں دو راجی سسّا ءِ لگتمال کنوک ھم ھمے بنگالی وت اَت انت۔

شُما کسے سرپد اِت کہ اِے دْراہ چون بیتگ؟ چی ءَ بنگالیاں وتی نوساچتگیں مُلک پاکستان پْروشینت ءُ کوڑائیں دو راجی سسّا گوں ھاکاں ھوار کُت؟ اِے ماں راجدپتر ءَ چاردھیں ماہ ءِ ڈول ءَ سَھرا اِنت! البت ما وَ زان ایں کہ پاکستان ءِ لوٹوک ناں بلوچ ءُ پشتو اَت اَنت ءُ ناکہ سندھی ءُ پنجابی اِت اَنت گُڑا اے بے مُرادیں ریاست کَے ءَ جوڑ کُت؟ تچکیں ھبر ایش اِنت کہ تھنا بنگالی، یو پی ءُ لھتیں بمبئی ءِ ردیں کاروباریاں پہ پاکستان ءِ جوڑ کنگ ءَ انگریزانی دپچٹ ءُ کاسگ چٹّی کُت کہ مرچاں وت ءَ پناھگِیر (مُھاجر) گْوش اَنت ءُ دومی بنگالی اَت کہ پاکستان وت اش جوڑ کتگ ءُ گُڑا وت پاکستان ءِ گون ءَ جنگ اش کُت ءُ پاکستان گیدی ءِ دیم بے شرپی ءَ پْروشینت اش!-

اِے دْراہ گوں ماتی زُبان ءِ وپادری ءِ برکت ءَ بیتگ وھدیکہ پاکستان ءِ سروکار مھمد اَلی جناہ ءَ ماں ڈھاکہ ءِ مُچّی یے ءَ ھمے جار پرین ایت کہ پاکستان ءِ راجمانی زُبان اردو اِنت ءُ نی وانگجاہ ءُ دربرجاھاں تھنا اردو وانینگ بیت، کارگس ءُ کارجاھاں اردو کارمرز بیت گُڑا بنگالی اِے جار ءِ ھلاپ ءَ پاد کا اَنت ءُ گْوش اَنت کہ پاکستان ءِ مستریں راج ما بنگالی ایں، دومی پنجابی، پد ءَ سندھی، پشتو ءُ بلوچ اَنت گُڑا اردو چہ کُجا آتک ءُ اردو چون پاکستان ءِ راجمانی زُبان بیت؟ ما وَ ایشی ءَ نہ منّ ایں!-

پد ءَ بنگالی راج پہ وتی راجی ءُ ماتی زُبان ءِ ھکّ ءَ یکمُشت بوت اَنت ءُ نودربر، ازمکار، زانتکاری ءُ کواسانی سروگانی ءَ ھرجاھاں تْرُندیں زھرشانی ئیں روانک کش اِت ءُ زھرشانی ئیں نِنداکاں اوشتات اَنت گُڑا پاکستان سرکار ءَ پوج ءَ ھُکم دات کہ ایشانی سر ءَ زوراکی بہ کن ات ءُ زھرشانی ءَ ھلاس بہ کنائین اِت۔ بلے بنگالی راج پاکستان ءِ اے زُلم ءُ زوراکی ءِ دیم ءَ اوشتاتگ ءُ پد نہ کِنِز اتگ اَنت گُڑا21 پروری 1952 ءَ پہ وتی ماتی ءُ راجی زُبان ءِ زِندگ دارگ ءِ ھاتر ءَ وتی بازیں نودربر، زانتکار، کواس ءُ جُھدکار شھید کنائینت ءُ زگریں ھون ءُ ساہ پہ راجی زُبان ءِ رکینگ ءَ کُربان کُتگ اَنت۔ بزاں ماں دنیا ءَ بنگالی اولی راج ءَ اَت کہ آیاں پہ وتی راجی ءُ ماتی زُبان ءِ پھریز ءَ وتی سر کُربان کُت اَنت۔ البت پد ءَ ھمے بنگالی زُبان ءَ ھم پاکستان ءِ سرکاری زُبان ءِ درجگ دیگ بوتگ بلے چہ اِے ناھکّیں کُشت ءُ کوش ءَ رند بنگالی راج سرپد بوت کہ اِے مُلک نی پہ ما مُلکے وَ نہ اِنت ءُ دْراھیں بنگالی راج ءِ تہ ءَ پاکستان ءِ ھلاپ ءَ نپرتے ودی بیتگ۔

وھدیکہ بنگالیاں وتی زُبان ماں وانگجاہ، دربرجاہ ءُ شاھدربرجاھاں ونت گُڑا آ زُبان دوست بیتگ اَنت، چہ زُبان دوستی ءِ برکت ءَ ماں بنگالی راج ءِ تہ ءَ راجدوستی ءِ آشوبی ءَ راجی زیردستی اش ماراتگ۔

چوناھیگا وھدیکہ یک راجے زُبان دوست، راجدوست بیت گُڑا آ راج زورگیر ءِ گلامی وَ نہ منّ ایت بلکیں وتی راجی آجوئی ءِ ھاتر ءَ جُھد کنان ءَ وتی ڈیھ ءِ وتواجھی ءُ راجی آجوئی ءِ ھاتر ءَ آشوبے رُدین ایت۔
پد ءَ ھمے بنگالی راج ءَ 1970 ءِ گچینکاری ءُ آئی ءِ جنگ ءُ جدل ءِ میان ءَ وتی راجی آجوئی ءِ جار جت ءُ پد ءَ بے کساس کُربانی دات ءُ وتی راج چہ پاکستان ءِ گلامی ءَ آجو کُت۔

نی بیا اِت ءُ بہ گِند ایں کہ ما بلوچ راج ءَ پہ وتی راجی زُباناں چے کُتگ؟ راستی وَ ھمیش اِنت کہ ما دْراھیں سالاں دژمنانی درآمدیگیں زُباناں وان ایں ءُ نبشتہ کن ایں بلے تھنا ھمے یکیں 21 پروری ءِ ماتی زُبانانی میان اُستمانی روچ ءَ ما لھتیں رَدیں سْیاھگ ءِ دو سَے گالرِد نبیسّ ایں کہ ما ھم زُبان دوست ایں ءُ مارا ھم براھوی ءُ بلوچی دوست بنت!-

بہ گِند ئے ما وتی راجی زُبان ڈالچار کُتگ اَنت، ما بلوچ راج وتی راجی زُباناں ناں کہ وان ایں ءُ نَیکہ نبشتہ کن ایں چمیشکا مئے راجی زُبان ءِ کْوھن ءُ زگریں گال گار ءُ بیگواہ بوُان اَنت مئے بلوچی گُپتاری ءَ پارسی، سندی، سرائیکی ءُ ھندی ءِ گال تْرُندی ءَ ھوار بیگ ءَ اَنت۔

انچوشکہ واجہ ڈاکٹر ناگمان بلوچ گْوش ایت “داں کہ کسے زُبان دوست مہ بیت آ راجدوست بیت نہ کنت” پمیشکا باید اِنت ما بلوچ راج وتی راجی زُباناں بہ وان این ءُ نبشتہ دربر ایں۔ ما بے ھال مہ بہ ایں کہ ما بلوچ گلامیں راجے ایں چمیشکا مئے راج ءِ پدریچ ءَ ماں وانگجاھاں راجی زُبان وانینگ نہ بنت پمیشکا باید اِنت ما وتی دزھُورکی ءِ وھد ءَ ماں چاگِردی رسانکدر وتی راجی زُباناں وت بہ وان این ءُ وتی، سْیال، سنگت، سْیاد ءُ وارساں ھم بلوچی ءِ وانگ ءَ سرسوج بہ کن ایں کہ ماں پیسبُک ءُ وٹس ایپی گلاں بلوچی وانگ ءَ ھیل کنان ءَ نبشتہ ھم دربر ایں۔

باید اِنت مئے بلوچ راجی آجوئی ءِ رھشُون ھم گُلیں راج ءَ ھم راجی زُبانانی وانگ ءُ نبشتہ دربرگ ءِ کلوہ ءُ پیگاماں روان بہ کن اَنت کہ راج وتی زُباناں بوان ایت ءُ زُبان دوست ءُ ڈیھ دوست بہ بیت چریشی ءِ راج ءِ تہ ءَ گُلامی ءِ مارشت ودی بنت ءُ راج پہ وتی راجی آجوئی ءَ پاد کیت۔

بلوچستان شالا آجو بات ءُ وتواجھیں بلوچ راج وتی راجی زُباناں ما وانگجاھاں وان اَت۔ بلوچ میزران بات اَنت ءُ بلوچی شالا مُدام دیمروی کنات۔ شالا انچوش بات۔


دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نوکتریں

بلوچستان: یک مردمے زورانسری آوار جنی ءَ پد بیگواہ

سربوتگیں ھالانی رِد ءَ پاکستان ءِ پھازگی لشکر ءَ یک مردمے زورانسری آوار جتگ ءُ بیگواہ کتگ -

عبدالمالک ءِ کُشندھانی یل بوگ پدردی اِنت – کھول

عبدالمالک ءِ کھول ءَ رسانکدراں وتی شنگ کرتگیں درشان ءِ تہ ءَ گوشتگ کہ کتکاراں دوھزار بیست ءُ دو ءِ بیست ءُ...

زورانسری آوار جنیانی بگیری ءَ کراچی ءَ زھرشانی برجاہ

بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ نُھ سد ءُ سِی...

ڈیرہ بگٹی ءَ شُد ءِ سوب ءَ سینزدہ سالی ورنا ءَ وتکشی کُتگ

ڈیرہ بگٹی ءِ دمگ سوئی ءَ سینزدہ سالی شُدیکیں ورنایے ءَ ھُشکیں نان ءِ نہ رسگ ءِ سوب ءَ وتی گُٹ وت...