مند ءَ ایف ڈبلیو او ءِ راشنانی ماندارگے زمّہ واری بی ایل ایف ءَ منّ اِتگ

سربوتگیں ھالانی رِد ءَ گوستگیں روچ ءَ مند ءَ ناشناسیں مردماں ایف ڈبلیو او ءِ ھاتر ءَ راشن بروکیں گاڑی ءِ مانداشتگ –

اھوالکارانی رِد ءَ ناشناسیں مردماں ایف ڈبلیو ھاتر ءَ راشن بروکیں مازدہ ٹرک مند ءِ دمگ چکاپ ءَ ھما وھد ءَ مانداشتگ کہ آ سیمسراں ٹٹ جنوکیں کارمندانی ھاتر ءَ راشن برگ ءَ بوتگ انت کہ سلاہ بندیں مردماں پیسر ءَ دگ بستگ ءُ ٹرک مانداشتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ ٹرک ماندارگے زمّہ واری منّ اِتگ –

جارکش میجر گوھرام بلوچ ءَ وتی درشان ءِ تہ ءَ گوشتگ کہ کیچ ءِ دمگ مند چُکاپ ءَ سرمچاراں پاکستانی پوج ءِ کاربوجیں کمپنی، فرنٹیر ورک آرگنائزیشن ( ایپ ڈبلیو او) ءَ ساز ءُ سامان سر کنوکیں ٹرک گوں ساماناں ھوار مانداشتگ-

آئی ءَ گوشتگ کہ ڈرائیور ءُ کلینڈر ھمے سوب ءَ مکن کتگ ءُ پد ءَ یل کتگ اَنت کہ بلوچ بوتگ انت- اے ٹرک ٹٹاں ھوار کاردارانی ھاتر ءَ راشن ءَ پُر بیتگ گاڑی ءِ تہ ءَ چہ پاکستانی پوج ءِ لھتے کاگد ھم دزکپتگ –

جارکش ءَ گوشتگ کہ ما پیسر ءَ ھم ٹرانسپورٹ ءِ مردماں چہ دزبندی کتگ آ ریاستی کمکاری ءَ یل بہ کن اَنت، بلے انگت لھتے گاڑیانی واھنند وتی پائدگ ءِ ھاتر ءَ دُژمن ءِ ھمراھداری کنگ ءَ اَنت- آ ھوش بہ کن انت اگاں ناں آیانی گوم ءَ ھم چو دُژمن ءِ رویش دارگ بیت –

گڈسر ءَ جارکش میجر گوھرام بلوچ ءَ گوشتگ کہ ما ڈرائیوراں گوں دزبندی کن ایں آ بلوچ چُکچینی ءَ ھوار پاکستانی پوج ءِ ھچ وڑیں سُر پُر ءِ کمک ءَ چہ وتی واھنند انکار بہ کن اَنت –