ھاران ءَ دگہ یک ورنایے زورانسری آوار جنگ بیتگ

پاکستانی پوج ءَ چہ ھاران ءَ دگہ یک ورنایے آوار جتگ ءُ ناشناسیں جاھے ءَ برتگ-

سربوتگیں ھالانی رِد ءَ گوستگیں روچ ءِ بیگاہ ءِ وھد ءَ ھاران قلعہ ھند ءَ برجاھیں یک لوگے ءِ سر ءَ سی ٹی ڈی ءَ بیڑبرتگ ءُ اللہ نور ء حسن نور نامیں ورنایے آوار جنگ ءَ پد ناشناسیں جاھے ءَ برتگ-

ھاران ءَ بیست ءُ چار کلاکانی تہ ءَ زورانسری آوار جنی ءِ شش کیس رپورٹ کنگ بیتگ- گوستگیں شپ ءَ۔پاکستانی پوج ءَ سے مردم جابر یلانزئی ء پزیر احمد، نجیب اللہ یلانزئی ء محمد حسین ءُ شفقت یلانزئی ء عبدالرحیم وھدے کہ ھاران ءَ ھم یوسف بادینی ءُ پرویز بادینی ء فیض محمد بادینی آوار جتگ ءُ ناشناسیں جاھے ءَ برتگ اَنت –

چہ ھاران ءَ بیگواھیں جابر یلانزئی ءُ نجیب اللہ یلانزئی رند ءَ یل کنگ بیتگ اَنت وتی لوگاں سر بیتگ اَنت وھدے کہ چہ ھاران ءَ یک روچے ءِ میان ءَ آ دگہ بیگواھیں چاریں مردم انگت یل کنگ نہ بیتگ اَنت-

ھمے وڑ گوستگیں روچاں پاکستانی پوج ءَ چہ کراچی ، شال ءُ وندر ءَ چار بلوچ ورناہ آوار جتگ ءُ ناشناسیں جاھے ءَ برتگ اَنت، آیانی تہ ءَ چہ کراچی ءَ چاکر جھمنند بلیدہ کیچ چہ شال فیصل ء رمضان محمد شہی ءُ چہ وندر سعود ءُ آئی سیادے ھوار اَنت-

زانگ بہ بیت کہ سرجمیں بلوچستان ءَ ھمکروچی ھساب ءَ زورانسری آوار جنی کیس رپورٹ بیتگ اَنت- ھمے ھپتگ ءَ بلوچستان ءِ جتائیں دمگاں کیس رپورٹ بیتگ اَنت چہ اود ءَ پوج ءَ مردم زورانسری آوار جنی ءِ نشانگ کتگ اَنت-