روکپتی بلوچستان ءَ لس مردمانی پاھو دیگ ءِ ھلاپ ءَ زھرشانی

ایرانی ءِ بنجاھی شھر تھران ءَ ھواریں دمگ کرج ءَ روکپتی بلوچستان ءَ بندوکیں مردمانی پاھو دیگ ءِ ھلاپ ءَ زھرشانی –

سر بیتگیں ھالانی رد ءَ کرج ءَ بلوچ زالبولاں ایرانی انکلاب ءِ کارگس ءِ دیم ءَ روکپتی بلوچستان ءَ بندوکیں مردمانی پاھو دیگ ءِ بگیری ءَ زھرشانی کتگ-

زھرشانی کنوکانی گوشگ اِنت کہ ایرانی آمیدگس ءَ اے وھد ءَ یک سد ءُ ھشتاد بندیگیں مردمانی پاھو دیگ ءِ ھکم جاری کرتگ ءُ چریشی ءَ سیستان ءُ بلوچستان ءَ ھوار دگہ جاھانی مردم ھم ھوار اَنت-

زھرشانی کنوکیں کھولانی گوشگ اِنت کہ سرکار پہ وت دیم لس مردماں پاھو دیگ اِنت آیانی سر ءَ بستگیں بھتاماں دلگوش کنگ ءُ آیاں وتی سپاھی کنگ ءِ موہ ءَ ھم دیگ ءَ نہ اِنت-

زھرشانی کنوکیں کھول ءَ سرکار ءُ دگہ واکداراں لوٹ کرتگ ءُ گوشتگ کہ آ اے پاھواں رد بہ کنت ءُ بندیگیں مردماں یلو بہ کنت-

روکپتی بلوچستان ءَ بازیں مردمے اے وھداں پاھو دیگ بیتگ اَنت کہ آیانی سر ءَ ایرانی سرکار ءَ گیشتر نشہ باپاری ءِ بھتامانی سر ءَ پاھو داتگ اَنت-

گوستگیں روچ ءَ ایرانی آمیدگس ءَ روکپتی بلوچستان ءِ دمگ بندر عباس ءَ بندوکیں شھر میناب ءِ جیل ءَ ھپت بندیگیں مردم پاھو داتگ ات اَنت –

کہ آیانی تہ ءَ یک استادے ھم ھوار ات کہ آئی ءِ پاھو دیگ ءِ سبب ءَ ایرانی آمیدگس ءَ نہ گوشتگ ات-

گوستگیں دو ماھانی تہ ءَ ایرانی آمیدگس ءَ تنی وھدی ھژدہ بلوچ پاھو داتگ اَنت ءُ آیانی لاش واتر کھولانی دست ءَ داتگ اَنت-