چہ 9 سالاں بیگواھیں داد محمد مری ءِ گوھار ءَ وتی برات ءِ دیما آرگ ءِ لوٹ کُتگ۔
اھوالانی رد ءَ 2013 ءَ زورانسری بیگواھی ءِ آماچ بیتگیں داد محمد مری ءِ گوھار خیر بی بی ءَ شال ریڈ زون ءَ برجاھیں بیگواھیں مردمانی کھولانی نندانک ءَ بھر زرتگ ءُ چہ سالاں بیگواھیں برات ءِ یل کنائنگ ءِ لوٹ کُتگ۔
شال نندانک ءِ ھند ءَ چہ تامری درشان ءِ تہ ءَ بیگواھیں داد محمد مری ءِ گوھار ءَ گُشتگ کہ 9 سال پیسر آئی ءِ برات لشکریاں زورانسری بیگواہ کُتگ، ھمک شھر ءَ وتی برات ءِ یل کنگ ءِ ھاتر ءَ زھرشانی کُتگ ءُ دزبندی نبشتہ کُتگ بلے مزنیں وھدے گوزگ ءَ پد ھم مارا گُشگ بئیگ ءَ نہ اِنت کہ داد محمد مری کجا اِنت ءُ آ کجام جرمکاریانی سوب ءَ بندیگ کنگ بیتگ۔
خیر بی بی ءِ رد ءَ ائی ءِ برات داد محمد مری شھریانی دیم ءَ ریاستی ادارگاں بیگواہ کُتگ ءُ گوں وت بُرتگ کہ چہ آئی ءَ پد داں روچ مروچی آ دیما آرگ نہ بیتگ۔ داد محمد مری ریاستی ادارگانی دزگیری ءَ اِنت اگر آئی سرءَ کجام جرم ھست اِنت گُڑءَ آ آمید گِس ءَ آرگ بہ بیت ءُ جرم ثابت کنگ بہ بیت۔
خیر بی بی ءَ گیشتر گُشتگ کہ داد محمد مری بے میار اِنت آئی سرءَ ھچ جرمکاری پِر نہ بیت، برات دیمءَ آرگ ءُ مارءَ انساپ دیگ بہ بیت اگاں برات زندگ نہ اِنت ھم مارا ھال دیگ بہ بیت۔
دومی نیمگ ءَ بیگواھیں مردمانی کھولانی نیمگ ءَ شال ءِ ریڈ زون ءَ برجاھیں نندانک مروچی 47 می روچ ءَ ھم برجاہ اِنت کہ اِشی تہءَ جتاھیں تک ءَ سیادی داروکیں مردم بنجل ءَ آیگ ءُ نندانک ءَ نشتگیں کھولاں گوں یکجاھی درشانگ ءَ اَنت۔
یات بہ بیت کہ شال نندانک ءِ بھرزیروکیں کھول وتی بیگواھیں دوستیگانی یل کنگ ءِ لوٹ کنگ ءَ اَنت کہ اے نیام ءَ کھول ءُ بلوچستان سرکار ءِ نیام ءَ گند ءُ نند ءُ گپ رَپ ھم بیتگ اَنت، بلے نندانک ءِ بھرزیروکاں وتی لوٹانی سرءَ سنجیدگیں دیمروی ءِ لوٹ کُتگ۔