شال ءَ زورانسری آوارجنی ءُ زھرشانی کنوکیں بلوچانی سر ءَ لٹ شاپی ءِ بگیری ءَ زھرشانی

بلوچ یکجھتی کمیٹی ءِ نیمگ ءَ بلوچستان ءِ بنجاھی شھر شال ءَ بلوچ نودربرانی زورانسری آوار جنی ءِ تہ ءَ گیشی ءُ کراچی ءَ بلوچ زالبولانی دزگیری ءُ آھانی سرا لٹ شاپ کنگے بگیری ءَ مروچی زھرشانی کنگ بوتگ – زھرشانی کنوکاں لوٹ کتگ کہ بیگواھیں مردم یل کنگ بہ بنت ءُ سند پولیس ءِ بگیری ءَ کاروائی کنگ بہ بیت –

زھرشانی روانک ءَ جنک ءُ بچکیں نودربر، سیاسی گلانی باسکاں ھوار بیگواھیں مردمانی کھولاں مزنیں کچ ءَ بھر زرتگ، زھرشانی کنوکاں زانشجاھاں بلوچ نودربرانی زورانسری آوار جنی ءِ بگیری ءَ نارہ ھم جتگ –

زھرشانی کنوکان ریاست ءِ نیمگ ءَ بلوچ نودربرانی گیرکانودی آوار جنگ، درآمدگسی کُشت کوش ءُ سند اسمبلی ءَ ڈن پرایمنیں بلوچ زالبولانی زھرشانی ءُ نودربرانی سرا سند پولیس ءِ لٹ شاپی ءُ دزگیری ترندی ءَ گوں ایرجتگ چہ ھستیں وھدے سرکار ءَ لوٹ کتگ گوشتگ کہ بلوچ نودربرانی زورانسری آوار جنی ءِ درچ بند کنگ بہ بیت ءُ زانشجاھاں بلوچ نودربراں چیزے ءِ دربرگ ءَ ھوار درسیں بیگواھیں مردم زوتاں زوت یل کنگ بہ بنت –

ترانکاراں گوشتگ کہ بلوچستان یک نیمگے ریاستی پالیسیانی سوب ءَ پُشت ءَ کپتگ ءُ دومی نیمگ ءَ اے ریاست ءَ ھنچیں جاورھال جوڈ کرتگ انت کہ اگاں یکے وتی بنکی ھکانی ھاتر ءَ گپ بہ جنت گڈا آئی سرا زوراکی، لٹ شاپ، دزگیر کنگ ءُ بیگواہ ھم کنگ بیت – وھدیکہ بیگواھیں مردمانی کھول وتی دوستیگیں مردمانی ھاتر ءَ توار چست کن انت گڈا آھانی جیڑہ گیش گیوار ءِ بدل ءَ آھانی سرا زوراکی کنگ ءُ دزگیر کنگ بنت –

زھرشانی ءَ تران کنان ءَ ترانکارانی گوشگ ات کہ بلوچستان ءِ تہ ءَ وئیلانی درچ سک باز تیزی ءَ گون برجاہ انت کہ یک نیمگے بلوچ نودربر زورانسری آوار جنگ ءُ بیگواہ کنگ بوھگ ءَ انت ءُ درآمیدگسی دروگیں پولیس میڑ ءَ ورنا کُشگ بوھگ ءَ انت ومی نیمگ ءَ ھمے ریاستی ادارھاں درسیں راجی ءُ انسانی اقدار لگتمال کتگ ءُ چادر ءُ چاردیوالی ءَ لگتمال کنگ ءَ انت – بلوچستان ءَ پھازگ ءِ نام ءَ لس مھلوک دلسیاہ کنگ بوھگ ءَ انت ءُ مھلوک جانی ءُ ماژگی ازیت دیگ بوھگ ءَ انت ءُ نوں بلوچ زانشجاھانی تہ ءَ نشانگ کنگ بوھگ ءَ انت –

زھرشانی کنوکانی گوشگ ات کہ ھمک روچ یکے ناں یکے آوار جنگ ءُ بیگواہ کنگ بیت – ناکہ ادا کانود ھست ءُ ناکہ چِست کنوک کانود ءِ پابند انت – بلوچ ورنا ءُ نودربرانی زورانسری آوار جنی ءِ بیگواہ کنگ ءَ پد مئے زھرشانی کنگے ھک ھم پچگرگ بوتگ – ھر وھد ءَ کسے زھرشانیاں بھر زوریت گڈا اگان پولیس دست ءَ لٹ وارت یا چیریں ادارہ ءُ ایف سی آوار جن انت ءُ بیگواہ کن انت –

زھرشانی کنوکاں چہ سند ءِ سرکار ءَ لوٹ کتگ گوشتگ کہ کھولانی سر ءَ بوتگیں لٹ شاپی ءِ وئیل ءِ بگیری ءَ کمیٹی ءِ اڈ بہ دنت ءُ سند بلوچانی زورانسری آوار جنی ءِ درچ ءَ بند بہ کنت ءُ بیگواھیں مردماں یل بہ دنت –