ھُزدار ءَ پاکستانی پولیس ءَ لوگے ءَ بیڑبرتگ ءُ جنینے بیران بوتگ

بلوچستان ءِ ضلع ھُزدار ءَ پولیس ءَ یک لوگے ءَ بیڑبرتگ ءُ چُک ءُ جنین لَٹ ءُ کُٹانی نشانگ کتگ اَنت ءُ ھمے میان ءَ یک جنینے بیران بوتگ-

پولیس ءَ ھُزدار ءِ دمگ کھنڈ یک لوگے ءَ بیڑبرتگ ءُ کہ ھمود ءَ اے وئیل بوتگ-

وئیل ءَ چہ پد کھول جنین لاش نادَراھجاہ ءَ سر کتگ ءُ زھرشانی بندات کتگ-

کھول ءَ ھمے گْوشتگ کہ لوگ ءِ سرجمیں مردم واب بیتگ اَنت کہ پولیس ءَ کمپان ءِ تہ ءَ دور کتگ ءُ لوگانی تہ ءَ پُترتگ اَنت ءُ لوگ ءَ ساڑی ئیں مردین جنین ءُ چُک ءُ سک لَٹ ءُ کُٹانی نشانگ کتگ اَنت چریشی ءِ آسر ءَ چار جنین ٹپی بوتگ اَنت ءُ یک پیرزالیں جنین ھمے لَٹ ءُ کُٹانی نشانگ ءَ چہ آ بیران بوتگ –

کھول ءَ گْوشتگ ما ھما وھد ءَ زھرشانی ءَ برجاہ دار ایں دانکہ مارا انساپ دیگ نہ بیت –

وھدیکہ پولیس گْوشگ اِنت کہ جرمکارے ءِ شوھازگ ءَ پولیس ءِ کارندھان لوگ ءِ در ٹُک اِتگ ءُ جنین دل ءَ گپتگ ءُ بیران بوتگ-

اسسٹنٹ کمشنر جمیل احمد بلوچ وئیل ءَ چہ پد نادُراھجاہ ءَ سر بوتگ ءُ کھول گوں گپ ءُ تران کتگ ءُ پد ءَ ڈاکٹر پوسٹ مارٹم کنگ ءِ ھاتر ءَ گْوشتگ اَنت ئِے پوسٹ مارٹم ءَ چہ پد ءَ راستیں گپ پدر بہ بیت-