نوشکی ءِ کلی جمالدینی ءِ دمگ ءَ پاکستانی لشکر ءُ ڈیتھ اسکواڈ ءَ لوگانی سر ءَ اُرش کتگ ءُ زالبول لٹ شاپ کتگ ءُ لوگ مانداشتگ انت۔
دمگی مردمانی گشگ ءِ رد ءَ پاکستانی لشکر ءُ ڈیتھ اسکواڈاں آدینگ ءِ روچ ءَ نقیب جمالدینی ءُ گوستگیں روچاں بیران بیتگیں الطاف ءِ ناکو ھدامرزی شیخ امین ءِ لوگانی سر ءَ اُرش کتگ ءُ زالبول ءُ چُک لٹ شاپ کتگ ءُ لوگ مانداشتگ انت۔
زانگ بہ بیت گوستگیں روچاں سرکاری پلامرزی ءَ ھستیں ٹولی ءِ تیرگواری ءَ بیران الطاف جمالدینی ءِ لوگ ءِ سر ءَ ھم دو روچ پیش چھاپہ جتگ ات کہ اود ءَ پرس ءِ پتر پچ بیتگ۔ اود ءَ زالبول لٹ ءُ کٹ کنگ بوتگ اَنت ءُ لوگ ماندارگ بوتگ۔
اے وئیلانی پژدرءَ دمگ ءَ سکا زھر ءِ درشانی بیتگ۔ شھریانی گشگ انت کہ پولیس ءُ دمگی انتزامیہ مھلوک ءِ رکینگ ءِ بدل ءَ گمانی ءَ مجرمانی سرپرستی ءَ کنگ ءَ انت ءُ اے وڑیں وئیلانی دیم ءَ دارگ ءَ ناکام گندگ ءَ کیت۔