امریکہ ءِ راجکار عبدالسید ءَ امریکی ٹیکس دھندگانی زرّاں درملکی فوجی کمک ءِ سر ءَ ھرچ کنگ ءِ ھلاپ ءَ گشتگ ءُ پاکستان ءَ ھوار پنچ ملکاں امریکی فوجی کمک ءِ ھلاس کنگ ءِ لوٹ کتگ۔
امریکہ ءِ شنگاری ادارہ NPR ءِ مارننگ ایڈیشن پروگرام ءَ گوں تران کنان ءَ عبدالسید ءَ گشتگ کہ امریکہ وتی راج ءِ ٹیکس ءِ زراں دگہ ملکانی فوجانی مالی کمک ءِ بدل ءَ وتی راج ءِ وشھالی ءِ سر ءَ ھرچ بہ کنت۔
آئی ءَ وتی بیان ءِ تہ ءَ اسرائیل ، مصر ، سعودی عرب ، اردن ءُ پاکستان ءِ نام گپتگ ءُ گْوشتگ کہ امریکی راج وتی ٹیکساں نہ دنت دانکہ آیانی زرّ دومی ملکانی فوجاں سر بہ بنت ۔
عبدالسید ءَ گیش گوشتگ کہ امریکہ ءَ ھمے سلاہانی بھا کنگ بند کنگی اِنت کہ آ انسانی ھکانی سنگینیں لگتمالی، نسل کشی ءُ نسلی تَک ءِ تہ ءَ کارمرد کنگ بنت۔
آئی ءَ امریکی سرکار ءِ درملکی فوجی کمک ءِ پالیسی ءِ سر ءَ جُست ءُ پُرس کتگ ءُ گْوشتگ کہ وتی ملک ءَ جان سلامتی، وانگ ءُ زانگ ءُ راجی لوٹانی سر ءَ ھرچ ءُ درچ ءِ واستا مھلوک ءِ زلورت اولیت دیگ بہ بیت۔