اوگانستان ءِ دو جاھاں پاکستان ءِ برزی اُرش ، زالبول ءُ زھگاں ھوار نھ مردم بیران

اوگانستان ءِ سرکار ءَ گْوشتگ کہ پنچ شمبے ءِ روچ ءَ پاکستانی بالی اُرشاں اوگانستان ءَ سئے لوگانی سر ءَ اُرش کتگ ءُ 9 مردم بیران بوتگ اَنت ءُ اسلام آباد ءَ گْوشتگ کہ ناشرکارانی پناہ گاہانی نشانگ جوڑ کنگ ءَ پد 22 ”ناشرکار“ بیران بوتگ اَنت۔ اے گامگیج ھما وھد ءَ بوتگ کہ دوئیں ھمساھگانی نیام ءَ جنگ سئے ماہ ءِ بے تواری ءَ پد گیش بوتگ۔

اوگان طالبان ءِ جارکش زبی اللہ مجاھد ءَ سوشل میڈیا ءِ ویب سائٹ ‘X’ ءِ سر ءَ گْوشتگ کہ اوگانستان ءِ صوبہ کنڑ ءُ ھلمند ءَ اُرشانی تہ ءَ جنین ءُ چُک ھوار بوتگ اَنت ءُ دگہ 11 مردم ٹپیگ بوتگ اَنت۔

آئی ءَ گْوشتگ: ما اے کارروائی ءَ ایر جن ایں کہ اے زوراکی ءِ جرم ءُ سرجمیں منّگ بوتگیں رہبندانی ھلاپ ورزی اِنت۔

پاکستان ءِ وزارت ءِ زانتکاری ءَ ٹاہ داتگ کہ اے اُرش ”جائزیں انٹیلی جنس“ ءِ بنیاد ءَ کنگ بوتگ اَنت ءُ دو جاھاں ناشرکارانی پناہ گاہ نشانگ جوڑ کنگ بوتگ اَنت۔ وزارت ءِ نیمگ ءَ ’’ایکس‘‘ ءِ سر ءَ شنگ بوتگیں بیان ءِ تہ ءَ ٹاہ دیگ بوتگ کہ ”نشانگ ٹک ءَ کنگ بوتگ اَنت ءُ بنداتی ھالانی رد ءَ بیست ءُ دو ناشرکار بیران بوتگ اَنت۔