شال ءَ گوں ھمگرنچیں دمگاں مروچی پاکستانی لشکر آپریشن کنگ ءَ اِنت کہ ایشی ءِ تہ ءَ گن شپ ھیلی کاپٹر ءُ ڈرون بھر زورگ ءَ اَنت ءُ ھمے وڑ یکشل یَ مارٹر شیلنگ کنگ بیگ ءَ اِنت۔
مرچی سھب ءَ شال ءَ گوں ھمگرنچیں زرگون ءُ کش ءُ گوری دمگاں پاکستانی لشکر ءَ جنگی آپریشن بندات کتگ کہ ایشی ءِ تہ ءَ لشکر ءِ پیادگیں کارندہ،گن شپ ھیلی کاپٹر ءُ ڈرون مزنیں کساسے ءَ بھر زورگ ءَ اَنت۔
دمگی مردمانی رد ءَ زرگون، شیرکی کچ، زرگون گیس فیلڈ ءُ کش ءُ گور ءِ دمگ آپریشن ءِ تہ ءَ انت۔ آیاں گْوشتگ کہ گْوستگیں شپ ءَ ھم لشکر ءَ چہ جتا جتائیں نیمگاں مارٹر ءِ گولہ باری ءُ بمب گواری کتگ۔
آپریشن ءِ سبب ءَ جانی ءُ مال ءِ تاوان ءِ بابت ءَ انگت ءَ ھال ءُ اھوال دیم ءَ نیتکگ انت۔