شال : زورانسری بیگواھیں دو جنینیں بلوچ نودربر دیم ءَ آرگ بیتگ اَنت

پاکستانی پوج ءُ سی ٹی ڈی ءَ دوئیں زالبول چہ شال ءَ زورانسری آوار جنی ءِ نشانگ کنگ بیتگ اَنت-

بلوچستان ءَ پاکستانی پوج ءِ دست ءَ زورانسری آوار جنی ءِ نشانگ بیتگیں بلوچ نودربر خدیجہ بلوچ ء پیر جان ءُ صفیہ بلوچ ء عبدالخالق واکدار ءَ مروچی پریس کلب ءَ دیم ءَ آورتگ اَنت-

اے بیگواھیں بلوچ نودربر پوج ءِ واکدار ءَ شال ءَ پریس کلب ءَ پیش کتگ ءُ پریس کانفرنس کنائینتگ، اود ءَ آیانی سر ءَ سلاہ بندیں گلاں چہ سیادی دارگ بھتام جتگ-

دیم ءَ آرگ بیتگیں زالبولانی تہ ءَ ھوار بلوچستان ءِ دمگ واشک ءِ ھند بسیمہ ءِ جھمنندیں بیست سالی ئیں بلوچ نودربر صفیہ بلوچ ء عبدالخالق گوستگیں ماہ 23 اگست 2026 ءِ کساس ساھت یک ءَ پاکستانی پوج ءِ یک لوگے ءِ سر ءَ بیڑبرتگ آوار جتگ ءُ ناشناسیں جاھے ءَ برتگ-

زورانسری بیگواہ صفیہ بلوچ ءِ کھول اے وھد ءَ آئی ءِ زورانسری بیگواھی راست کنان ءَ گْوشتگ کہ صفیہ بلوچ ءِ زورانسری آوار جنی ءَ کاؤنٹر ٹیررازم ڈیپارنمنٹ “سی ٹی ڈی ” ءُ انٹر سروسز انٹیلی جنس ” آئی ایس آئی ءِ کارندہ ھوار اَنت-

ھمے وڑ شال پریس کلب ءَ آرگ بیتگیں زورانسری بیگواھیں بلوچ نودربرانی تہ ءَ ھوار میڈیکل ءِ نودربر خدیجہ بلوچ ء پیر جان ھمے سال 22 اپریل ءِ شپ ءَ بولان میڈیکل کالج (بی ایم سی) گرلز ھاسٹل ءَ چہ سی ٹی ڈی ءَ آوار جتگ ءُ ناشناسیں جاھے ءَ برتگ-

خدیجہ بلوچ ءِ آوار جنی ءَ پد زورانسری آوار جنی ءِ ھلاپ ءَ آئی ءِ کھول ءُ بلوچ نودربرانی نیمگ ءَ چہ بازیں روچ ءَ تاں بی ایم سی کالج ءِ دیم ءَ نندانک داتگ ءُ آئی ءِ آجوئی ءِ لوٹ کتگ اَت-

اے دوئیں زالبول مروچی پریس کلب ءَ پیش کنگ بیتگ اَنت آیاں چہ پریس کانفرنس کنائینگ بیتگ، اود ءَ بلوچ آجوئی لوٹوکیں سلاہ بندیں گلاں چہ ھمگرنچ بیگ ءِ بھتام جتگ-

زانگ بہ بیت اشی ءَ ساری ھم باز زالبول زورانسری آوار جنی ءِ نشانگ کتگ اَنت ءُ بازیں مدتے ءَ آزارجاھاں بندیگ کنگ ءَ پد دیم ءَ آرگ بیتگ اَنت ءُ زوریں پریس کانفرنس پرمائینتگ اَنت –