بلوچستان ءِ واشک ءُ مشکے ءُ دگہ دمگاں پاکستانی لشکر ءِ دست ءَ بیگواھیں مردمانی کوش ءُ لاشانی چگل دیگ ءِ وئیل دیم ءَ اتکگ اَنت۔ چہ فورسز ءِ نیمگ ءَ بازیں جاھاں لٹ شاپی، لوگانی دور دیگ ءُ بازیں مردمانی کوشانی ھال دیم ءَ اتکگ انت-
ھالانی رد ءَ واشک ءِ دمگ بیسیمہ ءَ پاکستانی لشکر ءِ دست ءَ شاھزیب بلوچ ء ھاتم کُشگ بوتگ ءُ آئی ءِ لاش آئی ءِ سیاد ءُ وارسانی دست ءَ دیگ بوتگ۔ شاھزیب بلوچ 6 اگست 2026 ءَ موٹر سائیکل ءِ سوار بوھگ ءِ وھد ءَ تیرگواری ءَ پد ٹپیگیں جاوراں دزگیر کنگ بوتگ کہ ایشی ءَ پد آ بیگواہ کنگ بوتگ۔
ایشانی ھوار واشک ءِ دمگ پتک ءَ لشکر ءَ دمگی مردم وتی لوگاں بند کتگ ءُ آپریشن ءِ وھد ءَ سکا لٹ شاپ کتگ انت۔ ھمے وھد ءَ چاکر نامیں شھری یے ءِ گس بلڈوزر ءِ کمک ءَ ڈروھینگ بیتگ ، وھدیکہ چیر داتگیں لوگاں چہ پنچ مردمانی لاش دور دیگ ءِ ھال ھم ھست ۔ یک لاشے ءِ پجار عبدالنبی ءِ چُک شکراللہ (کپر ءِ نندوک) اِنت کہ 10 روچ پیسر دزگیر کنگ بوتگ ءُ بیگواہ بوتگ ءُ دگہ چاریں لاشانی پجار نہ بوتگ۔
دومی نیمگ ءَ مشکے ءِ نندوک کریم داد ءِ بچ سبزل بلوچ ءِ جون پیراندر ءِ میتگ گزی ءَ دست کپتگ۔ رپورٹانی رد ءَ آ گوستگیں شپ ءَ تیرگواری کنگ کشگ بوتگ۔ زانگ بہ بیت کہ سبزل بلوچ لھتیں ماہ پیش چہ وتی گس ءَ پاکستانی لشکر ءَ آوار جتگ ءُ بیگواہ کتگ۔
زانگ بہ بیت گوستگیں سئے روچانی تہ ءَ بلوچستان ءِ واشک، آواران، پنجگور ءُ جیونی ءَ ھوار چہ بلوچستان ءِ جتا جتائیں دمگاں چہ 10 ءَ گیش بیگواھیں مردمانی لاش ءِ ھال دیم ءَ اتکگ کہ ایشی ءَ انسانی ھکانی گل ءُ دمگی تک ءُ پھناتانی تہ ءَ مزنیں زھر درشانی ودی بیتگ اَنت۔