بلوچستان ءِ دمگ ھزدار ءَ شفیق الرحمن مینگل ءِ لوگ ءِ نزیک ءَ تیرگواری ءَ یک پولیس کارمندے ءَ ھوار 5 مردم بیران ءُ یک مردمے ٹپیگ بوتگ۔
پولیس ءِ رد ءَ اے وئیل چار شمبے ءِ سھب ءَ آڑینجی پولیس اسٹیشن ءِ سیمسر ءَ اواک ءِ دمگ ءَ بوتگ۔ اے دمگ چہ خضدار ءَ نزیک ءَ 150 کلومیٹر ءِ نزیک ءَ انت ءُ کوھی دمگے-
واکدارانی رد ءَ سلاہ بندیں مردماں شفیق مینگل ءِ لوگ ءِ نزیک ءَ لیویز ءِ کوھنیں پوسٹے نشانگ جوڑ کتگ کہ اود ءَ آئی ءِ گارڈ ءُ پولیس کارندہ نشتگ اَنت۔ تیرگواری ءِ وھد ءَ شفیق مینگل ءِ چار گارڈ کہ عبدالحئی، نعمت اللہ، یحییٰ ءُ نصیر احمد ءِ نام ءَ زانگ بوتگ اَنت آ جاہ پہ جاہ ءَ بیران بوتگ اَنت۔
پولیس ءِ رد ءَ سلاہ بندیں مردماں نور محمد نامیں پولیس کارندھے آوار جتگ ءُ لھتے راہ ءَ پد کشتگ۔ اے اُرش ءَ عبید اللہ نامیں مردمے ٹپیگ بوتگ ءُ اُرش کنوک آپریشن ءَ پد شُتگ انت۔
زانگ بہ بیت شفیق الرحمن مینگل بلوچستان ءِ سیاست ءِ تہ ءَ آڑوکی انت ۔ بلوچ راجدوستیں ٹولی، بیگواھیں مردمانی کھول ءُ لھتے انسانی ھکانی گل آئی ءِ سر ءَ سلاہ بندیں ”ڈیتھ اسکواڈ“، سیاسی کارکنانی آوار جنگ، زورانسری ءَ بیگواہ کنگ ءُ ٹارگٹ کلنگانی تہ ءَ ھوار بوھگ ءِ بھتام ءَ جن اَنت۔
دسمبر 2011 ءَ بی ایل اے ءِ فدائیں بھرگ مجید بریگیڈ ءَ شال ءَ شفیق مینگل ءِ لوگ ءَ وت کُشیں اُرشے کتگ۔ شفیق مینگل چہ اے اُرش ءَ رک اتگ ءُ آئی ءِ بازیں ھمکار بیران یا ٹپیگ بوتگ اَنت۔ بی ایل اے ءَ اے اُرش ءِ زمہ واری زرتگ۔
جون 2025 ءَ شفیق مینگل ءِ برات عطا الرحمن مینگل وڈھ ءِ دمگ آڑینجی ءَ تیرگواری ءِ وئیل ءَ بیران بوتگ ءُ آئی ءِ چُک مطیع الرحمان ٹپی بوتگ۔ بی ایل اے ءَ ھم اے اُرش ءِ زمہ واری زرتگ۔
کساس یک سالے ءَ پد 8 جولائی 2026 ءَ شفیق مینگل ءِ سر ءَ پد ءَ بی ایل اے ءِ نیمگ ءَ ھزدار ءَ آئی ءِ لوگ ءِ سر ءَ مزنیں وت کُشی ءُ سلاہ بندیں اُرشے ءِ نشانگ جوڑ کنگ بوتگ۔ بی ایل اے ءَ اے اُرش ءِ زمہ واری زرتگ ءُ گْوشتگ کہ اے اُرش آئی ءِ فدائین بھرگ مجید بریگیڈ ءَ کتگ۔
بلے مرچیگیں وئیل ءِ زمہ واری انگت ءَ کس ءَ نہ زرتگ۔