سب الٹرن کلاس ءِ لیکہ ءُ بلوچ زرمبشت
نبشتہ کار : یاسر باران
دی بلوچستان پوسٹ
دومی بھر
سب الٹرن کلاس تھیوری ءُ بلوچ ءُ بلوچستان
ما نوں گرامشی ءِ سب الٹرن کلاس ءِ تھیوری ءَ بلوچ ءُ بلوچستان ءَ دپ ما دپ کن ایں ۔
بہ گپت ءِ گرامشی، سب الٹرن تبک ءِ راجدپتر نیست، اگاں ھست ئِے گڑا آ زورگیرے راجدپتر انت، اے راجدپتر زورگیر ءَ نبشتہ کتگ ۔ انچش کہ ما بلوچ ءُ بلوچستان ءِ گوستانک ءَ چاریں وھدے انگریز کوزہ گیر کئیت ءُ بلوچستان ءَ بلوچ ءِ راستیں راجدپتر ءَ لپاش ایت ءُ پہ بلوچ ءَ دگہ دروگیں راجدپترے ءِ نویسگ ءَ بندات کنت۔ بلوچ ءَ چہ وتی زمین ءَ درآمد پیش دارگ ءِ جھد ءَ کنت، دانکے اے دروگیں راجدپتر بلوچ چاگرد ءِ تہ ءَ یک گواچنیں دابے ءَ روتگ بہ جنت ءُ اے پروپیگنڈہ چاگرد ءِ تہ ءَ بلوچ ءِ مجگ ءَ جاہ بہ کنت ءُ یک جوانیں رنگے ءَ منگ بہ بیت۔ وھدے انگریز ءِ اے سازتگیں پروپگنڈہ بلوچ چاگرد ءِ تہ ءَ درشانانی دروشم ءَ میزان میزان ءَ یک مھکمیں دابے ءَ جاہ کنت ۔ ءُ وھدے روانی ءَ بلوچ ءِ زانشتیں تبک اوں ھمے گپتمانانی آماچ بیت ءُ وتی کتابانی تہ ءَ بلوچ ءَ ھمے وڑ پیش کن اَنت ءُ لس بلوچ وتی رویشت ءُ زندمان ءِ تہ ءَ ھمے دروگاں گوچنیں دابے ءَ منگ بندات کنت ءُ وتی راستیں دپتر ءَ چہ شموشکار بیت۔
مرچیگیں وھد ءَ بلوچ نبشتہ کار ءُ نودربراں کہ چار ءُ شبین بندات کتگ گڑا آھاں ھمے چیز دیست ءُ مار ات کہ مئے دپتر آ داب ءَ کہ نبشتہ کنگی بیتگ آ داب ءَ نہ انت انچش کہ انگریز وت وتی نبشتگیں کتاب Defence of kahanءِ تہ ءَ نویس ایت کہ بنداتی زمانگ ءَ وھدے کہ ما بلوچستان ءِ سر ءَ اُرش کت گڑا مارا اے زمین ءِ جگراپی ءُ آئی کالب ءِ ھچ زانت نیست اَت، کوھستان مری کہ نواب مری ءِ کلات بیتگ اود ءَ وھدے انگریزاں اُرش کتگ گڑا آھاں اے جنگ ءِ تہ ءَ بے سوبی ءِ دیمپانی کنگ کپتگ ۔ ما اگاں آ زمانگ ءِ ھساب ءَ بچاریں گڑا انگریز ءِ گور ءَ ماڈرن سلاہ ءُ تپنگ بیتگ ءُ بلوچ ءِ گور ءَ وھدیگیں ءُ کوھنیں تپنگ بلے بلوچ ءِ گور ءَ گمانی آ کساس ءَ کہ تپنگے کار بیتگ آ کساس ءَ نہ بیتگ، آیانی گیشتر زھم ءُ اسپر بیتگ انت ، بلے اے بلوچ ءِ تمردی ءُ ڈیھ ءِ جگراپیکل سھتی بیتگ کہ انگریز گوں ماڈرن لشکر ءَ انگت بے سوب بیتگ۔ ءُ ھمے داب ءَ وتی راستیں گوست دیما آرتگ کہ انگریزاں اوں گوں وشیں سرے ءَ بلوچ ءِ ڈیھ وتی دست ءَ کرت نہ کتگ۔ دیمتر ءَ انگریز نبیس ایت کہ بلوچستان ءِ جگراپی انچو سھت بیتگ کہ اود ءَ آپ ءُ چمگ ءِ شوھاز کنگ ارزانیں کارے نہ ایں کہ یک دری لشکرے اد ءَ مانشت (survive) کت بہ کنت۔ اد ءَ گوست ھمے پیش دار ایت کہ انگریزاں بلوچ یک مھکمیں گھگیری ءَ دیستگ ءُ جگراپی ءِ نہ زانگ ءَ بنداتی زمانگ ءَ بازیں اڑاندانی دیمپان بیتگ اَنت۔
بہ درور ءِ گرامشی سب الٹرن کلاس ءِ سر ءَ ھکمران تبکہ ءِ سان باز وھد ءَ ایر بنت ءُ سب الٹرن کلاس ءِ یک جاہ بوگ ءِ دیم ءَ اڈاند بنت ۔ پرچہ کہ یک کوزہ گیرے کیت ترا مجگی نادراھی ءِ آماچ کنت ھمے مجگی نادراھی ترا نپرت کنگ ءِ سکین ءَ دنت یک ءُ دومی ءَ اے نپرت ایردستے ءِ راج ءَ یک جاہ بیئگ نئیل ایت۔ گڑا اے رد ءَ ما بلوچ ءَ چاریں وھدے کہ انگریز کوزہ گیر چہ بلوچستان ءَ در کیت ءُ پد ءَ پنجابی کوزہ گیر بلوچستان ءَ ایردستی ءِ سانکلاں ایر جیگ کنت دوبر بلوچستان ءُ بلوچ قوم ءَ وتی کالونی جوڑ کنت ۔ آغا عبدالکریم کوزہ گیر ءِ بگیری ءَ جنگ کنگ ءَ کوہ ءَ رؤت بلے انگریز کوزہ گیر ءِ سان ھست انت کہ ھست آں آ بلوچ ءِ یک جاہ بؤگ ءِ دیم ءَ اڑان بنت آغاعبدالکریم ایوک بیت آئی ءَ مالی کمک گون نہ بیت آ یک تنظیمی پلیٹ فارم ءِ اڈ دات نہ کنت ۔ آئی ءِ ایوک بوگ ءِ سوب ھم ھمیش بیت کہ انگریز کوزہ گیرے ءِ سان کہ ھست انت آ بلوچ ءَ یک جاہ بوگ ءَ نئیل انت ۔
گرامشی گوش ایت کہ اے سان دراجیں وھدے ءَ تاں ایردستیں تبکہ ءِ سر ءَ ایر بنت انچوش کہ ما بلوچ ءَ گند ایں آئی سرا ھم بازیں وھدے بیت اے سان ایر اَنت ۔ وھدے کہ نمیرانیں بابو نوروز ھام کوزہ گیرے ءِ بگیری ءَ کوہ ءَ رؤت جنگ کنت اے وھد ءَ زورگیرے سان توانمندیں رنگے ءَ ھست بنت ءُ بلوچ یک جاہ بیت نہ کنت ۔کوزہ گیر ءِ بگیری ءَ گھگیری چندے دمگانی تہ ءَ مھدود بیت۔ ھپتاد دھک ءَ ھم یک جاہ نہ بنت گھگیری یک ءُ دو دمگانی تہ ءَ مھدود بیت۔
گرامشی ءِ رِد ءَ سب الٹرن کلاس کم کم ءَ یکجاھی ءِ نیمگ ءَ رؤت گڑا اے رِد ءَ ما اگاں بچار ایں گڑا بلوچ ءِ گور ءَ دوھزار ءِ دھک ءَ یکجاھی ءِ آسار گندگ کائنت ۔
اے ارتکا ءِ پروسس اَنت کہ 1948 بگر داں 2000 بیا اے نہ انت کہ ھچ نہ بیتگ اے زمانگ بلوچ ءِ ارتکا ءِ پروسس بیتگ اے دراجیں سپر ءَ بلوچ ءَ باز دربرتگ ۔ مرچی کہ اے گھگیری دوھزار ءَ اتکگ ءُ سر بیتگ اے پیشی کار ءُ کردانی برورد اَنت کہ مرچی مھکمیں رنگے ءَ بلوچ innovatory force ءِ نیمگ ءَ رھادگ انت ۔
انچوش کہ گرامشی گوش ایت ھکمران تبکہ colonial region ءُ اودے سب الٹرن تبکہ ءِ چاگرد ءِ تہ ءَ سیاسی نزام ٹھین ایت ھمے ٹھینتگیں سیاسی نزامانی وسیلگ ءَ چہ پروگرام اڑ دنت پہ سب الٹرن کلاس ءِ منارینگ ءَ ، ایردستیں تبکہ ءِ گوم ءَ اے دابیں نا روائیں کار مدام کنگ بیت۔ چوش کہ بلوچ ءُ بلوچ سرزمین ایردست اَنت۔ پنجابی Ruling class ءِ پنجابی اے کار شم پدا ءَ ترندی گوں بلوچ چاگرد ءِ تہ ءَ وتی سیاسی نزام ءَ رائج کنگ ءَ اَنت ۔ پہ درور ءَ پارلمنٹ مئے دیم ساپ ءُ پدر انت ۔ مرچی بلوچستان ءَ پنجابی ھکمران تبکہ پارلیمنٹ ءِ دروشم ءَ وتی ھکمرانی ءِ برجم دارگ ءِ جھد ءَ اَنت ۔ بلوچ چاگرد ءِ تہ ءَ اے نزام ءِ نوکی ءُ کوھنی، رنگ ءُ داب ھم مارا گندگ ءَ کائنت ۔ وھدے کہ نوک یک پارلیمانی نزام ءِ کئیت گڈا ایردستیں تبکہ ءِ پانک ءَ جنت کہ ما بدلی کاریں، وانگجاہ ، شھدربرجاہ ءُ دگاں جوڑ کن ایں، دیمروئی بیت ءُ نیزگاری ھلاس بیت بلے اے پانک ھشکیں پانک اَنت اے پانکانی ءِ تہ ءَ راستی ءِ جند نیست ۔ بس وتی Hegemony دارگ ءِ واست ءَ اے دابیں جار پرین اَنت ۔ اے نزامے وھدے کہ کمے وھد گوز ایت نیزگاریں تبکہ جیڑ ایت کہ اے مارا رد دیگ ءَ انت ۔ اشاں دیمروئی ءِ جار جتگ ات نیزگاری ءِ ھلاس کنگ ءِ جار جتگ ات بلے اشاں گوں راج ءَ دھوکہ کتگ ۔ اے اشی ءَ پھم انت کہ اے نیزگار دوست نہ انت بلکنہ چانیگ وار انت وتی لچ ءِ پر کنگ ءَ اتکگ انت ۔ راج ءِ تہ ءَ ھمے گپ ءُ باوستانی چست بؤگ ءَ پد ھکمران تبکہ ءِ in door نیاداں اے باوست چست بیت کہ اے نزام نوں کوھن تر اتگ ایردستیں تبکہ توار چست کنگ ءَ انت ھمے ھاتر ءَ اے نزام ءِ جاھ ءَ دگہ نزامے آرگی انت تاکہ ایردستانی دپ بند کنگ بہ بیت انت ۔ ھکمران تبکہ دگہ نزامے اڈمڑ دنت گوں جتائیں پالیسیاں تاکہ ایردستیں تبکہ ءِ دپ بند بہ بیت ۔ نوکیں سیاسی نزام ھم ھمے وڈ کنت۔ اے نزام ءَ ھمے داب ءَ ھکمران تبکہ دیما بران کنت ۔ بلے یک روچے الم ایردستیں تبکہ آیانی پندل ءُ راستیاں سرپد بیت ۔ بلے بلوچ نوں سرپد اَنت بلوچ سک باز اے وڑیں وتگڑیں نزامانی وسیلہ ءَ چہ ریپینگ بیتگ ۔
برز ءَ من نبشتگ ات کہ گرامشی ءِ رد ءَ سب الٹرن کلاس کم کم ءَ یک innovatory force ءِ نیمگ ءَ بزانکہ َ object چی subject نیمگ ءَ رھادگ بیت ۔ گرامشی ءِ گالاں ماں بلوچ ءُ بلوچ زرمبشت ءِ نز ءَ چار ایں گڈا مارا بلوچ ءِ گوستانک ءَ گندگ ءَ کئیت ۔ بلوچ سب الٹرن کلاس ءِ سیاسی نزام یا زرمبشت وجود ءَ اتکگ ۔ 1948 بہ بیت یا شست ءُ ھپتاد ءِ زرمبشت بہ بہ انت اے زرمبشت وتی راج ءَ گوں وت ءَ ھوار گیجگ ءَ سوبین نہ بیتگ اَنت ۔ ھمے جست پاد کئیت کہ چیا سوب مند نہ بیتگ اَنت ؟ اشی ءِ پسو ھم ھست ۔ گرامشی وتی نبشتانک ءِ تہ ءَ جاھے نبشتہ کنت کہ سب الٹرن کلاس ءِ ھمک سیاسی نزام سوب مند نہ بنت ۔ بلوچ سب الٹرن کلاس ءِ ھم ھمک سیاسی نزام یا زرمبشت سوبین نہ بیتگ اَنت ۔ پرچہ کہ اول وَ راج ءِ پلا مرزی گون نہ بیتگ دومی زرمبشت ءِ یکشلیں درچ پرشتگ ۔ بلوچ وھدیکہ 2000 کئیت دوھزار ءَ پد ءِ زرمبشت ءَ مرچی 26 سال انت کہ برجاہ انت ۔ اشی ءِ یک شری ءِ وا اش انت کہ اے زرمبشت ءِ یکشلیں درچ نہ پرشتگ ءُ اشی ءِ تہ ءَ روچ پہ روچ ترندی آرگ بئیگ ءَ اَنت مھکم بوان انت ۔ دومی اے زرمبشت وتی راج ءِپلامرزی گرگ ءَ ھم سوبین بیتگ وھدیکہ یک زرمبشتے ءَ وتی راج ءِ پلامرزی گون بہ بیت گڑا بہ زان کہ آ زرمبشت ءَ وتی گام گوں آجوئی ءَ نزیک کتگ اَنت ۔
روان انت —
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-