بلوچستان ءَ چار جتاجتائیں اُرشانی زمہ واری بی ایل ایف ءَ منّ اِتگ اَنت

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گوشتگ کہ بیست جون 2026 ءَ سوراب ءِ دمگ نغاڑ ءَ یک مھکم ءُ یکجاھی کاروائی یے کتگ – شھر سر ءَ پوجی دستیگ کنگ ءِ ھاتر ءَ کاروائی بندات کتگ سرمچارانی جتاجتائیں ٹولیاں بھر کتگ اَنت، آیاں یکیں وھد ءَ وتی گچین کتگیں جاھانی سر ءَ سنگر گپتگ ءُ سرجمیں نغاڑ انگیر ءَ کتگ-

جارکش ءَ گْوشتگ کہ آپریشن بنداتی ھمراھی ءَ سرمچارانی ٹولیاں نغاڑ آؤکیں ءُ رؤکیں بُنجاھی شھدگ سر جتاجتائیں ھندانی سر ءَ تُرندیں ناکہ بندی کتگ- دمگی بلوچ آبادی ءَ تاوان ءِ رکینگ ءِ ھاتر ءَ سرجمیں راھانی روگ ءُ آیگ سرجمی بند کتگ-

جارکش ءَ گوشتگ راھانی بندی ءُ ناکہ بندی سرجم بیگ ءَ سرمچارانی جاڑیگیں ٹولیاں پیشگامی کنان ءَ نگاڑ ءَ برجاہ ایس ایس پی (SSP) کارگس سر ءَ اُرش کتگ ماڑی سرجمی ءَ دستیگ کتگ – سرمچاراں کارگس دستیگ کنگ ءَ پد اود ءَ ساڑی ھشت سرکاری تُپنگ، میگزین، بلٹ پروف جیکٹس ءُ دگہ پوجی ساز ءُ سامان وتی دستیگ کتگ اَنت- ھمے میان ءَ سرمچاراں ایس ایس پی کارگس ءِ کر ءَ اوشتوکیں پوج ءِ پنچ سرکاری گاڑی مانداشتگ ءُ پُر کتگ اَنت آیانی تہ ءَ دو بلٹ پروف گاڑی ھم ھوار اَنت-

آئی ءَ گوشتگ ایس ایس پی کارگس سر ءَ دستیگ ءِ میان ءَ اود ءَ ساڑی پولیس کارندہ سرمچاراں دزگیر کتگ ءُ جُست ءُ پُرس بندات کتگ- پرچاکہ بی ایل ایپ راجی آجوئی ءِ جنگ ءَ اِنت ءُ مئے تُپنگانی نشانگ تھنا زورگریں پوج ءُ آئی ءِ چاریگ اَنت ھمے ھاتر ءَ جُست ءُ پُرس ءِ سرجمی بیگ ءَ سرمچاراں تُرندیں کڈن ءَ پد گل ءِ نامینتگیں جنگی راھبند ءُ انسانی ھمدردی ءِ بُنیاد ءَ سرجمیں دزگیریں کارندہ یل کتگ اَنت- سرمچاراں آپریشن ءِ سرجم کنگ ءَ پد پہ سلامتی درتکگ اَنت-

جارکش ءَ گْوشتگ کہ بی ایل ایف ءِ سرمچاراں 19 جون 2026 ءَ کلات ءِ دمگ سنگداد ءَ پوج ءِ بمب ڈسپوزل اسکواڈ ءِ دو گاڑیاں ھمگرنچیں ٹولی سر ءَ سنگر گپتگ ءُ اُرش کتگ – اے کاروائی ءِ آسر ءَ بمب ڈسپوزل اسکواڈ ءِ سے پیادگ کارندہ جاہ پہ جاھی مرتگ اَنت وھدے کہ گاڑیاں سوار آ دگہ کارندہ ٹپی بیتگ اَنت-

جارکش ءَ گْوشتگ کہ بی ایل ایف ءِ سرمچاراں 19 جون 2026 ءَ دگہ یک کاروائی ءَ تربت ءِ دمگ آپسر ءَ برجاہ پوج ءِ بُنجاھی بُنجل ءِ سر ءَ راکٹ لانچر ءَ چہ بازیں گولھے آس داتگ کہ وتی نشانگ ءَ کپتگ اَنت چریشی ءِ آسر ءَ زورگریں پوج ءَ جانی ءُ مالی تاوان چست کنگ کپتگ-

جارکش ءَ دیمتر ءَ گْوشتگ کہ بی ایل ایف ءِ سرمچاراں 13 جون 2026 ءَ کیچ ءِ دمگ شاھرک ءَ ڈن ءِ ھند سر ءَ یک دکانے ءِ سر ءَ بیڑبرتگ کیکن ءِ جھمنند ءُ کُشندہ ٹولی ءِ پُرکاریں کارندہ نزیر ء علی محمد دزگیر کتگ- نزیر ء علی محمد دراجیں مدتے ءَ ڈیتھ اسکواڈ ءِ دمگی سروک نصیر ءِ سروکی ءَ زورگریں پوج ءِ واستا چاریگی ءُ کمکاری ءَ تچکی ءَ ھمگرنچ بیتگ- آ کیچ، کیساک، شاھرک ءُ شاپک ءَ ھوار بالگتر ءُ کولواہ ءِ دمگاں سرمچارانی ھلاپ ءَ چاریگی ءُ آپریشن ءَ تچکی ءَ بھر زرتگ-

جارکش ءَ گوشتگ اے کارندہ 2 مارچ 2023 ءَ شاپک ءِ کوھی دمگ بھترم ءَ بؤکیں لشکر کشی ءِ بُنیادی کردار بیتگ چریشی ءَ گل ءِ دو سرمچار شعیب پنّام ءِ ودار ءُ یحییٰ پنّام ءِ سیکی شھید بیتگ اَنت- نزیر ءَ ھمے سرمچارانی رندگیری کتگ زورگریں پوج ءَ را آیانی ساڑی بوگ ءِ ھال داتگ- نزیر ء علی مھمد ءَ چہ جُست ءُ پُرس ءَ پد دزکپتگیں سبوتانی بُنیاد ءَ سرمچاراں 16 جون 2026 ءَ شاپک ءَ گٹ کور ءِ ھند سر ءَ آ کُشتگ-

گُڈی جارکش ءَ بیتگیں سرجمیں اُرشانی زمہ واری منّ اِتگ اَنت-