بلوچستان ءِ جتاجتائیں دمگاں بیتگیں جتاجتائیں وئیلانی زمہ واری بی آر جی ءُ یو بی اے ءَ منّ اِتگ اَنت

بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مروچی سُھب ءَ سرمچاراں بلوچستان ءِ دمگ نصیر آباد ءِ ھند نوتال ءِ نزیک ءَ ھائی وے دگ سر ءَ ناکہ بندی کتگ ءُ گاڑی پٹ ءُ پول کتگ اَنت-

جارکش ءَ گوشتگ اے میان ءَ جعفر ایکسپریس ریل ءِ پھازداری ءَ پوج ءِ سے گاڑی نشانگ کتگ اَنت، چریشی ءِ آسر ءَ بازیں کارندھے مرتگ ءُ ٹپی بیتگ اَنت، وھدے کہ سرمچاراں جعفر ایکسپریس ریل ھم اُرش ءِ نشانگ کتگ-

جارکش ءَ گوشتگ کہ اے اُرش ءِ آسر ءَ ریل ءَ ھوار پاکستانی پوج ءَ جانی ءُ مالی تاوان چست کنگ کپتگ-

جارکش دوستین بلوچ ءَ دیمتر ءَ گْوشتگ کہ بی آر جی سرمچاراں بلوچستان ءَ چہ پنجاب ءَ رؤکیں مڈی بروکیں دو مزنیں گاڑیانی سر ءَ تیرگواری کتگ ءُ نشانگ کتگ اَنت آ ناکارہ کتگ اَنت، وھدے کہ یک ڈرائیورے دزگیر کتگ ءُ وتی ھمراھی ءَ برتگ-

بی آر جی ءِ جارکش ءَ گوشتگ اے اُرش ءِ زمہ واری ءَ مئے گل بی آر جی منّ اِیت ءُ اے وڑیں کاروائیاں بلوچستان ءِ وتواجھی ءَ تاں برجاہ دار اِیت-

ھمے وڑ یونائیٹڈ بلوچ آرمی ءِ جارکش مزار بلوچ ءَ وتی شنگ کتگیں درشان ءِ تہ ءَ گوشتگ کہ یو بی اے ءِ سرمچاراں گوستگیں بیگاہ ءِ ھشت ءِ نزیک ءَ سبی ءَ چہ ڈھاڈر ءَ رؤکیں 132 کے وی ءِ بُنجاھی ٹرانسمیشن لائن ءِ دو ٹاور تراکناکیں شورواں چہ تباہ کتگ اَنت چریشی ءِ آسر ءَ ٹرانسمیشن ءِ دو ٹاورز کپتگ اَنت، چریشی ءِ سوب ءَ ڈھاڈر ءُ آئی ءِ کش گور ءِ دمگاں لین پُجارینگ مھتل بیتگ ءُ اے اُرش ءِ زمہ واری ءَ مئے گل یونائیٹڈ بلوچ آرمی منّ اِیت-

جارکش ءَ گوشتگ مئے اے وڑیں اُرش بلوچستان ءِ وتواجھی ءَ تاں برجاہ بنت-